1. Ananso la wala aŋ na maŋ e kpeɛŋaa ko te ka te sagra noɔre saŋa kaŋa?

 SAŊA kaŋa a maŋ eɛ kpeɛŋaa ko bo ka ho sagra noɔre bee? Lɛ ka yɛlɛ da waa ko Naa Deevid, azuŋ o da puore sɔrɛɛ Naaŋmen ka: “Vɛŋ ka N taa a boɔbo ka N maŋ sagra ho noɔre.” (Yiem. 51:12) Deevid da nɔŋ la Jehoova. Kyɛ saŋa kaŋa a da maŋ eɛ kpeɛŋaa koo ka o sagra noɔre, lɛ meŋ aŋ maŋ waa ko te meŋ saŋa kaŋa. Bonso aŋ waa lɛ? A dɛndɛŋ soba, te ba pɛgeyi, azuŋ te maŋ eɛ noba naŋ ba sagra noɔre. Ayi soba, wagre zaa Setaana maŋ mɔɔrɔŋ ka o bɛnle te ka te zagre Jehoova noɔre, aŋa lɛ na oŋ da e na. (2 Kor. 11:3) Ata soba, te be la donɛɛ kaŋa noba naŋ taa noɔre zagroo gyogo, “a [vooroŋ] na naŋ tonɔ toma pampana a banaŋ naŋ zagra noɔre tuubu zie.” (Efe. 2:2) Aseŋ ka te mɔɔ te mɔɔbo zaa ka te zɔɔtoɔ̃ a boɔbo te naŋ taa ka te zagre noɔre, ane ferebo na zaa a Dɛɛvul ane a donɛɛ ŋa naŋ ferɛ te ka te zagra noɔre na, lɛ na vɛmeŋ ka te toɔ̃ sagra Jehoova noɔre ane bana na o naŋ tere sori ka ba kaara te zu na.

2. Ka ba naŋ yelka te nare ka te “sagra noɔre” wala ka lɛ wuli? (Gyimisi 3:17)

² Kanne Gyimisi 3:17. A vooroŋ soŋ da soŋ la Gyimisi oŋ sɛge ka, yɛmbaŋneba maŋ nareŋ ka ba “sagra noɔre.” Lɛ wuleeŋ ka, aseŋ ka te maŋ de eŋnyagroŋ a yi te poɔ zaa a sagra bana na Jehoova naŋ tere sori ka ba kaara te zu na nɔɛ. Kyɛ Jehoova ba boɔrɔ ka te sagra noba naŋ boɔrɔ ka te zagre O bege nɔɛ.—Tom. 4:​18-20.

3. Ananso la wala aŋ e nimizeɛ ko Jehoova ka te sagra bana na o naŋ tere sori ka ba kaara te zu na nɔɛ?

³ Aminekaŋaŋ te na maŋ nyɛŋ ka a eɛ mɔlɔ ka te sagra Jehoova noɔre a gaŋ nensaalaa noɔre. Bonso Jehoova sowuli zaa maŋ toriŋ. (Yiem. 19:7) Kyɛ bana na Jehoova naŋ tere sori baŋ kaara te zu na ba pɛgeyi. Kyɛ aneazaa, te Saa naŋ be sazuŋ na terɛɛ sori ka bidɔgreba, paaloŋ kaareba, ane a lantaapuoruu  nembɛrɛ kaara te zu. (Yeng. 6:20; 1 Tɛs. 5: 12; 1 Pit. 2:​13, 14) Ka teneeŋ wa sagra ba nɔɛ, lɛ wuleeŋ ka te siriŋ sagrɛɛ Jehoova noɔre. Yɛ vɛŋ ka te nyɛ lɛ teŋ na baŋ sagra nensaaleba na Jehoova naŋ tere sori ka ba kaara te zu na nɔɛ, aneazaa ka saŋa kaŋa te koŋ maŋ boɔrɔ ka te sage ba sowuli.

4. Ananso la wala ka bibiiri yaga maŋ zagra ba dɔgreba nɔɛ?

⁴ Noba naŋ “zagra ba dɔgrebɔ nɔɛ” la ŋmaa gyeere baapaalba. (2 Tim. 3:​1, 2) Ananso la wala ka ba yaga zie ba sagra noɔre? Ba mine maŋ teɛrɛŋ ka ba dɔgreba eɛ bampuori-kombampoɔ noba. Bonso bidɔgreba mine ba maŋ erɛ yɛlɛ na ba naŋ yelko ba biiri ka ba maŋ erɛ na. Ba mine meŋ maŋ teɛrɛ ka a donɛɛ leɛrɛɛŋ yaga zaa, azuŋ ba dɔgreba kawane na koŋ baŋ lɛ soŋ ba, bee a eɛ kpɛeŋaa yaga ka ba tuuraa. Ka hooŋ e baapaalaa, lɛ hoŋ meŋ teɛrɛ bee? A maŋ eɛ kpeɛŋaa ko baapaalba ka ba tu Jehoova bege ŋa: “Yɛ sagra a yɛ dɔgrebɔ nɔɛ a Daana eŋɛ, bonso, a ŋaa e la yelvelaa.” (Efe. 6:1) Boŋ na baŋ soŋ bo ka ho erɛ lɛ?

5. Ananso la wala aŋ e nɔmãã yaga zaa Yezu naŋ da sagra o dɔgreba nɔɛ aŋa lɛ na Luka 2:​46-52 naŋ yel na?

⁵ Yezu eɛ ewuli soŋ yaga zaa a ko te teŋ na baŋ tɔgle a kyaare noɔre sagoo. (1 Pit. 2:​21-24) O da eɛ nensaalaa naŋ pɛgeyi, kyɛ o dɔgreba yɛŋ da ba pɛgeyi. Kyɛ Yezu da eŋnɛ la o dɔgreba aneazaa ka saŋa kaŋa ba da maŋ ŋmɛ la gbɛɛ bee a ba taa yɛlɛ muni wommo a koo. (Yiib. 20:12) Hooŋ nyɛ yɛlɛ naŋ da e saŋa na Yezu naŋ da di yuomo 12 na. (Kanne Luka 2:​46-52.) Yezu neŋ o dɔgreba da gaa la Gyɛruzɛlɛm, saŋa na baŋ da leɛ waana na, ba da ba baŋ ka Yezu ba kye ba zieŋ. A da eɛ Gyoosɛf neŋ Mareya ferebo toma ka ba mɔɔ kyɛ kaa nyɛ ka ba biiri zaa be la ba zieŋ saŋa na baŋ da leɛ kulo na. Saŋa na Gyoosɛf neŋ Mareya naŋ wa nyɛ Yezu na, Mareya da paanɛɛ Yezu o naŋ da leɛ kpɛŋle Gyɛruzɛlɛm zuŋ! Yezu da naaŋ baŋ wuliŋ ka o deme bebeŋ. Kyɛ o da yi la gyeremɛ poɔŋ a iri a noɔre ko o dɔgreba. Gyoosɛf ane Mareya “da ba baŋ a yɛlɛ O naŋ yeli ko ba tɛgɛ.” Kyɛ Yezu da naŋ “sagra [la] ba wuluu.”

6-7. Boŋ na baŋ soŋ baapaalba ka ba sagra ba dɔgreba nɔɛ?

⁶ Baapaalba, a maŋ eɛ kpeɛŋaa ko yɛ ka yɛ sagra yɛ dɔgreba nɔɛ ka ba naŋ wa ŋmɛ gbɛre bee a ba taa yɛlɛ muni wommo ko yɛ bee? Boŋ na baŋ soŋ yɛ? A dɛndɛŋ soba, mɔɔ kyɛ baŋ teɛroŋ na Jehoova naŋ taa. A Baabole yeleeŋ ka ka hooŋ wa sagra ho dɔgreba nɔɛ, a eɛ yɛlɛ naŋ “seŋ ne a Daana zie.” (Kol. 3:20) Jehoova baŋɛɛŋ ka saŋa kaŋa, bege na mine ho dɔgreba naŋ maŋ biŋ ko bo na maŋ eɛ kpeɛŋaa ka ho tu, bee ba ba maŋ taa yɛlɛ muni wommo a ko bo. Kyɛ ka hooŋ naŋ sagra ba noɔre, a na vɛmeŋ ka o poɔ pɛle.

⁷ A yiiloŋ soba, teɛre nyɛ lɛ ho dɔgreba poɔ naŋ na pɛle seŋ ka hooŋ sagra ba nɔɛ. Lɛ meŋ na vɛŋeŋ ka ba sage bo di yaga zaa. (Yeng. 23:​22-25) Lɛ na vɛŋeŋ ka ho tage peɛle ba yaga zaa. Te yɔɔdɔɔ Alexandre naŋ yi Belgium yeleeŋ ka: “Saŋa na maŋ piili sagra N dɔgreba nɔɛ na, a da vɛŋɛɛŋ maŋ tage peɛle ba yaga zaa kyɛ taa popeɛloŋ meŋ.” b A taaloŋ soba, teɛre nyɛ maaloo hoŋ na nyɛ nendaare kaŋa ka hooŋ kyɛllɛ wono ba nɔɛ. Paulo, naŋ yi Brazil paaloŋ yeleeŋ ka, “N naŋ sagra N dɔgreba nɔɛ na soŋ maŋ aŋ e mɔlɔ ka N sage Jehoova ane bana naŋ kaara te zu na sowuli.” Naaŋmen Yelbiri na wulee lɛ a naŋ e nimizeɛ yaga zaa seŋ ka ho sagra ho dɔgreba nɔɛ. O yeleeŋ ka: “Lɛ ka ho yɛlɛ na kyɛnɛ velaa, kyɛ ka ho taa nyɔvo-tɔɔre a teŋɛzu.”—Efe. 6:​2, 3.

8. Ananso la wala ka baapaalba yaga zie maŋ sagra ba dɔgreba nɔɛ?

 ⁸ Baapaalba yaga baŋɛɛ maaloo ba naŋ maŋ nyɛ ka banaŋ wa sagra nɔɛ. A da eɛ kpeɛŋaa ko Luiza meŋ naŋ yi Brazil paaloŋ, saŋa na o dɔgreba naŋ da ba tere sori ka o taa fone a piilee saŋa. Bonso, o da nyɛɛŋ ka o taaba zaaŋ taa fone. Kyɛ o da wa nyɛɛŋ ka guubu la ka o dɔgreba de koroo. Pampana yɛŋ, o yeleeŋ ka, “N nyɛɛŋ ka maŋ na sagra N dɔgreba nɔɛ ba waa ŋa kparoo ba naŋ de su ma a nyɔge N nuure le eŋ a kparoo poɔŋ, kyɛ a waa ŋa lɔɔre seat belt naŋ na baŋ faa N nyɔvore.” Wagre mineŋ, a naŋ maŋ eɛ kpeɛŋaa ko Elizabeth naŋ e baapaalaa naŋ yi United States paaloŋ ka o sagra o dɔgreba nɔɛ. O yeleeŋ ka, “Ka a naŋ wa e kpeɛŋaa ko ma ka N woŋ sowuli kaŋa N dɔgreba naŋ biŋ ko ma muni, N maŋ leɛteɛrɛɛ guubu na N naŋ maŋ nyɛ ka maŋ wa sage N dɔgreba nɔɛ.” Monica meŋ naŋ be Armenia paaloŋ yeleeŋ ka, yɛlɛ maŋ kyɛnɛɛ soŋ zaa a koroo ka o naŋ wa sagra o dɔgreba nɔɛ, a gaŋ ka o naŋ wa zagre ba nɔɛ.

9. Bo teɛroŋ ka noba mine maŋ taa kyaare bege tuubu?

⁹ Noba yaga baŋɛɛŋ ka a fɛrɛɛŋ ka te taa a gɔmenante, a tuuro bege na mine meŋ “a teŋɛzu kpeɛ̃o deme” ŋa naŋ maŋ biŋ ko te na. (Uro. 13:1) Kyɛ ana noba ŋa neŋ ba zu maŋ zagreŋ ka ba tu bege mine ba naŋ nyɛ ka a eɛ kpeɛŋaa yaga ko ba ka ba tu. Aŋa mannoo poɔŋ, hooŋ leɛteɛre zuyɔɔ yɛlɛ a nyɛ. Noba yaga naŋ be paaloŋ kaŋa naŋ be Europe poɔŋ sagedieŋ ka, “a ba seŋ ka ho yɔɔ ho zuyɔɔ ka hooŋ nyɛ ka a ba tu sori ka ho e lɛ.” A lɛ zuŋ noba naŋ be ana paaloŋ na ba yɔɔrɔ ba zuyɔɔ na a paaloŋ gɔmenante naŋ yel ka ba yɔɔrɔ na.

10. Ananso la wala teŋ maŋ tuuro bege mine gba te naŋ ba boɔrɔ?

¹⁰ A Baabole yeleeŋ ka nensaaleba namine maŋ de la dɔgɛɛ waana nensaaleba zuŋ, ka Setaana la ba naa, kyɛ a koŋ kɔɔre ba na nyɛ la saammo. (Yiem. 110:​5, 6; Ikil. 8:9; Luk. 4:​5, 6) A la vɛŋ teŋ baŋ ka, “soba na zaa naŋ zagra a wederebɛ noɔre, zagra la bonna Naaŋmen naŋ biŋ.” Pampana ŋa yɛŋ, Jehoova la tere sori ka a paaloŋ kaareba ŋa dire naaloŋ, ka lɛ na vɛŋ ka yɛlɛ kyɛnɛ soŋ zaa a donɛɛ zuŋ, azuŋ o boɔrɔŋ ka te maŋ sagra ba nɔɛ. Aseŋ ka te maŋ “yɔɔ bon na zaa aŋ seŋ ka [te] maŋ yɔɔ” a ko ba, a maŋ yɔɔrɔ te zuyɔɔ, a korɔ ba gyeremɛ, a kyɛ sagra ba nɔɛ. (Uro. 13:​1-7) Aminekaŋaŋ te na maŋ nyɛŋ ka a bege mine ba soma ko te, bee a ba tu sori, bee te na ŋmɛ la sane ka teneeŋ tu a. Kyɛ te maŋ tuuro la a bege ŋa bonso lɛ ka Jehoova yelka te erɛ ka anaŋ ba sãã Jehoova bege yɛŋ.—Tom. 5:29.

11-12. Aŋa lɛ Luka 2:​1-6 naŋ yel na, boŋ ka Gyoosɛf ane Mareya da e toɔ̃ tu bege kaŋa naŋ da ba soma ko ba? Ka bo yɛlɛŋ da yi a poɔŋ wa? (Kaa a fotori meŋ.)

¹¹ Te na baŋ zannɛɛ yelkaŋa yi Gyoosɛf ane Mareya zie, ba da eɛ siri ka ba tu a teŋɛzu kpeɛ̃o deme bege aneazaa ka a da ba soma ko  ba. (Kanne Luka 2:​1-6.) Saŋa na Mareya naŋ da taa poɔ ta kyuuri awai na, o neŋ Gyoosɛf da tuoree yɛlɛ mine naŋ da na baŋ vɛŋ ka a eɛ kpeɛŋaa ko ba ka ba sagra noɔre. Siiza Ɔgɔtu naŋ da e Urom paaloŋ Naa na, da biŋee bege ka ba sɔre a noba zaa. Gyoosɛf ane Mareya da seŋ ka ba tu so tɔɔre a gaa Bɛtelɛhɛm, be tɔɔre da ta ŋa kilometare 150 (Maalihi 93 na lɛ) a sori meŋ ziiri mine da e la tanne. A sori tuubu da koŋ e mɔlɔ fẽẽ zaa, agaŋaazaa a ko Mareya. Aminekaŋaŋ ba da naaŋ zoree dabeɛ̃ ka yelkaŋa na baŋ pɔgɛɛ Mareya bee a bie naŋ be o poɔŋ na. Bee ba da naaŋ zorɛɛ dabeɛ̃ ka ba na baŋ be la soriŋ gɛrɛ kyɛ ka o dɔge. A bie naŋ be o poɔŋ na la na wa leɛ a Mɛzaaya, azuŋ ba da boɔrɔŋ ka ba mɔɔ ba mɔɔbo zaa ka yelfaa zaa ta pɔge o. Ba da naaŋ baŋ kpɛnlɛɛ lɛ zuŋ a zagre ka ba tu a bege ŋa bee?

¹² Gyoosɛf ane Mareya da ba tere sori ka a yɛlɛ ŋa kaŋa zaa pigeba sori ka ba tu a bege ŋa. Jehoova da ko baŋ maaloo ba noɔre sagoo zuŋ. Mareya da te ta la Bɛtelɛhɛm ka yelfaa zaa ba pɔgoo, a da dɔge bidɔɔ naŋ taa laafeɛ, ka Baabole daŋyelbo gba da tu be nyɛ eebo!—Maik. 5:2.

13. Ka teneeŋ sagra noɔre, sobuo ka te yɔɔmine na baŋ nyɛ tɔnɔ yi be?

¹³ Ka teneeŋ wa tuuro a teŋɛzu kpeɛ̃o deme nɔɛ, te maŋ nyɛ la tɔnɔ ka te taaba meŋ nyɛ tɔnɔ. Sobuoŋ? Kaŋa la ka te koŋ nyɛ totagi na noba naŋ maŋ nyɛ ka ba naŋ wa sãã bege na. (Uro. 13:4) Ka teneeŋ wa sagra a teŋɛzu kpeɛ̃o deme nɔɛ, lɛ na vɛmeŋ ka ba taa teɛroŋ naŋ soma a kyaare Jehoova Sieree Deme zaa. Aŋa mannoo poɔŋ, yuomo mine naŋ pare, Nigeria paaloŋ poɔŋ sogyare mine da wa kpɛ la te Lammozie kaŋa saŋa na baŋ da erɛ lantaapuoruu lammo kaŋa beŋ na, a boɔrɔ noba naŋ da iri taa waɛ ka ba ba boɔrɔ ka ba yɔɔ zuyɔɔ na. A sogyare neŋkpoŋ da yelko la a sogyare ka ba wa yi gaa, a yelka: “Jehoova Sieree Deme yɛŋ ba e noba naŋ maŋ iri taa waɛ zuyɔɔ yɛlɛ zuŋ.” Wagre zaa, ka hooŋ maŋ wa tuuro a paaloŋ bege, lɛ na baŋ vɛmeŋ ka ho boɔrɔ yosoŋ korɔ Jehoova puorebiiri; aminekaŋaŋ a yosoŋ ŋa na faa la ho yɔɔmine bebiri kaŋa.—Mat. 5:16.

14. Boŋ da soŋ te yɔɔpɔge kaŋa oŋ da “nare ka o sagra” a teŋɛzu kpeɛ̃o deme nɔɛ?

 ¹⁴ Kyɛ aminekaŋaŋ, te naŋ koŋ boɔrɔ ka te sagra a teŋɛzu kpeɛ̃o deme nɔɛ. Te yɔɔpɔge Joanna naŋ be United States paaloŋ yeleeŋ ka, “a da maŋ eɛ kpeɛŋaa yaga zaa ko ma ka N sagra a paaloŋ kaareba nɔɛ, bonso noba mine naŋ be N booree poɔŋ da tuoree daŋkyagre ba nuureŋ.” Kyɛ Joanna da mɔɔ la o mɔɔbo zaa ka o leɛre o teɛroŋ. A dɛndɛŋ soba, o da ba lɛ kanna yɛlɛ naŋ be social media zuŋ naŋ yele yelfaare a kyaare a paaloŋ kaareba. (Yeng. 20:3) A yiiloŋ soba, o da puore sɔrɛɛ Jehoova ka o somoo ka o dɛloo a gaŋ oŋ na kaara soriŋ ka nensaaleba naaloŋ leɛre. (Yiem. 9:​9, 10) A taaloŋ soba, o da kannɛɛ te gama naŋ yele yɛlɛ a kyaare lɛ teŋ na baŋ tage te menne yi a donɛɛ naaŋ di yɛlɛ poɔŋ. (Gyn. 17:16) Pampana ŋa Joanna yeleeŋ ka, oŋ sagra a paaloŋ kaareba nɔɛ kyɛ korɔ ba gyeremɛ na vɛŋɛɛŋ oŋ taa “emmaaroŋ yaga zaa.”

15. Ananso la wala aŋ na maŋ e kpeɛŋaa ko te saŋa kaŋa ka te sagra Jehoova lantaapuoruu sowuli?

¹⁵ Jehoova yelka te “sagra noba naŋ derɛ weɛ a [te] poɔŋ na nɔɛ” a lantaapuoruu poɔŋ. (Hib. 13:17) Aneazaa ka te Wedeɛrɛ Yezu pɛgeyieŋ, kyɛ noba na oŋ kaa iri ka ba deɛrɛ te weɛ na yɛŋ ba pɛgeyi. Aminekaŋaŋ a na maŋ eɛ kpeɛŋaa ko te ka te sage ba sowuli saŋa kaŋa, agaŋaazaa ka ba naŋ yelka te e yelkaŋa te naŋ ba boɔrɔ eebo. Ba da ko la a bitontona Piita meŋ sowuli mine oŋ da ba boɔrɔ ka o tua a piilee saŋa na. Saŋa na maleke kaŋa naŋ da yelka o ɔɔ donne mine nɛne a Moosis Bege naŋ yelka a ba pɛgeyi na, gbɛre bota zaa oŋ da zagre ka o e lɛ! (Tom. 10:​9-16) Ananso la wala? O da nyɛɛŋ ka yɛŋ zaa kye ana sowuli paalaa ŋa eŋɛŋ. Bonso o zemmo poɔŋ zaa o daŋ ba e lɛ. Ka anaŋ da e kpeɛŋaa ko Piita ka o sage sowuli naŋ yi maleke naŋ pɛgeyi zie yɛŋ, lɛ yɛŋ a ba e te nɔmãã saŋa kaŋa aŋ maŋ e kpeɛŋaa ko te ka te sage sowuli naŋ yi nensaaleba naŋ ba pɛgeyi zie!

16. Aneazaa ka a bitontona Pɔɔl da naŋ baŋ yeleŋ ka sowuli na ba naŋ koroo na, yɛŋ kye be, kyɛ wala oŋ da e? (Toma 21:​23, 24, 26)

¹⁶ A bitontona Pɔɔl da “narɛɛŋ ka o sagra noɔre” haali saŋa na baŋ da koo sowuli kaŋa oŋ nyɛ ka yɛŋ ba kye be na. A Gyuu Kristabiiri da woŋee yɛlɛ mine a kyaare Pɔɔl —ba da yeleeŋ ka Pɔɔl yɔ wulee a noba “ka ba zagre a wuluu a Moosis naŋ biŋ” na a kyɛ ta tuuraa meŋ. (Tom. 21:21) A nembɛrɛ naŋ da be Gyɛruzɛlɛm da ko la Pɔɔl sowuli ka o de dɔbɔ banaare poɔ o eŋɛŋ a gaa a ŋmenpuoredie a te maale ba menne a wuli ka o meŋ tuuro la a Bege. Kyɛ Pɔɔl da baŋɛɛŋ ka a Kristabiiri da ba la kye a Moosis Bege na poɔŋ. O da ba e yelfaa zaa meŋ. Kyɛ Pɔɔl da ba naare a yɛlɛ ŋa poɔŋ. Zie naŋ wa nyaa, “Pɔɔl da de [la] noba banaare na, ka o ne ba da te peere ba dɛgre.” (Kanne Toma 21:​23, 24, 26.) Lɛ Pɔɔl naŋ da e na vɛŋɛɛŋ ka noɔreyeni da be a lantaapuoruu poɔŋ.—Uro. 14:​19, 21.

17. Boŋ hoŋ zanne yi te yɔɔpɔge Stephanie zemmo yɛlɛ na poɔŋ?

¹⁷ A da eɛ kpeɛŋaa ko te yɔɔpɔge kaŋa yuori naŋ di Stephanie ka o sage sowuli a lantaapuoruu nembɛrɛ naŋ da tere o paaloŋ. O neŋ o serɛ da deɛ popeɛloŋ sonnɔ lantaapuor-bile kaŋa naŋ yele paaloŋ yuo kɔkɔre. Kyɛ bɛɛtil da yeleeŋ ka a lantaapuor-bile na koŋ baŋ la tɔnne, azuŋ a da wa fɛrɛŋ ka a kultaa deme ŋa te poɔ Lantaapuoruu naŋ yele ba meŋɛ kɔkɔre. Stephanie yeleeŋ ka “N poɔ zaaŋ da sãã, bonso, N da nyɛɛŋ ka lantaapuoruu na naŋ yele te menne kɔkɔre na, ba maaleŋ boɔrɔ sommo yaga zaa.” Kyɛ aneazaa, o da naŋ sagɛɛ a na sowuli na. A puoriŋ, o da yelka, “N wa  nyɛɛŋ ka yɛŋ be la a gbɛre na Bɛɛtil naŋ de na poɔŋ. Bonso, noba yaga da be la a lantaapuoruu na poɔŋ ka ba booree deme kaŋa zaa ba poɔ ba eŋɛŋ, azuŋ te da wa leɛ la ba booree deme. N neŋ te yɔɔpɔge kaŋa naŋ da ba lɛ waana a lammore, kyɛ leɛ piili waana a lammore zannɛɛ a Baabole. Pampana ŋa yɛŋ, N taa la wagre yaga maŋ maŋ de erɛ N meŋɛ boma zannoo.” O da la yeleeŋ ka, “Maŋ sagra sowuli na vɛŋɛɛŋ maŋ taa zoma naŋ soma.”

18. Bo maaloo teŋ maŋ nyɛ ka teneeŋ wa sagra sowuli?

¹⁸ Te na baŋ zanneŋ ka te sagra nɔɛ. Yezu “da zanne la noɔre sagoo.” Wagre sonne yoŋ poɔŋ naane oŋ da maŋ sagra nɔɛ, kyɛ O da naŋ sagrɛɛ nɔɛ “a yi . . . dɔgɛɛ O naŋ da nyɛ poɔ” meŋ. (Hib. 5:8) Aŋa Yezu, te meŋ na baŋ zanneŋ ka te sagra nɔɛ ware kpeɛne poɔŋ. Aŋa mannoo poɔŋ, a COVID-19 baaloŋ saŋa baŋ da yel ka te ta la gɛrɛ te Lammoziiri na, a ta la gɛrɛ a die neŋ die naaŋ moɔloo na, a da eɛ kpeɛŋaa ko bo ka ho sage a na sowuli na bee? Kyɛ hoŋ sage a na sowuli na gu boŋ, a soŋ ka ho neŋ ho yɔɔmine taa noɔreyeni a kyɛ la vɛŋ ka Jehoova poɔ pɛle. Pampana ŋa yɛŋ, te zaa eɛ siri ka te sage sowuli zaa baŋ na ko te a dɔgroŋ kpoŋ saŋa. Ka teneeŋ wa sage ana sowuli na, a na baŋ faa la te nyɔvoɛ!—Joob 36:11.

19. Bonso hoŋ boɔrɔ ka ho sagra sowuli?

¹⁹ A zannoo ŋa poɔŋ, te nyɛɛŋ ka, ka teneeŋ wa sagra sowuli, te maŋ nyɛɛ maaloo yaga. Kyɛ, te naŋ nɔnɔ Jehoova a kyɛ boɔrɔ ka te erɛ yɛlɛ naŋ pɛlɛ o poɔ na zuŋ teŋ maŋ tuuro o sowuli. (1 Gyn. 5:3) Yelsonne na zaa Jehoova naŋ e ko te na, te daŋ koŋ baŋ yɔɔ a sane zaa. (Yiem. 116:12) Kyɛ te na baŋ sagrɛɛ O neŋ bana na zaa naŋ kaara te zu na nɔɛ. Ka teneeŋ wa sagra noɔre, lɛ wuleeŋ ka te eɛ yɛmbaŋneba. Ka teneeŋ wa e yɛmbaŋneba meŋ, te na maŋ erɛɛ yɛlɛ naŋ na vɛŋ ka Jehoova poɔ pɛle.—Yeng. 27:11.