1. Bo yɛlɛ mine ka noba na baŋ soore te sakuuŋ bee toma zieŋ?

 KA HO tontoŋtɔ kaŋa bee ho sakuu bitɔ kaŋaŋ wa soore bo yɛlɛ mine a kyaare ho sagediibu yɛlɛ, wala aŋ maŋ erɛ bo? Dabeɛ̃ maŋ kpɛ boŋ bee? Lɛ aŋ maŋ waa ko te yaga zie zaa. Kyɛ ana soorebiri na na baŋ soŋ teŋ ka te nyɛ bon na a soba naŋ teɛrɛ kyɛbee yɛlɛ o naŋ sagedi, ka lɛ yuo sori ko te ka te manne a duorisoŋ ko o soba. Noba mine maŋ soorɛɛ soorebie mine ba neŋ te teɛroŋ naŋ ba kyaare taa zuŋ, bee a boɔrɔ ka te neŋ ba ŋmɛ nɔkpeɛne. Kyɛ a ba seŋ ka lɛ e te seɛlee, bonso ba maŋ woŋee yɛlɛ mine naŋ ba e yelmeŋɛ a kyaare te sagediibu yɛlɛ. (Tom. 28:22) Ane meŋ, te be la “a bebi-baaree” poɔŋ, azuŋ ana maŋ eɛ kpeɛŋaa ka te ne noba “laŋnoɔre,” ka nensaaleba e “nimikuonii deme” meŋ.—2 Tim. 3:​1, 3.

2. Ananso la wala aŋ seŋ ka te taa sumaaroŋ?

² Aminekaŋaŋ ho na teɛreŋ ka, ‘Wala maŋ na baŋ e a e bɔĩĩ a sigri N meŋɛ ka neɛ kaŋaŋ wa boɔrɔ ka o ŋmɛ nɔkpeɛne a kyaare N sagediibu yɛlɛ?’ Sumaaroŋ na baŋ soŋ boŋ. Sumaaroŋ soba maŋ eɛ bɔĩĩ ka neɛŋ wa iri o suuri kyɛbee ka o naŋ ba baŋ lɛ oŋ na iri yɛlɛ noɔre. (Yeng. 16:32) Yelmeŋɛ la, a ba maŋ e mɔlɔ ka neɛ taa ana gyogo ŋa. Kyɛ wala teŋ na baŋ e taa sumaaroŋ gyogo? Ka neɛ kaŋaŋ wa ŋmeɛrɛ bo nɔkpeɛne a kyaare ho sagediibu yɛlɛ, wala hoŋ na e iri a noɔre ko a soba sumaaroŋ poɔŋ? Ka hooŋ wa e bidɔgrɔ meŋ, sobuo hoŋ na baŋ tu kyɛ wuli ho biiri ka ba maŋ yi sumaaroŋ poɔŋ kyɛ iri soorebie nɔɛ naŋ kyaare ba sagediibu yɛlɛ? Yɛ vɛŋ ka te nyɛ.

3. Ananso la wala teŋ na baŋ yelka ka neɛŋ wa taa sumaaroŋ lɛ ba wuli ka o ba taa faŋa? (2 Timoti 2:​24, 25)

³ Ka neɛŋ taa sumaaroŋ ba wuli ka o ba taa faŋa. Bonso ka teneeŋ wa tuoro yelkpeɛne, ana fɛreŋ ka te eŋ faŋa yaga zaa kyɛ baŋ toɔ̃ e bɔĩĩ. Sumaaroŋ eɛ a “vooroŋ soŋ wɔnee.” (Gal. 5:​22, 23) A Giriki yelbiri naŋ are ko “sumaaroŋ” na, ba da maŋ de mannɛɛ wiri naŋ gali kyɛ baŋ goɔ o oŋ leɛ mãã. Hooŋ leɛteɛre nyɛ wiri naŋ gali, kyɛ leɛ mãã. Aneazaa ka a wiri maaŋɛɛŋ, kyɛ o naŋ taa la faŋa. Wala teŋ meŋ na baŋ e a naŋ taa sumaaroŋ aneazaa ka te taa la faŋa? Te koŋ baŋ e lɛ te meŋɛŋ. Aseŋ ka te maŋ puore sɔre Naaŋmen vooroŋ soŋ na ka o soŋ te ka te baŋ taa ana gyog-soŋ ŋa. Noba yaga toɔ̃ zannɛɛŋ a taa sumaaroŋ gyogo. Jehoova puorebiiri yaga baŋ toɔ̃ wulee sumaaroŋ saŋa na noba mine naŋ ire ba suuri, aŋ vɛŋ ka noba taa teɛroŋ naŋ soma a kyaare Jehoova Sieree Deme. (Kanne 2 Timoti 2:​24, 25.) Wala hoŋ na baŋ e taa sumaaroŋ a de wuli ka ho taa la faŋa?

4. Bo teŋ na baŋ zanne yi Aziki zemmo yɛlɛ ŋa poɔŋ a kyaare sumaaroŋ?

⁴ A Baabole taa la yɛlɛ yaga naŋ wuli te lɛ sumaaroŋ naŋ soma seŋ. Hooŋ lɛ nyɛ Aziki zemmo yɛlɛ. Saŋa na Aziki naŋ da zeŋ a Filiisitiya paaloŋ Giirar teŋɛŋ na, o kpeɛreŋ taaba na da taa oŋ neŋ nyuuri a da ga tɛnne pɔgi a bulli na o saa tontonneba naŋ da tu na. Aziki da ba zɔɔrɔ ka o faa o bulli na, kyɛ o ne o booree deme da ire gaa la ziyuo a te tu bulli yobo. (Mun. 26:​12-18) Kyɛ a Filiisitiya noba da la yeleeŋ ka a koɔ̃ naŋ be a bul-paala na meŋ poɔŋ, ba naŋ so a. Kyɛ aneazaa, Aziki da naŋ eɛ o yɛlɛ emmaaroŋ poɔŋ. (Mun. 26:​19-25) Boŋ da soŋ Aziki oŋ naŋ taa sumaaroŋ aneazaa ka noba da erooŋ yɛlɛ aŋ na baŋ vɛŋ ka o suuri iri? Nɔkpeɛne zaa kyebe ka o da zannɛɛ ana gyogo ŋa yi o dɔgreba ewuli soŋ na, lɛ na Aboraham naŋ da maŋ erɛ o yɛlɛ emmaaroŋ poɔŋ ka Saara meŋ da maŋ e “baaloŋ a e bɔĩĩ na” zieŋ.—1 Pit. 3:​4-6; Mun. 21:​22-34.

5. Bo yelmannaa la wuli ka Kristabiiri naŋ e bidɔgreba na baŋ wulee ba biiri ka ba baŋ lɛ sumaaroŋ naŋ soma seŋ?

⁵ Kristabiiri naŋ e bidɔgreba, yɛ meŋ na baŋ wulee yɛ biiri ka ba baŋ lɛ sumaaroŋ naŋ soma seŋ. Te nyɛ te yɔɔdɔɔ Maxence naŋ di yuomo 17 zemmo yɛlɛ. O da tuoree noba naŋ taa suuri o sakuu poɔŋ ane a naaŋ moɔloo poɔŋ. O dɔgreba da mãã la ba menne kyɛ somoo oŋ baŋ lɛ oŋ na baŋ e taa sumaaroŋ. O dɔgreba yeleeŋ ka, “Maxence wa nyɛɛŋ ka, ka neɛ suuriŋ wa iri a maŋ fɛreŋ ka o eŋ faŋa a nyɔge o meŋɛ ka lɛ vɛŋ ka o ta de suuri e neŋ yɛlɛ.” A yɛlɛ noɔ̃ zie la ka, pampana ŋa yɛŋ Maxence eɛ sumaaroŋ soba.

6. Sobuo ka puoro na baŋ soŋ te ka te maaleŋ taa sumaaroŋ yaga zaa?

⁶ Wala teŋ na e ka neɛ kaŋaŋ wa e yelkaŋa ka te suuri iri, aŋa mannoo poɔŋ, ka neɛ kaŋaŋ wa yele yelfaare a kyaare Jehoova kyɛbee a erɛ a Baabole seɛ? Aseŋ ka te puore sɔre Jehoova ka o ko te o vooroŋ soŋ ane o sazu yɛŋ na ka te baŋ de sumaaroŋ e neŋ yɛlɛ. Kyɛ a puoriŋ, ka teneeŋ wa nyɛ ka te ba e yɛlɛ soŋ, te na baŋ lɛ puore sɔrɛɛ Jehoova a kyaare a yɛlɛ a kyɛ teɛre lɛ te naŋ na e ka teneeŋ la tuore a yɛlɛ ŋa taaba. Ka teneeŋ e lɛ, Jehoova na ko teŋ o vooroŋ soŋ na ka te baŋ te menne taaba a kyɛ taa sumaaroŋ meŋ.

7. Ka teneeŋ baŋ a Baabole sɛgre mine te zuŋ, sobuo aŋ na baŋ soŋ te ka te baŋ te menne taaba te yelyaga ane te yel-eree poɔŋ? (Yeng Yelibie 15:​1, 18)

⁷ Baabole sɛgre yaga bebeŋ a na baŋ soŋ te ka te kaara te yelyaga soŋ ka yɛlɛ mineŋ wa vɛŋ ka te suuri iri. Naaŋmen vooroŋ soŋ na baŋ soŋ teŋ ka te teɛre ana sɛgre na mine. (Gyn. 14:26) Aŋa mannoo poɔŋ, sɛgre naŋ be Yeng Yelibie gane na poɔŋ na baŋ soŋ teŋ ka te taa sumaaroŋ. (Kanne Yeng Yelibie 15:​1, 18.) A Yeng Yelibie gane na wulee lɛ a naŋ maŋ soma ka  teneeŋ wa nyɔge te menne saŋa na teŋ maŋ wa tuore yɛlɛ naŋ na baŋ vɛŋ ka te suuri iri.—Yeng. 10:19; 17:27; 21:23; 25:15.

8. Ananso la wala aŋ seŋ ka te maŋ teɛre nyɛ bon naŋso neɛ kaŋa naŋ soorɔ soorebiri kaŋa a kyaare te sagediibu yɛlɛ?

⁸ Ka teneeŋ maŋ teɛrɛ yɛlɛ gɛrɛ tɔɔre, ana soŋ teŋ. (Yeng. 19:11) Neɛ naŋ teɛrɛ yɛlɛ gɛrɛ tɔɔre maŋ baŋ la o meŋɛ taabo ka neɛ kaŋaŋ wa yele yɛlɛ naŋ ba soma a kyaare o sagediibu yɛlɛ. Saŋa kaŋa noba mine maŋ soorɔ teŋ soorebie mine, kyɛ te ba maŋ baŋ bon naŋ so baŋ soorɔ ana soorebie na. Azuŋ sɛre teŋ na iri a noɔre ko a soba na, aseŋ ka te teɛre ka, te ba baŋ bon naŋ vɛŋ oŋ soorɔ ana soorebie na.—Yeng. 16:23.

9. Sobuo ka Giidioŋ da de yɛŋ ane sumaaroŋ toŋ ne toma saŋa na a Iifiriam deme suuri naŋ da iri neŋ o na?

⁹ Hooŋ leɛ nyɛ lɛ Giidioŋ naŋ da iri yɛlɛ noɔre ko a Iifiriam noba. Ba da de la suuri a sooroo ka, bonso oŋ ba toŋ boɔle ba baŋ na wa paale o eŋɛŋ ka ba zɔɔ neŋ a Izerayɛl biiri dɔnnɔ na. Kyɛ boŋ da vɛŋ ka ba suuri iri yaga zaa lɛ, pɔloo la da vɛŋ bee? Aminekaŋaŋ. Kyɛ Giidioŋ da teɛrɛɛ yɛlɛ gaa tɔɔre a da mɔɔ ka o nyɛ ananso ba naŋ sooroo ana soorebiri na, aŋ somoo oŋ nyɛ noɔre iribo naŋ seŋ neŋ a ko ba. A Baabole yeleeŋ ka, “oŋ wa yel lɛ baare ka ba suuri leɛ mãã.”—Sar. 8:​1-3.

10. Boŋ na baŋ soŋ te ka te iri soorebie nɔɛ noba naŋ maŋ soorɔ a kyaare te sagediibu yɛlɛ? (1 Piita 3:15)

 ¹⁰ Aminekaŋaŋ te tontoŋtɔ kaŋa bee te sakuubitɔ kaŋa na baŋ soore teŋ ananso te naŋ maŋ de Baabole sowuli tɔnɔ ne toma. Te na mɔɔ la te mɔɔbo zaa ka te wuli a soba ananso a Baabole sowuli naŋ soma gaŋ sowuli zaa, kyɛ aseŋ ka te wuli gyeremɛ ko a soba meŋ. (Kanne 1 Piita 3:15.) A ba seŋ ka te teɛrɛ ka o soorebiri na eɛ zoma oŋ toorɔ te, kyɛ aseŋ ka te teɛre nyɛ lɛ o soorebiri na naŋ na baŋ soŋ te ka te baŋ yɛlɛ naŋ e nimizeɛ koo. Ananso zaa neɛ naŋ taa kyɛ soore te soorebiri zaa, aseŋ ka te yi bɔinloŋ ane nimimaaroŋ poɔŋ a iri a soorebiri noɔre ko o soba. Te noɔre iribo na na baŋ somooŋ ka o leɛ teɛre yɛlɛ gaa tɔɔre a kyaare teɛroŋ na o naŋ da taa na. Ka a soba gbaŋ soore a yɛlɛ aŋa zoma la oŋ tooro te, kyɛ te de nimimaaroŋ iri a noɔre ko o soba.—Uro. 12:17.

11-12. (a) Ka neɛ kaŋaŋ wa soore te soorebiri kaŋa naŋ e kpeɛŋaa, bo yɛlɛ aŋ seŋ ka te daŋ peɛre te menne sɛre kyɛ iri a soorebiri noɔre? (Kaa a foto meŋ.) (b) Manne wuli lɛ neɛ kaŋa soorebiri naŋ na baŋ yuo sori ka ho ne o soba di dama soŋ zaa lɛ.

¹¹ Aŋa mannoo poɔŋ, ho tontoŋtɔ kaŋa na baŋ soore boŋ ka, ananso la wala yɛŋ ba dire dɔgebo bebiri tigri. Aminekaŋaŋ o teɛrɛɛŋ ka tenee yɛŋ ba maŋ e yelzaa a pɛle te niŋe anaŋ vɛŋ oŋ soorɔ lɛ bee? Bee aminekaŋaŋ, o nyɛɛŋ ka ka hooŋ ba poɔ ba eŋɛŋ ka ba di neɛ kaŋa dɔgebo bebiri tigri, a na sãã la popeɛloŋ na ho tontoŋ taaba naŋ taa na bee? Te na baŋ daŋ pugi la te tontoŋtɔ na ane o naŋ teɛrɛ o taaba yɛlɛ, a kyɛ vɛŋ ka o baŋ ka ho meŋ boɔbo la ka ho ne ho tontoŋ taaba zaa maŋ laŋ tonɔ toma ne popeɛloŋ. Lɛ na baŋ yuo la sori ko te ka te wuli a soba ananso te naŋ ba dire dɔgebo tigri a yi a Baabole poɔŋ soŋ zaa lɛ.

¹² Te na baŋ deɛ ana yɛlɛ ŋa toŋ ne toma ka neɛ kaŋaŋ wa soore te soorebie mine meŋ naŋ e kpeɛŋaa. Aminekaŋaŋ ho sakuubitɔ kaŋa na baŋ yeleŋ ka aseŋ ka Jehoova Sieree Deme leɛre ba teɛroŋ ba naŋ taa kyaare pɔge ne pɔge ane dɔɔ ne dɔɔ gane taa yɛlɛ. Onaŋ ba baŋ Jehoova Sieree Deme sagediibu ba naŋ taa kyaare a yɛlɛ ŋa la vɛŋ oŋ yele lɛ bee? Bee aminekaŋaŋ o zɔmeŋɛ kaŋa bee o dɔgrɔ kaŋa be la ana yɛlɛ ŋa poɔŋ bee? Ka lɛ o teɛrɛ ka te kyiree noba naŋ erɛ a yɛlɛ ŋa ba zemmo poɔŋ na bee? Vɛŋ ka o baŋ peɛlaaŋ ka te maŋ wulee nɔmmo korɔ neɛzaa, te baŋɛɛŋ meŋ ka neɛzaa taa la someŋɛ ka o iri yelzaa o naŋ boɔrɔ ka o e o zemmo poɔŋ. b (1 Pit. 2:17) Kyɛ pãã somoo ka o nyɛ yɛlɛ a Baabole naŋ yel ane lɛ teŋ maŋ nyɛrɛ tonɔ ka teneeŋ de a Baabole wulibo tonɔ ne toma te zemmo poɔŋ.

13. Wala hoŋ na baŋ e soŋ neɛ kaŋa naŋ teɛrɛ ka yɛŋ kyebe ka neɛ sage Naaŋmen di?

¹³ Ka neɛ kaŋaŋ wa ŋmeɛrɛ te nɔkpeɛne yaga zaa a kyaare te sagediibu yɛlɛ, te ta teɛrɛ ka te baŋɛɛ bon na o soba naŋ sagedi. (Tit. 3:2) Aŋa mannoo poɔŋ, ka ho sakuubitɔ kaŋaŋ yelka yɛŋ ba kyebe ka neɛŋ sage Naaŋmen di, wala hoŋ na e? Aseŋ ka ho teɛrɛ ka o soba baŋɛɛŋ a kyɛ sagedi yaga zaa ka Naaŋmen naaneŋ maale boma, kyɛ boma la leɛre a menneŋ a wa bebe bee? Aminekaŋaŋ yɛlɛ noba naŋ maŋ yele oŋ woŋ la oŋ meŋ yele. Ta vɛŋ ka yɛ ŋmɛ nɔkpeɛne a kyaare a yɛlɛ, kyɛ ho na baŋ kooŋ te gama na kaŋa, bee ka ho wuloo zie oŋ na baŋ te nyɛ yɛlɛ naŋ kyaare Naaŋmen bonmaalee yɛlɛ jw.org zuŋ, ka o baŋ teɛre a yɛlɛ soŋ a puoriŋ. Kaapɔge, a puoriŋ o na boɔrɔŋ ka yɛ di dama a kyaare zannoo yɛlɛ bee vidio kaŋa o naŋ nyɛ yi beŋ. Ka teneeŋ wa wuli gyeremɛ koo ana sori ŋaŋ, kaapɔge o na boɔrɔŋ ka o zanne yɛlɛ yaga a kyaare a Baabole.

14. Sobuo ka Niall da de te intanɛt tomazie na soŋ o class bitɔ kaŋa oŋ wa nyɛ ka yɛlɛ na noba naŋ maŋ yele kyaare Jehoova Sieree Deme na eɛ zirii?

¹⁴ Baapaalaa kaŋa yuori naŋ di Niall da de la  te intanɛt tomazie na a wuli ka yɛlɛ na noba naŋ maŋ yele a kyaare Jehoova Sieree Deme na eɛ zirii. O yeleeŋ ka, “N class bitɔ kaŋa da maŋ yelko maŋ ka N naŋ sage a Baabole naŋ e ‘sinsiŋlɛ’ gane di naŋ vɛŋ maŋ ba sage science yɛlɛ di.” O class bitɔ na da ba ko Niall vuo ka o manne o sagediibu yɛlɛ wuloo, azuŋ o da wulooŋ jw.org zie kaŋa yelzu naŋ la “Science and the Bible”. A puoriŋ, Niall da nyɛɛŋ ka o class bitɔ na da kannɛɛ ana yɛlɛ na, azuŋ o neŋ o da di la dama a kyaare lɛ nyɔvore naŋ e piilee. Aminekaŋaŋ ho meŋ nyɛɛ ana tɔnɔ ŋa mine.

15. Sobuo ka bidɔgreba na baŋ soŋ ba biiri ka ba de sumaaroŋ iri yɛlɛ noɔre ka ba sakuubi taabaŋ wa soore ba soorebi-kpeɛne a kyaare ba sagediibu yɛlɛ?

¹⁵ Bidɔgreba na baŋ soŋɛɛ ba biiri ka ba nyɛ lɛ baŋ na baŋ yi sumaaroŋ poɔŋ a iri yɛlɛ noɔre ka neɛ kaŋaŋ wa soore ba soorebi-kpeɛne a kyaare ba sagediibu yɛlɛ. (Gyi. 3:13) Booree zannoo saŋa, bidɔgreba mine neŋ ba biiri maŋ eɛ ewuluu a kyaare lɛ baŋ na baŋ e ba yɛlɛ ka ba naŋ wa tuore ana yɛlɛ na mine. Ba maŋ gyielee yelzuri mine noba naŋ na baŋ soore ba a yɛlɛ sakuuŋ, a di dama a kyɛ e ewuluu a kyaare lɛ baŋ na baŋ iri yɛlɛ noɔre, a wuli ba biiri lɛ baŋ na baŋ de sumaaroŋ e lɛ sori naŋ soma poɔŋ.—Kaa a daga ŋa, “ Ka Hooŋ E Ewuluu Ko Ho Booree Deme, A Na Soŋ Baŋ.”

16-17. Ka bidɔgrebaŋ maŋ erɛ ewuluu korɔ ba biiri, sobuo aŋ na baŋ soŋ ba?

¹⁶ Ewuluu na baŋ soŋɛɛ Kristabiiri ka ba wuli ba taaba ba sagediibu yɛlɛ ka a pɛle soŋ zaa a kyɛ eŋ ba sagediibu faŋa, ka yɛlɛ na ba naŋ sagedi na somaŋ. A “Young People Ask” yelzuri naŋ be jw.org zuŋ na taa la zannoo yɛlɛ mine baapaalba naŋ na baŋ sɛge ba mine yɛlɛ eŋ be. Ba maalɛɛ ana zannoo yɛlɛ ŋa ka a soŋ baapaalba ka ba eŋ ba menne sagediibu faŋa a kyɛ soŋ ba ka ba maŋ sɛgre soorebie nɔɛ iribo ba  menneŋ. Ka yɛ booreeŋ laŋ zanne a yɛlɛ ŋa, yɛ na zanne nyɛɛ lɛ yɛŋ na baŋ de sumaaroŋ iri soorebie naŋ kyaare yɛ sagediibu yɛlɛ sori naŋ soma poɔŋ.

¹⁷ Baapaalaa kaŋa yuori naŋ di Matthew wulee lɛ o dɔgreba naŋ da maŋ e ewuluu koo aŋ somoo yaga zaa. Ba booree zannoo saŋa, Matthew ane o dɔgreba maŋ peɛrɛɛ yelzuri mine o class bitaaba naŋ na baŋ soore o yɛlɛ. O yeleeŋ ka: “Te maŋ teɛrɛɛ soorebie mine baŋ na baŋ soore ma, a de yɛlɛ na te naŋ peɛre nyɛ na e ewuluu meŋ kyaare lɛ maŋ na e N yɛlɛ. Ka maaŋ wa baŋ ananso naŋ vɛŋ maŋ sage yɛlɛ na maŋ sagedi na soŋ zaa, N maŋ taa la nyaa kyɛ aŋ e mɔlɔ ko ma ka N de sumaaroŋ iri yɛlɛ noɔre ko N taaba.”

18. Bo kawaŋ soŋ la be Kolosi 4:6 poɔŋ?

¹⁸ Yelmeŋɛ la, ka teneeŋ gbaŋ wa wuli yɛlɛ ka a pɛle soŋ zaa kyɛ neɛ zaa naaneŋ na sage yɛlɛ na te naŋ yele na. Kyɛ ka teneeŋ yi sumaaroŋ ane gyeremɛ soriŋ a yel a yɛlɛ, a na baŋ someŋ. (Kanne Kolosi 4:6.) Ka teneeŋ wa manna te sagediibu yɛlɛ korɔ neɛ kaŋa, a waa ŋa te naŋ de bɔll zaara korɔ o soba. Te na baŋ de la a bɔll lɔɔ ko o soba bɔĩĩ lɛ, bee a de za koo yaga zaa lɛ. Ka teneeŋ de a bɔll lɔɔ koo bɔĩĩ lɛ, a na baŋ eɛ mɔlɔ ka o soba nyɔge a bɔll a meŋ de lɔɔ ko o tɔ soba. Lɛ meŋ la, ka teneeŋ yi sumaaroŋ ane gyeremɛ soriŋ a yele yɛlɛ korɔ noba, ba na boɔrɔŋ ka ba kyɛlle woŋ te yɛlɛ ka te ne ba toɔ̃ tɔnne a dama a puoriŋ meŋ. Yelmeŋɛ la, ka neɛ kaŋaŋ boɔrɔ ka o e te seɛ bee a boɔrɔ ka o ŋmɛ nɔkpeɛne, te koŋ la tɔnne a dama diibu. (Yeng. 26:4) Kyɛ aminekaŋaŋ noba yaga koŋ e lɛ; aminekaŋaŋ gba noba yaga zie na boɔrɔ ka ba kyɛlle woŋ te yɛlɛ.

19. Bonso aŋ seŋ ka te maŋ taa sumaaroŋ ka teneeŋ wa ire soorebie naŋ kyaare te sagediibu yɛlɛ nɔɛ?

¹⁹ A pɛlɛɛŋ ka te maŋ nyɛɛ tɔnɔ yaga zaa ka teneeŋ zanne ka te taa sumaaroŋ. Puore sɔre Jehoova ka o ko bo a faŋa ka ho maŋ baŋ toɔ̃ taa sumaaroŋ ka neɛ kaŋaŋ wa soore bo soorebi-kpeɛŋaa kaŋa kyaare ho sagediibu yɛlɛ. Teɛre baŋ ka, ka hooŋ taa sumaaroŋ gyogo, ka neɛ kaŋa neŋ boŋ ba wa laŋ teɛroŋ gba, kyɛ a koŋ vɛŋ ka nɔkpeɛne wa. Ka hooŋ maŋ yi sumaaroŋ ane gyeremɛ soriŋ a iri yɛlɛ noɔre ko noba, a na soŋ baŋ ka ba leɛre teɛroŋ na baŋ da taa kyaare yelmenne naŋ be a Baabole poɔŋ na. Te “maŋ nare [te] menne wagre zaa ka [te] iri yɛlɛ noɔre” a kyaare te sagediibu yɛlɛ, “kyɛ yɛ maŋ de sumaaroŋ ane gyeremɛ naŋ e zuluŋ erɛ lɛ.” (1 Pit. 3:15) Vɛŋ ka ho sumaaroŋ wuli ka ho taa la faŋa!