ZANNOO YƐLƐ 18
YIELOŊ 1 Jehovah’s Attributes
Taa Sagediibu Ka “A Tendaa Zaa Sɛreŋmaara” Na Eɛ Yɛlɛ Nimimaaroŋ Soriŋ!
“Ka lɛ a tendaa zaa Sɛreŋmaara koŋ sage e yɛlɛ naŋ seŋ neŋ bee?”—MUN. 18:25.
YƐLƐ TE NAŊ NA ZANNE
Te na wa nyɛɛ lɛ Jehoova naŋ na wuli nimimaaroŋ ane dantorii yaga zaa saŋa na oŋ na wa seŋnɛ a neŋfaare yire kũũ poɔŋ na.
1. Bo yɛlɛ naŋ diire sukyiri la ka Aboraham da wa zanne?
YUOMO yaga naŋ pare Naaŋmen da tu la maleke eŋɛŋ a kyɛ yelko Aboraham ka O na sãã la Sodom ane Gomora kpɛlɛŋkpɛlɛŋ. Aneazaa ka Aboraham da taa la sagediibu Naaŋmen eŋɛŋ, kyɛ a yɛlɛ ŋa da dɔnnooŋ. Azuŋ o da soorɛɛ Naaŋmen ka: “Ho na nyoɔ̃yɛ a sontuuribo . . . ane a neŋbɛɛ? . . . Ka lɛ a tendaa zaa Sɛreŋmaara koŋ sage e yɛlɛ naŋ seŋ neŋ bee?” Jehoova da di la kannyiri a kyɛ soŋ o zɔmeŋɛ ŋa oŋ wa zanne yelnimizeɛ kaŋa ka: Naaŋmen daŋ koŋ sãã nemmenne zaa. A yɛlɛ ŋa naŋ sonnɛɛ te meŋ a kyɛ diire te sukyie zenɛ ŋa.—Mun. 18:23-33.
2. Ananso la wala teŋ sagedi peɛlaaŋ ka Jehoova maŋ di la sɛrɛɛ mennoŋ ane nimimaaroŋ soriŋ?
2 Wala teŋ na baŋ e baŋ peɛlaaŋ ka ka Jehoovaŋ wa dire sɛrɛɛ, o maŋ di la a sɛrɛɛ nimimaaroŋ ane mennoŋ soriŋ? Bonso “Jehoova maŋ nyɛrɛɛ [neɛ] sukyiri” poɔ. (1 Saa. 16:7) O gba baŋɛɛ “nensaalaa . . . zaa sukyiri.” (1 Nam. 8:39; 1 Tun. 28:9) A yɛlɛ ŋa eɛ nɔmãã yaga zaa. Jehoova baŋ la yɛŋ gaŋ nensaalaa, te daŋ koŋ baŋ baŋ yɛŋ seŋ Jehoova meŋ. Azuŋ saŋa kaŋa te koŋ maŋ baŋ te baare ananso o naŋ e yɛlɛ mine. A bitontona Pɔɔl da yel kyaarɛɛ Jehoova Naaŋmen ka: “O sɛrɛɛdiibu ba taa mannoo!”—Uro. 11:33.
3-4. Saŋa kaŋa bo soorebie mine la teŋ na baŋ soore? Ka bo yɛlɛ teŋ na zanne a zannoo ŋa poɔŋ? (Gyɔɔn 5:28, 29)
3 Aneazaa ka te baŋɛɛŋ ka Jehoova maŋ eɛ yɛlɛ naŋ tori, kyɛ aminekaŋaŋ te meŋ na maŋ soorɛɛ soorebie na mine Aboraham meŋ naŋ da soore na. Kaapɔge te gba na sooreŋ ka: ‘Noba na mine Jehoova naŋ da sãã saŋa kaŋa naŋ pare aŋa Sodom ane Gomora noba na, ka lɛ Jehoova na lɛ seŋ baŋ yi kũũ poɔŋ bee? A Baabole naŋ yelka “kũũni leɛ-iruu na bebeŋ a ko . . . noba naŋ ba e sontuuribo” na, ka lɛ ba meŋ na poɔ la be bee?’—Tom. 24:15.
4 Yɛ vɛŋ ka te leɛteɛre te menne yɛlɛ te naŋ baŋ kyaare a kũũni leɛ-iruu. A ba kɔɔre kyɛ teŋ da zanne wul-paalaa te naŋ taa a kyaare noba naŋ na “iri yi . . . kũũni poɔ a kpɛ nyɔvore poɔ” ane noba naŋ na “iri yi kũũni poɔ a kpɛ sɛrɛɛ diibu poɔ” yɛlɛ. a (Kanne Gyɔɔn 5:28, 29.) Ana yɛlɛ na teŋ da zanne na vɛŋɛɛŋ teŋ e leɛroo mine, te na zannɛɛ a yɛlɛ a zannoo ŋa poɔŋ, ane a zannoo naŋ tɔnne na poɔŋ. Te na daŋ zannɛɛ yɛlɛ te naŋ ba baŋ ane yɛlɛ te naŋ baŋ a kyaare Jehoova sɛrɛɛ diibu naŋ tori na.
YƐLƐ TE NAŊ BA BAŊ
5. Saŋa kaŋa naŋ pare, bo yɛlɛ ka te gama na da yel kyaare noba na Jehoova naŋ da sãã aŋa Sodom ane Gomora noba na?
5 Saŋa kaŋa naŋ pare, te gama na yelee yɛlɛ naŋ na pɔge noba na Jehoova naŋ da di ba sɛrɛɛ ka ba eɛ noba naŋ ba e sontuuribo na. Te zanne nyɛɛŋ ka ana noba na taa aŋa Sodom ane Gomora noba ba taa teɛretɔroo zaa ka ba na nyɛɛ kũũni leɛ-iruu. Kyɛ saŋa na teŋ da puore sɔre Jehoova a kyɛ mãã te menne a peɛre yɛlɛ yaga kyaare a yɛlɛ ŋa na, a da wa pɛlɛɛŋ ka te koŋ baŋ yelka a sereŋ na eɛ lɛ. Bonso teŋ yel lɛ?
6. Bo sɛrɛɛ ka Jehoova da di kyaare neŋfaare mine, kyɛ bo yɛlɛ teŋ ba baŋ?
6 Leɛteɛre a yɛlɛ ŋa nyɛ. A Baabole sɛgre yaga yelee yɛlɛ kyaare lɛ Jehoova naŋ di neŋfaare sɛrɛɛ. Aŋa mannoo poɔŋ, Jehoova da de la Kɔmpiiri sãã neŋ a noba na zaa naŋ da bebe Noowa saŋa na a kyɛ bare Noowa ane o yideme yoŋ. Ane meŋ Jehoova da tu la Izerayɛl biiri eŋɛŋ a sãã paalonne ayɔpoi naŋ da be a Noɔre Emmo Teŋgane na. O da lɛ tu la maleke bonyeni eŋɛŋ a ko Asiiriya sogyare naŋ ta 185,000 teŋsogi gbuli. (Mun. 7:23; Dut. 7:1-3; Aiz. 37:36, 37) Kyɛ a Baabole zie zaa ba wuli ka a noba ŋa zaa Jehoova naŋ da ko na kaŋa zaa koŋ baŋ lɛ nyɛ kũũni leɛ-iruu. Ananso la wala teŋ yel lɛ?
7. Bo yɛlɛ teŋ ba baŋ kyaare a noba naŋ da nyɛ saammo a Kɔmpiiri poɔŋ, ane Keenan noba na a Izerayɛl biiri naŋ ko saŋa na baŋ da zɔɔ deɛ a teŋgane na? (Kaa a gane foto.)
7 Te ba baŋ lɛ Jehoova naŋ di a noba ŋa teŋ yel ba yɛlɛ na kaŋa zaa sɛrɛɛ; te ba baŋ ka a noba Jehoova naŋ da ko na da nyɛɛ a vuo ka ba zanne Jehoova yɛlɛ a leɛre ba eebo bee. Yɛlɛ a Baabole naŋ yelkyaare a Kɔmpiiri la ka, Noowa da eɛ “a mennoŋ yelmanna.” (2 Pit. 2:5) Kyɛ a Baabole ba yelka saŋa na oŋ da meɛrɛ a gbori kpoŋkpoŋ na o da mɔɔrɛɛ o moɔbo zaa meŋ ka o manne Naaŋmen yɛlɛ ko noba zaa naŋ be a donɛɛ lombori zaa. Lɛ meŋ la a Keenan noba na, te ba baŋ ka a neŋfaare na zaa naŋ da bebe na da nyɛɛ a vuo ka ba zanne Jehoova yɛlɛ a leɛre ba eebo bee.
Noowa neŋ o yideme la meɛrɛ a gbori kpoŋkpoŋ na. Neɛzaa ba baŋ ka Noowa da mɔɔ la o moɔbo zaa ka o manne Naaŋmen yɛlɛ ko nensaaleba zaa naŋ da be a donɛɛ zuŋ sɛre kyɛ ka a kɔmpiiri wa bee (Kanne o wɛlbo 7)
8. Bo yɛlɛ teŋ ba baŋ a kyaare Sodom ane Gomora noba na?
8 Ka noba na Jehoova naŋ da sãã Sodom ane Gomora poɔŋ na meŋ? Lɔt da kpeɛrɛɛ a noba ŋa poɔŋ, kyɛ o da eɛ dɔɔ naŋ e nemmeŋɛ. Lɔt da mannɛɛ Jehoova yɛlɛ ko ba zaa bee? Ai. Yelmeŋɛ la ka a noba ŋa zaa da eɛ neŋfaare, kyɛ ka lɛ ba kaŋa la kaŋa zaa da baŋɛɛ soŋ ane faaloŋ tɛɛtɛɛ bee? Aminekaŋaŋ ba da ba taa a lɛ bammo na. A Baabole gba yeleeŋ ka nembeɛoŋ mine da waɛŋ a boɔrɔ ka ba fere gaŋneŋ Lɔt saamma naŋ da be o dieŋ. A Baabole yeleeŋ ka a nembeɛoŋ ŋa da eɛ “dɔɔnyaane ane bipɔlɔ.” (Mun. 19:4; 2 Pit. 2:7) Ka lɛ te na baŋ yeleŋ ka Jehoova naŋ e nimimaaroŋ Naaŋmen na koŋ lɛ seŋ a noba ŋa kaŋa zaa oŋ da ko na yi kũũ poɔŋ bee? Ai, te koŋ baŋ yel lɛ. Jehoova da vɛŋɛɛŋ ka Aboraham baŋ peɛlaaŋ ka nemmenne naŋ be a teŋɛ na poɔŋ ba ta pie gba. (Mun. 18:32) Ba da ba e sontuuribo, azuŋ a da tu la sori ka Jehoova sãã ba ba yel-eree zuŋ. Azuŋ “kũũni leɛ-iruu [naŋ bebe] a ko . . . noba naŋ ba e sontuuribo” na, ka lɛ te na baŋ yeleŋ ka a noba ŋa kaŋa zaa koŋ poɔ be bee? Te ba baŋ te baare!
9. Bo yɛlɛ teŋ ba baŋ a kyaare Soolomoŋ?
9 A Baabole meŋ lɛ yelee noba mine naŋ da e nemmenne kyɛ aŋ wa ta saŋa kaŋa baŋ ba lɛ e nemmenne yɛlɛ. Naa Soolomoŋ la a noba ŋa kaŋa. O da baŋɛɛ Jehoova soŋ ane sori na a naŋ seŋ ka o puoruu, ka Jehoova meŋ da koo maaloo yaga zaa; kyɛ a puoriŋ, o da leɛ te puoree zirii ŋmema. Lɛ da vɛŋɛɛŋ ka Jehoova suuri iri yaga zaa, ka a Izerayɛl biiri zaa meŋ da di dɔgɛɛ yaga zaa o faaloŋ na zuŋ. Saŋa na Soolomoŋ naŋ da kpi na, a Baabole yeleeŋ ka o “da [gbireŋ] kũũ poɔŋ a laŋ neŋ o sããkommine,” ka dɔbɔ mine naŋ da taa yelmennoŋ aŋa Naa Deevid meŋ da poɔ be. (1 Nam. 11:5-9, 43; 2 Nam. 23:13) Kyɛ ka lɛ a Baabole naŋ yelka o gbiree kũũ poɔŋ a laŋ neŋ o sããkommine na wuleeŋ ka o na nyɛɛ kũũni leɛ-iruu bee? A Baabole ba wuli. Kyɛ kaapɔge noba mine na yeleŋ ka “ka neɛŋ wa kpi o yɔɔ la o yelfaare zaa sane.” (Uro. 6:7) Yelmeŋɛ la, kyɛ lɛ ba wuli ka ka neɛŋ wa kpi a soba taa la sori ka o lɛ nyɛ kũũ leɛ-iruu. Kũũni leɛ-iruu eɛ kyɔɔtaa naŋ yi Naaŋmen zie o naŋ nɔŋ te zuŋ. O maŋ de la a kyɔɔtaa ŋa ko noba na o naŋ boɔrɔ ka o ko ba a vuo ka ba puoruu tegitegilɛ. (Joob 14:13, 14; Gyn. 6:44) Soolomoŋ meŋ na nyɛ la a kyɔɔtaa ŋa bee? Jehoova yoŋ la baŋ; teneeŋ yɛŋ ba baŋ. Kyɛ te baŋɛɛŋ ka Jehoova na eɛ yɛlɛ naŋ tori.
YƐLƐ TE NAŊ BAŊ
10. Jehoova boɔbo la ka o sãã nensaaleba zaa bee? (Iziikiel 33:11) (Kaa a foto meŋ.)
10 Kanne Iziikiel 33:11. Jehoova maŋ wuli teŋ teɛroŋ o naŋ taa a kyaare lɛ o naŋ maŋ dire nensaaleba sɛrɛɛ. A bitontona Piita da yelee yɛlɛ na mine daŋyele Iziikiel naŋ da yel na, o da yeleeŋ ka “a ba e [Jehoova] boɔbo ka neɛzaa nyɛ sããmmo.” (2 Pit. 3:9) A yɛlɛ ŋa diiree sukyiri yaga zaa, azuŋ te baŋɛɛŋ ka Jehoova daŋ koŋ sage sãã nensaaleba kpɛlɛŋkpɛlɛŋ ka anaŋ ba seŋ neŋ ka o e lɛ. O taa la nimbazo yaga zaa, a maŋ wulo nimbazo meŋ ka anaŋ wa seŋ ka o e lɛ.
Ka ba naŋ wa seŋ noba naŋ da ba e sontuuribo na a yi kũũ poɔŋ, nensaale tɛɛtɛɛ zaa na nyɛ la a vuo ka ba zanne Jehoova yɛlɛ (Kanne o wɛlbo 10)
11. Nemboboŋ koŋ nyɛ kũũni leɛ-iruu, ka wala teŋ e baŋ lɛ?
11 Bo yɛlɛ teŋ baŋ kyaare noba na mine naŋ koŋ nyɛ kũũni leɛ-iruu na? A Baabole yelee ba mine yɛlɛ. b Yezu da yeleeŋ ka Gyudase Ezekarɔte koŋ nyɛ kũũni leɛ-iruu. (Mak. 14:21; ho na baŋ kannɛɛ yɛlɛ meŋ naŋ be Gyn. 17:12. c) Gyudase da baŋɛɛŋ ka yɛlɛ na o naŋ erɛ na ba pɛle Jehoova ane O Bidɔɔ Yezu poɔ, kyɛ oŋ da e. (Mak. 3:29; kanne a zannoo yɛlɛ ŋa meŋ jw.org zuŋ, “What Is the Unforgivable Sin?”) Lɛ meŋ ka Yezu da yelka a ŋmenpuore wedeɛreba na naŋ da iri zɔɔrɔ neŋ o na koŋ nyɛ kũũni leɛ-iruu. (Mat. 23:33) A bitontona Pɔɔl meŋ da kpaaŋɛɛŋ ka nɔzagreba naŋ zagre ka ba leɛre ba eebo kyɛ kpi koŋ nyɛ kũũni leɛ-iruu.—Hib. 6:4-8; 10:29.
12. Boŋ teŋ baŋ kyaare Jehoova nembaalonzoe? Tere yelmannee mine.
12 Kyɛ bo yɛlɛ teŋ baŋ a kyaare Jehoova nembaalonzoe? Bo yɛlɛ oŋ e a wuli ka “a ba e o boɔbo ka neɛzaa nyɛ sããmmo”? Te nyɛ lɛ oŋ da wuli nembaalonzoe a ko noba mine naŋ da e yelfaare naŋ e nimizeɛ. Naa Deevid da eɛ yelfaare mine naŋ e nimizeɛ yaga zaa. O da gaŋneŋ la dɔɔ kaŋa pɔge a kyɛ ko a dɔɔ meŋ. Kyɛ Deevid da eɛ kaŋdabaŋkalɛ o yelfaare na yɛlɛ, ka Jehoova meŋ da yi nimimaaroŋ soriŋ a di suuri koo. (2 Saa. 12:1-13) Naa Manaase zemmo kpoŋ zie zaa o da eɛ yelfaare naŋ da ba soma fẽẽ zaa. Kyɛ a yɛlɛ ŋa zaa puoriŋ Jehoova da wulooŋ nimimaaroŋ a di o yelbebe suuri koo o naŋ da e kaŋdabaŋkalɛ o yelfaare zuŋ. (2 Tun. 33:9-16) A yɛlɛ ŋa zaa wuleeŋ ka Jehoova maŋ wulee nimimaaroŋ a ko noba ka o naŋ wa nyɛ ka aseŋ ka o e lɛ. O na leɛ seŋ la noba naŋ e kaŋdabaŋkalɛ ba yelfaare yɛlɛ na a yi kũũ poɔŋ.
13. (a) Ananso la wala ka Jehoova da wuli nembazo ko a Ninevɛ deme na? (b) Bo yɛlɛ ka Yezu da yelkyaare a Ninevɛ deme?
13 Te lɛ baŋɛɛŋ lɛ Jehoova naŋ da wuli a Ninevɛ deme nembazo. Naaŋmen da yelko la Gyoona ka: “Ba [yelfaare] do wa la N nimitɔɔre.” Kyɛ saŋa na baŋ da wa e kaŋdabaŋkalɛ ba yelfaare na yɛlɛ, Jehoova da di la ba yelbebe suuri ko ba. O da wulee nembaalonzoe yaga zaa a gaŋ Gyoona. Gyoona suuri da ireeŋ yaga zaa ka Naaŋmen da teɛroo ka a Ninevɛ deme ŋa “ba baŋ ba nuduri ane ba nugɔɔ taaŋ.” (Joona 1:1, 2; 3:10; 4:9-11) Yuomo mine puoriŋ, Yezu da de la a yɛlɛ ŋa wuli lɛ Jehoova naŋ taa dantorii ane nembaalonzoe seŋ. Yezu da yeleeŋ ka a Ninevɛ deme na naŋ da e kaŋdabaŋkalɛ ba yelfaare yɛlɛ na “na iri yi la kũũni poɔŋ a sɛrɛɛ ŋmaabo bebiri.”—Mat. 12:41.
14. A Ninevɛ deme naŋ na “iri yi kũũni poɔ a kpɛ sɛrɛɛ diibu poɔ” na, wala ka lɛ wuli?
14 Kyɛ a sɛgre naŋ yelka a Ninevɛ deme na “iri yi [la] kũũni poɔ a kpɛ sɛrɛɛ diibu poɔ” na, wala ka lɛ wuli? Yezu da yeleeŋ ka noba mine na “iri yi [la] kũũni poɔ a kpɛ sɛrɛɛ diibu poɔ.” (Gyn. 5:29) O Yuoŋ Turi Naaŋ Diibu na yɛlɛ oŋ da yele, a lɛ saŋa na “sontuuribo ane noba naŋ ba e sontuuribo” na iri yi la kũũ poɔŋ. (Tom. 24:15) Kyɛ noba naŋ ba e sontuuribo na yɛŋ, ba na “iri yi [la] kũũni poɔ a kpɛ sɛrɛɛ diibu poɔ.” Lɛ wuleeŋ ka ka ba naŋ wa iri yi kũũ poɔŋ Jehoova ane Yezu na kaaraŋ ka ba nyɛ ka a noba ŋa de la yɛlɛ na ba naŋ zanna na tonɔ neŋ toma ba zemmo poɔŋ bee. Ka a Ninevɛ neɛ kaŋaŋ iri kũũ poɔŋ a kyɛ zagre ka o puore Jehoova, o sɛrɛɛ diibu na la ka o na kpiŋ a daŋ koŋ lɛ nyɛ nyɔvore. (Aiz. 65:20) Kyɛ bana na zaa naŋ na sage ka ba puoro Jehoova yelmennoŋ poɔŋ na yɛŋ, ba na nyɛɛ a vuo ka ba zeŋ tegitegilɛ!—Daan. 12:2.
15. (a) Ananso la wala aŋ ba seŋ ka te maŋ yele ka noba na zaa naŋ da nyɛ saammo Sodom ane Gomora na koŋ nyɛ kũũni leɛ-iruu? (b) Bo ka yɛlɛ naŋ be Gyud 7 wulo meŋɛmeŋɛ? (Kaa a daga ŋa “ Wala Ka Gyud Da Boɔrɔ Ka O Wuli?”)
15 Saŋa na Yezu naŋ da yele a Sodom ane Gomora noba yɛlɛ na, o da yeleeŋ ka a “Sɛrɛɛ Ŋmaabo Bebiri” a na eɛ mɔlɔ ko ba a gaŋ noba naŋ zagroo ane o wulibo na. (Mat. 10:14, 15; 11:23, 24; Luk. 10:12) Wala oŋ da boɔrɔ ka o wuli? Aminekaŋaŋ te na teɛrɛŋ ka Yezu da boɔrɔŋ ka o bigre wuli lɛ noba naŋ da bebe o saŋa na naŋ da e neŋfaare te gaali seŋ. Kyɛ ka hooŋ nyɛ saŋa na oŋ da yele a Ninevɛ deme yɛlɛ na, a da ba e yelmannaa o naŋ manna. Azuŋ yɛlɛ na Yezu naŋ da yelkyaare a Ninevɛ deme na eɛ yelmeŋɛ a ba e yelmannaa. A “Sɛrɛɛ Ŋmaabo Bebiri” ŋa yɛlɛ oŋ da yelkyaare Sodom ane Gomora deme na, ane a “Sɛrɛɛ Ŋmaabo Bebiri” na yɛlɛ oŋ da yelkyaare a Ninevɛ deme na zaa eɛ bonyeni. Yezu meŋ da lɛ yelee yelkaŋa a kyaare noba naŋ na “iri yi kũũni poɔ a kpɛ sɛrɛɛ diibu poɔ” na. “Bana naŋ e yelfaare” na meŋ na poɔ la be. A Sodom ane Gomora deme na meŋ da erɛɛ yelfaare aŋa a Ninevɛ deme na. Kyɛ a Ninevɛ deme na da nyɛɛ a vuo ka ba e kaŋdabaŋkalɛ. (Gyn. 5:29) Azuŋ aminekaŋaŋ tamaa bebeŋ a ko a Sodom ane Gomora deme na. Kaapɔge ana noba na mine na nyɛɛ kũũni leɛ-iruu, ka te nyɛ a vuo ka te wuli ba Jehoova ane Yezu Krista yɛlɛ!
16. Bo yɛlɛ teŋ baŋ kyaare gbɛre na Jehoova naŋ na de kyaare noba na oŋ na seŋ ane noba na oŋ koŋ seŋ yi kũũ poɔŋ? (Jeremaiya 17:10)
16 Kanne Jeremaiya 17:10. A sɛgre ŋa yelee yɛlɛ te naŋ baŋ a kyaare Jehoova sɛrɛɛ diibu: Jehoova la maŋ “peɛrɛ sukyie, . . . [a peɛre] nensaalaa teɛrɛ.” Ka a kũũni leɛ-iruuŋ wa ta, o na maŋ de la “saŋyɔɔ naŋ seŋ neŋ ko neɛzaa a tuuro o soba soe.” Jehoova na wulee nembazo ko noba mine ka anaŋ seŋ neŋ ka o e lɛ, kyɛ o koŋ wuli nembazo ko noba mine meŋ ka anaŋ ba seŋ neŋ ka o e lɛ. Ka a Baaboleŋ ba vɛŋ ka a pɛle ka neɛ kaŋa koŋ nyɛ kũũni leɛ-iruu te daŋ ta wa yele ka o soba koŋ nyɛ kũũni leɛ-iruu!
“A TENDAA ZAA SƐREŊMAARA” NA EƐ “YƐLƐ NAŊ SEŊ NEŊ”
17. Bo teɛretɔ la bebe ko noba naŋ kpi na?
17 A yi saŋa na zaa Adama ane Hawaa naŋ da zagre Jehoova noɔre kyɛ te poɔ Setaana eŋɛŋ na, noba turiturituri yaga kpieŋ. Kũũ sereŋ eɛ te “dɔndɔŋ” faa meŋɛ! (1 Kor. 15:26) Boŋ na pɔge ana noba na zaa? Krista yelmeŋɛ potuuribo mine noɔre naŋ ta 144,000 na nyɛ la kũũni leɛ-iruu a gaa sazu, ka Jehoova ko ba kpeɛ̃o baŋ koŋ baŋ lɛ kpi. (Yel. 14:1) Dɔbɔ ane pɔgeba yaga zaa naŋ nɔnɔ Jehoova meŋ na poɔ la a “sontuuribo” naŋ na iri yi kũũ poɔŋ na, ba na nyɛ la nyɔvore naŋ ba taa baaraa a donɛɛ ŋa zuŋ, ka ba naŋ naŋ moɔ̃ nimiri a erɛ yɛlɛ naŋ soma a Krista Yuoŋ Turi Naaŋ Diibu saŋa ane a pigrinyɛ baara saŋa. (Daan. 12:13; Hib. 12:1) Ane meŋ, a Krista Yuoŋ Turi Naaŋ Diibu saŋa, “noba naŋ ba e sontuuribo” na, bana la noba naŋ daŋ ba puore Jehoova, bee a da erɛ “yelfaare” na, ba na nyɛ la a vuo ka ba leɛre ba eebo a wa puoro Jehoova yelmennoŋ poɔŋ. (Luk. 23:42, 43) Kyɛ noba mine yɛŋ da bebeŋ a e siri ka ba na zagrɛɛ Jehoova noɔre ane o boɔbo eebo bare kpɛlɛŋkpɛlɛŋ, bana yɛŋ o de la gbɛre ka ba daŋ koŋ nyɛ kũũni leɛ-iruu.—Luk. 12:4, 5.
18-19. (a) Ananso la wala teŋ na baŋ taa sagediibu yaga zaa ka Jehoova na di la sɛrɛɛ naŋ tori a kyaare noba naŋ kpi na? (Aizeeya 55:8, 9) (b) Bo teŋ na zanne a zannoo naŋ tɔnne na poɔŋ?
18 Ka lɛ te na baŋ sagediŋ peɛlaaŋ ka sɛrɛɛ zaa Jehoova naŋ di kyaare nensaaleba maŋ toriŋ bee? Ɛɛ! Aboraham da baŋɛɛŋ ka Jehoova eɛ “a tendaa zaa Sɛreŋmaara” naŋ pɛgeyi, a taa yɛŋ gaŋ neɛzaa, a taa nembazo meŋ. O ko la o Bidɔɔ na wulibo a de a sɛrɛɛ diibu zaa eŋ o nuuriŋ. (Gyn. 5:22) Jehoova ane Yezu zaa baŋɛɛŋ yelzaa naŋ be nensaalaa zaa sukyiriŋ. (Mat. 9:4) Azuŋ ka ba naŋ wa dire nensaaleba sɛrɛɛ ba na di la sɛrɛɛ sori “naŋ seŋ neŋ” poɔŋ!
19 Azuŋ yɛ vɛŋ ka te dɛle Jehoova ane gbɛre zaa o naŋ maŋ de. Te baŋɛɛŋ ka te ba seŋ neŋ ka te dire sɛrɛɛ kyɛ ona yɛŋ seŋnɛɛŋ! (Kanne Aizeeya 55:8, 9.) Azuŋ teŋ bare a sɛrɛɛ diibu zaa eŋ Jehoova ane o Bidɔɔ nuuriŋ. Te baŋɛɛŋ meŋ ka te Naa Yezu Krista na tɔglɛɛ o Saa dantorii ane nembazo gyogri na yaga zaa. (Aiz. 11:3, 4) Kyɛ bo yɛlɛ teŋ na baŋ yelkyaare sɛrɛɛ diibu na Jehoova ane Yezu naŋ na di a dɔgroŋ kpoŋ saŋa na? Bo yɛlɛ teŋ ba baŋ? Ka bo yɛlɛ teŋ baŋ? A zannoo naŋ tɔnne na na soŋ teŋ ka te nyɛ a soorebie ŋa nɔɛ iribo.
YIELOŊ 57 Preaching to All Sorts of People
b Ka hooŋ boɔrɔ ka ho baŋ Adama, Hawaa, ane Kain yɛlɛ, kanne A Kaakaara Ziduoruu, January 1, 2013, gam. 12, ftn.
c A yelbie ŋa, “a soba na a naŋ nare biŋ ka o wɛ” naŋ be Gyɔɔn 17:12 na wuleeŋ ka ka Gyudaseŋ wa kpi, o wɛɛŋ, tamaa zaa kyebe ka o na leɛ iri yi la kũũ poɔŋ.
