1. Sɛre kyɛ ka bitontona Piita na kpi na, bo toma ka Jehoova da koo?

 A BITONTONA Piita da baŋɛɛŋ ka a koŋ kɔɔre kyɛ ka o kpi. O da de la yuomo yaga a puore Jehoova yelmennoŋ poɔŋ, o da maŋ tuuree Yezu o naaŋ moɔloo toma zaa poɔŋ, a moɔle a duorisoŋ ko noba naŋ ba e Gyuumine, a da e a lantaa zukaareba kaŋa meŋ. Kyɛ Jehoova da la ko la Piita toŋ tegroŋ kaŋa. Ayi yuoni 62-64 C.E. kpakyagaŋ, a vooroŋ soŋ da somooŋ oŋ sɛge lɛtare ayi mine—ana la 1 ane 2 Piita gama naŋ be a Baabole poɔŋ na. O teɛretɔ da la ka a lɛtare ŋa na soŋ la Kristabiiri o kũũ puoriŋ.—2 Pit. 1:​12-15.

2. Ananso la wala teŋ na baŋ yelka saŋa na Piita naŋ da sɛge o lɛtare na da eɛ wagre naŋ seŋ neŋ?

² Vooroŋ soŋ da soŋɛɛ Piita oŋ sɛge o lɛtare na saŋa na o yɔɔmine naŋ da be “dɔgɛɛ tɛɛtɛɛ poɔ.” (1 Pit. 1:6) Neŋfaare mine da boɔrɔŋ ka ba de zirii wuluu ane gyog-dɛgɛ mine waneŋ a lantaapuoruu poɔ. (2 Pit. 2:​1, 2, 14) A da koŋ la kɔɔre, a Kristabiiri naŋ da be Gyɛruzɛlɛm na na tuoree “a yɛlɛ zaa baaroo”—a Urom sogyare na da waanaŋ ka ba sãã Gyɛruzɛlɛm ane a ŋmenpuoredie. (1 Pit. 4:7) Nɔkpeɛne zaa kyebe ka Piita lɛtare na da soŋ la a Kristabiiri baŋ nyɛ lɛ baŋ na toɔ̃ are yelkpeɛne na baŋ tuoro na noɔreŋ ane lɛ baŋ na baŋ e sɛgre ba menne ko yelkpeɛne naŋ be ba nimitɔɔreŋ na. b

3. Ananso la wala aŋ seŋ ka te zanne Piita lɛtare na a vooroŋ soŋ naŋ somoo oŋ sɛge na yɛlɛ gaa tɔɔre?

 ³ Aneazaa ka Piita da sɛge la o lɛtare na ko Kristabiiri naŋ da bebe o saŋa na, kyɛ Jehoova vɛŋɛɛŋ baŋ de a eŋ a Baabole poɔŋ meŋ. Azuŋ te meŋ na baŋ nyɛɛ tɔnɔ yi a lɛtare ŋa poɔŋ. (Uro. 15:4) Aŋa a dɛndɛŋ Kristabiiri na, te meŋ be la donɛɛ kaŋa naŋ paale neŋ gyog-dɛgɛ, azuŋ te meŋ maŋ tuoree yelkpeɛne naŋ maŋ vɛŋ aŋ e kpeɛŋaa ko te ka te puoro Jehoova. Aneŋ meŋ, a koŋ kɔɔre te na tuoree dɔgroŋ kpoŋ kaŋa naŋ gaŋ saammo na baŋ da sãã Gyɛruzɛlɛm ane a ŋmenpuoredie na. Te nyɛ yelnimizeere mine teŋ na baŋ zanne yi Piita lɛtare ayi na poɔŋ. Ana soŋ teŋ ka te nare te menne ko a donfaa ŋa meŋ baaroo, a ta la zoro nensaaleba dabeɛ̃, kyɛ taa nɔmmo naŋ e zuluŋ ko te taaba. Ana soŋɛɛ a lantaapuoruu nembɛrɛ meŋ ka ba nyɛ lɛ baŋ na toɔ̃ soŋ ba yɔɔmine naŋ be ba lantaapuoruu poɔŋ ka ba are kpeɛŋaa.

4. Aŋa lɛ 2 Piita 3:​3, 4 naŋ wuli na, bo yɛlɛ la na baŋ vɛŋ ka te sagediibu sigi teŋɛ?

⁴ Noba naŋ ba sage yɛlɛ a Baabole naŋ yelkyaare te nendaarekaŋa la ŋmaa gyeere te. Aminekaŋaŋ, te dɔndɔnne na maŋ erɛ teŋ laara, bonso te de la yuomo yaga kyɛnlɛ a donɛɛ ŋa baaroo. Noba mine maŋ yeleŋ ka o daŋ koŋ wa zaa. (Kanne 2 Piita 3:​3, 4.) Ka te tontoŋtɔ kaŋa, te dɔgrɔ kaŋa, bee neɛ kaŋa te naŋ pɔge a naaŋ moɔloo poɔŋ wa erɛ te laara, a na baŋ vɛmeŋ ka te sagediibu sigi teŋɛ. Piita da mannɛɛ yɛlɛ naŋ na baŋ soŋ te.

5. Boŋ na baŋ soŋ te ka te naŋ dire kannyiri a kyɛ kyɛnlɛ a donfaa ŋa baaroo? (2 Piita 3:​8, 9)

⁵ Aminekaŋaŋ noba mine na teɛrɛŋ ka Jehoova naaraŋ ka o de a donfaa ŋa waneŋ o baaroo. Piita yelbie na oŋ da yel na na baŋ soŋ teŋ ka te taa teɛroŋ naŋ soma, a teɛre teŋ ka Jehoova wagre ane nensaaleba wagre ba yitaa fẽẽ zaa. (Kanne 2 Piita 3:​8, 9.) Jehoova nimitɔɔreŋ, yuomo ture maŋ waa ŋa bebi yenaa. Jehoova taa la kannyiri, o boɔbo meŋ la ka neɛzaa ta nyɛ saammo. Kyɛ ka o bebiri naŋ wa ta, a donfaa ŋa na baareŋ. Nyɛ lɛ aŋ e apoɔsori yaga zaa ka te de a wagre naŋ kyɛre na moɔlɔ a duorisoŋ korɔ noba zaa naŋ be paalonne zaa poɔŋ.

6. Wala teŋ na baŋ e a “kyɛnlɛ” Jehoova bebiri na? (2 Piita 3:​11, 12)

⁶ Piita da eŋ teŋ faŋa ka te “kyɛnlɛ” Jehoova bebiri na. (Kanne 2 Piita 3:​11, 12.) Sobuoŋ teŋ na baŋ e lɛ? Bebiri zaa, te maŋ mɔɔ kyɛ teɛrɛ gɛrɛ tɔɔre a nyɛ lɛ zemmo naŋ na soma yaga zaa a dompaalaa poɔŋ. Hooŋ leɛteɛre nyɛ hoŋ vooro sase noɔ̃, a dire bondi sonne, a korɔ te nɔŋneba naŋ iri yi kũũni poɔŋ waayaane, a wulo noba yaga naŋ kpi yuomo yaga yaga naŋ pare lɛ Baabole daŋyelbo naŋ nyɛ eebo. Ka hooŋ maŋ teɛrɛ a yɛlɛ ŋa taa, a na soŋ boŋ ka ho naŋ kyɛnɛ kyɛnlɛ a donfaa ŋa baaroo, kyɛ eŋ ho sagediibu meŋ faŋa ka te be la a bebi baaree poɔŋ. Ba “naŋ daŋ [kpãã te] a yɛlɛ ama zaa eŋɛ” a kyaare a te nendaare kaŋa zuŋ, te koŋ vɛŋ “ka a konde-wuluu deme tuluu bɛlle [te].”—2 Pit. 3:17.

7. Ka teneeŋ zoro nensaaleba dabeɛ̃, sobuoŋ aŋ na baŋ nyɛ kpeɛ̃o te zuŋ?

⁷ Te naŋ baŋ ka a koŋ kɔɔre kyɛ ka Jehoova bebiri na wa na, te boɔrɔŋ ka te manne a duorisoŋ ko neɛzaa. Kyɛ saŋa kaŋa, te na maŋ zoree dabeɛ̃ ka te e lɛ. Ananso la wala? Aminekaŋaŋ te naŋ zoro nensaaleba dabeɛ̃ zuŋ. Lɛŋ da pɔge Piita. Zisoɔree na baŋ da di Yezu sɛrɛɛ na, Piita da zoe dabeɛ̃ ka o yel ka o eɛ Yezu potuuro, a gba da yelka o ba bamoo! (Mat. 26:​69-75) Kyɛ a puoriŋ, a bitontona ŋa ne o zu da de la nyaa a yelka: “Yɛ ta zoro neɛzaa dabeɛ̃ bee a vɛŋ ka ba tɔ dabeɛ̃ eŋ yɛ.” (1 Pit. 3:14)  Piita yelbie na eŋ teŋ faŋa ka te na baŋ zɔɔtoɔ̃ la nensaaleba dabeɛ̃ zaa.

8. Boŋ na baŋ soŋ te ka te ta zoro nensaaleba dabeɛ̃? (1 Piita 3:15)

⁸ Boŋ na baŋ soŋ te ka te ta zoro nensaaleba dabeɛ̃? Piita yelko teŋ ka: “Yɛ eŋnɛ a Krista, a yɛ Daana, yɛ sukyie pooreŋ.” (Kanne 1 Piita 3:15.) Te maŋ teɛrɛ te menne ka te Daana Yezu Krista la te Naa naŋ taa kpeɛ̃o yaga zaa. Ka hooŋ wa nyɛ a vuo ka ho manne a duorisoŋ ko neɛ kaŋa kyɛ ka dabeɛ̃ kpɛ bo, teɛre te Naa na yɛlɛ. Teɛre nyɛ lɛ o naŋ zeŋ dire naaloŋ ka malekere teŋ koŋ baŋ sɔre ŋmaa gyeere o. Teɛre baŋ ka, “ba de la a sazu ane a tendaa zu kpeɛ̃o zaa ko [o],” a baŋ meŋ ka o na “be la [te] zie a te ta a teŋɛ baaroo saŋa.” (Mat. 28:​18-20) Piita eŋ teŋ faŋa ka te maŋ “nare tegitegilɛ” ka te manne te sagediibu yɛlɛ ko noba. Ho na boɔrɔŋ ka ho manne a duorisoŋ ko neɛ kaŋa ho tomazieŋ, ho sakuu poɔŋ, bee zi zaala kaŋaŋ bee? Teɛre a nyɛ bebiri hoŋ na baŋ e lɛ, a nare ho meŋɛ meŋ a kyaare yɛlɛ hoŋ na yel. Puore sɔre Jehoova, a sagedi meŋ ka o na soŋ boŋ ka ho ta wa zoro nensaaleba dabeɛ̃.—Tom. 4:29.

9. Bo yɛlɛ mine poɔŋ la ka Piita da ba toɔ̃ wuli nɔmmo? (Kaa a foto meŋ.)

⁹ Piita da zannɛɛ lɛ oŋ na maŋ e wulo nɔmmo korɔ o taaba. O da bebeŋ saŋa na Yezu naŋ da yelka: “N korɔ yɛŋ nɔ-palaa, ka yɛ nɔnɔ taa;  aŋa lɛ N naŋ nɔnɔ yɛ na, yɛ meŋ nɔnɔ taa lɛ.” (Gyn. 13:34) Kyɛ aneazaa, Piita da zagrɛɛŋ ka o di bondirii ane noba naŋ ba e Gyuumine, bonso o da zoree a Gyuumine naŋ e Kristabiiri na dabeɛ̃. A bitontona Pɔɔl da yeleeŋ ka yɛlɛ na Piita naŋ e na eɛ “dawari” yɛlɛ bee “pɔntenakaare yɛlɛ.” (Gal. 2:​11-14) Piita da sage de la a dɛnnoo, a zanne yelkaŋa yi be. O lɛtare ayi na zaa poɔŋ, o da sɛgɛɛŋ ka te ta taa nɔmmo ko te yɔɔmine te sukyie yoŋ poɔŋ, kyɛ aseŋ ka te wulo ana nɔmmo na korɔ ba.

10. Boŋ na wuli ka te taa la “nɔmmo naŋ sereŋ e meŋɛ”? Wuli a muni. (1 Piita 1:22)

¹⁰ Piita da yeleeŋ ka aseŋ ka te “nɔnɔ taa ne [te] sukyie zaa.” (Kanne 1 Piita 1:22.) Te sereŋ na baŋ taa la ana nɔmmo ŋa ka teneeŋ “sage tu a yelmeŋɛ.” Ana yelmennee na mine teŋ zanne na la ka, “Naaŋmen ba wɛlɛ noba.” (Tom. 10:​34, 35) Ka teneeŋ maŋ wulo nɔmmo korɔ noba mine a lantaapuoruu poɔŋ, kyɛ ba wulo nɔmmo korɔ ba mine, te ba tuuro bege na Yezu naŋ ko te ka te nɔnɔ taa na. Yelmeŋɛ la, a na baŋ eɛ mɔlɔ ka te tage peɛle noba mine a gaŋ ba mine, aŋa lɛ na Yezu gba naŋ da e na. (Gyn. 13:23; 20:2) Piita teɛre teŋ ka te mɔɔ kyɛ “taa nɔmmo ko te yɔɔmine”—a maŋ nɔnɔ te yɔɔmine zaa, bonso ba poɔ la te booree na poɔŋ.—1 Pit. 2:17.

11. Ka ba naŋ yelka te “nɔnɔ taa ne [te] sukyie zaa” wala ka lɛ wuli?

¹¹ Piita eŋ teŋ faŋa ka te “nɔnɔ taa ne [te] sukyie zaa.” A sɛgre naŋ yel ka te nɔnɔ taa ne te “sukyie zaa” na wuleeŋ ka teŋ na nɔŋ o soba ka ana gbaŋ e kpeɛŋaa ka te e lɛ. Aŋa mannoo poɔŋ, wala teŋ na e ka te yɔɔ kaŋaŋ e yelkaŋa a sãã te poɔ? A piilee saŋa na, aminekaŋaŋ te meŋ na boɔrɔŋ ka te e yelkaŋa a yaa sane a gaŋ teŋ na wuli nɔmmo. Kyɛ Piita da wa zannɛɛŋ ka, ka teneeŋ e yelkaŋa yaa sane, Naaŋmen poɔ koŋ pɛle neŋ te. (Gyn. 18:​10, 11) Piita da sɛgɛɛŋ ka: “Yɛ ta leɛ yɔɔ neɛ naŋ e yɛ faa ne faaloŋ bee a leɛ to neɛ naŋ to yɛ, kyɛ yɛ maŋ leɛ yɔɔ neɛ naŋ sãã yɛ ne maaloo.” (1 Pit. 3:9) Ka hooŋ nɔŋ ho taaba ne ho sukyiri zaa, ho na wulee nimimaaroŋ ane nembazo ko neɛ gba naŋ e yelkaŋa a sãã ho poɔ.

12. (a) Ka teneeŋ nɔŋ te yɔɔmine ne te sukyie zaa, sobuo aŋ na baŋ lɛ soŋ te? (b) Bo hoŋ meŋ na mɔɔrɔ ka ho e aŋa lɛ na ho naŋ nyɛ a Preserve the Precious Gift of Unity vidio na poɔŋ?

¹² O lɛtɛ dɛndɛŋ na poɔŋ, Piita da de la a yelbie “yɛ nɔnɔ taa tegitegilɛ” toŋ ne toma. Ka teneeŋ taa ana nɔmmo ŋa tɔ, te koŋ maŋ vɛnɛ te taaba yelbebe naŋ e fẽẽ yoŋ korɔ ba, kyɛ te na maŋ vɛŋ la ba “yelbebe yaga” meŋ a ko ba. (1 Pit. 4:8) Aminekaŋaŋ Piita da leɛ teɛrɛɛ yɛlɛ na Yezu naŋ da wuluu a kyaare vɛŋkuubu yuomo mine naŋ pare. Ana saŋa na, aminekaŋaŋ Piita da teɛrɛ ka o eɛ neŋ soŋ saŋa na oŋ da yelka o na vɛŋ ko la o yɔɔ “gbɛre boyopoi” yoŋ na. Kyɛ Yezu da wuleeŋ ka aseŋ ka o vɛŋ ko o yɔɔ na “gbɛre lezaata ne pie ane ayopoĩ,” lɛ wuleeŋ ka a ba taa mannoo. (Mat. 18:​21, 22) Ka a naŋ e kpeɛŋaa ka ho de a kawane ŋa toŋ ne toma, ta vɛŋ ka ho eŋɛ kyoɔre! Jehoova puorebiiri zaa ba pɛgeyi, azuŋ saŋa kaŋa a maŋ eɛ kpeɛŋaa ka ba di suuri ko ba taaba. Yel naŋ e nimizeɛ la ka ho mɔɔ ho mɔɔbo zaa ka ho di suuri ko ho yɔɔ na, ka yɛ leɛ taa emmaaroŋ. c

13. Ananso la wala aŋ na baŋ e kpeɛŋaa ka a nembɛrɛ nyɛ wagre a eŋnɛ ba yɔɔmine faŋa?

¹³ Saŋa na Yezu naŋ da wa iri yi kũũni poɔŋ a yelko Piita ka: “Kyeenɛ a N peere” na, Piita daŋ ba inne ana yɛlɛ na zaa. (Gyn. 21:16) Lantaapuoruu nembɛrɛ baŋɛɛŋ ka ana sowuli ŋa kyaarɛɛ ba meŋ. Kyɛ ana baŋ eɛ kpeɛŋaa ko a lantaapuoruu nembɛrɛ ka ba nyɛ wagre a tonɔ  ana toŋ nimizeɛ ŋa. A lantaapuoruu nembɛrɛ seŋ ka ba daŋ kaa ka ba yideme nyɛ bonzaa yɛlɛ naŋ ferɛ ba, a wulo ba nɔmmo, kyɛ soŋ ba ka ba tage peɛle Jehoova meŋ. Ba maŋ deɛrɛɛ weɛ a naaŋ moɔloo toma poɔŋ, a maŋ sɛgre te lammore, gbandige lammore, ane te lammobɛrɛ zaa yɛlɛ aŋ kyɛŋ soŋ zaa lɛ. Ba mine meŋ maŋ tonɛɛ Hospital Liaison Committee toma, bee a laŋ tonɔ toma ne Local Design/Construction Tomazie. Yelmeŋɛ la ka a nembɛrɛ toma eɛ yaga!

14. Boŋ na baŋ eŋ a nembɛrɛ faŋa ka ba kyeenɛ a peere? (1 Piita 5:​1-4)

¹⁴ Piita da eŋ la o nembɛr-taaba faŋa ka, ba “kyeenɛ a Naaŋmen peere.” (Kanne 1 Piita 5:​1-4.) Ka hooŋ e a lantaapuoruu neŋkpoŋ kaŋa, te baŋ ka ho nɔnɔ la ho yɔɔmine a boɔrɔ ka ho eŋnɛ ba faŋa. Kyɛ saŋa kaŋa, ho na maŋ taa la yɛlɛ yaga ka ho e bee ka ho bale yaga zaa ka a e kpeɛŋaa ko bo ka ho e lɛ. Boŋ hoŋ na baŋ e? Yel yɛlɛ na zaa naŋ dɔnnɔ bo na ko Jehoova puoro poɔŋ, ane lɛ hoŋ boɔrɔ ka ho soŋ ho yɔɔmine na. Piita da sɛgɛɛŋ ka: “Soba na zaa naŋ tonɔ, seŋ ka o tonɔ ne a kpeɛ̃o na Naaŋmen naŋ ko o.” (1 Pit. 4:11) Aminekaŋaŋ ho yɔɔmine tuoree yɛlɛ mine naŋ koŋ baŋ nyɛ maaloo a donfaa ŋa poɔŋ. Kyɛ teɛre baŋ ka, Yezu naŋ e “a pekyee-naa” na baŋ soŋ baŋ gaŋ neɛzaa. O na baŋ eɛ lɛ a donfaa ŋa poɔŋ ane a donpaalaa poɔŋ. Yɛlɛ Jehoova naŋ boɔrɔ ka a nembɛrɛ erɛ la ka ba nɔŋ ba yɔɔmine na, a eŋnɛ ba faŋa, a “kyɛ . . . waa noba ba naŋ na tɔglɔ.”

15. Sobuo ka te yɔɔdɔɔ kaŋa maŋ tu kyɛ kyeenɛ a peere? (Kaa a foto meŋ.)

¹⁵ Te yɔɔdɔɔ William naŋ e lantaapuoruu neŋkpoŋ kaŋa yuomo yaga baŋɛɛ lɛ aŋ e nimizeɛ ka o maŋ eŋnɛ o yɔɔmine faŋa. Saŋa na a COVID-19 baaloŋ naŋ wa piili na, o ne o nembɛr-taaba na da de la gbɛre ka daa gbuli zaa poɔŋ, ba na maŋ boɔlɛɛ te yɔɔmine na kaŋa la kaŋa zaa naŋ be ba group poɔŋ na. O da wulee a ananso, a yelka: “Te yɔɔmine na yaga zie zaa da be la dieŋ ba yoŋ tɛgɛ, a da na baŋ eɛ mɔlɔ meŋ ka ba nyɛ teɛroŋ faare mine.” Ka te yɔɔdɔɔ kaŋaŋ wa tuoro yelkpeɛŋaa kaŋa, te yɔɔdɔɔ William maŋ kyɛlle woŋ la a soba yɛlɛ soŋ a mɔɔrɔ ka o baŋ yɛlɛ naŋ ferɛ o soba ane lɛ oŋ na baŋ e soŋ a soba. O pãã maŋ kaa nyɛɛ vidiori bee gama mine naŋ be te intanɛt tomazie naŋ oŋ na baŋ de soŋ te yɔɔ na. O yeleeŋ ka: “A eɛ nimizeɛ ka te maŋ eŋnɛ te yɔɔmine  faŋa pampana a gaŋ saŋa zaa naŋ pare. Te maŋ mɔɔrɛɛ te mɔɔbo zaa ka te soŋ noba naŋ ba e te yɔɔmine ka ba wa zanne Jehoova yɛlɛ; lɛ ne o zu aŋ seŋ ka te maŋ mɔɔrɔ ka te eŋ te yɔɔmine faŋa, a soŋ Jehoova peere na ka ba naŋ kyɛnɛ be a yelmeŋɛ poɔŋ.”

16. Sobuo teŋ na de yɛlɛ naŋ be Piita lɛtare na poɔŋ toŋ ne toma?

¹⁶ Yɛlɛ fẽẽ mine yoŋ la teŋ zanne yi lɛtare ayi na a vooroŋ soŋ naŋ da soŋ Piita oŋ sɛge na. Aminekaŋaŋ ho nyɛɛ yɛlɛ mine aŋ seŋ ka ho e leɛroo a poɔŋ. Aŋa mannoo poɔŋ, ho na boɔrɔŋ ka ho maŋ teɛre yɛlɛ gaa tɔɔre a kyaare maaloo na teŋ na nyɛ a dompaalaa poɔŋ na bee? Ho de biŋ la ho nimitɔɔreŋ ka ho maŋ manna a duorisoŋ korɔ noba ho tomazieŋ, ho sakuu poɔŋ, bee zi-zaala kaŋaŋ bee? Ho nyɛɛ soe mine hoŋ na baŋ yi ho sukyiri zaa poɔŋ a wuli nɔmmo ko ho yɔɔmine yaga zaa bee? Lantaapuoruu nembɛrɛ, yɛ eɛ siri ka yɛ yi yɛ poɔ zaa a de eŋnyagroŋ kyeenɛ Jehoova peere na bee? Ka hooŋ peɛre ho meŋɛ soŋ, aminekaŋaŋ ho na nyɛŋ ka yɛlɛ mine bebeŋ aseŋ ka ho leɛre, kyɛ ta vɛŋ ka ho eŋɛ kyoɔre. ‘A Daana yɛlɛ somaŋ,’ o na soŋ boŋ ka ho nyɛ nimitɔɔre gaabo. (1 Pit. 2:3) Piita eŋ teŋ faŋa ka: “Naaŋmen [na] . . . teɛ yɛ [la] taa, a ko yɛ faŋa kyɛ e ka yɛ are kpeɛŋaa.”—1 Pit. 5:10.

17. Ka teneeŋ nyɔge kpeɛŋaa a vɛŋ ka Jehoova ko te wulibo naŋ seŋ neŋ, bo tɔnɔ teŋ na nyɛ?

¹⁷ A piilee saŋa na, Piita da nyɛɛŋ ka o ba seŋ neŋ ka o be a Naaŋmen Bidɔɔ zieŋ. (Luk. 5:8) Kyɛ Jehoova ane Yezu nɔmmo ane ba sommo zuŋ, Piita da mɔɔ la o mɔɔbo zaa a tuuro Yezu. Piita da nyɛ la a vuo ka o “kpɛ a te Daana ane te Faara Yezu Krista naaloŋ naŋ ba taa baaraa poɔ.” (2 Pit. 1:11) Nyɛ kyɔɔta kpoŋ naŋ seŋ lɛ! Ka hooŋ meŋ nyɔge kpeɛŋaa aŋa Piita a vɛŋ ka Jehoova ko bo wulibo naŋ seŋ neŋ, ho meŋ na nyɛ la a nyɔvore naŋ ba taa baaraa kyɔɔtaa na. Ho na nyɛ la a ho ‘yeldeebo tɔnɔ naŋ la a ho nyɔvore faabo.’—1 Pit. 1:9.