ZANNOO YƐLƐ 40
YIELOŊ 30 My Father, My God and Friend
Jehoova Maŋ “Saŋɛɛ Noba Na Sukyie Naŋ Kyɛre”
“O maŋ saŋɛɛ noba na sukyie naŋ kyɛre; o maŋ lee ba felɛ.”—YIEM. 147:3.
YƐLƐ TE NAŊ NA ZANNE
Jehoova taa la noba na sukyie naŋ kyɛre na yɛlɛŋ yaga zaa. A zannoo ŋa na soŋ teŋ ka te nyɛ soe o naŋ maŋ tu kyɛ diire te sukyie ka te sukyieŋ wa kyɛre ane lɛ teŋ na toɔ̃ e a dii te taaba sukyie.
1. Wala ka yɛlɛ maŋ waa ko Jehoova ka onaŋ wa nyɛ yɛlɛ o puorebiiri naŋ tuoro?
JEHOOVA maŋ nyɛrɛɛ yɛlɛ na zaa o puorebiiri naŋ tuoro. Ka te poɔŋ wa pɛle bee ka te poɔŋ wa sãã, o maŋ nyɛ aŋ. (Yiem. 37:18) Ka onaŋ wa nyɛ lɛ te naŋ mɔɔrɔ te mɔɔbo zaa a puoruu aneazaa ka te tuoree yelkpeɛne, o poɔ maŋ pɛle ne teŋ yaga zaa! Agaŋaazaa, o eɛ siri ka o soŋ te a kyɛ dii te sukyie meŋ.
2. Boŋ ka Jehoova maŋ e ko noba na sukyie naŋ kyɛre, ka bo tɔnɔ teŋ na baŋ nyɛ yi a lɛ sommo na poɔŋ?
2 Yieme 147:3 yeleeŋ ka, bana na sukyie naŋ kyɛre na, Jehoova ‘maŋ leŋ la ba felɛ.’ A Baabole sɛgre ŋa wulee lɛ na Jehoova naŋ maŋ sonnɔ bana na sukyie naŋ kyɛre. Kyɛ wala teŋ na baŋ e a nyɛ tɔnɔ yi sommo na zaa Jehoova naŋ maŋ korɔ te na poɔŋ? Te nyɛ a yelmannaa ŋa. Dɔkta naŋ baŋ o toma nimiri na mɔɔ la o mɔɔbo zaa ka o saŋ neɛ naŋ pere. Ka a neɛ naŋ pere naŋ na baŋ nyɛ laafeɛ, aseŋ ka o de sowuli na zaa a dɔkta naŋ koo na toŋ neŋ toma soŋ. A zannoo ŋa poɔŋ, te na nyɛɛ lɛ Jehoova naŋ yel a yi o Yelbiri na poɔŋ a kyaare noba na sukyie naŋ kyɛre ane lɛ teŋ na baŋ de kawane na o naŋ yi nɔmmo poɔŋ a ko te na toŋ neŋ toma.
JEHOOVA VƐŊƐƐŊ TEŊ BAŊ KA TE EƐ NANEE YAGA ZAA KOO
3. Bonso ka noba mine maŋ teɛre ka ba ba taa tɔnɔ zaa?
3 A yɛlɛ nembao zie la ka, noba yaga naŋ be a donɛɛ zuŋ zenɛ ŋa ba nɔŋ ba taaba yɛlɛ, azuŋ ba maŋ dɔgrɔ baŋ ka lɛ vɛŋ baŋ maŋ teɛrɛ ka ba ba taa tɔnɔ zaa. Te yɔɔpɔge kaŋa yuori naŋ di Helen a yeleeŋ ka: “N dɔgreba da ba taa nɔmmo fẽẽ zaa. N saa da maŋ erɛɛ nimikuõ-yɛlɛ yaga zaa a da maŋ yelko ma ka N ba taa tɔnɔ zaa.” Aminekaŋaŋ, neɛ kaŋa erɛ boŋ nimikpɛ yɛlɛ yaga zaa, a maŋ toorɔ bo zoma, a vɛŋ aŋ waa ŋa ho naŋ ba taa tɔnɔ zaa. Ka lɛ aŋ waa ko bo yɛŋ, ana baŋ eɛ kpeɛŋaa ka ho sagedi ka neɛ sereŋ na baŋ nɔŋ boŋ meŋɛmeŋɛ.
4. Aŋa lɛ na Yieme 34:18 naŋ yel na, bo teɛretɔ ka Jehoova ko te?
4 Ka neɛ kaŋaŋ wa erɛ bo nimikpɛ yɛlɛ gba, kyɛ ho na baŋ sagediŋ ka Jehoova nɔŋ boŋ yaga zaa, a taa ho yɛlɛŋ meŋ. O “peɛlɛɛ noba na sukyie naŋ kyɛre.” (Kanne Yieme 34:18.) Ka hooŋ wa teɛrɛ ka ho ba taa tɔnɔ zaa, teɛre baŋ ka Jehoova nyɛɛ gyog-sonne na ho naŋ taa, azuŋ oŋ tage bo waneŋ o sɛŋ. (Gyn. 6:44) O maŋ eɛ siri wagre zaa ka o soŋ bo, bonso, ho eɛ nanee yaga zaa koo.
5. Bo yɛlɛ teŋ na baŋ zanne yi lɛ na Yezu naŋ da maŋ wulo nimibaaloŋ korɔ noba na naŋ da maŋ teɛrɛ ka ba ba taa tɔnɔ zaa na?
5 Ka teneeŋ zanna Yezu ewuluu na, a na soŋ teŋ ka te baŋ lɛ yɛlɛ naŋ maŋ waa ko Jehoova. Saŋa na Yezu naŋ da be a teŋɛzuŋ na, o da maŋ wulee nimibaaloŋ korɔ bana naŋ da maŋ teɛrɛ ka ba ba taa tɔnɔ zaa na. (Mat. 9:9-12) Saŋa na pɔge kaŋa naŋ da beɛrɛ baaloŋ nimizeɛ kaŋa naŋ da wa nyɔge o kparooŋ a taa tamaa ka o na nyɛ la baaloŋ saŋ na, Yezu da dii la o sukyiri a kyɛ puguu ka o taa la sagediibu yaga zaa. (Mak. 5:25-34) Yezu da wulee gyogri na meŋɛ o Saa naŋ taa. (Gyn. 14:9) Azuŋ ho na baŋ sagediŋ peɛlaaŋ ka ho eɛ nanee yaga zaa ko Jehoova, o nyɛrɛɛ ho gyog-sonne, ho sagediibu a neŋ nɔmmo ho naŋ taa koo.
6. Ka hooŋ wa teɛrɛ ka ho ba taa tɔnɔ zaa, boŋ hoŋ na baŋ e?
6 Ka hooŋ daŋ wa teɛre ka ho ba taa tɔnɔ zaa, boŋ hoŋ na baŋ e? Maŋ kanna Baabole sɛgre naŋ wulo ka ho eɛ nanee yaga zaa ko Jehoova, a teɛrɛ a yɛlɛ gɛrɛ tɔɔre. b (Yiem. 94:19) Ta maŋ derɛ ho meŋɛ manna neŋ ho taaba, lɛ neŋ o zu meŋ aŋ ba seŋ ka ho maŋ de ho teɛroŋ zaa meŋ eŋ yɛlɛ hoŋ koŋ baŋ e eŋɛŋ. Jehoova ba kaara soriŋ ka te erɛ yɛlɛ naŋ gaŋ te faŋa. (Yiem. 103:13, 14) Ka neɛ kaŋaŋ daŋ e bo nimikuõ yɛlɛ mine saŋa kaŋa naŋ pare, ta paana ho meŋɛ ka hooŋ vɛŋ ka a yɛlɛ pɔge bo! Teɛre baŋ ka Jehoova na di la noba na naŋ dɔgrɔ ba taaba sɛrɛɛ, a kyɛ soŋ bana na ba naŋ dɔgrɔ na. (1 Pit. 3:12) Sandra da tuoree daŋkyagre o biiloŋ saŋa, ŋaa oŋ yel, “N da maŋ puore sɔrɛɛ Jehoova wagre zaa ka o soŋ ma ka N nyɛ gyog-sonne na o naŋ nyɛrɛ N eŋɛŋ na.”
7. Sobuoŋ ka yɛlɛ teŋ daŋ tuore te zemmo poɔŋ na baŋ soŋ te ka te baŋ soŋ te taaba Jehoova puoruu poɔŋ?
7 Daŋ ta wa bonnɔ zaa ka Jehoova na baŋ tu la ho eŋɛŋ a kyɛ soŋ ho taaba. O ko boŋ apoɔsori ka ho ne o laŋ toŋ toma a naaŋ moɔloo poɔŋ. (1 Kor. 3:9) Ho naŋ daŋ tuore daŋkyagre zuŋ, a na baŋ eɛ mɔlɔ ka ho taa yɛlɛ muni wommo ko noba naŋ tuoro daŋkyagre. Ho na baŋ eɛ yɛlɛ yaga zaa a soŋ ba. Helen, teŋ daŋ yel o yɛlɛ na nyɛɛ sommo, azuŋ pampana o meŋ maŋ toɔ̃ soŋ la o taaba. O yelka: “N da maŋ teɛreŋ ka N ba taa tɔnɔ zaa, Kyɛ Jehoova soŋ maŋ maŋ wa nyɛ ka o nɔŋ maŋ, a maŋ tuuro N eŋɛŋ kyɛ sonnɔ N taaba meŋ.” Helen poɔ pɛlɛɛŋ yaga zaa o meŋ naŋ tonɔ a paaneɛ toma.
JEHOOVA BOƆRƆŊ KA TE SAGE KA O DI LA TE YELBEBE SUURI KO TE
8. Boŋ ka Jehoova yele korɔ te aŋ be Aizeeya 1:18?
8 Jehoova puorebiiri mine naŋ maŋ paanɛɛ ba menne yelfaare mine ba naŋ e saŋa kaŋa naŋ pare, ka ba eɛ ana yelfaare na sɛre kyɛ derɛ suobu bee ka ba eɛ ana yelfaare na ba suobu deebo puoriŋ. Kyɛ, maŋ teɛre baŋ ka Jehoova nɔŋ teŋ yaga zaa, azuŋ oŋ ko te a yɔɔdeɛbo. Azuŋ, te na baŋ sagediŋ peɛlaaŋ ka o boɔrɔŋ ka te sage o kyɔɔtaa ŋa. Jehoova eŋ teŋ noɔre ka, ka te neŋ o wa “maale taa soŋ” c baare, o na di la suuri ko te kpɛlɛŋkpɛlɛŋ. (Kanne Aizeeya 1:18.) Te poɔ pɛlɛɛŋ yaga zaa ka te baŋ ka Jehoova ba maŋ lɛ teɛrɛ yelfaare te naŋ e aŋ pare yɛlɛ! Kyɛ o daŋ koŋ inni yelsonne na zaa te naŋ e na.—Yiem. 103:9, 12; Hib. 6:10.
9. Bonso aŋ ba seŋ ka te de te teɛroŋ zaa eŋ yelfaare mine te naŋ e aŋ pare eŋɛŋ?
9 Ka yɛlɛ mine ho naŋ e aŋ pare naŋ wa dɔnnɔ bo yaga zaa, mɔɔ ho mɔɔbo zaa a de ho teɛroŋ zaa eŋ yɛlɛ ho naŋ erɛ pampana ane yɛlɛ hoŋ na baŋ e nendaarekaŋa a gaŋ hoŋ na de ho teɛroŋ eŋ yɛlɛ ho naŋ e aŋ pare. Leɛteɛre a bitontona Pɔɔl zemmo yɛlɛ. O da e la kaŋdabaŋkalɛ o naŋ da dɔgre a Kristabiiri yaga zaa, kyɛ o da baŋɛɛŋ ka Jehoova di la suuri koo. (1 Tim. 1:12-15) Kyɛ o da naŋ teɛrɛɛ yelfaare na oŋ e aŋ pare na bee? Nɔkpeɛne zaa kyebe ka o da zagrɛɛŋ ka o e lɛ aŋa lɛ na oŋ da zagre ka o teɛrɛ yɛlɛ na oŋ da maŋ erɛ ka lɛ vɛŋ oŋ da de yuori yaga zaa a Gyuu puoruu poɔŋ na. (Fil. 3:4-8, 13-15) Pɔɔl da mɔɔrɛɛ o mɔɔbo zaa Jehoova puoruu toma poɔŋ, a de o teɛroŋ zaa eŋ nendaarekaŋa yɛlɛŋ. Aŋa Pɔɔl, ho meŋ koŋ baŋ leɛre yɛlɛ naŋ pare ho zemmo poɔŋ. Kyɛ ho na baŋ deɛ emmo naŋ seŋ neŋ a korɔ Jehoova, a erɛ o boɔbo pampana, a kyɛ de ho teɛroŋ zaa eŋ noɔre na o naŋ eŋ bo hoŋ na nyɛ nendaarekaŋa na.
10. Ka yɛlɛ te naŋ e saŋa kaŋa naŋ pare wa sãã noba mine poɔ, wala teŋ na baŋ e?
10 Aminekaŋaŋ, yɛlɛ ho naŋ e a sãã noba mine poɔ saŋa kaŋa naŋ pare yɛlɛ na baŋ dɔnnɔ boŋ. Boŋ na baŋ soŋ bo? Mɔɔ ho mɔɔbo zaa ka yɛ maale a yɛlɛ. Ane meŋ, yelko ba, a kyɛ vɛŋ ka ba baŋ ka ho ŋmɛɛ gbɛre. (2 Kor. 7:11) Puore sɔre Jehoova ka o soŋ bana na ho naŋ e yɛlɛ a sãã ba poɔ na. O na baŋ soŋ la ho neŋ bana na zaa ho naŋ sãã ba poɔ na, ka yɛ zaa naŋ puoruu a kyɛ naŋ taa emmaaroŋ.
11. Boŋ teŋ na baŋ zanne yi a daŋyele Gyoona zemmo yɛlɛ ŋa poɔŋ? (Kaa a foto meŋ.)
11 Maŋ zanne yelkaŋa yi ho gbɛ-ŋmɛ eŋɛŋ, a kyɛ ko Jehoova a vuo ka o de bo toŋ neŋ toma zaa o naŋ boɔrɔ. Te nyɛ a daŋyele Gyoona zemmo yɛlɛ. Aŋ da seŋ ka o gaa Ninevɛ aŋa lɛ Jehoova naŋ da yelkoo na, o da zoroŋ ka o gaa zi-zaala. Jehoova da tagɛɛ Gyoona toori, ka lɛ vɛŋ oŋ zanne yelkaŋa yi o gbɛ-ŋmɛ eŋɛŋ. (Joona 1:1-4, 15-17; 2:7-10) Jehoova da ba zagre Gyoona bare. Kyɛ Naaŋmen da lɛ yelkooŋ ka o gaa Ninevɛ, pampana ŋa yɛŋ, tɔntɔbaalɛ ka Gyoona da kyɛlle woŋ. O da ba vɛŋ ka o gbɛ-ŋmɛ na pigi o sori ka o toŋ toma na Jehoova naŋ la koo ka o toŋ na.—Joona 3:1-3.
Saŋa na Gyoona naŋ da wa yi a zoŋkpoŋ poɔŋ a ba kpi na, Jehoova da la yelkooŋ ka o gaa Ninevɛ a te manne O duoro na ko a noba (Kanne o wɛlbo 11)
JEHOOVA MAŊ TU LA O VOOROŊ SOŊ NA EŊƐŊ A KYƐ DII TE SUKYIE
12. Sobuoŋ ka Jehoova maŋ ko te emmaaroŋ ka teneeŋ wa tuoro yelkpeɛne te zemmo poɔŋ? (Filipae 4:6, 7)
12 Jehoova maŋ tu la o vooroŋ soŋ na eŋɛŋ a kyɛ dii te sukyie ka teneeŋ wa tuoro yelkpeɛne mine te zemmo poɔŋ. Te nyɛ Ron ane Carol zemmo yɛlɛ ŋa. Ba bidɔɔ da ko la o meŋɛ, nyɛ sukyiri kyɛre yɛlɛ naŋ seŋ lɛ. Ba yeleeŋ ka: “Te tuoree yelkpeɛne yaga zaa te zemmo poɔŋ, kyɛ a yɛlɛ ŋa yɛŋ da gaŋ la te faŋa. Te da maŋ puoreŋ gbɛɛ yaga ka yɛlɛŋ wa gaali te, azuŋ te sereŋ da maŋ nyɛ la emmaaroŋ na Filipae 4:6, 7 naŋ yel o yɛlɛ na.” (Kanne.) Ka hooŋ wa tuoro sukyiri kyɛre yɛlɛ mine ho zemmo poɔŋ, wagre zaa ho na baŋ yelee ho sukyiri yɛlɛ zaa ko Jehoova puoro poɔŋ a kɔɔre lɛ zaa ho naŋ boɔrɔ. (Yiem. 86:3; 88:1) Maŋ puoro sɔrɔ Jehoova wagre zaa ka o ko bo o vooroŋ soŋ na. O na maŋ soŋ boŋ meŋ.—Luk. 11:9-13.
13. Sobuo ka a vooroŋ soŋ na baŋ soŋ te ka te naŋ puoro Jehoova yelmennoŋ poɔŋ? (Efesu 3:16)
13 Ho tuoree yelkpeɛne mine naŋ vɛŋ ka ho eŋɛ zaa kyoɔre hoŋ ba lɛ taa faŋa na e yelzaa bee? A vooroŋ soŋ na baŋ ko boŋ faŋa ka ho naŋ moɔ̃ nimiri puoro Jehoova yelmennoŋ poɔŋ. (Kanne Efesu 3:16.) Te nyɛ te yɔɔpɔge kaŋa yuori naŋ di Flora zemmo yɛlɛ. O neŋ o serɛ zaa da laŋ tonɛɛ a misinaare toma, kyɛ ka o serɛ na da sãã kultaa, ka lɛ vɛŋ baŋ bare a kultaa. O yeleeŋ ka: “Yɛlɛ na oŋ da e na da kyɛrɛɛ N sukyiri yaga zaa ka N teɛroŋ zaa gyɛre. N da puore sɔrɛɛ Jehoova ka o ko ma o vooroŋ soŋ ka N baŋ toɔ̃ are a yɛlɛ ŋa noɔreŋ. Jehoova da dii la N sukyiri, aneazaa ka a yɛlɛ da waa ŋa a naŋ gaŋ N faŋa, kyɛ Jehoova da soŋ maŋ maŋ nyɛ faŋa a toɔ̃ are a yeltuo ŋa noɔreŋ.” Flora nyɛɛŋ ka Naaŋmen somooŋ ka o sagediibu maaleŋ e kpeɛŋaa yaga zaa; o taa la a sagediibu meŋ ka o na somooŋ o yelkpeɛne zaa poɔŋ. O yeleeŋ ka, “Yelbie na naŋ be Yieme 119:32 mannɛɛ lɛ Jehoova naŋ somoo. Be yeleeŋ ka: ‘N na lonne de la ho bege toŋ neŋ toma, bonso ho maalɛɛ zie ko a N sukyiri poɔŋ.’”
14. Bo yɛlɛ teŋ na baŋ erɛ ka a soŋ te ka te nyɛ Naaŋmen vooroŋ soŋ na?
14 Ka hooŋ wa sɔre Jehoova ka o ko bo o vooroŋ soŋ na, boŋ aŋ seŋ ka ho meŋ e? Maŋ erɛ yɛlɛ naŋ na vɛŋ ka ho nyɛ Naaŋmen vooroŋ soŋ na. A mine la, a lammore gaabo ane a naaŋ moɔloo toma. Maŋ kanna Jehoova Yelbiri na bebiri zaa. Lɛ na soŋ boŋ ka ho maŋ teɛrɛ o yɛlɛ wagre zaa. (Fil. 4:8, 9) Ka hooŋ wa kanna a Baabole, maŋ kaara ka ho nyɛ noba mine naŋ da tuore yelkpeɛne ka ba yɛlɛ be a Baabole poɔŋ, a teɛre nyɛ lɛ na Jehoova naŋ soŋ ba baŋ are kpeɛŋaa na yɛlɛ gaa tɔɔre. Sandra teŋ daŋ yel o yɛlɛ na da tuoree yelkpeɛne yaga o zemmo poɔŋ. O yeleeŋ ka: “Gyoosɛf zemmo yɛlɛ na da tɔ la N sukyiri yaga zaa. O da ba vɛŋ ka a yelkpeɛne ane daŋkyagre na oŋ tuore na sãã o neŋ Jehoova niiloŋ na.”—Mun. 39:21-23.
JEHOOVA MAŊ TU LA TE YƆƆMINE EŊƐŊ A KYƐ DII TE SUKYIE
15. Nembobo zie teŋ na baŋ nyɛ sukyiridii, ka sobuo baŋ na baŋ soŋ te? (Kaa a foto meŋ.)
15 Ka teneeŋ wa tuoro yelkpeɛne mine, te yɔɔmine na baŋ ‘moore ko [teŋ] bee a dii te sukyie.’ (Kol. 4:11) Te yɔɔmine na eɛ sori na kaŋa Jehoova naŋ maŋ tu kyɛ wulo te nɔmmo. Ka teneeŋ wa manna te sukyie yɛlɛ zaa ka te yɔɔmine mãã ba menne a kyɛlle woŋ, bee a maŋ bɔ wagre a laŋna neŋ te, a na baŋ dii la te sukyie yaga zaa. Aminekaŋaŋ ba na kannɛɛ Baabole sɛgre kaŋa naŋ eŋnɛ faŋa ko te, bee ka ba vɛŋ ka te neŋ ba laŋ puore. d (Uro. 15:4) Saŋa kaŋa, te yɔɔ kaŋa na baŋ leɛteɛre teŋ teɛroŋ Jehoova naŋ taa kyaare yɛlɛ mine ka a soŋ te ka te toɔ̃ are kpeɛŋaa. Te yɔɔmine meŋ na baŋ lɛ eɛ yɛlɛ mine a soŋ te. Aŋa mannoo poɔŋ, ba na baŋ maalɛɛ bondirii a wa ko te.
Zɔmeŋ-sonne naŋ be dɛlebo na baŋ ko teŋ sukyiridii ane sommo (Kanne o wɛlbo 15)
16. Saŋa kaŋa wala aŋ seŋ ka te maŋ e sɛre kyɛ na baŋ nyɛ sommo yi te taaba zie?
16 Saŋa kaŋa ka teneeŋ na baŋ nyɛ sommo yi te yɔɔmine zie, aseŋ ka te sɔre sommo yi ba zie. Te yɔɔdɔba ane te yɔɔpɔgeba nɔŋ teŋ a boɔrɔ ka ba soŋ te. (Yeng. 17:17) Kyɛ aminekaŋaŋ ba koŋ baŋ lɛ yɛlɛ naŋ dɔnnɔ te bee sommo na te naŋ boɔrɔ. (Yeng. 14:10) Ka sukyiri kyɛreŋ wa kpɛ bo, ho na baŋ mannɛɛ ho sukyiri yɛlɛ ko ho zɔmenne mine naŋ kyile. Vɛŋ ka ba baŋ yɛlɛ naŋ na baŋ soŋ bo. Ho na baŋ mannɛɛ a yɛlɛ ko a lantaapuoruu nembɛrɛ bayi mine ho naŋ minli. Te yɔɔpɔgeba mine meŋ maŋ nyɛɛ sukyiridii naŋ seŋ neŋ ka ba naŋ wa manne a yɛlɛ ko te yɔɔpɔgeba naŋ kyile.
17. Bo yɛlɛ mine la na baŋ vɛŋ ka a e kpeɛŋaa ko te ka te nyɛ faŋa emmo? Kyɛ wala teŋ na baŋ e a maŋ toɔ̃ nyɛ faŋa emmo naŋ seŋ neŋ?
17 Maŋ mɔɔ kyɛ laŋna neŋ ho yɔɔmine. Ka hooŋ wa tuoro sukyiri kyɛre yɛlɛ mine, kaapɔge ho koŋ maŋ boɔrɔ ka ho laŋna neŋ ho taaba. Saŋa kaŋa, kaapɔge ho yɔɔmine koŋ maŋ taa yɛlɛ muni wommo ko bo, bee ba na baŋ yelee yɛlɛ mine naŋ ba soma a ko bo. (Gyi. 3:2) Kyɛ, ta maŋ wɛlɛ ho meŋɛ yire ho yɔɔmine eŋɛŋ. Jehoova na baŋ tu la ba eŋɛŋ kyɛ eŋ bo faŋa. Lantaapuoruu neŋkpoŋ kaŋa yuori naŋ di Gavin naŋ taa sukyiri gyɛre baaloŋ yeleeŋ ka: “Gbɛɛ yaga N ba maŋ boɔrɔ ka N lanna neŋ N zɔmenne bee a yele yɛlɛ korɔ ba.” Kyɛ Gavin maŋ mɔɔŋ a lanna neŋ o yɔɔmine, lɛ maŋ somooŋ oŋ nyɛ sukyiridii. Te yɔɔpɔge kaŋa yuori naŋ di Amy yeleeŋ ka: “Yɛlɛ mine naŋ daŋ pɔge ma zuŋ, a maŋ eɛ kpeɛŋaa ko ma ka N sage noba di. Kyɛ N mɔɔrɔŋ ka N sage N yɔɔmine di aŋa lɛ na Jehoova naŋ sage ba di na. N baŋ ka lɛ maŋ vɛŋeŋ ka Jehoova poɔ pɛle, a maŋ vɛŋeŋ ka N meŋ poɔ pɛle.”
JEHOOVA NƆ-ENNEE NAŊ KYAARE NENDAAREKAŊA NA NA BAŊ KO TEŊ SUKYIRIDII
18. Bo yɛlɛ teŋ kaara soriŋ nendaarekaŋa, kyɛ bo teŋ na baŋ e pampana?
18 A koŋ kɔɔre Jehoova na iree yelzaa naŋ maŋ korɔ te sukyiri gyɛre bee a vɛŋ teŋ dire dɔgɛɛ bare. (Yel. 21:3, 4) A lɛ saŋa na, yɛlɛ na zaa naŋ vɛŋ teŋ dire woore na “koŋ lɛ wa [te] teɛroŋ poɔ.” (Aiz. 65:17) Pampana gba, ka teneeŋ wa dire dɔgɛɛ, Jehoova maŋ sonnɔ teŋ. Jehoova taa la soe yaga o naŋ maŋ tu a kyɛ sonnɔ te, azuŋ sage Jehoova sommo na o naŋ maŋ korɔ te. Taa sagediibu ka “o taa la [ho] yɛlɛ.”—1 Pit. 5:7.
YIELOŊ 7 Jehovah, Our Strength
a Ba leɛrɛɛ a yoe.
b Kaa a daga ŋa, “ Ho Eɛ Nanee Yaga Zaa Ko Jehoova.”
c Ka te neŋ Jehoovaŋ na “maale taa soŋ,” aseŋ ka te wuli ka te eɛ kaŋdabaŋkalɛ te yelfaare yɛlɛ, a leɛre te eebo meŋ. Ka teneeŋ e yelfaa naŋ e nimizeɛ, aseŋ ka te bɔ sommo yi a lantaapuoruu nembɛrɛ zie.—Gyi. 5:14, 15.
