Ho boɔrɔŋ ka ho maŋ nyɛ tɔnɔ yaga yi ho Baabole zannoo poɔŋ bee? Te nyɛ yɛlɛ mine naŋ na baŋ soŋ bo ka ho maŋ de ho teɛroŋ zaa eŋ a zannoo poɔŋ:

• Maŋ bɔ zie naŋ soma hoŋ na baŋ zeŋ. Ka hooŋ na toɔ̃, maŋ bɔ zie naŋ e forifori, ka kyaanee meŋ bebe hoŋ na nyɛrɛ soŋ. Ho na baŋ bɔ la tabule ane dakogi a zeŋ, bee ka ho gaa zeŋ yeŋe zie kaŋa gɔmɔ naŋ ba kyebe yaga.

• Maŋ bɔ zie kaŋa hoŋ na baŋ e ho yoŋ. Yezu da “gaa la zie kaŋa o yoŋ” a te puore saŋa na “zie naŋ da naŋ ba vɛle sɛre.” (Mak. 1:35) Ka hooŋ koŋ baŋ nyɛ zie hoŋ na e ho yoŋ a toɔ̃ zanne boma, ho na baŋ yelko la ho yideme bee noba na ho neŋ ba naŋ kpeɛrɛ na ka ba baŋ saŋa na hoŋ na maŋ zanne boma, a vɛŋ ka ba baŋ meŋ ka ba ta erɛ gɔmɔ yaga a dɔnnɔ bo ka hooŋ wa zanna.

• Maŋ de ho teɛroŋ zaa eŋ yɛlɛ na ho naŋ zanna na poɔŋ. Ta vɛŋ ka yelzaa tage ho teɛroŋ yi a zannoo poɔŋ. Ka hooŋ maŋ de ho fone bee ho tablɛt zanna boma, maŋ de o eŋ zie na oŋ koŋ e gɔmɔ eŋ bo. Ka hooŋ piili zanna boma a kyɛ teɛre ka a da seŋ ka ho e yelkaŋa, ho na baŋ sɛgɛɛ a lɛ yɛlɛ na biŋ, ka hooŋ wa zanne baare ka a toɔ̃ teɛre bo ka ho e ana yɛlɛ na. Ka anaŋ wa e kpeɛŋaa ko bo ka ho de ho teɛroŋ eŋ a zannoo poɔŋ, iri a kyɛŋkyɛŋ fẽẽ a dɔle ho kɔbɔ kyɛ lɛ wa tɔnne.