1. Bo ka Jehoova tonɔ boɔlɔ o puorebiiri ka ba erɛ? (Kaa a foto meŋ.)

 NEMBUO zie teŋ na baŋ gaa te nyɛ sukyiridii ane sowuli? Te baŋɛɛ a soorebiri ŋa noɔre iribo. Te na baŋ puore sɔrɛɛ Jehoova. Jehoova tonɔ boɔlɔ teŋ ka te erɛ lɛ. A Baabole yelko teŋ ka, te maŋ “puoro tegitegilɛ a ta bara.” Lɛ wuleeŋ ka Jehoova boɔrɔŋ ka te maŋ puoro sɔroo wagre zaa. (1 Tɛs. 5:17) Te na baŋ yi la te poɔ zaa a puore sɔroo ka o ko te sowuli te zemmo yɛlɛ zaa poɔŋ. (Yeng. 3:5, 6) Jehoova naŋ yuoro o nu yaga zaa na zuŋ, o yeleeŋ ka te na baŋ puore sɔrooŋ gbɛrbowala zaa te naŋ boɔrɔ.

2. Bo teŋ na zanne a zannoo ŋa poɔŋ?

² Te puoree Jehoova bareka, bonso o ko teŋ apoɔsori ka te maŋ puore sɔroo. Kyɛ te naŋ maŋ taa yɛlɛ yaga ka te e zuŋ, ana baŋ eɛ kpeɛŋaa ka te nyɛ wagre a puore. Te maŋ nyɛŋ meŋ ka aseŋ ka te nyɛ nimitɔɔre gaabo te puoro poɔŋ. Jehoova bareka o naŋ ko te sowuli ane faŋa emmo a yi a Baabole poɔŋ. A zannoo ŋa na soŋ teŋ ka te nyɛ lɛ teŋ na baŋ tɔgle Yezu a maŋ bɔ wagre puore. Te na lɛ zanne nyɛɛ yɛlɛ anuu mine teŋ na baŋ de poɔ te puoro poɔŋ ka a soma.

3. Bo yɛlɛ ka Yezu da baŋ kyaare puoro?

³ Yezu da baŋɛɛ ka puoro yɛlɛ eɛ nimizeɛ yaga zaa ko Jehoova. Sɛre kyɛ oŋ na wa a donɛɛ ŋa zuŋ na, Yezu da maŋ nyɛɛ o Saa naŋ ire noba mine naŋ da taa sagediibu puoro  nɔɛ. Aŋa mannoo poɔŋ, Yezu da be la o Saa zieŋ saŋa na Oŋ da iri Haana, Deevid, Elaagya ane ba taaba mine puoro nɔɛ. (1 Saa. 1:10, 11, 20; 1 Nam. 19:4-6; Yiem. 32:5) Azuŋ ka Yezu da maŋ wulo o potuuribo ka ba puoro wagre zaa!​—Mat. 7:7-11.

4. Bo teŋ na baŋ zanne yi Yezu puoro poɔŋ?

⁴ Yezu da maŋ eɛ ewuli soŋ ko o potuuribo a tuuro puoro poɔŋ. Saŋa na Yezu naŋ da tonɔ o naaŋ moɔloo toma a donɛɛ zuŋ na, o da maŋ puoroŋ wagre la wagre zaa. A da seŋ ka o maŋ bɔ wagre biŋ a puore bonso, o da maŋ taa la yɛlɛ ka o e wagre zaa ka noba meŋ da maŋ be o zieŋ wagre zaa. (Mak. 6:31, 45, 46) O da maŋ iree wieoŋ beguo saŋa ka lɛ na vɛŋ ka o nyɛ wagre o yoŋ tɛgɛ a puore. (Mak. 1:35) Saŋa kaŋa gba, o da poureeŋ zisoɔre gbuli sɛre kyɛ derɛ gbɛre kaŋa naŋ e nimizeɛ yaga. (Luk. 6:12, 13) Yezu da lɛ puoreeŋ gbɛɛ yaga zie naŋ na nyaa ka o kpi na, a da de o teɛroŋ zaa eŋ tonkpeɛŋaa naŋ e nimizeɛ yaga zaa oŋ waana ka o toŋ na eŋɛŋ.​—Mat. 26:39, 42, 44.

5. Sobuo teŋ na baŋ tɔgle Yezu te puoro poɔŋ?

⁵ Yezu ewuli ŋa wulo teŋ ka, lɛ zaa te toma naŋ seŋ kyɛ aseŋ ka te maŋ bɔ wagre puore. Aŋa Yezu, te meŋ bɔ wagre biŋ a maŋ puore. Aminekaŋaŋ te na baŋ daŋ la iribo beguo saŋa bee a maŋ bɔ wagre biŋ zisoɔree saŋa a puore. Ka teneeŋ wa erɛ lɛ te na wulee Jehoova ka te nimiri paɛŋ ane a kyɔɔta-soŋ ŋa oŋ ko te na. A dɛndɛŋ saŋa na te yɔɔpɔge Lynne naŋ da wa zanne nyɛ ka puoro eɛ apoɔsori na, a da tɔ la o sukyiri yaga zaa. O yeleeŋ ka, “Maŋ da wa zanne nyɛ ka N na baŋ puore sɔre la Jehoova wagre zaa na, a da vɛŋɛɛŋ maŋ nyɛ ka o eɛ Zɔmeŋɛ naŋ peɛle ma yaga zaa a boɔrɔ ka N nyɛrɛ nimitɔɔre gaabo N puoro poɔŋ.” Nɔkpeɛne zaa kyebe ka te yaga zie zaa meŋ taa la a teɛroŋ ŋa. Azuŋ yɛ vɛŋ ka te nyɛ yelnimizeere anuu mine teŋ na baŋ de poɔ te puoro poɔŋ.

6. Aŋa lɛ Yel-iriwulaa 4:10, 11 naŋ yel na, ananso la wala aŋ seŋ ka te pugiro Jehoova?

⁶ Maŋ pugi Jehoova. A bitontona Gyɔɔn da nyɛɛ yelnyɛ kaŋa naŋ e seɛlee yaga zaa, a da nyɛ nembɛrɛ lezare ne banaare naŋ puoro Jehoova. Ba da pugee Naaŋmen a yele ka o seŋnɛɛ “puubu, emmo ane kpeɛ̃o.” (Kanne Yel-iriwulaa 4:10, 11.) A maleke sonne meŋ  taa yɛlɛ yaga zuŋ aŋ seŋ ka ba pugiro Jehoova. Ba ne o la laŋ be sazuŋ azuŋ ba wa bammooŋ soŋ. Ba maŋ nyɛɛ gyogri o naŋ taa a yi o yel-eree poɔŋ. Ka ba naŋ wa nyɛ lɛ Jehoova naŋ maŋ erɛ o yɛlɛ na a maŋ vɛmeŋ baŋ pugiroo.​—Joob 38:4-7.

7. Ananso la wala aŋ seŋ ka te maŋ pugiro Jehoova?

⁷ Te meŋ maŋ pugiro Jehoova te puoro poɔŋ. Te na baŋ eɛ lɛ a yi teŋ na maŋ yel yɛlɛ na te naŋ nɔŋ a kyaaroo, ane ananso te naŋ taa emmo yaga zaa a koo. Ka hooŋ wa kanna bee a zanna a Baabole, maŋ mɔɔrɔ ka ho nyɛ Jehoova gyogri na o naŋ iri wuli hoŋ nɔŋ yaga zaa na. (Joob 37:23; Uro. 11:33) A pãã yelkoo lɛ ho naŋ teɛre kyaare ana gyogri na. Te na baŋ lɛ pugee Jehoova o naŋ sonnɔ te ane te yɔɔmine zaa na. O maŋ kaarɛɛ te zu wagre zaa a kyɛ guuro te meŋ.​—1 Saa. 1:27; 2:1, 2.

8. Bo yɛlɛ mine zuŋ aŋ seŋ ka te pugiro Jehoova? (1 Tɛsalonika 5:18)

⁸ Maŋ puore Jehoova bareka. Te taa la yɛlɛ yaga zuŋ aŋ seŋ ka te puoro Jehoova bareka. (Kanne 1 Tɛsalonika 5:18.) Te na baŋ puoruuŋ bareka ane bonsoŋ zaa te naŋ taa, bonso o zie ka kyɔɔta sonne zaa yi. (Gyi. 1:17) Aŋa mannoo poɔŋ, te naŋ baŋ puoruuŋ bareka ane lɛ oŋ maale a teŋgane oŋ veɛlɛ na, ane bon veɛlɛ na zaa o naŋ maale na. Te na baŋ lɛ puoruuŋ bareka o naŋ ko te nyɔvore, booree, zɔmenne ane teɛretɔ. Te na baŋ puoree Jehoova bareka meŋ o naŋ ko te vuo ka te neŋ o taa zɔmennoŋ naŋ soma yaga zaa.

9. Ananso la wala aŋ seŋ ka te taa bareka puoruu gyogo a ko Jehoova?

⁹ Aminekaŋaŋ, aseŋ ka te teɛre yɛlɛ gaa tɔɔre a toɔ̃ baŋ yɛlɛ na Jehoova naŋ e ko tenee menne aŋ seŋ ka te puoruu bareka. Zenɛ ŋa noba yaga ba taa bareka puoruu. Gbɛɛ yaga, noba maŋ teɛrɛɛ lɛ baŋ na e a nyɛ bon ba naŋ boɔrɔ a gaŋ lɛ baŋ na baŋ e a puore bareka. Ka teneeŋ taa ana gyogo ŋa, boma yoŋ teŋ na maŋ sɔrɔ yire Jehoova zie. Ka teneeŋ ba boɔrɔ ka lɛ e yɛŋ, aseŋ ka te naŋ kyɛnɛ taa bareka puoruu a ko Jehoova ane yɛlɛ na zaa o naŋ e ko te na.​—Luk. 6:45.

10. Te yɔɔpɔge kaŋa naŋ da taa bareka puoruu gyogo na sobuo aŋ da somoo oŋ toɔ̃ are o yelkpeɛne noɔreŋ? (Kaa a foto meŋ.)

¹⁰ Ka teneeŋ taa bareka puoruu gyogo, a na baŋ soŋ teŋ ka te are te yelkpeɛne noɔreŋ. Te nyɛ Kyung-sook zemmo yɛlɛ ŋa naŋ be January 15, 2015, The Watchtower gane na poɔŋ. Baaloŋ kaŋa ba naŋ boɔlɔ Lung cancer da nyɔgooŋ. O da yeleeŋ ka: “A baaloŋ ŋa yɛlɛ da kyoɔrɛɛ N eŋɛ yaga zaa. N da teɛrɛɛŋ ka N kɔŋ la bonzaa ka dabeɛ̃ zaa meŋ da kpɛ ma.” Boŋ da somoo oŋ toɔ̃ are a noɔreŋ? O yelka bebiri zaa zisoɔree saŋa, sɛre kyɛ oŋ na gaŋ na, o maŋ do la o die peɛzu a te puore Jehoova bareka puoro poɔŋ a yel yɛlɛ anuu o naŋ e koo ana bebiri na. Azuŋ a yɛlɛ da ba la dɔnnoo yaga, a da vɛŋ oŋ maŋ toɔ̃  wuli o nɔmmo ko Jehoova. O nyɛɛ lɛ Jehoova naŋ maŋ sonnɔ o yelmeŋɛ puorebiiri ka ba naŋ wa tuoro yelkpeɛne, a la wa nyɛ meŋ ka Jehoova kooŋ maaloo yaga zaa o zemmo poɔŋ a gaŋ yelkpeɛne na o naŋ tuoro na. Aŋa Kyung-sook, te meŋ na taa la yɛlɛ mine zuŋ teŋ na baŋ puore Jehoova bareka ka teneeŋ gbaŋ wa tuoro yelkpeɛne. Ka teneeŋ maŋ puoruu bareka te puoro poɔŋ, a na baŋ soŋ teŋ ka te are te yelkpeɛne noɔreŋ kyɛ taa popeɛloŋ.

11. Saŋa na Yezu naŋ da wa gaa sazu na, ananso la wala aŋ da seŋ ka o potuuribo na taa sukyiri kpagu?

¹¹ Sɔre Jehoova ka o ko bo sukyiri kpagu a naaŋ moɔloo poɔŋ. Sɛre oŋ na leɛ gaa sazu na, Yezu da teɛrɛɛ o potuuribo toma na ba naŋ taa ka ba manne o yɛlɛ “Gyɛruzɛlɛm poɔ, a Gyudiya zaa poɔ, ane Samareya poɔ, a te ta a tendaa koŋkobo zaa” na. (Tom. 1:8; Luk. 24:46-48) A da ba kɔɔre, a Gyuumine wedeɛreba da nyɔgɛɛ bitontona Piita ane Gyɔɔn a de ba gaa a Sɛredireba nimitɔɔre. Ba da yelko la a dɔbɔ ŋa ka ba bare a naaŋ moɔloo toma a da fuu ba meŋ. (Tom. 4:18, 21) Wala ka Piita ane Gyɔɔn da e?

12. Aŋa lɛ na Toma 4:29, 31 naŋ yel na, bo ka a potuuribo da e?

¹² Saŋa na a Gyuumine puoruu wedeɛreba naŋ da wa fuu Piita ane Gyɔɔn baare na, ba da yelko baŋ ka: “Yɛ teɛre nyɛ, a buo soba la seŋ ne eebo a Naaŋmen niŋesogɔ, te naŋ na sage a yɛ noɔre bee a Naaŋmen noɔre? Tenee eŋ kontoɔ̃ bare bonna te naŋ nyɛ bee a woŋ yeluu.” (Tom. 4:19, 20) Saŋa na baŋ da wa yuo Piita ane Gyɔɔn bare na, ba da puore sɔrɛɛ Jehoova a kyaare o boɔbo eebo. Ba da puoreeŋ ka: “Soŋ a ho tontonneba ka ba moɔle a ho yelbiri kyɛ ta zoro dabeɛ̃.” Jehoova da kyɛlle woŋɛɛ a ba puoro na.​—Kanne Toma 4:29, 31.

13. Boŋ teŋ na baŋ zanne yi Jin-hyuk zemmo yɛlɛ na poɔŋ?

¹³ Ka a donɛɛ ŋa namineŋ wa fuu te ka te bare te naaŋ moɔloo toma na, te na baŋ tɔglɛɛ a Yezu potuuribo ŋa. Aŋa mannoo poɔŋ, ba da nyɔgɛɛ Jin-hyuk eŋ nempɔgedieŋ, o naŋ da ba de o meŋɛ eŋ a donɛɛ ŋa na-di yɛlɛ zuŋ. A nempɔgedieŋ, ba da kooŋ toma ka o kaara o taaba mine ba naŋ nyɔge eŋ debilii pooreŋ a da ba maŋ yuoro ba bara na. O toma da la ka o maŋ de boma yɛlɛ naŋ fɛre ba te ko ba, kyɛ a da ba seŋ ka o yel a Baabole yɛlɛ yɛŋ ko ba. O da puore sɔrɛɛ Jehoova ka o koo nyaa kpoŋ ka o toɔ̃ moɔle a duorisoŋ ko noba ka o naŋ wa nyɛ apoɔsori. (Tom. 5:29) O yeleeŋ ka: “Jehoova da kyɛlle woŋee N puoro a ko ma nyaa kpoŋ ane bammo maŋ da maŋ de mintiri anuu ka N neŋ noba zanne a Baabole ba pɔgebodie denoɔreŋ. N da maŋ sɛgɛɛ lɛtɛre teŋsogɔ saŋa, maŋ na de ko bana na meŋ naŋ be pɔgedi-bonyeni poɔŋ na ka zieŋ wa nyaa.” Aŋa te yɔɔdɔɔ Jin-hyuk, te meŋ na baŋ puoro sɔrɛɛ Jehoova ka o ko te nyaa kpoŋ ane bammo, a dɛle Jehoova kpɛlɛŋkpɛlɛŋ meŋ ka o na soŋ teŋ ka te toŋ a naaŋ moɔloo toma baare velaa zaa.

14. Boŋ na baŋ soŋ te ka te baŋ toɔ̃ are te yelkpeɛne noɔreŋ? (Yieme 37:3, 5)

¹⁴ Puore sɔre Jehoova ka o soŋ bo ka ho toɔ̃ are ho yelkpeɛne zaa noɔreŋ. Te yaga zaa tuoree yelkpeɛne aŋa, baaloŋ bee gaŋ koŋ gbiri teɛrɛ, aminekaŋaŋ te nɔŋna kaŋa kpieŋ, kyɛ bee te tuoree booree poɔ yelkpeɛne, dɔgroŋ bee yelyobo mine naŋ dɔnnɔ te. Baaloŋ lɔnnee ane zɔɔre vɛŋɛɛŋ ka ana yelkpeɛne ŋa maaleŋ e kpeɛŋaa ka te are a noɔreŋ. Puore sɔre Jehoova a yel ho sukyiri yɛlɛ zaa a koo. Yel ho sukyiri yɛlɛ zaa koo a ŋa ho naŋ yelaa korɔ ho zɔmeŋɛ kaŋa naŋ peɛle bo yaga.  Dɛle Jehoova kpɛlɛŋkpɛlɛŋ ka “o na eŋ ka lɛ toŋ.”​—Kanne Yieme 37:3, 5.

15. Sobuo ka puoro na baŋ soŋ te ka te “dire kannyiri saŋa na [te] naŋ tuoro dɔgroŋ”? Tere yelmannaa.

¹⁵ Ka teneeŋ moɔ̃ niŋe a puoro, a na maŋ soŋ teŋ ka te “dire kannyiri saŋa na [te] naŋ tuoro dɔgroŋ.” (Uro. 12:12) Jehoova baŋɛɛ yelkpeɛne na zaa o puorebiiri naŋ tuoro, “o na woŋee ba kuori meŋ.” (Yiem. 145:18, 19) Te yɔɔpɔge Kristie naŋ e paaneɛ a nyɛ yuomo 29 nyɛɛ a yɛlɛ ŋa ka a eɛ yelmeŋɛ. Baaloŋ kpeɛŋaa kaŋa oŋ da ba kaara soriŋ da nyɔgooŋ. Azuŋ teɛrɛ da gurooŋ. Ana puoriŋ dɔkta da yelko la o ma meŋ ka o taa baaloŋ kaŋa naŋ na koo. Kristie yeleeŋ ka: “N da puore sɔrɛɛ Jehoova kpeɛŋaa ka o ko ma faŋa naŋ seŋ neŋ bebiri zaa ka N are N yelkpeɛne na noɔreŋ. N maŋ mɔ̃ɔ̃ kyɛ gaa a lammore zaa kyɛ zanna boma N meŋɛ.” O da la yeleeŋ ka: “Puoro soŋ maŋ maŋ toɔ̃ are N yelkpeɛne zaa noɔreŋ, maŋ da baŋ ka Jehoova maŋ bebeŋ wagre zaa na zuŋ, a da maŋ dii la N sukyiri yaga zaa. Aneazaa ka N da ba nyɛ baaloŋ saŋ tɔntɔbaalɛ, kyɛ Jehoova da kyɛlle woŋ la N puoro, a ko ma emmaaroŋ ane sukyiridii.” Te daŋ ta wa inne ka “a Daana [baŋɛɛ] lɛ O naŋ na maŋ faa a nemmenne yi ba yelwonni poɔ.”​—2 Pit. 2:9.

16. Ananso la wala aŋ seŋ ka Jehoova soŋ te ka te zɔɔtoɔ̃ pigrinyɛ?

¹⁶ Puore sɔre Jehoova ka o soŋ bo ka ho toɔ̃ are pigrinyɛ noɔreŋ. Teŋ e nensaaleba naŋ ba pɛgeyi zuŋ, bebiri zaa aseŋ ka te maŋ mɔɔrɔ te mɔɔbo zaa ka te baŋ toɔ̃ zɔɔtoɔ̃ pigrinyɛ zaa. Setaana mɔɔrɛɛ o mɔɔbo zaa ka o vɛŋ ka te pigrinyɛ na maaleŋ e kpeɛŋaa yaga zaa. Setaana maŋ boɔrɔŋ ka o de nimipɛle yeldɛgɛ sãã ne te teɛroŋ. Ana nimipɛle yɛlɛ ŋa maŋ vɛmeŋ teŋ taa teɛroŋ faare naŋ na baŋ vɛŋ ka te dɛge Jehoova nimitɔɔreŋ; ana baŋ la vɛmeŋ ka te e yelfaare meŋ naŋ e nimizeɛ yaga zaa.​—Mak. 7:21-23; Gyi. 1:14, 15.

17. Ka teneeŋ wa puore sɔre Jehoova sommo baare, bo aŋ seŋ ka te e? (Kaa a foto meŋ.)

 ¹⁷ Jehoova yoŋ na baŋ soŋ te ka te are te pigrinyɛ zaa noɔreŋ. Azuŋ saŋa na Yezu naŋ da wulo o potuuribo lɛ baŋ na maŋ puore na o da yeleeŋ ka: “Ta e ka te kpɛ pigrinyɛ poɔ, kyɛ faa te a yi a neŋfaa na nuureŋ.” (Mat. 6:13) Jehoova boɔrɔŋ ka o soŋ te, kyɛ aseŋ ka te maŋ puore sɔre o sommo. Ka teneeŋ wa puore baare, a maŋ seŋ ka te mɔɔ te mɔɔbo zaa ka te tage te menne yi pigrinyɛ zaa eŋɛŋ. Te maŋ mɔɔrɔ te mɔɔbo zaa, a ta kanna bee a kyɛllɛ yeldɛgɛ naŋ pori a Setaana donɛɛ ŋa poɔŋ na. (Yiem. 97:10) Ka teneeŋ maŋ kanna a kyɛ zanna a Baabole, te na maŋ derɛɛ yelsonne eŋnɛ te teɛroŋ. Ka teneeŋ maŋ gɛrɛ te lammore, a kyɛ de te menne eŋ a naaŋ moɔloo toma poɔŋ, ana maŋ lɛ soŋ teŋ ka te go te sukyie teɛrɛ zaa. Jehoova meŋɛ meŋ eŋ teŋ noɔre ka, o koŋ vɛŋ ka pigrinyɛ zaa naŋ gaŋ te faŋa a pɔge te.​—1 Kor. 10:12, 13.

18. Bo yɛlɛ aŋ seŋ ka te zaa e a kyaare puoro yɛlɛ?

¹⁸ Ka teneeŋ na baŋ di yelmennoŋ ko Jehoova a bebi-baaree ŋa naŋ e kpeɛŋaa ŋa poɔŋ yɛŋ, a na fɛreŋ ka te kaŋa la kaŋa zaa maŋ puoro yaga zaa a gaŋ saŋa zaa naŋ pare. Iri wagre biŋ bebiri zaa a maŋ puore yi ho sukyiri poɔŋ. Jehoova boɔrɔŋ ka te ‘yeli te sukyie poɔ yɛlɛ zaa koo’ puoro poɔŋ. (Yiem. 62:8) Pugi Jehoova, a kyɛ puoruu bareka ne bon zaa o naŋ e ko bo. Sɔroo ka o soŋ bo ka ho taa nyaa kpoŋ ho naaŋ moɔloo toma na poɔŋ. Puore sɔroo ka o soŋ bo ka ho are ho yelkpeɛne zaa bee pigrinyɛ zaa hoŋ na tuore noɔreŋ. Ta wa tere sori ka yelzaa bee neɛzaa pigre bo sori ka ho maŋ puoro sɔrɔ Jehoova wagre la wagre zaa. Kyɛ sobuoŋ ka Jehoova maŋ kyɛllɛ wono te puoro? Te na zannɛɛ a soorebiri ŋa naŋ e nimizeɛ ŋa a zannoo naŋ tɔnne na poɔŋ.