ZANNOO YƐLƐ 47
YIELOŊ 103 Shepherds—Gifts in Men
Te Yɔɔdɔbɔ—Ho Boɔrɔŋ Ka Ho Wa E A Lantaapuoruu Neŋkpoŋ Kaŋa Bee?
“Neɛzaa naŋ boɔrɔ ka o tonɔ a puoruu laŋne zusoba bee a lantaapuoruu neŋkpoŋ toma boɔrɔ la toma naŋ taa yuori.”—1 TIM. 3:1.
YƐLƐ TE NAŊ NA ZANNE
A zannoo ŋa na mannɛɛ gyogri a Baabole naŋ yelka neɛ seŋ ka o taa sɛre kyɛ na baŋ wa e a lantaapuoruu neŋkpoŋ kaŋa.
1-2. Bo toma ka a lantaapuoruu neŋkpoŋ maŋ tonɔ?
KA HOOŊ e a nembɛrɛ sonneba kaŋa, aminekaŋaŋ ho mɔɔ la ho moɔbo zaa a wa taa gyogri naŋ seŋ ka ho taa sɛre kyɛ na baŋ wa e a lantaapuoruu neŋkpoŋ kaŋa. Ka lɛ ho na boɔrɔŋ ka ho wa e a lantaapuoruu neŋkpoŋ kaŋa a tonɔ “toma naŋ taa yuori” bee?—1 Tim. 3:1.
2 Bo toma ka a lantaapuoruu neŋkpoŋ maŋ tonɔ? O maŋ deɛrɛɛ weɛ a naaŋ moɔloo toma poɔŋ, a maŋ mɔɔrɔ o moɔbo zaa ka o eŋnɛ a lantaapuoruu noba faŋa a kyɛ korɔ ba wuluu, a maŋ de o yelyaga ane o yel-eree meŋ eŋnɛ a lantaapuoruu noba faŋa. Te na baŋ yelka lɛŋ vɛŋ ka a Baabole yelka a lantaapuoruu nembɛrɛ naŋ tonɔ tonkpeɛne eɛ “noba [ba naŋ ko] kyɔɔtaare.”—Efe. 4:8.
3. Wala ka te yɔɔdɔɔ na baŋ e a wa seŋ neŋ ka o e a lantaapuoruu neŋkpoŋ kaŋa? (1 Timoti 3:1-7; Tiitu 1:5-9)
3 Wala hoŋ na baŋ e a wa seŋ neŋ ka ho e a lantaapuoruu neŋkpoŋ kaŋa? Ka neɛŋ na baŋ wa seŋ neŋ ka o e a lantaapuoruu neŋkpoŋ kaŋa, lɛ ba wuli ka aseŋ ka o soba taa bammo kaŋa sɛre. Gbɛɛ yaga ka neɛŋ boɔrɔ toma, aseŋ ka o taa bammo a kyaare a toma sɛre kyɛ ka ba na baŋ de o a tomaŋ. A lantaapuoruu nembɛrɛ toma na yɛŋ ba waa lɛ. Ka hooŋ baŋ a naaŋ moɔloo toma nimiri, a baŋ wulibo meŋ, lɛ yoŋ koŋ baŋ vɛŋ ka ho wa e a lantaapuoruu neŋkpoŋ kaŋa. Aseŋ ka ho taa gyogri na zaa meŋ naŋ be 1 Timoti 3:1-7 ane Tiitu 1:5-9. (Kanne.) A zannoo ŋa poɔŋ, te na zannɛɛ a gyogri na mine a Sɛgre naŋ yel a yɛlɛ na. Te na wa zanne nyɛɛ lɛ te yɔɔdɔɔ naŋ na baŋ e a taa yosoŋ, a e booree zudaana naŋ soma, a kyɛ e neɛ meŋ naŋ na e siri ka o tonɔ korɔ a lantaapuoruu.
TAA YOSOŊ
4. Ka ba naŋ yelka ho ba “taa saanaa zaa” wala ka lɛ wuli?
4 Ka hooŋ na baŋ e a lantaapuoruu neŋkpoŋ kaŋa, a ba seŋ ka ho “taa saanaa zaa,” lɛ wuleeŋ ka a lantaapuoruu poɔŋ, ho taa la yosoŋ ho gyog-sonne zuŋ, ka neɛzaa meŋ koŋ baŋ de sieree zaa a yelka ho eɛ yelfaa zaa. Ane meŋ, aseŋ ka “banaŋ naŋ ba e Kiristabiiri yele [ho] yelveɛle yɛlɛ.” Yelmeŋɛ la, noba naŋ ba e Kristabiiri na baŋ yelee yelfaare a kyaare te sagediibu, kyɛ a ba seŋ ka ba taa sieree zaa baŋ na baŋ de yelka ho ba taa yelmennoŋ bee ho ba e neŋsoŋ. (Daan. 6:4, 5) Soore ho meŋɛ ka, ‘Ka lɛ N taa la yosoŋ N yɔɔmine ane noba naŋ ba puoro Jehoova nimitɔɔreŋ bee?’
5. Boŋ hoŋ na baŋ e a wuli ka ho “nɔŋ [la] tonveɛle”?
5 Ka hooŋ e neɛ naŋ “nɔŋ tonveɛle,” ho na maŋ kaaraŋ ka ho nyɛ ho taaba gyog-sonne ba naŋ taa, a maŋ pugiro ba ane gyog-sonne na ba naŋ taa na. Ho poɔ maŋ pɛleŋ ka ho erɛ yelsonne korɔ noba, saŋa kaŋa gba ho maŋ eɛ yɛlɛ ko ba a gaŋ lɛ na ba naŋ da kaara soriŋ na. (1 Tɛs. 2:8) Ananso la wala aŋ seŋ ka lantaapuoruu neŋkpoŋ e neɛ naŋ “nɔŋ tonveɛle?” Ka o naŋ taa a lɛ gyogo ŋa, a na somooŋ ka o poɔ maŋ pɛle ka o de o wagre yaga zaa sonnɔ te yɔɔmine naŋ be a lantaapuoruu poɔŋ. (1 Pit. 5:1-3) Aneazaa ka a toma ŋa ba e toŋ-fẽẽ, kyɛ o poɔ maŋ pɛleŋ ka o tonɔ korɔ o taaba.—Tom. 20:35.
6. Ka ba naŋ yelka neɛ “maŋ derɛ noba saannoŋ,” wala ka lɛ wuli? (Hiburu 13:2, 16; kaa a foto meŋ.)
6 Ka hooŋ maŋ erɛ yelsonne korɔ ho taaba, ane noba gba naŋ ba e ho zɔmenne naŋ peɛle bo, lɛ wuleeŋ ka ho “maŋ derɛ [la] noba saannoŋ.” (1 Pit. 4:9) Yelpeɛre mine naŋ kyaare a Baabole yeleeŋ ka, ka neɛŋ taa saannoŋ gyogo, o maŋ wulee nimimaaroŋ korɔ noba gba o naŋ ba baŋ, ka o poɔ meŋ maŋ pɛle ka o tonɔ boɔlɔ ba ka ba wa o die. Soore ho meŋɛ ka, ‘Ka lɛ N eɛ neɛ naŋ maŋ wulo nimimaaroŋ korɔ saamma naŋ wa N lantaapuoruu poɔ bee?’ (Kanne Hiburu 13:2, 16.) Neɛ naŋ taa saannoŋ gyogo maŋ wulee nimimaaroŋ korɔ saana zaa, ka ba eɛ nandaaneba, neɛ naŋ yi lantaapuore zaala kaŋa wa ka o tere yelyaga, bee ka ba eɛ gbandige zukaareba.—Mun. 18:2-8; Yeng. 3:27; Luk. 14:13, 14; Tom. 16:15; Uro. 12:13.
Kultaa deme mine la wulo saannoŋ korɔ gbandige zukaara ne o pɔge (Kanne o wɛlbo 6)
7. Wala ka lantaapuoruu neŋkpoŋ na baŋ e a wuli ka o ba e “neɛ naŋ nɔŋ libie”?
7 “A ta e . . . neɛ naŋ nɔŋ libie.” Lɛ wuleeŋ ka libie ane bondaaŋ boma ba e yɛlɛ naŋ e nimizeɛ yaga ko bo ho zemmo poɔŋ. Ka ho eɛ nandaana bee bondaana, kyɛ ho maŋ de la Jehoova puoruu yɛlɛ daŋ weɛ ho zemmo poɔŋ. (Mat. 6:33) Ho maŋ de la ho wagre, ho faŋa, ane ho bontaree a puoro Jehoova, a kaara ho yideme zu, a kyɛ tonɔ korɔ a lantaapuoruu. (Mat. 6:24; 1 Gyn. 2:15-17) Soore ho meŋɛ ka: ‘Wala ka libie e nimizeɛ ko ma seŋ? Ka lɛ boma yɛlɛ naŋ fɛre N zemmo poɔŋ maŋ seŋ maŋ bee? Kyɛbee N maŋ de la N teɛroŋ zaa eŋ ka N bɔ libie yaga ane bondaaŋ boma bee?’—1 Tim. 6:6, 17-19.
8. Ka ba naŋ yelka neɛ “baŋ [la] o meŋɛ taabo” a kyɛ “baŋ o meŋɛ nyɔgebo” meŋ, wala ka lɛ wuli?
8 Ka hooŋ “baŋ [ho] meŋɛ taabo,” a “baŋ [ho] meŋɛ nyɔgebo” meŋ, lɛ wuleeŋ ka yelzaa poɔŋ ho maŋ eŋ aŋ seŋ. Aŋa mannoo poɔŋ, ho ba maŋ nyu dãã bee a di bondirii te gaali, ho maŋ maalɛɛ ho meŋɛ a su boma naŋ seŋ neŋ, a maŋ kaa iri nimipɛle yɛlɛ meŋ naŋ soma. Ho ba maŋ tɔglɔ lɛ noba naŋ ba puoro Jehoova naŋ maŋ erɛ yɛlɛ ba zemmo poɔŋ. (Luk. 21:34; Gyi. 4:4) Ka noba gbaŋ wa e yɛlɛ naŋ ba soma a kyaare bo, kyɛ ho maŋ eɛ bɔin. Ho ba “waa dããnyukuolo”; bee a e neɛ noba naŋ baŋ bo ka ho nyuuree dãã yaga. Soore ho meŋɛ ka, ‘Lɛ maŋ maŋ erɛ yɛlɛ N zemmo poɔŋ na wuleeŋ ka N baŋ la N meŋɛ taabo bee?’
9. Ka ba naŋ yelka neɛ “baŋ [la] yɛŋ” a kyɛ “maŋ erɛ yɛlɛ ka a tuuro taa velaa zaa,” wala ka lɛ wuli?
9 Ka hooŋ e neɛ naŋ “baŋ yɛŋ,” ho maŋ teɛrɛɛ yelzaa gaa tɔɔre a nyɛ lɛ a Baabole naŋ yelkyaare a yɛlɛ, a nyɛ Baabole sowuli naŋ kyaare a, ka lɛ vɛŋ hoŋ baŋ a yɛlɛ tɛgɛ soŋ, ka a soŋ bo ka ho de gbɛre naŋ soma. Ho ba ŋmorɔ derɛ gbɛre ka hooŋ ba baŋ yɛlɛ yaga a kyaare gbɛre na ho naŋ derɛ na. Kyɛ ho maŋ mɔɔŋ a peɛre baŋ a yɛlɛ soŋ. (Yeng. 18:13) Lɛ maŋ vɛŋeŋ hoŋ de gbɛ-sonne neŋ Jehoova boɔbo naŋ kyaare taa. Ka hooŋ e neɛ naŋ “maŋ erɛ yɛlɛ ka a tuuro taa velaa zaa,” lɛ wuleeŋ ka ho maŋ sɛgrɛɛ ho yɛlɛ soŋ, a maŋ de ho wagre meŋ tonɔ neŋ toma. Ho be la dɛlebo a maŋ de sowuli meŋ tonɔ neŋ toma soŋ. Ka hooŋ toɔ̃ taa a gyogri ŋa te naŋ zanne a yɛlɛ na, a na vɛŋeŋ ka ho taa yosoŋ. Yɛ vɛŋ ka te pãã nyɛ gyogri na a Baabole naŋ yelka aseŋ ka booree zudaana taa ka lɛ vɛŋ ka o e booree zudaana naŋ soma.
E BOOREE ZUDAANA NAŊ SOMA
10. Sobuoŋ ka dɔɔ na baŋ “kaara o . . . yideme zaa zu velaa”?
10 Ka hooŋ e serɛ a boɔrɔ ka ho wa e a lantaapuoruu neŋkpoŋ kaŋa, a na fɛreŋ ka ho booree meŋ taa yosoŋ. Azuŋ aseŋ ka ho “kaara [ho] . . . yideme zaa zu velaa.” Lɛ wuleeŋ ka aseŋ ka ho yi nɔmmo poɔŋ a kaara ho yideme zu soŋ a derɛ gbɛ-sonne korɔ ba. A maŋ erɛ ho booree zannoo, a maŋ mɔɔ ka ho yideme gaa a Lammozie, a kyɛ sonnɔ ba ka ba mɔɔrɔ ba moɔbo zaa a naaŋ moɔloo poɔŋ. Ananso la wala aŋ e nimizeɛ? A bitontona Pɔɔl da soorɛɛŋ ka: “Bonso, ka [neɛŋ] ba baŋ lɛ o naŋ na e kaa o meŋɛ yideme zu, wola ka o na toɔ̃ e kaa a Naaŋmen puoruu laŋne deme zu?”—1 Tim. 3:5.
11-12. Ka te yɔɔdɔɔ kaŋaŋ boɔrɔ ka o wa e a lantaapuoruu neŋkpoŋ kaŋa, ananso la wala aŋ e nimizeɛ ka o yideme taa yosoŋ? (Kaa a foto meŋ.)
11 Ka hooŋ e bi-saa, aseŋ ka ho biiri zaa naŋ ba ta yuomo 18 hoŋ naŋ kaara ba zu “sigre ba menne kyɛ eŋnɛ noba yelzaa poɔ.” Aseŋ ka ho yi nɔmmo poɔŋ a korɔ ba wulibo. Yelmeŋɛ la ka ho na boɔrɔŋ ka ba maŋ taa popeɛloŋ a laara a kyɛ deɛnɛ aŋa lɛ bibiiri zaa naŋ maŋ erɛ na. Kyɛ aseŋ ka ho ko ba wulibo naŋ soma ka ba maŋ kyɛllɛ wono ho yɛlɛ, a taa gyeremɛ ko noba, a kyɛ taa gyog-soŋ meŋ. Aseŋ ka ho lɛ soŋ ba meŋ ka ba de Baabole sowuli tonɔ neŋ toma ba zemmo poɔŋ, a wa seŋ neŋ suobu deebo.
12 “Ka o bibiiri waa yelderebɛ, ka noba ta yele ba yelfaare yɛlɛ bee a ta waa biiri naŋ ba sagra ba dɔgrebɔ nɔɛ.” Ka bie naŋ e Kristabieŋ te e yelfaa kaŋa naŋ e nimizeɛ, sobuo aŋ na baŋ fɛre a bie saa? Ka a bi-saaŋ da ba korɔ a bie wulibo ane dɛnnoo naŋ seŋ neŋ, lɛ yɛŋ o koŋ baŋ e a lantaapuoruu neŋkpoŋ kaŋa.—Kanne A Kaakaara Ziduoruu October 15, 1996 gane na, gam. 21, wɛl. 6-7.
Bi-saa mine la wulo ba biiri ka ba maŋ tonɔ korɔ Jehoova ane a lantaapuoruu (Kanne o wɛlbo 11)
TONƆ KORƆ A LANTAAPUORUU
13. Wala hoŋ na baŋ e a wuli ka ho eɛ neɛ naŋ taa “sumaaroŋ,” a kyɛ ba “wullo [ho] meŋɛ”?
13 Te yɔɔdɔbɔ naŋ taa Kristabiiloŋ gyogri maŋ sonnɛɛ a lantaapuoruu yaga zaa. “Sumaaroŋ” soba maŋ boɔrɛɛ emmaaroŋ. Ka hooŋ e sumaaroŋ soba, ho maŋ kyɛllɛ wonee ho taaba yelyaga a boɔrɔ ka ho baŋ ba teɛroŋ. Aŋa mannoo poɔŋ, ka a lantaapuoruu nembɛrɛ zaaŋ laŋ de gbɛre kaŋa neŋ Baabole sowuli naŋ kyaare taa, ka lɛ ho na sagɛɛ ba gbɛre na, aneazaa ka aminekaŋaŋ ho neŋ ba ba laŋ teɛroŋ? “A ta e neɛ naŋ wullo [ho] meŋɛ” tɛgɛ la ka ho ba maŋ ferɛ noba ka ba erɛ yɛlɛ lɛ hooŋ naŋ boɔrɔ. Ho baŋɛɛŋ ka a eɛ nimizeɛ ka ho kyɛlle woŋ ho taaba mine teɛroŋ ba naŋ taa. (Mun. 13:8, 9; Yeng. 15:22) Ho ba e “zɔɔŋmaara” bee neɛ naŋ taa “sutoloŋ.” Lɛ wuleeŋ ka ho maŋ wulee gyeremɛ korɔ ho taaba ka ho neŋ ba ba maŋ ŋmeɛrɛ nɔkpeɛne, a maŋ wulo ba nimimaaroŋ meŋ. Emmaaroŋ soba maŋ mɔɔrɔŋ ka o neŋ o taaba taa emmaaroŋ ka ana gbaŋ ba e mɔlɔ ka o e lɛ. (Gyi. 3:17, 18) O maŋ de la kɔkɔ baaloŋ yele yɛlɛ korɔ o taaba ka lɛ vɛŋ ka ba suuri leɛ mãã, ka ba neŋ o gbaŋ ba laŋ teɛroŋ fẽẽ zaa a kyaare o sagediibu yɛlɛ.—Sar. 8:1-3; Yeng. 20:3; 25:15; Mat. 5:23, 24.
14. Ka ba naŋ yelka neɛ eɛ “Kiristabi-paalaa” ane “neɛ naŋ tori,” wala ka lɛ wuli?
14 Te yɔɔdɔɔ naŋ seŋ neŋ ka o e a lantaapuoruu neŋkpoŋ kaŋa “ba seŋ ka o e Kiristabi-paalaa.” Aneazaa ka a ba seŋ ka ho de suobu ka a kɔɔre yaga zaa, kyɛ aseŋ ka a kɔɔre fẽẽ ka ho neŋ Jehoova niiloŋ e kpeɛŋaa, a kyɛ zanne lɛ hoŋ na baŋ de a Baabole de gbɛ-sonne ho zemmo poɔŋ. Sɛre baŋ na iri bo ka ho e a lantaapuoruu neŋkpoŋ kaŋa na, aseŋ ka ho tɔglɔ Yezu a taa sigrimennoŋ, a kyɛ maŋ e siri ka ho toŋ Jehoova toma zaa ba naŋ de ko bo. A maŋ di kannyiri a kyɛnlɛ ka ba ko bo toma a lantaapuoruu poɔŋ. (Mat. 20:23; Fil. 2:5-8) Ho na baŋ wuliŋ ka ho eɛ “neɛ naŋ tori” ka hooŋ wa de Jehoova bege tonɔ neŋ toma ho zemmo poɔŋ, a kyɛ tuuro sowuli zaa o laŋnoɔre puoruu naŋ de korɔ te na.—1 Tim. 4:15.
15. Ferebo la ka lantaapuoruu neŋkpoŋ e neɛ naŋ baŋ gyamaa poɔ yelyaga terebo soŋ zaa bee? Wuli a muni.
15 A Sɛgre vɛŋɛɛŋ aŋ pɛle ka zukaareba seŋ ka ba maŋ e noba naŋ na baŋ “wuli noba velaa.” Ka lɛ a wuleeŋ ka ho e neɛ naŋ baŋ yelyaga terebo yaga zaa bee? Ai. Yelmeŋɛ la, a lantaapuoruu nembɛrɛ zaa naaneŋ baŋ gyamaa poɔ yelyaga terebo yaga, kyɛ aseŋ ka ba maŋ baŋ toɔ̃ de a Baabole eŋ ba yɔɔmine faŋa yaga zaa ka ba naŋ wa gaa ka ba te puore ba, bee a de a Baabole toŋ neŋ toma soŋ ka ba naŋ wa gaa a naaŋ moɔloo. (1 Kor. 12:28, 29; Efe. 4:11) Aneazaa ka a ba fɛre ka ho e neɛ naŋ baŋ yelyaga terebo yaga zaa, kyɛ aseŋ ka ho mɔɔrɔ ka ho wa e wulwulo naŋ kyile. Wala hoŋ na baŋ e a wa e wulwulo naŋ kyile yaga?
16. Wala hoŋ na baŋ e a wa leɛ wulwulo naŋ kyile? (Kaa a foto meŋ.)
16 “Aseŋ ka o e neɛ naŋ baŋ a yelbiri naŋ seŋ ne dɛloo.” Ka hooŋ boɔrɔ ka ho e wulwulo naŋ kyile, maŋ de a Baabole tonɔ neŋ toma ka hooŋ wa terɛ yelyaga bee a korɔ te yɔɔmine kawane. Ka hooŋ na toɔ̃ e lɛ, aseŋ ka ho maŋ zanna a Baabole ane te gama na soŋ. (Yeng. 15:28; 16:23) Ka hooŋ wa zanna boma maŋ de ho teɛroŋ eŋ lɛ te gama na naŋ maŋ wulo a Sɛgre muni, a de tonɔ neŋ toma ho wulibo poɔŋ. Ka hooŋ wa wulo, maŋ mɔɔrɔ ka ho yelyaga na tɔ ho kyɛllekyɛlleba na sukyie. Ho na baŋ yelko la a lantaapuoruu nembɛrɛ naŋ kyile ka ba wuli bo yɛlɛ hoŋ na baŋ e a nyɛ nimitɔɔre gaabo ho wulibo poɔŋ, a de yɛlɛ na baŋ na yel na tonɔ neŋ toma, lɛ na soŋ boŋ ka ho baŋ wulibo yaga zaa. (1 Tim. 5:17) A lantaapuoruu nembɛrɛ seŋ ka ba maŋ eŋnɛ ba yɔɔmine faŋa; a kyɛ korɔ ba kawane ane dɛnnoo ka a naŋ wa seŋ ka ba e lɛ. Kyɛ aseŋ ka a nembɛrɛ maŋ yi nimimaaroŋ poɔŋ a erɛ lɛ. Ka hooŋ maŋ yi nɔmmo poɔŋ a wulo, a de Naaŋmen Yelbiri na meŋ tonɔ neŋ toma ho wulibo poɔŋ, ho na wa eɛ wulwulo naŋ kyile. Bonso ho na tɔglɛɛ Yezu naŋ e a Wulwul-kpoŋ na.—Mat. 11:28-30; 2 Tim. 2:24.
Nembɛrɛ sonnɔ kaŋa neŋ lantaapuoruu neŋkpoŋ kaŋa naŋ kyile la gaa ka ba te eŋ te yɔɔpɔge kaŋa faŋa, oŋ de apoɔsori a zanna lɛ oŋ na baŋ de a Baabole toŋ neŋ toma soŋ o wulibo poɔŋ. A nembɛrɛ sonnɔ la kaara o meŋɛ kyaanaa eŋɛŋ kyɛ terɛ o yelyaga ka a na baŋ soŋ o ka o nare o meŋɛ soŋ ko gyamaa poɔ yelyaga o naŋ taa (Kanne o wɛlbo 16)
NAŊ MOƆ̃ NIMIRI A NYƐRƐ NIMITƆƆRE GAABO
17. (a) Boŋ na baŋ soŋ nembɛrɛ sonnɔ ka o nyɛrɛ nimitɔɔre gaabo? (b) Bo yɛlɛ aŋ seŋ ka a lantaapuoruu nembɛrɛ teɛre a yɛlɛ ka ba naŋ wa boɔrɔ ka ba kaa iri te yɔɔdɔɔ kaŋa ka o e a lantaapuoruu neŋkpoŋ kaŋa? (Kaa a daga ŋa, “ Yɛ Ta Vɛŋ Ka Yɛ Yɛlɛ E Tuo Te Gaali Ka Yɛ Naŋ Wa Boɔrɔ Ka Yɛ Iri Te Yɔɔdɔɔ Kaŋa Ka O E A Lantaapuoruu Neŋkpoŋ Kaŋa.”)
17 A nembɛrɛ sonneba mine na baŋ teɛrɛŋ ka, ba na yɛŋ daŋ koŋ baŋ wa e a lantaapuoruu nembɛrɛ mine, bonso gyogri na a naŋ seŋ ka ba taa sɛre kyɛ na baŋ e a lantaapuoruu nembɛrɛ na eɛ yaga. Kyɛ aseŋ ka ho teɛre baŋ ka Jehoova bee o lantaapuoruu na ba kaara soriŋ ka ho pɛgeyi. (1 Pit. 2:21) Jehoova vooroŋ soŋ na la na soŋ bo ka ho toɔ̃ wa taa a lɛ gyogri ŋa. (Fil. 2:13) A gyogo kaŋa bebeŋ aŋ seŋ ka ho mɔɔ kyɛ taa bee? Puore sɔre Jehoova a kyaare a yɛlɛ. Zanne yɛlɛ yaga a kyaare a lɛ gyogo na, a kyɛ soore a nembɛrɛ kaŋa lɛ hoŋ na baŋ e a maaleŋ taa a lɛ gyogo na.
18. Boŋ aŋ seŋ ka nembɛrɛ sonneba zaa moɔ̃ niŋe a erɛ?
18 Te neŋ a lantaapuoruu nembɛrɛ zaa eɛ siri ka te maaleŋ taa a gyogri na teŋ zanne a yɛlɛ yi a zannoo ŋa poɔŋ na. (Fil. 3:16) Ho eɛ a nembɛrɛ sonneba kaŋa bee? Moɔ̃ nimiri a nyɛrɛ nimitɔɔre gaabo! Puore sɔre Jehoova ka o ko bo wulibo naŋ seŋ neŋ, ka ho toɔ̃ tonɔ koroo ane a lantaapuoruu. (Aiz. 64:8) Jehoova na ko boŋ maaloo ane mɔɔre na zaa ho naŋ mɔɔrɔ ka ho wa e a lantaapuoruu neŋkpoŋ kaŋa na.
YIELOŊ 101 Working Together in Unity
