ZANNOO YƐLƐ 43
YIELOŊ 90 Encourage One Another
Boŋ Na Baŋ Soŋ Bo Ka Hooŋ Wa Taa Bonnoo Ho Teɛroŋ Poɔŋ?
“Kyɛ yɛ maŋ tegre yelzaa nyɛ.”—1 TƐS. 5:21.
YƐLƐ TE NAŊ NA ZANNE
Te na zanne nyɛɛ lɛ teŋ na baŋ iri bonnoo zaa naŋ na baŋ sãã puoruu na te naŋ de korɔ Jehoova na yi te teɛroŋ poɔŋ.
1-2. (a) Bo yɛlɛ mine la ka Jehoova puorebiiri na baŋ taa bonnoo a poɔŋ? (b) Boŋ teŋ na zanne a zannoo ŋa poɔŋ?
KA TE eɛ neŋnyaane bee baapaalba, kyɛ te zaa maŋ baŋ taa la bonnoo a saŋa kaŋa. Aŋa mannoo poɔŋ, te yɔɔ kaŋa naŋ e baapaalaa na baŋ teɛrɛŋ ka, “ka lɛ Jehoova sereŋ taa la N yɛlɛŋ?” Lɛ na baŋ vɛŋeŋ ka a e kpeɛŋaa koo ka o de suobu. Bee te de ka te yɔɔdɔɔ kaŋa da de la Jehoova puoruu daŋ weɛ o baapaaloŋ saŋa a gaŋ oŋ na bɔ libie yaga a donɛɛŋ. Kyɛ pampana ŋa o yuomo gaa la nimitɔɔre, a ba lɛ e mɔlɔ meŋ koo ka o nyɛ libie a kaa o yideme zu, ka lɛ vɛŋ oŋ piili bonnɔ ka aminekaŋaŋ o da ba de gbɛ-soŋ o baapaaloŋ saŋa. Bee te yɔɔpɔge nyaaŋaa kaŋa ba lɛ taa faŋa yaga. O eŋɛ na baŋ kyoɔreŋ, bonso o ba lɛ taa faŋa a na toŋ aŋa lɛ oŋ da maŋ toŋ saŋa kaŋa naŋ pare na. Ka lɛ ho daŋ soorɛɛ ho meŋɛ a soorebie ŋa: ‘Jehoova nyɛrɛ maŋ yɛŋ? Yɛlɛ na zaa maŋ de iri sareka ko Jehoova na taa la tɔnɔ yɛŋ? Ka lɛ N naŋ taa la tɔnɔ ko Jehoova yɛŋ?’
2 Ka teneeŋ taa a soorebie ŋa taa kyɛ ba bɔ a noɔre iribo, a na baŋ sãã la te sagediibu ka te gba bare Jehoova puoruu. A zannoo ŋa poɔŋ, te na zannɛɛ Baabole poɔ sowuli mine naŋ na baŋ soŋ te ka teneeŋ wa taa bonnoo (1) ka Jehoova ba taa te yɛlɛŋ, (2) bee a bonnɔ ka gbɛɛ mine teŋ da de saŋa kaŋa naŋ pare ba soma, bee (3) a bonnɔ ka kaapɔge te ba taa tɔnɔ ko Jehoova.
BOŊ NA BAŊ SOŊ TE KA TENEEŊ WA TAA BONNOO?
3. Ka teneeŋ wa taa bonnoo, boŋ na baŋ soŋ te ka te toɔ̃ iraa bare te teɛroŋ poɔŋ?
3 Ka teneeŋ wa taa bonnoo, a na somaŋ ka te maŋ peɛre bɔ te soorebie nɔɛ iribo yi a Baabole poɔŋ. Ka teneeŋ erɛ lɛ, a na soŋ teŋ ka te sagediibu maaleŋ e kpeɛŋaa, ka te neŋ Jehoova zɔmennoŋ meŋ e kpeɛŋaa, a kyɛ “taa a [te] yeldeebo kpeɛŋaa.”—1 Kor. 16:13.
4. Wala teŋ na baŋ e a “maŋ tegre yelzaa nyɛ”? (1 Tɛsalonika 5:21)
4 Kanne 1 Tɛsalonika 5:21. A Baabole eŋ teŋ faŋa ka te “maŋ tegre yelzaa nyɛ.” Wala teŋ na baŋ e a toɔ̃ e lɛ? Ka teneeŋ taa bonnoo a kyaare yelkaŋa te naŋ sagedi, te na baŋ peɛrɛɛ a Baabole poɔŋ a nyɛ lɛ a Baabole naŋ yel. Aŋa mannoo poɔŋ, te de ka baapaalaa kaŋa teɛrɛŋ ka aminekaŋaŋ Jehoova ba taa o yɛlɛŋ. Aseŋ ka o sagedi ka Jehoova sereŋ ba taa o yɛlɛŋ bee? Ai, aseŋ ka o ‘tegre a yɛlɛ nyɛ,’ a peɛre a Baabole a nyɛ ka Jehoova taa la o yɛlɛŋ bee ka o ba taa o yɛlɛŋ.
5. Sobuo ka Jehoova maŋ tu a kyɛ yele yɛlɛ korɔ te teŋ nyɛ te soorebie nɔɛ iribo?
5 Ka teneeŋ wa kanna a Baabole a maŋ waa ŋa Jehoova naŋ yele yɛlɛ korɔ te. Kyɛ ka teneeŋ taa soorebie mine a boɔrɔ ka te nyɛ a nɔɛ iribo, aseŋ ka te mɔɔ kyɛ peɛre a yɛlɛ gaa tɔɔre. Aseŋ ka te peɛre a Baabole ziiri naŋ na baŋ soŋ te ka nyɛ te soorebie na nɔɛ iribo. Te na baŋ peɛrɛɛ a yɛlɛ yi te gama na mine meŋ poɔŋ. (Yeng. 2:3-6) Te na baŋ puore sɔrɛɛ Jehoova ka o soŋ te ka te nyɛ te soorebie na nɔɛ iribo. A kyɛ pãã peɛre bɔ Baabole sowuli mine naŋ na baŋ soŋ te te yɛlɛ na poɔŋ. Te na baŋ kannɛɛ noba na mine naŋ da tuore yɛlɛ na taa te naŋ tuoro ka ba yɛlɛ be a Baabole poɔŋ na zemmo yɛlɛ.
6. Ka teneeŋ wa gaa te lammore, sobuo aŋ maŋ soŋ te ka bonnoo te naŋ taa na baare?
6 Ka teneeŋ wa gaa te lammore na a te zanna a Baabole, a maŋ waa ŋa Jehoova naŋ yele yɛlɛ korɔ te. Ka teneeŋ maŋ gɛrɛ a lammore wagre zaa, te na baŋ woŋee yelkaŋa yi yelyaga ba naŋ terɛ poɔŋ, bee a yi te yɔɔ kaŋa soorebiri noɔre iribo o naŋ tere poɔŋ, ka a baŋ soŋ te ka te bonnoo na baare. (Yeng. 27:17) Te pãã waanaŋ ka te nyɛ bonnoo mine te naŋ maŋ taa, ane lɛ teŋ na baŋ e peɛre nyɛ te soorebie te naŋ taa nɔɛ iribo.
BOŊ NA BAŊ SOŊ BO KA HOOŊ WA TEƐRƐ KA JEHOOVA BA TAA HO YƐLƐŊ?
7. Bo soorebiri la ka noba mine na baŋ soore?
7 Ho daŋ soorɛɛ ho meŋɛ ka, ‘Ka lɛ Jehoova maŋ nyɛrɛ maŋ yɛŋ?’ Ka hooŋ maŋ teɛrɛ ka hooŋ yɛŋ ba dɔgle bonzaa zuŋ, ho na teɛrɛŋ ka hooŋ yɛŋ daŋ koŋ baŋ nyɔge zɔmennoŋ neŋ Soba na naŋ maale a aŋdonɛɛ zaa na. Aminekaŋaŋ Naa Deevid meŋ da taa la a lɛ teɛroŋ ŋa. A da e oŋ nɔmãã yaga zaa o naŋ wa baŋ ka Jehoova taa la nensaaleba yɛlɛŋ. O da yeleeŋ ka: “O Jehoova, boŋ la nensaalaa ka ho baga be o zieŋ, bee nensaalaa bie hoŋ teɛrɛ o yɛlɛ?” (Yiem. 144:3) Yeŋ hoŋ na baŋ nyɛ a soorebiri ŋa noɔre iribo, “Ka lɛ Jehoova baga be la nensaaleba zieŋ bee?”
8. Aŋa lɛ 1 Saamiuel 16:6, 7, 10-12 naŋ yel na, boŋ ka Jehoova maŋ nyɛ noba eŋɛŋ?
8 Te zannɛɛŋ a yi a Baabole poɔŋ ka, bana na noba naŋ maŋ nyɛ ka ba ba dɔgle bonzaa zuŋ na, Jehoova yɛŋ maŋ nyɛ baŋ. Aŋa mannoo poɔŋ, Jehoova da toŋɛɛ Saamiuel ka o gaa sɔ Gyeesi bidɔbɔ na kaŋa naaloŋ kãã ka o wa e Izerayɛl naa nendaarekaŋa. Gyeesi da boɔlɛɛ o bidɔbɔ bayɔpoi ka ba wa nyɛ Saamiuel kyɛ o da ba boɔle Deevid naŋ da e ba bere-baaraa soba na. b Kyɛ, Deevid ka Jehoova da kaa iri. (Kanne 1 Saamiuel 16:6, 7, 10-12.) Jehoova da nyɛrɛɛ Deevid sukyiri a baŋ neɛ na meŋɛ naŋ la Deevid. O da baŋ ka a bipɔl-bile ŋa nɔmooŋ yaga zaa.
9. Bonso teŋ na baŋ sagedi meŋɛmeŋɛ ka Jehoova taa la te yɛlɛŋ? (Kaa a foto meŋ.)
9 Hooŋ leɛteɛre yɛlɛ na mine naŋ wuli ka Jehoova taa la ho yɛlɛŋ. O maŋ ko boŋ kawane naŋ na baŋ soŋ bo ka ho de gbɛ-sonne ho zemmo poɔŋ. (Yiem. 32:8) Lɛ wuleeŋ ka o baŋ boŋ, a baŋ yɛlɛ meŋ naŋ soma ko bo ho zemmo poɔŋ. (Yiem. 139:1) Ka hooŋ de Jehoova kawane a tonɔ neŋ toma ho zemmo poɔŋ, a nyɛ lɛ a naŋ sonnɔ bo ho zemmo poɔŋ na, ho na wa sagediŋ ka Jehoova sereŋ taa la ho yɛlɛŋ. (1 Tun. 28:9; Tom. 17:26, 27) Jehoova nyɛrɛɛ mɔɔre na zaa ho naŋ mɔɔrɔ ka ho puoruu a kyɛ erɛ yɛlɛ naŋ pɛlɛ o poɔ na. O nyɛɛ gyog-sonne na zaa ho naŋ taa, a boɔrɔ ka o e ho zɔmeŋɛ meŋ. (Jer. 17:10) O poɔ na pɛleŋ yaga zaa ka hooŋ meŋ boɔrɔ ka ho e o zɔmeŋɛ.—1 Gyn. 4:19.
“Ka hooŋ bɔ [Jehoova] zie, o na vɛmeŋ ka ho nyɛ o.”—1 Tun. 28:9 (Kanne o wɛlbo 9) c
KA HOOŊ WA BONNƆ KA KAAPƆGE SAŊA KAŊA NAŊ PARE HO BA DE GBƐ-SONNE HO ZEMMO POƆŊ, BOŊ NA BAŊ SOŊ BO?
10. Ka teneeŋ maŋ teɛre gbɛɛ mine teŋ da de saŋa kaŋa naŋ pare yɛlɛ, bo soorebie teŋ na baŋ soore te menne?
10 Saŋa kaŋa, noba mine na baŋ zeŋ teɛrɛɛ gbɛɛ mine baŋ da de saŋa kaŋa naŋ pare, a bonnɔ ka aminekaŋaŋ ba da ba de gbɛ-sonne. Aminekaŋaŋ ba da barɛɛ toma mine saŋyɔɔ naŋ da soma yaga, bee a de gbɛre ka ba koŋ e yaako zaa naŋ na deɛ ba wagre yaga ka lɛ vɛŋ ka ba toɔ̃ nyɛ wagre yaga a toŋ Jehoova puoruu toma. Kyɛ kaapɔge yuomo yaga naŋ pare baŋ de a lɛ gbɛre ŋa. Aminekaŋaŋ, ba na nyɛɛ ba taaba mine yɛŋ naŋ da de ba wagre zaa bɔ libie ka pampana ŋa baŋ taa libie yaga, ka libi-yɛlɛ ba ferɛ ba ba zemmo poɔŋ. Lɛ na baŋ vɛŋeŋ ka ba teɛrɛ ka: ‘Ka lɛ gbɛre na maŋ da de ka N toŋ toma yaga ko Jehoova na da eɛ gbɛ-soŋ yɛŋ? Kyɛbee ka maaŋ meŋ da toŋ toma yaga a bɔ libie a meŋ da taa libie yaga pampana lɛŋ da seɛ?’
11. Bo yɛlɛ la da dɔnnɔ a yieloŋ yiele naŋ sɛge Yieme 73 na?
11 Ka hooŋ meŋ taa a lɛ teɛroŋ ŋa tɔ, peɛre a yieloŋ yiele naŋ sɛge Yieme 73 na yɛlɛ. O da nyɛɛ noba naŋ ba puoro Jehoova naŋ da taa libie, a taa laafeeloŋ naŋ soma, aŋ waa ŋa yelzaa ba dɔnnɔ ba ba zemmo poɔŋ. (Yiem. 73:3-5, 12) Saŋa na oŋ da wa nyɛ ka a waa ŋa ba zemmo somaŋ ka yelzaa ba ferɛ ba na, o da teɛrɛŋ ka gbɛre na oŋ de ka o puoro Jehoova na, tɔnɔ zaa kyebe. Bebiri zaa a yɛlɛ da maŋ dɔnnooŋ yaga zaa. (Yiem. 73:13, 14) Boŋ da somoo oŋ toɔ̃ iri a teɛroŋ faare ŋa bare o teɛroŋ?
12. Aŋa lɛ Yieme 73:16-18 naŋ yel na, boŋ da soŋ a yieloŋ yiele ka o eŋkyoɔre na baare?
12 Kanne Yieme 73:16-18. A yieloŋ yiele da gaa la Jehoova ŋmenpuoredie. Saŋa na oŋ da wa gaa be na, o da toɔ̃ teɛrɛɛ yɛlɛ soŋ. O da wa nyɛɛŋ ka aneazaa ka a waa ŋa noba mine wonee noɔ̃ ba zemmo poɔŋ, kyɛ ba ba taa nendaarekaŋa teɛretɔ zaa. A da vɛŋɛɛŋ ka o eŋkyoɔre na baare, kyɛ oŋ maaleŋ sagedi yaga zaa ka oŋ de Jehoova puoruu daŋ weɛ o zemmo poɔŋ na la gbɛre naŋ soma yaga zaa. Azuŋ o da eɛ siri ka o naŋ na moɔ̃ la nimiri a puoro Jehoova.—Yiem. 73:23-28.
13. Ka hooŋ e kaŋdabaŋkalɛ ane gbɛɛ mine ho naŋ da de saŋa kaŋa naŋ pare, boŋ na baŋ soŋ bo? (Kaa a foto meŋ.)
13 Aŋa a Yieloŋ Yiele, ho meŋ na baŋ iree a teɛroŋ faare ŋa taa yi ho teɛroŋ. Sobuoŋ? Maŋ teɛrɛ bonsonne na zaa ho naŋ taa ho zemmo poɔŋ na, a teɛre meŋ ka Jehoova maaloo be la ho zieŋ. Baŋ meŋ ka bana na naŋ ba puoro Jehoova na, ba ba taa Jehoova maaloo. Noba yaga zie zaa naŋ ba puoro Jehoova na, ba maŋ de la ba menne zaa dɛle tonsonne ba naŋ taa, bonso ba ba taa nendaarekaŋa teɛretɔ zaa. Kyɛ hooŋ yɛŋ, Jehoova korɔ boŋ kyɔɔta-sonne pampana, a lɛ eŋ noɔre ka o na ko boŋ bonsonne yaga nendaarekaŋa meŋ. (Yiem. 145:16) Hooŋ leɛteɛre a yɛlɛ ŋa meŋ nyɛ, ho koŋ baŋ baŋ te baare lɛ ho zemmo naŋ da naaŋ waa ka hooŋ da ba de gbɛre ka ho de ho wagre zaa tonɔ Jehoova toma. Kyɛ yelkaŋa te naŋ baŋ peɛlaaŋ la ŋa: Ka hooŋ wa de gbɛɛ mine ho naŋ nɔŋ Naaŋmen ane nensaaleba zuŋ, ho na nyɛ la maaloo yaga naŋ na vɛŋ ka ho taa popeɛloŋ meŋɛmeŋɛ.
Maŋ teɛrɛ maaloo na zaa Jehoova naŋ eŋ noɔre ka o na ko teŋ na yɛlɛ (Kanne o wɛlbo 13) d
KA HOOŊ WA TEƐRƐ KA HO BA TAA TƆNƆ KO JEHOOVA
14. Bo yɛlɛ mine poɔŋ ka noba mine be, ka bo soorebiri baŋ na baŋ soore ba menne?
14 Nyaaŋbo ane baaloŋ zuŋ, Jehoova puorebiiri mine koŋ baŋ toŋ toma yaga Jehoova puoruu poɔŋ aŋa lɛ baŋ da boɔrɔ na. Azuŋ a maŋ vɛŋeŋ baŋ teɛrɛ ka ba ba taa tɔnɔ ko Jehoova. Aminekaŋaŋ ba na sooreŋ ka, ‘Ka lɛ N meŋ naŋ taa la tɔnɔ ko Jehoova yɛŋ?’
15. Bo yɛlɛ ka a yieloŋ yiele naŋ sɛge Yieme 71 da sagedi meŋɛmeŋɛ?
15 A yieloŋ yiele naŋ sɛge Yieme 71 meŋ da taa la a lɛ teɛroŋ ŋa. O da puoreeŋ, a yelka: “Ta wa gyeɛre ma bara saŋa na N faŋa naŋ baara.” (Yiem. 71:9, 18) Aneazaa ka a yieloŋ yiele faŋa da baarɛɛŋ, kyɛ o da taa la sagediibu ka, ka o naŋ puore Jehoova yelmennoŋ poɔŋ a te ta a baaraa Jehoova na somooŋ. A yieloŋ yiele wa zanne nyɛɛŋ ka, Jehoova poɔ maŋ pɛle neŋ la bana na naŋ maŋ yi yelmennoŋ poɔŋ a puoruu aneazaa ka ba tuoree yelkpeɛne.—Yiem. 37:23-25.
16. Bo yɛlɛ mine la ka neŋnyaane na baŋ e ko Jehoova? (Yieme 92:12-15)
16 Ka hooŋ e neŋnyaaŋaa, teɛre nyɛ teɛroŋ na Jehoova naŋ taa kyaare bo. O na baŋ soŋ boŋ ka ho puoruu yelmennoŋ poɔŋ aneazaa ka ho laafeeloŋ ba paale. (Kanne Yieme 92:12-15.) Ta de ho teɛroŋ eŋ yɛlɛ hoŋ koŋ baŋ e eŋɛŋ, kyɛ, de ho teɛroŋ zaa eŋ yɛlɛ hoŋ na baŋ e pampana na eŋɛŋ. Aŋa mannoo poɔŋ, ho ewuli sonne ane lɛ hoŋ maŋ wuli ka ho teɛrɛɛ ho taaba yɛlɛ na na baŋ eŋ baŋ faŋa. Ho na baŋ yelko baŋ lɛ Jehoova naŋ soŋ bo a yuomo ŋa zaa poɔŋ, ane Jehoova nɔ-ennee na zaa ho naŋ kaara soriŋ ka ho nyɛ nendaarekaŋa. Daŋ ta wa inne ka, ka hooŋ maŋ puore ko ho yɔɔmine, a na soŋ baŋ yaga zaa. (1 Pit. 3:12) Lɛ zaa te zemmo naŋ waa, te zaa taa la yelkaŋa teŋ na baŋ e ko Jehoova ane te taaba.
17. Ananso la wala aŋ ba seŋ ka te de te menne manna neŋ te taaba?
17 Ka ho eŋɛŋ wa kyoɔre, ka ho teɛrɛ ka ho koŋ baŋ lɛ e yelzaa ko Jehoova, teɛre baŋ ka o niŋe paɛŋ yaga zaa ane yɛlɛ na zaa ho naŋ toɔnɔ erɛ koroo na. Aminekaŋaŋ ho na maŋ boɔrɔŋ ka ho de yɛlɛ na ho naŋ toɔnɔ erɛ na manna neŋ yɛlɛ noba mine naŋ toɔnɔ erɛ. Kyɛ, a ba seŋ ka ho erɛ lɛ! Bonso Jehoova ba derɛ yɛlɛ ho naŋ toɔnɔ erɛ manna neŋ neɛzaa. (Gal. 6:4) Aŋa mannoo poɔŋ, Mareya da ko la Yezu kãã-nyunoɔ̃ daaroŋ naŋ ba wono. (Gyn. 12:3-5) Ka a ko-pɔge na meŋ da de libi-kuree ayi naŋ e libi-bilii a wa eŋ a ŋmenpuoredie libie eŋ zie naŋ. (Luk. 21:1-4) Kyɛ Yezu da ba de a pɔgeba bayi ŋa yɛlɛ na manne taa. O da nyɛɛŋ ka ba zaa bayi eɛ yɛlɛ a wuli ba sagediibu. Yezu maŋ tɔglɛɛ o Saa Jehoova yelzaa poɔŋ. Azuŋ ho na baŋ taa la sagediibu ka Jehoova maŋ nyɛrɛɛ yɛlɛ na zaa ho naŋ erɛ koroo ho sagediibu zuŋ ane ho naŋ nɔmoo zuŋ, o niŋe maŋ paŋ yaga, haali ka anaŋ gbaŋ e fẽẽ seŋ wala.
18. Boŋ na baŋ soŋ te ka te iri bonnoo zaa yi te teɛroŋ? (Kaa a daga ŋa meŋ, “ Jehoova Yelbiri Na Na Baŋ Soŋ Boŋ Ka Ho Iri Bonnoo Zaa Yi Ho Teɛroŋ.”)
18 Te zaa maŋ taa la bonnoo saŋa kaŋa. Kyɛ aŋa lɛ teŋ wa zanne nyɛ na, Naaŋmen yelmeŋɛ Yelbiri, a Baabole na baŋ soŋ teŋ ka te iri bonnoo zaa yi te teɛroŋ. Azuŋ ka hooŋ wa taa bonnoo zaa, maŋ mɔɔ kyɛ peɛre bɔ ho soorebie zaa nɔɛ iribo. Jehoova baŋ boŋ soŋ, a baŋ neɛ na meŋɛ naŋ la bo. O niŋe paɛŋ yaga zaa ane yɛlɛ na zaa ho naŋ de iri sareka kyɛ na toɔ̃ toŋ o puoruu toma na, o na paalɛɛ noɔre na meŋ oŋ eŋ ka o na ko boŋ maaloo na. Jehoova nɔŋɛɛ o yelmeŋɛ puorebiiri zaa, a teɛrɛ ba yɛlɛ meŋ yaga zaa.
YIELOŊ 111 Our Reasons for Joy
a YELBIE MINE BA NAŊ WULI A MUNI: A zannoo ŋa poɔŋ, te na zannɛɛ lɛ bonnoo naŋ na baŋ vɛŋ ka te teɛrɛ ka te ba taa tɔnɔ ko Jehoova, bee a teɛrɛ ka te ba de gbɛ-sonne te zemmo poɔŋ saŋa kaŋa naŋ pare. A bonnoo ŋa taa ba e bonnoo na a Baabole naŋ yelka a maŋ wuliŋ ka neɛ ba taa sagediibu Jehoova ane o nɔ-ennee eŋɛŋ na.
b Aneazaa ka a Baabole ba wuli yuomo na Deevid naŋ da nyɛ saŋa na Jehoova naŋ da iruu ka o e naa na, kyɛ aminekaŋaŋ o da be la o yuomo pie neŋ ata te tɔ pie neŋ awae kpakyagaŋ.—Kanne A Kaakaara Ziduoruu September 1, 2011 gane na, gam. 29, wɛl. 2. (O be la Nansaalee ane Twi kɔkɔɛ poɔŋ.)
