Paul: Te poɔ zaaŋ da pɛle! Yuoni 1985 November kyuu na poɔŋ, te da kpɛ la plane a gɛrɛ Liberia paaloŋ naŋ be Africa Sa-niŋe seŋ. Be teŋ da piili te misinaare toma. A plane na teŋ da kpɛ na da te sigee Senegal paaloŋ. Anne da yeleeŋ ka, “awa gbuli yoŋ aŋ na de te kyɛ ka te ta Liberia!” Kyɛ baŋ da moɔle a yelka: “Noba na zaa naŋ gɛrɛ Liberia paaloŋ na sigi a plane poɔŋ. Noba mine zɔɔrɔŋ ka ba deɛ a paaloŋ naaŋ diibu, azuŋ a plane koŋ baŋ gaa be.” Saŋa na teŋ da be Senegal paaloŋ na, te neŋ misinaarehe mineŋ da laŋ kpeɛrɛ, kyɛ teŋ da maŋ wono duorisaamma a kyaare Liberia paaloŋ, ka ba koorɛɛ noba yaga zaa beŋ, ka a gɔmenante meŋ da biŋ bege ka neɛzaa ta wa yire yeŋe zimaanee saŋa ka lɛ naane ba na kooŋ.

Anne: Te eɛ noba naŋ ba nɔŋ ka te maŋ erɛ yɛlɛ naŋ taa dabeɛ̃ fẽẽ zaa. A yi N biiloŋ saŋa zaa, neɛzaa da baŋ maŋ ka dabeɛ̃ zoro la ma. Ka maaŋ gbaŋ wa ŋmaara sori, dabeɛ̃ da maŋ kpɛ maŋ! Kyɛ te da naŋ eɛ siri ka te gaa Liberia aneazaa ka be da eɛ dabeɛ̃ yaga zaa.

Paul: N neŋ Anne zaaŋ laŋ baa England paaloŋ sa-niŋe seŋ, te die ane ba die da ba e tɔɔre. N dɔgreba ane Anne ma da eŋ teŋ faŋa ka te piili a paaneɛ toma, azuŋ saŋa na teŋ da wa baare high school na, te da piilee a paaneɛ toma. Ba poɔ da pɛlɛɛŋ yaga zaa te naŋ da boɔrɔ ka te de te nyɔvore zaa tonɔ a wagre zaa puoruu toma. Saŋa na maŋ da wa nyɛ yuomo 19 na, N da nyɛ la apoɔsori ka N gaa Bɛɛtil. N neŋ Anne da kulee taa yuoni 1982 oŋ wa poɔ N eŋɛŋ teŋ tonɔ toma Bɛɛtiliŋ.

Anne: Te da nɔŋ la a Bɛɛtil toma, kyɛ te da boɔrɔŋ ka te gaa tonɔ a naaŋ moɔloo toma zie ba naŋ boɔrɔ naaŋ moɔleba yaga. Te neŋ te yɔɔdɔbɔ ane te yɔɔpɔgeba mine naŋ da e misinaarehe da laŋ tonɛɛ toma Bɛɛtiliŋ, ba ewuli sonne ane ba zemmo yɛlɛ na da eŋ teŋ faŋa teŋ meŋ boɔrɔ ka te wa e misinaarehe. Bebiri zaa zisoɔree, te da maŋ puore sɔrɛɛ Jehoova a kyaare a boɔbo te naŋ taa ka te wa e misinaarehe na, te da eɛ lɛ yuomo ata, azuŋ te noɔre zaaŋ da mãã saŋa na baŋ da toŋboɔle te ka te wa Gilead sakuu class 79 soba yuoni 1985 poɔŋ! Saŋa na teŋ da wa baare a sakuu na, ba da yelka te gaa Liberia paaloŋ naŋ be Africa Sa-niŋe seŋ.

Paul: Te da kpɛ la a dɛndɛŋ plane naŋ da yi Senegal a gɛrɛ Liberia paaloŋ na. Dabeɛ̃ da bebeŋ yaga zaa, noba meŋ da koŋ baŋ yi yeŋe zimaanee saŋa. Daa poɔŋ ka lɔɔreŋ wa e gɔmɔ, dabeɛ̃ da maŋ kpɛ la noba yaga zaa baŋ zaa zo yaare a kyɛ ŋmeɛrɛ kpɛlle. Zisoɔree zaa,  te da maŋ laŋ kannɛɛ a Yieme gane na ka lɛ na baŋ soŋ te ka te e bɔin. Aneazaa ka yɛlɛ da eɛ kpeɛŋaa a paaloŋ, kyɛ te da nɔŋ la te toma na. Anne da maŋ yoɔrɔŋ a moɔlɔ a duorisoŋ, kyɛ maŋ meŋ da tonɔ toma a Bɛɛtil poɔŋ, N neŋ te yɔɔdɔɔ John Charuk la da laŋ tonɔ toma. a N da zannɛɛ yɛlɛ yaga yi o zieŋ, bonso o da be la Liberia paaloŋ a kɔɔre, azuŋ o da baŋɛɛ yelkpeɛne na te yɔɔmine na naŋ tuoro ane lɛ zemmo yɛlɛ naŋ waa ko ba.

Anne: Te yɔɔmine na da vɛŋeŋ teŋ nɔŋ Liberia, bonso ba da wuli teŋ nɔmmo yaga zaa a kyɛ da taa yelmennoŋ meŋ. Ba da wa eɛ te booree deme teŋ minli taa yaga zaa. Ba da maŋ korɔ teŋ kawan-sonne naŋ da maŋ eŋ te faŋa yaga zaa. Be naaŋ moɔloo da nomaŋ yaga zaa. Ka hooŋ wa gaa noba die a ba kɔɔre kyɛ boɔrɔ ka ho yi be gaa ziyuo, ba poɔ da maŋ sãã! Noba da maŋ nɔŋeŋ ka ba yele Baabole poɔ yɛlɛ zie zaa. A da maŋ eɛ mɔlɔ lɛ ka ho neŋ ba piili dire dama. Te da taa la Baabole zannezanneba yaga zaa, aŋ gba da maŋ e kpeɛŋaa ka te nyɛ wagre ka te neŋ ba zaa zanne boma. A naaŋ moɔloo toma da noma korɔ teŋ yaga zaa!

Paul: Yuomo anaare kpakyagaŋ, emmaaroŋ da be la a paaloŋ poɔŋ fẽẽ. Kyɛ yuoni 1989 poɔŋ, zɔɔre da la piileeŋ. Yuoni 1990 July 2, a noba na naŋ da iri zɔɔrɔ neŋ a paaloŋ gɔmenante na da zɔɔ nyɔgɛɛ a zie na Bɛɛtil naŋ da be na. Te da bebeŋ kyuuri ata ka te neŋ noba naŋ be paaloŋ yobo koŋ baŋ di dama, azuŋ te neŋ te booree deme, ane te donɛɛ zaa toma zikpɛŋ na gba da koŋ baŋ di dama. Nimikuõ-yɛlɛ da pa la zie zaa, bondirii yɛlɛ da eɛ kpeɛŋaa, ka dɔbɔ meŋ da maŋ ferɛ gana neŋ pɔgeba. Lɛ ka yɛlɛ da waa a paaloŋ yuomo pie neŋ anaare.

Anne: Bale mine da ireeŋ a zɔɔrɔ kyɛ koorɔ bale yobo mine noba. Sogyare da maŋ pa la zie zaa, a su bon galema mine, a kpeɛrɛ die zaa ba naŋ nyɛ, a derɛ bonzaa ba naŋ boɔrɔ. Ba mine da maŋ nyɛɛ neŋko aŋ waa ŋa ba naŋ koorɔ noore. A sogyare da maŋ pigee a soe zaa, a da maŋ ko neɛzaa naŋ boɔrɔ ka o wa tu a sori gaa. Ka ba naŋ wa baare, ba da maŋ de la a kũũni dɔgle taa zuriŋ. A yɛlɛ ŋa gba da eɛŋ a peɛle a Bɛɛtil. Ba da ko la te yɔɔmine naŋ taa yelmennoŋ, ane misinaarehe bayi.

Ka a sogyareŋ wa nyɛ bale kaŋa noba ba naŋ ba nɔŋ ba yɛlɛ, ba da maŋ ko baŋ. Te yɔɔmine na da maŋ de la ba yɔɔmine sɔgle ka ba ta ko ba, aneazaa ka ba da baŋ ka ka ba naŋ nyɔge ba ka ba erɛ lɛ, ba na ko baŋ. Misinaarehe ane Bɛɛtil tontonneba mine meŋ gba da eɛ lɛ. Te yɔɔdɔba mine naŋ da zo kyɛ bare ba deri da wa la Bɛɛtil a wa kpeɛrɛ beŋ, ba mine da maŋ gaŋ la te deri pooreŋ. N neŋ N serɛ ane booree deme mine naŋ da e noba bayɔpoi da laŋ ganɛɛ de-bonyenaa poɔŋ.

Paul: Bebiri zaa, a sogyare da maŋ boɔrɔŋ ka ba kpɛ wa a Bɛɛtil poɔ a wa nyɛ ka te sɔglɛɛ noba mine be bee. Te da taa la noba banaare naŋ da maŋ kaara a yeŋe korɔ te: noba bayi da maŋ be la a die poɔŋ kyɛ kaara a  yeŋe, kyɛ ka bayi meŋ yi are a denɔ-kpoŋ noɔreŋ. Ka ba naŋ wa de ba nuuri gaa ba nimitɔɔre seŋ, a wuleeŋ ka a sogyare koŋ kpɛ wa. Kyɛ ka ba naŋ wa de ba nuuri gaa ba puori seŋ, lɛ wuleeŋ ka a sogyare boɔrɔŋ ka ba kpɛ wa, azuŋ te yɔɔmine naŋ be a die poɔŋ kyɛ kaara a yeŋe na da maŋ zoŋ wieoŋ lɛ a de te yɔɔmine na ba naŋ boɔrɔ ka ba ko ba na te sɔgle.

Anne: Kyɛ bebiri kaŋa, te yɔɔmine na da ba toɔ̃ pigi a sogyare mine suuri naŋ da iri yaga zaa ka ba ta kpɛ a zie poɔ. N da larɛɛ N meŋɛ ane te yɔɔpɔge kaŋa eŋ kɔŋso die kaŋa poɔŋ, bonkaŋa baŋ de daare maale da be la be ka neɛ na baŋ kpɛ sɔgle o poɔŋ. Te yɔɔpɔge na da kpɛ sɔglɛɛ o poɔŋ. A sogyare da kpɛ la a die poɔ a taa marefa bɛrɛ. Ba da de la suuri a kpaara die na teŋ da be na denoɔreŋ. Paul da sɔre baŋ ka ba ta kpɛ wa, a da yelka, “N pɔge maalɛɛ o meŋɛ a kɔŋso dieŋ.” Saŋa na maŋ da pɔgrɔ zie na te yɔɔpɔge na naŋ kpɛ te sɔgle na, a bon da eɛ gɔmɔ, aŋ da seŋ ka N maale bonzaa naŋ da bebe biŋ soŋ, N da kɔɔrɛɛŋ fẽẽ kyɛ toɔ̃ e lɛ, azuŋ N da teɛrɛŋ ka a sogyare na boɔrɔŋ ka ba baŋ bon na maŋ erɛ be a kɔɔre lɛ, lɛ da vɛŋɛɛŋ ka dabeɛ̃ zaa kpɛ ma ka N eŋɛ zaa miine yaga zaa. Kyɛ ka maaŋ yuo a denoɔre ka ba naŋ nyɛ lɛ na dabeɛ̃ naŋ da kpɛ ma na, a na vɛŋeŋ ka ba maaleŋ boɔrɔ ka ba baŋ bon na maŋ da erɛ beŋ, azuŋ a da seŋ ka N e bɔin sɛre kyɛ yuoro a denoɔre. Wala maŋ pãã na e? N da puore sɔrɛɛ Jehoova ka o soŋ ma. N da yuo la a denoɔre ka N dabeɛ̃ na zaa baare kyɛ maŋ puore ba. Kaŋa soba da daa maŋ bare kyɛ va kpɛ a kɔŋso die poɔ a te wele wele a bon na poɔ te yɔɔpɔge naŋ da sɔgle na. Seɛlee zaaŋ da kpɛ o o naŋ da ba nyɛ neɛzaa be. O neŋ o taaba na pãã da welɛɛ a deri zaa poore ane a siiliŋ poɔ zaa. Kyɛ ba da ba nyɛ bonzaa.

Paul: Gbɛɛ yaga te da ba maŋ taa bondirii na di beguo saŋa, kyɛ a beguo Bɛɛtil Baabole zannoo na da maŋ waa ŋa beguo bondirii a ko te. Te zaa da baŋɛɛŋ ka teŋ na kanna a kyɛ zanna a Baabole na na baŋ soŋ teŋ ka te are te yelkpeɛne noɔreŋ.

Te da baŋɛɛŋ ka, ka teneeŋ yi ka te te bɔ bondirii ane koɔ̃ waneŋ, a sogyare na baŋ wa ko la te yɔɔmine na ba naŋ da boɔrɔ ka ba ko na. Saŋa kaŋa Jehoova da maŋ tu la so seɛleeŋ a ko te boma yɛlɛ naŋ fɛre te wagre naŋ seŋ neŋ poɔŋ. Jehoova da kaarɛɛ te yelfɛree zieŋ a kyɛ sonnɔ te teŋ e bɔin.

Yɛlɛ da saanaŋ yaga zaa a paaloŋ poɔŋ, aŋ da waa ŋa tamaa zaa ba lɛ kyebe, kyɛ a Baabole yelmeŋɛ da korɔ teŋ teɛretɔ. Gbɛɛ yaga, te yɔɔmine na yaga zie da maŋ zoŋ, a bɔ ba nyɔvoɛ zie, kyɛ ba sagediibu da naŋ eɛ kpeɛŋaa, baŋ da naŋ e bɔin aneazaa ka ba da tuoree yelkpeɛne yaga. Ba mine da yeleeŋ ka baŋ tuoro a zɔɔre ŋa na, a sonnɔ baŋ ka ba “nare ba menne soŋ ko a dɔgroŋ kpoŋ.” Lantaapuoruu nembɛrɛ ane te yɔɔdɔbɔ mine naŋ da e baapaalba da de la nyaa a soŋ ba yɔɔmine. Te yɔɔmine na naŋ da zo gaa moɔ poɔ na da sonnɛɛ taa, a da moɔlɔ a duorisoŋ zie na ba naŋ da be na. Ba da bɔ la boma a maale zie a moɔ poɔŋ, a da maŋ erɛ lammore beŋ. A lɛ wagre kpeɛne na saŋa, Lammozie gaabo ane a naaŋ moɔloo toma da maŋ eŋɛɛ te yɔɔmine na faŋa yaga zaa. Ka teneeŋ wa gaa ka te te poŋ bondirii ane bonsuurii ko te yɔɔmine ŋa, ba da maŋ yelka te ko ba naaŋ moɔloo baagere; a yɛlɛ ŋa da maŋ tɔ la te sukyie yaga zaa. Noba yaga zie da nyɛɛ yɛlɛ naŋ ba soma fẽẽ zaa a zɔɔre poɔŋ, azuŋ ba da boɔrɔŋ ka ba woŋ a duorisoŋ.  Ba nɔɛ zaaŋ da maŋ mãã ane lɛ na Jehoova Sieree Deme naŋ da maŋ taa nɔmmo ane popeɛloŋ ba kpakyagaŋ aneazaa ka ba da tuoree yelkpeɛne yaga zaa. (Mat. 5:​14-16) Eŋnyagroŋ na te yɔɔmine na naŋ da taa na da soŋɛɛ a sogyare na mine naŋ da koorɔ noba na, baŋ meŋ gba wa leɛ te Kristabi-taaba.

Paul: Saŋa kaŋa a da maŋ fɛreŋ ka te yi Liberia paaloŋ. Gbɛre bota zaa teŋ maŋ yi a paaloŋ wagre fẽẽ poɔŋ a kyɛ leɛ wa. Saŋa kaŋa meŋ te da gaayɛŋ a ta yuoni gbuli a kyɛ leɛ wa, gbɛre boyi zaa teŋ da e lɛ. Ŋaa ka te yɔɔpɔge kaŋa meŋ naŋ da e misinaare da yelkyaare lɛ a naŋ maŋ waa ko te ka anaŋ wa ta ka te yi a paaloŋ: “Teŋ da gaa Gilead sakuu na, ba da wuli teŋ ka te nɔŋ te yɔɔmine naŋ be zie na te naŋ gɛrɛ na neŋ te sukyie zaa. Azuŋ ka teneeŋ wa bara te yɔɔmine a woloŋwoloŋ ŋa poɔŋ kyɛ gɛrɛ, a da maŋ kyɛrɛɛ te sukyie yaga zaa!” Kyɛ te poɔ da pɛlɛɛŋ yaga zaa te naŋ da be paalonne mine naŋ peɛle a Liberia paaloŋ, kyɛ toɔnɔ sonnɔ te yɔɔmine naŋ be Liberia ane a naaŋ moɔloo toma na ba naŋ da tonɔ beŋ na.

Anne: Yuoni 1996 May kyuu na poɔŋ, te da de la Bɛɛtil lɔɔre, a de gama mine naŋ taa duori nimizeere mine naŋ kyaare a Liberia naaŋ moɔloo toma a yire ka te gaa. Te da eɛ noba banaare. Te da boɔrɔŋ ka te mɔŋ a lɔɔre a gaa zie kaŋa a sogyare naŋ ba peɛle, be tɔɔre da ta la kilomitare 16 (Maalere 10). Kyɛ a sogyare da wa la zie na teŋ da be na. A sogyare suuri da ireeŋ baŋ ŋmeɛrɛ marefare. Ba da vɛŋɛɛŋ ka te lɔɔre na are, baŋ da tage te bata yi a lɔɔre poɔŋ kyɛ bare Paul a lɔɔre poɔŋ, a de a lɔɔre mɔnɔ te gɛrɛ. Dabeɛ̃ da kpɛ teŋ yaga zaa. Teŋ da wa baŋna ka Paul la te kyɛnɛ waana ka zĩĩ yire o zuŋ. Te teɛroŋ zaaŋ da gyɛre teŋ teɛrɛ ka aminekaŋaŋ ba ŋmɛ oŋ neŋ marefa, kyɛ teŋ da leɛ nyɛ ka ba ba ŋmɛ o neŋ marefa bonso o da toɔnɔ kyɛnɛŋ! A sogya kaŋa la da ŋmɛ o zuŋ saŋa na oŋ da daa o yi a lɔɔre poɔŋ na. Jehoova bareka, a zie da ba ŋmaa yaga.

Sogyare lɔɔre kaŋa da arɛɛ be ka noba yaga da be o poɔŋ, dabeɛ̃ da kpɛ baŋ yaga zaa. Te da boɔrɔŋ ka te kpɛ a lɔɔre, kyɛ zie da ba kyebe teŋ na kpɛ, azuŋ te da nyɔgɛɛ a lɔɔre mare ane te faŋa zaa. Neɛ na naŋ da mɔnɔ a lɔɔre na da zoro neŋ la a lɔɔre yaga zaa, aŋ da kyɛre fẽẽ lɛ ka te yagi le teŋɛŋ. Te da kyeerɛ yele korooŋ ka o are lɛ, kyɛ dabeɛ̃ da kpɛ oŋ yaga zaa azuŋ o da zagrɛɛŋ ka o are. Te da mɔɔ la te moɔbo zaa a nyɔge kpeɛŋaa, a baaraa zaa te da te ta la zie na a lɔɔre naŋ da gɛrɛ na, kyɛ te zaaŋ da bale, ka dabeɛ̃ zaa da kpɛ te ka te enne meŋ zaa da miine.

Paul: Te bonsuuri zaaŋ da dɛge a kyɛ kyeɛre kyeɛre, te da kaarɛɛ taa ka te nɔɛ zaa mãã te naŋ naŋ voorɔ. Te da gaŋ peɛlɛɛ Helicopter kaŋa naŋ da are peɛle be baŋ da ŋmɛ ŋmɛ o neŋ marefa, kyɛ zie naŋ da wa nyaa na, onaŋ da de te gaaneŋ Sierra Leone paaloŋ. Saŋa na teŋ da wa te ta Sierra Leone paaloŋ na, te da puoree Jehoova bareka, kyɛ te yɔɔmine naŋ da be Liberia paaloŋ na yɛlɛ da naŋ dɔɔnɔ teŋ.

Anne: Te da gaa te ta la Sierra Leone paaloŋ Bɛɛtil naŋ be Freetown laafeɛ, te yɔɔmine naŋ bebe na da kaa la te zu soŋ zaa. Kyɛ yɛlɛ na zaa naŋ da e Liberia paaloŋ na da maŋ leɛ waanɛɛ N teɛroŋ. Bebiri zaa N da maŋ teɛrɛŋ ka yelfaa kaŋa na eŋ, N teɛroŋ zaaŋ da maŋ gyɛre, ka a zie zaa da maŋ e bũũ lɛ N nimitɔɔreŋ. N da maŋ iriŋ zisoɔree ka N eŋɛ zaa miine ka dabeɛ̃ zaa kpɛ ma maŋ teɛrɛ ka yelfaa kaŋa waanaŋ ka o e. N da ba maŋ toɔnɔ voorɔ soŋ. Paul da maŋ kore maŋ ka o neŋ ma laŋ puore. Te da maŋ yielee te puoruu yiele na mine lɛɛŋ a te ta saŋa na N eŋɛ naŋ ba lɛ miine. N da teɛrɛŋ ka yɛlɛ na zaa naŋ pɔge te na zuŋ a na baŋ vɛŋeŋ ka N le baaloŋ nimizeɛ kaŋa a koŋ baŋ lɛ toŋ a misinaare toma.

Kyɛ yelkaŋa da eɛŋ, N daŋ koŋ inni a yɛlɛ zaa. A lɛ daa na poɔŋ, te da nyɛɛ gama ayi mine. Kaŋa da eɛ a Awake! June 8, 1996 gane na. Zannoo yɛlɛ kaŋa da be la o poɔŋ a zannoo yelzu da la, “Boŋ Hoŋ Na Baŋ E Ka Dabeɛ̃ Wa Kpɛ Bo Yaga Zaa Te Gaali.” Ŋaa yɛŋ N da baŋɛɛ bon naŋ vɛŋ ka dabeɛ̃ maŋ kpɛ ma maŋ miine yaga zaa lɛ. A gane ayi soba na da eɛ A Kaakaara Ziduoruu May 15, 1996 gane na, o meŋ da taa la a zannoo yelzu ŋa, “Where Do They Get Their Strength?” Foto kaŋa da be la A Kaakaara Ziduoruu poɔŋ, a foto da eɛ pɛnpɛlaa kpaŋkpama kyɛlee naŋ kɔɔre kɔɔre. A zannoo yɛlɛ da yeleeŋ ka, aŋa lɛ a pɛnpɛlaa kpaŋkpama kyɛlee naŋ kɔɔ kyɛ oŋ naŋ toɔ̃ ɛgrɛ na, lɛ ka Jehoova na baŋ soŋ te ka te naŋ sonnɔ te taaba mine ka teneeŋ gbaŋ tuoro yelkpeɛne mine te zemmo poɔŋ. A tuuro a gama ŋa eŋɛŋ Jehoova da ko maŋ a faŋa naŋ seŋ neŋ maŋ toɔ̃ are kpeɛŋaa. (Mat. 24:45) N da bɔ la a gama naŋ yele ana yɛlɛ na taa biŋ, a da soŋ maŋ yaga zaa. Fẽẽfẽẽ fẽẽfẽẽ wagre naŋ gɛrɛ poɔŋ, a yelkpeɛne na zaa teŋ da tuore na ba maŋ lɛ waana N teɛroŋ a dɔnnɔ ma yaga.

Paul: Aneazaa ka saŋa kaŋa a da maŋ fɛreŋ ka te zo yi a Liberia paaloŋ, kyɛ ka teneeŋ wa nyɛ a vuo ka te leɛ gaa, te poɔ da maŋ pɛleŋ yaga zaa. Yuoni 2004  baaraa saŋa a da kyɛrɛɛ fẽẽ ka te nyɛ yuomo lezare a te misinaare toma te naŋ da tonɔ Liberia paaloŋ na. A zɔɔre da baarɛɛŋ. Ba da sɛgrɛɛ yɛlɛ ka ba leɛ wa mɛ a Bɛɛtil. Kyɛ a da ba kɔɔre baŋ da yelka te gaa paaloŋ yuo kaŋa.

A da eɛ kpeɛŋaa yaga zaa a ko te. Te da nɔŋ la te yɔɔmine naŋ be Liberia paaloŋ na yaga zaa, ba da waa ŋa te booree deme. Te da ba boɔrɔ ka te bare ba kyɛ gaa. Kyɛ te da nyɛɛ lɛ Jehoova naŋ da ko te maaloo saŋa na teŋ da bare te booree deme kyɛ gaa a Gilead sakuu na. Azuŋ te da sagɛɛ a toma. Ghana paaloŋ teŋ da gɛrɛ, be peɛlɛɛ Liberia paaloŋ.

Anne: Te da koŋeŋ yaga zaa saŋa na teŋ da yire Liberia paaloŋ na. Te noɔre da maaŋɛɛŋ saŋa na te yɔɔdɔɔ nyaaŋaa kaŋa baŋ boɔlɔ Frank naŋ da taa yɛŋ yaga zaa naŋ da yelko te ka: “Aseŋ ka yɛ inni te yɛlɛ!” O pãã da lɛ yeleeŋ ka: “Te baŋ ka yɛ daŋ koŋ baŋ inni te yɛlɛ zaa, kyɛ aseŋ ka yɛ nɔŋ yɛ yɔɔmine naŋ be Ghana paaloŋ na meŋ neŋ yɛ sukyie zaa. Jehoova la korɔ yɛ a toma, azuŋ yɛ de yɛ teɛroŋ zaa eŋ lɛ yɛŋ na baŋ soŋ yɛ yɔɔmine naŋ bebe na.” Yɛlɛ na te yɔɔdɔɔ ŋa naŋ da yelko te na da soŋ teŋ teŋ e siri ka te nyɔge zɔmeŋ-paalba zi-paalaa na te naŋ gɛrɛ ka noba yaga ba baŋ te be, ka yelzaa meŋ e paalaa a ko te.

Paul: A da ba kɔɔre kyɛ teŋ da wa nɔŋ te yɔɔmine naŋ be Ghana paaloŋ na yaga zaa. Jehoova Sieree Deme da bebeŋ yaga! Te da zannɛɛ yɛlɛ yaga a yi te yɔɔmine yelmennoŋ ane lɛ ba sagediibu naŋ e kpeɛŋaa na poɔŋ. Te da de la yuomo 13 toŋ neŋ toma Ghana paaloŋ, kyɛ nɔmãã yɛlɛ mine da lɛ eɛŋ. Ba da lɛ yelka te gaa East Africa Bɛɛtil naŋ be Kenya paaloŋ. Yelmeŋɛ la, te zɔmenne naŋ be Ghana ane Liberia paaloŋ na vɔlaa da kpɛ teŋ, kyɛ te da lɛ nyɔgɛɛ zɔmeŋ-paalba Kenya paaloŋ. Aŋa lɛ a puoruu toma naŋ e yaga Ghana ane Liberia paaloŋ na, lɛ meŋ ka a puoruu toma e yaga Kenya paaloŋ meŋ.

Anne: N tuoree yelkpeɛne yaga N zemmo poɔŋ, saŋa kaŋa meŋ dabeɛ̃ da maŋ kpɛ maŋ yaga zaa. Ka teneeŋ wa tuore dabeɛ̃ yɛlɛ ane yelkpeɛne te zemmo poɔŋ, a na baŋ vɛŋeŋ ka te le baaloŋ ka dabeɛ̃ kpɛ te yaga zaa. A ba seŋ ka te kaara soriŋ ka Jehoova na go teŋ yi a yɛlɛ ŋa taa poɔŋ. Ka maaŋ wa woŋ marefa kuori, N poɔ maŋ fere beɛrɛŋ, ka tiiri erɛ ma, ka N nuuri zaa e tafaraŋ tafaraŋ lɛ. Kyɛ N maŋ sage de la sommo na zaa Jehoova naŋ korɔ ma aŋ na baŋ eŋ ma faŋa na, ane sommo na zaa te yɔɔmine naŋ maŋ korɔ ma na. N wa nyɛɛŋ meŋ ka, ka teneeŋ moɔ̃ nimiri a maŋ zanna boma, a puoro sɔrɔ Jehoova, a gɛrɛ a lammore ane a naaŋ moɔloo, a na soŋ teŋ ka te naŋ tonɔ toma na Jehoova naŋ ko te na.

Paul: Saŋa kaŋa noba maŋ soore teŋ ka, “Ka lɛ yɛ nɔŋ la toma na yɛ naŋ tonɔ na bee?” A paalonne na baŋ veɛlɛŋ, kyɛ zɔɔre na baŋ iree be saŋa na ho naŋ ba kaara soriŋ, ka be e dabeɛ̃ yaga zaa. Kyɛ yɛlɛ te naŋ maŋ nɔŋ yaga zaa a gaŋ a paaloŋ la te yɔɔmine na naŋ e te booree deme na. Aneazaa ka te zaa yi la booree tɛɛtɛɛ ane ziiri tɛɛtɛɛ, kyɛ te zaa nɔŋ la Jehoova. Te baŋ ka ba toŋ teŋ ka te gaa te eŋ te yɔɔmine na faŋa, kyɛ a yelmeŋɛ la ka ba meŋ maŋ eŋ teŋ faŋa yaga zaa.

Te booree naŋ be a donɛɛ lombori zaa na eɛ yelseɛlee naŋ yi Jehoova zie. Te taa la booree deme zie zaa te naŋ gɛrɛ. Ka teneeŋ poɔ a lantaapuoruu poɔŋ yɛŋ, zie zaa te naŋ gaa kyɛ te na nyɛɛ te booree deme be. Te taa la sagediibu ka ka teneeŋ dɛle Jehoova, o na ko teŋ a faŋa ka te are yeltuo zaa teŋ na tuore noɔreŋ.​—Fil. 4:13.