Ana yuoni na poɔŋ, a lantaapuoruu da eɛ leɛroo mine naŋ na baŋ soŋ ka te yɔɔmine na puoro Jehoova neŋ noɔreyeni. Daa la daa zaa, ba da maŋ eɛ lammo kaŋa baŋ da boɔlɔ Puoro ane Pugiro Jehoova Lammo. Sɛgre na zaa baŋ da maŋ yel a yɛlɛ a lammo zieŋ na, ba da maŋ sɛgaaŋ eŋ A Kaakaara Ziduoruu gane poɔŋ a wuli a sɛgre muni aŋ pɛle soŋ zaa. Ba da printɛɛ calender naŋ da maŋ wuli daa zaa sɛgre na baŋ na yel o poɔ yɛlɛ a lammo saŋa, a da maŋ wuli yieloŋ baŋ na baŋ yiele bebiri zaa. Ba da na baŋ yielaaŋ ba booree zannoo ane ba menne boma zannoo saŋa.

Ana lammore ŋa zieŋ, te yɔɔmine na da maŋ mannɛɛ yɛlɛ ba naŋ nyɛ a naaŋ moɔloo poɔŋ, bee yelkaŋa Jehoova naŋ e ko ba ka ba niŋe pa yaga zaa, a yiele, bee a puore. Eva Barney naŋ da de suobu yuoni 1923 saŋa na oŋ da di yuomo 15 na yeleeŋ ka: “Ka hooŋ boɔrɔ ka ho yel yelsoŋ kaŋa naŋ e ho zemmo poɔŋ, ho maŋ iri areŋ a yelka, ‘N na boɔrɔŋ ka N puore a Daana bareka ane yelsonne na zaa o naŋ e ko ma na.’” Te yɔɔdɔba mine da bebeŋ a da nɔŋ a yɛlɛ ŋa eebo yaga zaa. Te Yɔɔpɔge Barney tɔnɛɛŋ a yelka: “Te Yɔɔdɔɔ Godwin da eɛ dɔɔ nyaaŋaa a da maŋ taa yɛlɛ yaga meŋ ka o manne a kyaare yelsonne Jehoova naŋ e koo. Kyɛ ka o pɔgeŋ wa nyɛ ka te yɔɔdɔɔ naŋ kaara a zannoo zu na poɔ saanaŋ o naŋ yele yɛlɛ yaga na, o da maŋ nyɔge la o kparoo tage oŋ leɛ zeŋ.”

Kyuu zaa, ba da maŋ eɛ ana lammo ŋa dayeni. A Kaakaara Ziduoruu April 1, 1923 gane na da mannɛɛ a lammo ŋa yɛlɛ a yelka: “Aseŋ ka te yɔɔmine maŋ po a lammo wagre ziiri ayi ka te yɔɔmine de a wagre kyɛlee a manne yelsonne ba naŋ nyɛ a naaŋ moɔloo poɔŋ a kyɛ eŋ ba yɔɔmine faŋa. . . . Te sagedieŋ ka a lammo ŋa na soŋɛɛ te yɔɔmine ka ba tage peɛle taa.”

Charles Martin naŋ da di yuomo 19 naŋ da e naaŋ moɔlɔ naŋ yi Vancouver, Canada paaloŋ da nyɛ la tɔnɔ yaga yi a lammore ŋa poɔŋ. A puoriŋ, o da yeleeŋ ka: “A da soŋ maŋ maŋ baŋ yɛlɛ na maŋ seŋ ka N yel ka teneeŋ wa gɛrɛ a die neŋ die naaŋ moɔloo na. Gbɛɛ yaga te yɔɔmine maŋ mannɛɛ yɛlɛ ba naŋ nyɛ a die neŋ die naaŋ moɔloo toma na poɔŋ. A lɛ ŋa da soŋ maŋ maŋ baŋ bon maŋ na yel ane lɛ maŋ na iri yɛlɛ noɔre ko noba.”

Te yɔɔmine na da taa la bebie baŋ zaa da maŋ yi laŋ gaa a naaŋ moɔloo, lɛ da vɛŋɛɛŋ baŋ taa noɔreyeni. April 1, 1923 A Kaakaara Ziduoruu gane na da yeleeŋ ka: “Teŋ boɔrɔ ka te zaa laŋ noɔreyeni a toma  poɔŋ zuiŋ . . . , te kaa iree Atalatadaare, May 1, 1923, ka te zaa laŋ yi gaa a naaŋ moɔloo. Kyuu zaa Atalatadaare dɛndɛŋ soba da maŋ eɛ naaŋ moɔloo bebiri. Neɛzaa naŋ be lantaapuoruu zaa poɔŋ seŋ ka o de o meŋɛ eŋ a toma ŋa poɔŋ.”

Naaŋ moɔleba naŋ e bibiiri meŋ gba da de la ba menne eŋ a toma ŋa poɔŋ. Hazel Burford naŋ da di yuomo 16 ana saŋa na yeleeŋ ka: “A Bulletin gane na da taa la naaŋ moɔloo ewuluu teŋ na baŋ toɔ̃ nyɔge eŋ te zuŋ a de toŋ neŋ toma. a N neŋ N Sããkoma da maŋ mɔɔrɛɛ te moɔbo zaa a toma ŋa poɔŋ.” Kyɛ te Yɔɔpɔge Burford noɔre da maaŋɛɛŋ ane lɛ na te yɔɔdɔɔ kaŋa naŋ da erɛ o yɛlɛ, o naŋ de o meŋɛ eŋ a toma ŋa poɔŋ na zuŋ. O yelka: “Te yɔɔdɔɔ kaŋa naŋ da e dɔɔ nyaaŋaa da teɛre ka a ba seŋ neŋ fẽẽ zaa ka N maŋ gɛrɛ a naaŋ moɔloo a te yele yɛlɛ korɔ noba. Ana saŋa na, noba mine da ba baŋ ka ‘bipɔlɔ ane pɔgesaree’ naŋ e naaŋ moɔleba meŋ na baŋ poɔŋ a soŋ de puubu ko Jehoova.” (Yiem. 148:​12, 13, NWT) Kyɛ te Yɔɔpɔge Burford da naŋ kyɛnɛ moɔlɛɛ a duorisoŋ. A puoriŋ o da nyɛɛ a vuo a gaa a yiiloŋ Gilead School class na, a da te tonɔ a misinaare toma Panama paaloŋ. A puoriŋ te yɔɔmine na da leɛrɛɛ teɛroŋ na ba naŋ da taa kyaare bibiiri meŋ naŋ na gɛrɛ a naaŋ moɔloo na.

Te lammobɛrɛ na meŋ da soŋɛɛ te yɔɔmine na baŋ taa noɔreyeni. Ana lammobɛrɛ ŋa mine saŋa, ba da maŋ iree bebie mine baŋ na maŋ de gaa a naaŋ moɔloo, aŋa oŋ na baŋ da e Winnipeg, Canada paaloŋ na. Ba da yelka March 31, bana na zaa naŋ wa a lammokpɛŋ na na yi gaa la a naaŋ moɔloo ana teŋkpɛŋ na poɔŋ. Ba da maŋ nyɛ la noba yaga a naaŋ moɔloo poɔŋ, ka tɔnɔ yaga meŋ da maŋ yi be wa. Noba yaga noɔre naŋ da ta 7,000 da la gaa la lammokpɛŋ kaŋa Winnipeg teŋkpɛŋ naŋ August 5 daare. Ana saŋa, a lammo ŋa la lammo noba naŋ da wa yaga zaa Canada paaloŋ.

Jehoova puorebiiri da eɛ lammokpɛŋ kaŋa naŋ e tegroŋ yaga zaa yuoni 1923 a yi August 18-26, Los Angeles, California teŋkpɛŋ naŋ. Daaraa wala naŋ da kyɛre ka a lammokpɛŋ ŋa ta na, duorisaamma gama da moɔlɛɛ a lammo ŋa yɛlɛ, ka a naaŋ moɔleba meŋ da tɔre gambilii naŋ ta 500,000 a ko noba. Ba da sɛgɛɛ a lammo yɛlɛ eŋ gampɛlɛ naŋ e yɛloŋ a maŋ de mare lɔɛ noba naŋ kpeɛrɛ gɛrɛ ziiri ane ba menne lɔɛŋ a moɔlɔ a lammo yɛlɛ.

 A lammo Asibitidaare, August 25, te Yɔɔdɔɔ Rutherford da terɛɛ yelyaga kaŋa yelzu naŋ la “Peere ane Buure,” ana yelyaga na poɔŋ, o da wuleeŋ aŋ pɛle soŋ zaa ka bana naŋ e neŋsonne a na zeŋ a donɛɛ zuŋ kyɛ paradiisi poɔŋ na la a “peere.” O da lɛ terɛɛ yelyaga kaŋa meŋ a da kanne yɛlɛ mine naŋ e nimizeɛ a kyaare gbɛre kaŋa neɛzaa naŋ seŋ ka o de. Ana yɛlɛ na yelzu da la, “A Kpããmo.” Ana yɛlɛ ŋa da iree zirii Kristabiiri olo, a kyɛ da eŋ sukyiri sonne deme zaa faŋa ka ba zo yi “Baabilɔŋ Kpoŋ” poɔŋ. (Yel. 18:​2, 4) A puoriŋ, naaŋ moɔleba naŋ be a donɛɛ lombori zaa da deɛ eŋnyagroŋ a tɔre gambile kaŋa naŋ da taa a kpããmo yɛlɛ ŋa turituri ko noba.

A Lammo bebi baaraa daare, noba naŋ da gaŋ 30, 000 da kyɛllɛɛ te Yɔɔdɔɔ Rutherford yelyaga kaŋa oŋ da lɛ tere. A yelyaga yelzu da la, “All Nations Marching to Armageddon, but Millions Now Living Will Never Die.” Baŋ da baŋ ka nenyaga na waŋ na zuŋ, ba da te ha la stadium paalaa kaŋa Los Angeles teŋkpɛŋ na poɔŋ. Te yɔɔmine na naŋ da boɔrɔ ka neɛzaa wono a yɛlɛ na zuŋ, ba da de la speaker bɛrɛ mine naŋ da be a stadium poɔŋ toŋ ne toma, ana saŋa na, ana meŋ da la technology paalaa naŋ da bebe. Ba yaga zie meŋ da kyɛllɛɛ a lammo waalɛnsi zuŋ.

Yuoni 1923 poɔŋ, a naaŋ moɔloo toma da nyɛɛ nimitɔɔre gaabo yaga zaa Africa, Europe, India, ane South America paalonne pooreŋ. India paaloŋ poɔŋ, te yɔɔdɔɔ A. J. Joseph da kaarɛɛ o pɔge ane o biiri bayoɔbo zu, kyɛ da naŋ sonnɔ baŋ maala te gama na Hindi, Tamil, Telugu, ane Urdu kɔkɔɛ pooreŋ.

Sierra Leone paaloŋ meŋ Alfred Joseph ane Leonard Blackman naŋ da e Baabole zannezanneba da sɛge ko la te donɛɛ zaa toma zikpɛŋ naŋ da be Brooklyn, New York na, ka ba boɔrɛɛ sommo. Ba da sagɛɛ ba sɔrebo na April 14, 1923. Alfred yeleeŋ ka, “Asibitidaare zisoɔree kaŋa, neɛ kaŋa da boɔle maŋ fon zuŋ saŋa na maŋ da ba kaara lɛ soriŋ.” O da woŋ la dɔɔ kaŋa naŋ yele yɛlɛ ne kɔkɔ tegroŋ, a dɔɔ da soorooŋ ka, “Hooŋ lɛ sɛge ko Watch Tower Society ka ho boɔrɔŋ ka noba mine wa manne a Naaŋmen yɛlɛ ko bo na?” Ka Alfred deɛ yelka “ɛɛ.” Ka a dɔɔ yelka, “Tɔɔ, ba toŋ maŋ ka N wa ho zie.” William R. Brown la da yele a yɛlɛ. A lɛ daare na ka o neŋ o pɔge Antonia ane ba bipɔgebilii Louise ane Lucy da yi Caribbean paaloŋ wa. A da ba kɔɔre kyɛ ka te yɔɔmine na ne te Yɔɔdɔɔ Brown ane o yideme da nyɛ taa.

Alfred da tɔnnɛɛŋ a yelka: “Zie naŋ da wa nyaa beguo saŋa, N neŋ Leonard da zeŋɛɛŋ ka te e te daagbuli zaa Baabole zannoo, beŋ la teŋ nyɛ dɔɔ wogi kaŋa naŋ wa are a die dendɔreŋ. Te Yɔɔdɔɔ  Brown da la. O eŋɛ naŋ da nyagra ka o moɔle a duorisoŋ ko noba na zuŋ, o da boɔrɔŋ ka o tere gyamaa poɔ yelyaga ka zieŋ wa nyaa.” A da ba ta kyuu gbuli, kyɛ ka te Yɔɔdɔɔ Brown da tɔre a gama na zaa oŋ da de gaa neŋ be na baare. A da ba kɔɔre kyɛ baŋ da toɔle gama 5,000 koo, a da ba lɛ kɔɔre kyɛ aŋ wa fɛre ka o lɛ nyɛ gama yaga poɔ. Kyɛ noba da ba boɔlɔ te Yɔɔdɔɔ Brown ka gaŋ-koɔrɔ. Yuoŋ yaga na zaa oŋ de puore Jehoova na poɔŋ, ka o naŋ wa terɛ yelyaga gbɛ yaga o maŋ de la a Baabole wulo neŋ a yɛlɛ, lɛ zuŋ ba da boɔlooŋ ka Bible Brown.

Germany paaloŋ meŋ, te yɔɔmine da de la gbɛre ka ba na iree a bɛɛtil naŋ da be Barmen teŋkpɛŋ naŋ a gaa neŋ ziyuo bonso be da eɛ bile lɛ. Ba da la woŋeeŋ meŋ ka a France deme da waanaŋ ka ba zɔɔ ne ana teŋkpɛŋ na. Te yɔɔmine na da nyɛ la die kaŋa Magdeburg teŋkpɛŋ naŋ, o da soma yaga zaa ko a printing toma. June 19 te yɔɔmine na da toɔ̃ woree a tontoŋ boma zaa baŋ maŋ de tonɔ neŋ a printing toma ane a ba die boma zaa a gaa a Bɛɛtil paalaa naŋ be Magdeburg teŋkpɛŋ naŋ. Daare na baŋ wa yelko te donɛɛ zaa toma zikpɛŋ na ka ba woree ba boma zaa gaa a bɛɛtil paalaa na, zie naŋ wa nyaa ka duorisaamma gama da moɔlɔ ka a France deme wa zɔɔ nyɔge la Barmen teŋkpɛŋ na. Te yɔɔmine na da puoree Jehoova bareka yaga zaa o naŋ guuro ba a kyɛ sonnɔ ba na.

Brazil paaloŋ, George Young naŋ da maŋ tuuro soe gɛrɛ ziiri yaga te moɔlɔ a duorisoŋ na, da vɛŋɛɛŋ baŋ piili bɛɛtil paalaa a da piili maala A Kaakaara Ziduoruu Portuguese kɔkɔre poɔŋ. Kyuure awala yoŋ poɔŋ, o da tɔrɛɛ gama 7,000. Sarah Ferguson poɔ zaaŋ da pɛle saŋa na te yɔɔdɔɔ Young naŋ da wa ka o puore ba yideme na. A yi yuoni 1899 zaa ka Sarah Ferguson da piili kanna A Kaakaara Ziduoruu, kyɛ o da ba toɔ̃ de suobu. Kyuure awala mine puoriŋ, te Yɔɔpɔge Ferguson ane o biiri banaare zaa da de la suobu.

Saŋa na a yuoni naŋ wa baara na, December 15, 1923 A Kaakaara Ziduoruu gane na da mannɛɛ lɛ a leɛroo ba naŋ e ba lammore poɔŋ, a naaŋ moɔloo poɔŋ ane ba lammobɛrɛ poɔŋ naŋ da soŋ Jehoova puorebiiri baŋ nyɛ nimitɔɔre gaabo yaga zaa, a da yelka: “A pɛlɛɛŋ ka a lantaapuoruu . . . taa la sagediibu naŋ e kpeɛŋaa . . . A yuoni 1924 ŋa poɔ te naŋ kpeɛrɛ ŋa, yɛ vɛŋ ka te zaa e siri ka te toŋ toma yaga a kyɛ naŋ kyɛnɛ puoro Naaŋmen neŋ eŋnyagroŋ ane popeɛloŋ.”

Yuoni 1924 meŋ da e la yuoŋ tegroŋ a ko Jehoova puorebiiri ana saŋa na. Te yɔɔmine naŋ be Bɛɛtil na da maalɛɛ zie kaŋa naŋ be Staten Island poɔŋ. Be ne zie na te donɛɛ zaa toma zikpɛŋ naŋ da be Brooklyn na da peɛlɛɛ taa. Ba da mɛ la ana zi-paalaa ŋa baare yuoni 1924 poɔŋ, a da soŋɛɛŋ ka te yɔɔmine na taa noɔreyeni kyɛ toɔ̃ moɔle a duorisoŋ meŋ gaŋ saŋa zaa naŋ pare.