A MAŊ eɛ kpeɛŋaa ko bo ka ho nyɛ wagre zanne boma daa zaa bee? Saŋa kaŋa ho maŋ nyɛŋ ka a Baabole zannoo ba noma korɔ bo bee? Lɛ aŋ maŋ waa ko te zaa saŋa kaŋa. Kyɛ hooŋ leɛteɛre yɛlɛ mine te naŋ maŋ erɛ wagre zaa, aŋa koɔ̃ suobu. Koɔ̃ suobu maŋ de la te wagre ane te faŋa, kyɛ ka teneeŋ wa so koɔ̃ baare, te eŋɛ zaaŋ maŋ mãã! Lɛ ka Baabole zannoo meŋ na baŋ soŋ te ka te eŋɛ mãã. (Efe. 5:26) Te nyɛ yɛlɛ mine naŋ na baŋ soŋ bo:

• Iri wagre biŋ hoŋ na maŋ de zanne a Baabole. Te baŋɛɛŋ ka te meŋɛ Baabole zannoo eɛ yel na kaŋa “naŋ fɛre yaga zaa” aŋ seŋ ka Kristabie zaa mɔɔrɔ kyɛ erɛ. (Fil. 1: 10) Ka hooŋ ba boɔrɔ ka ho inni saŋa na a naŋ seŋ ka ho zanne boma, ho na baŋ sɛgɛɛ a bebiri ane a wagre a de mare ho die zie kaŋa aŋ na e mɔlɔ ko bo ka ho nyɛ. Bee ka hooŋ boɔrɔ, ho na baŋ sɛtɛɛ alarm ho fone bee tablɛt zuŋ ka o maŋ teɛre bo ka a wagreŋ wa ta.

• Kaa iri wagre naŋ na soma ko bo ka ho maŋ de zanne boma. A maŋ eɛ mɔlɔ ko bo ka ho zanne boma kɔɔre bee? Kyɛbee hooŋ yɛŋ maŋ nɔŋeŋ ka ho zanne fẽẽ kyɛ bare a lɛ wa tonɔ a puoriŋ? Hooŋ yoŋ baŋ ona naŋ soma ko bo. Azuŋ sɛgre ho meŋɛ Baabole zannoo yɛlɛ lɛ aŋ na soma ko bo ka ho maŋ baŋ toɔ̃ zanne. Ka wagreŋ wa ta ka ho zanne boma kyɛ ka boma zannooŋ ba erɛ bo, mɔɔ kyɛ de minti pie yoŋ zanne. Ka hooŋ de minti pie yoŋ gba zanne boma, kyɛ ho na nyɛɛ tɔnɔ yaga a gaŋ hoŋ koŋ zanne togitogi. Aminekaŋaŋ gba ka hooŋ zanne boma minti pie, a na noma korɔ boŋ, ka ho lɛ boɔrɔ ka ho zanne fẽẽ poɔ.—Fil. 2:13.

• Maŋ daŋ kaa iri yɛlɛ na ho naŋ boɔrɔ ka ho zanne. Ka hooŋ zeŋ kyɛnlɛ ka ho zannoo wagre na ta kyɛ ka ho pãã teɛrɛ yɛlɛ na ho naŋ boɔrɔ ka ho zanne na, ho koŋ de ho “wagre [toŋ] neŋ toma soŋ.” (Efe. 5:16) Ho na baŋ sɛgɛɛ yelzuri mine hoŋ na boɔrɔ ka ho zanne a yɛlɛ biŋ. Aŋa mannoo poɔŋ, ka soorebiri kaŋaŋ wa wa ho teɛroŋ, sɛgoo biŋ. Bebiri zaa ka hooŋ wa zanne boma baare, ho na baŋ lɛ sɛgɛɛ yɛlɛ mine hoŋ na lɛ boɔrɔ ka ho lɛ zanne.

• Ho na baŋ leɛrɛɛ yɛlɛ lɛ ho naŋ boɔrɔ. Saŋa kaŋa, ho na baŋ leɛrɛɛ a bebiri, saŋa, ane lɛ hoŋ na zanne kɔɔre seŋ, bee a leɛre yɛlɛ na hoŋ waana ka ho zanne na. Yɛlɛ naŋ e nimizeɛ la ka, daa zaa maŋ mɔɔ kyɛ zanne boma.

Ka teneeŋ maŋ mɔɔ kyɛ zanne boma daa zaa, te na nyɛ la tɔnɔ yaga. Te neŋ Jehoova niiloŋ na eɛ kpeɛŋaa, a maŋ derɛ gbɛ-sonne te zemmo poɔŋ, a kyɛ maŋ nyɛ faŋa emmo naŋ seŋ neŋ.—Joos. 1:8.