1. A koŋ kɔɔre, boŋ ka Yezu na e?

 ZIE na teŋ kyɛŋ ta a donɛɛ ŋa poɔŋ na, yɛlɛ yaga na leɛreŋ ka a e nɔmãã yaga zaa! A koŋ kɔɔre, Yezu na di la neŋvobɔ zaa sɛrɛɛ. Yezu vɛŋɛɛŋ teŋ baŋ yɛlɛ naŋ na e sɛre kyɛ ka a sɛrɛɛdiibu ta. O da wulee o potuuribo bon naŋ “na wuli” ka o leɛ-waabo ane “a teŋɛ baaroo saŋ taɛ la.” (Mat. 24:3) A daŋyelbo ŋa be la Matio zuri 24 ane 25, a lɛ be Marko zu 13 ane Luka zu 21.

2. Bo teŋ na zanne a zannoo ŋa poɔŋ, ka sobuoŋ aŋ na baŋ soŋ te?

² Yezu da de la yelmannee ata mine e kpããmo a ko te. Ana la a peere ane a boore, a pɔge yɛmbaŋneba ne a pɔge dambolo naŋ ba baŋ dɔbɔ, ane a talɛntere yelmannaa na. A yelmannaa ŋa kaŋa zaa soŋ teŋ teŋ baŋ ka Yezu na kaa la neɛzaa yel-eree a kyɛ di o soba sɛrɛɛ. A zannoo ŋa poɔŋ, te na zannɛɛ a yelmannee ŋa yɛlɛ a nyɛ yɛlɛ teŋ na baŋ zanne yi a poɔŋ. A dɛndɛŋ yelmannaa teŋ na daŋ zanne la a peere ane a boore yelmannaa na.

A PEERE ANE A BOORE

3. Bo saŋa ka Yezu na di noba sɛrɛɛ?

³ A peere a neŋ a boore yelmannaa na poɔŋ, Yezu yeleeŋ ka, lɛ na noba naŋ na e ba yɛlɛ a kyaare a duorisoŋ ane lɛ ba naŋ na e ba yɛlɛ a kyaare o yɔɔmine ba naŋ sɔ naaloŋ kãã la oŋ na kaa a kyɛ di ba sɛrɛɛ. (Mat. 25:31-46) A ‘dɔgroŋ kpoŋ’ saŋa oŋ na wuli ka neɛ eɛ pere bee o eɛ boɔ sɛre kyɛ ka Hammagedon piili. (Mat. 24:21) Aŋa lɛ na pekyeenɛ naŋ maŋ wɛle peere ane boore taaŋ na, lɛ meŋ la ka Yezu na wɛle bana na zaa naŋ sonnɔ bana na ba naŋ sɔ a naaloŋ kãã na a yi bana na naŋ ba sonnɔ ba na eŋɛŋ.

4. Aŋa lɛ na Aizeeya 11:​3, 4 naŋ yel na, ananso la wala teŋ na baŋ sagedi meŋɛmeŋɛ ka Yezu na di la noba sɛrɛɛ dantorii soriŋ? (Kaa a foto meŋ.)

 ⁴ A Baabole daŋyel biŋeeŋ ka Yezu na arɛɛ Jehoova gbɛbɔgriŋ a di sɛrɛɛ dantorii soriŋ. (Kanne Aizeeya 11:3, 4.) O kaarɛɛ nensaaleba yel-eree, ba teɛrɛ, ba yelyaga ane lɛ ba naŋ erɛ ba yɛlɛ a kyaare o yɔɔmine na ba naŋ sɔ a naaloŋ kãã na soŋ sɛre kyɛ dire ba sɛrɛɛ. (Mat. 12:​36, 37; 25:40) Noba na zaa naŋ sonnɔ Krista yɔɔmine na ba naŋ sɔ naaloŋ kãã, a sonnɔ ba ba toma meŋ poɔŋ na, Yezu baŋɛɛ ba zaa. a Sori na kaŋa neɛ naŋ na baŋ tu kyɛ soŋ Krista yɔɔmine na la ka, o sonnɔ ba a naaŋ moɔloo toma poɔŋ. Bana naŋ sonnɔ ba a toma ŋa poɔŋ na, o na di la ba sɛrɛɛ ka ba eɛ “nemmenne,” ba na nyɛɛ a vuo ka ba nyɛ “nyɔvore naŋ ba taa baaroo” a donɛɛ zuŋ kyɛ. (Mat. 25:46; Yel. 7:16, 17) A eɛ kyɔɔtaa naŋ e kpoŋ yaga zaa a ko bana naŋ dire yelmennoŋ na! Ka ba naŋ wa dire yelmennoŋ a yi pampana a te ta saŋa na a dɔgroŋ kpoŋ naŋ na baare na, ba yoe na be la “a nyɔvore gane” poɔ.​—Yel. 20:15.

5. Bo teŋ na baŋ zanne yi a peere ane a boore yelmannaa na poɔŋ, ka nembuoŋ na baŋ nyɛ tɔnɔ yi be?

⁵ De ho yel-eree wuli ka ho diree yelmennoŋ korɔ Naaŋmen. Yezu yelmannaa naŋ kyaare boore ane peere na kyaarɛɛ bana naŋ taa teɛretɔ ka ba na zeŋɛɛ a donɛɛ ŋa zuŋ na. Ba maŋ sonnɛɛ Krista yɔɔmine a tonɔ a naaŋ moɔloo toma a de wuli ka ba taa la sagediibu, a kyɛ maŋ la yi yelmennoŋ poɔŋ a tuuro sowuli na zaa a gbaŋgba-bivelaa ane yɛmbaŋna naŋ maŋ de korɔ ba na. (Mat. 24:45) Kyɛ bana na meŋ naŋ taa teɛretɔ ka ba na gaa la sazu na meŋ seŋ ka ba kyɛlle a kpããmo na naŋ be a yelmannaa ŋa poɔŋ na. Bonso Yezu maŋ kaarɛɛ ba meŋ yel-eree, ba poteɛrɛ, ane ba yelyaga. Aseŋ ka ba meŋ wuli ka ba taa la yelmennoŋ. Yezu gba da terɛɛ yelmannee ayi mine naŋ taa kpããmo duoro ko bana na ba naŋ sɔ naaloŋ kãã na. A yelmannee ŋa meŋ be la Matio zuri 25 poɔŋ. Yɛ vɛŋ ka te yel a pɔgeba naŋ ba baŋ dɔbɔ naŋ e dambolo ane bana naŋ e yɛmbaŋneba yelmannaa na yɛlɛ.

A PƆGEBA NAŊ BA BAŊ DƆBƆ NAŊ E DAMBOLO ANE BANA NAŊ E YƐMBAŊNEBA

6. Sobuoŋ ka a pɔgeba naŋ ba baŋ dɔbɔ banuu na wuli ka ba taa la yɛŋ? (Matio 25:​6-10)

⁶ A pɔgeba naŋ ba baŋ dɔbɔ yelmannaa na poɔŋ, Yezu da yeleeŋ ka ba da eɛ pɔgeba pie naŋ da gɛrɛ ka ba te tuore a pɔge-paalaa serɛ. (Mat. 25:1-4) Ba zaa teɛretɔ la ka ba tu a pɔge-paalaa serɛ ka ba gaa a kultaa tigri zie. Yezu da yeleeŋ ka ba poɔ banuu eɛ “yɛmbaŋneba” ka banuu meŋ e “dambolo.” Bana naŋ da e yɛmbaŋneba na da sɛgrɛɛ ba menne soŋ a kaara velaa. Ba gba da eɛ siri ka ba kyɛnle a pɔge-paalaa serɛ kɔɔre lɛ zaa naŋ seŋ neŋ, ka o naŋ gbaŋ na wa teŋsogɔ saŋa. Azuŋ ba da de la fentilɛ waneŋ ka a kyaane zie ko ba ka ba nyɛrɛ teŋsogɔ saŋa. Ba gba da de la kãã poɔ a waneŋ, ka a pɔge-paalaa serɛŋ gbaŋ kɔɔre, kyɛ ba na nyɛ la kãã eŋ ba fentilhi na poɔŋ ka a vũũ ta kpinni. (Kanne Matio 25:6-10.) Saŋa na a pɔge-paalaa serɛ naŋ da wa ta na, a pɔgeba naŋ ba baŋ dɔbɔ naŋ e yɛmbaŋneba na neŋ o da laŋ kpɛ la a tigri zie. Lɛ meŋ la, ka Kristabiiri na ba naŋ sɔ naaloŋ kãã naŋ di yelmennoŋ lɛɛŋ te ta saŋa na Krista naŋ na wa na, o na ko baŋ ba kyɔɔtaa ka ba poɔ a Pɔge-paalaa serɛ Yezu eŋɛŋ ka ba kpɛ a sazu Naaloŋ poɔŋ. b (Yel. 7:1-3) Ka banuu na meŋ naŋ e dambolo na meŋ?

7. Boŋ da pɔge a pɔgeba banuu na naŋ ba baŋ dɔbɔ naŋ da e dambolo na, ka ananso la wala?

 ⁷ Ba poɔ banuu na yɛŋ da ba nare ba menne a e siri a kyɛnlɛ a pɔge-paalaa serɛ. Ba fentilhi da waanaŋ ka a kpinni, kyɛ ba da ba taa kãã meŋ na eŋ. Saŋa na baŋ da wa woŋ ka a pɔge-paalaa serɛ waanaŋ na, ba da gaayɛŋ ka ba te da kãã. Ba da ba kyebe saŋa na a pɔge-paalaa serɛ naŋ da wa ta na. A lɛ saŋa, “banaŋ zaa naŋ da nare ba menne da tu o [la] ka ba te kpɛ a pɔgebeɛle tigri die kyɛ ka ba page a dendɔre.” (Mat. 25:10) A puoriŋ, a banuu naŋ e dambolo na da leɛ waɛŋ a boɔrɔ ka ba kpɛ, a pɔge-paalaa serɛ da yelko baŋ ka: “N ba baŋ yɛ.” (Mat. 25:​11, 12) Ba na yɛŋ da ba nare ba menne soŋ ka ba kyɛnle a pɔge-paalaa serɛ kɔɔre lɛ zaa naŋ seŋ neŋ. Bo yɛlɛ ka bana na ba naŋ sɔ naaloŋ kãã na na baŋ zanne yi be?

8-9. Boŋ ka bana na ba naŋ sɔ naaloŋ kãã na na baŋ zanne yi a pɔgeba naŋ ba baŋ dɔbɔ yelmannaa na poɔŋ? (Kaa a foto meŋ.)

⁸ Wuli ka ho narɛɛ ho meŋɛ soŋ a kaara velaa. Yezu da ba wulo ka bana na ba naŋ sɔ naaloŋ kãã na mine na narɛɛ ba menne soŋ a kyɛnlɛ te ta a donɛɛ baaroo saŋa kyɛ ka ba mine koŋ nare ba mine soŋ ka ba e lɛ. Kyɛ o da wulee yɛlɛ naŋ na pɔge bana na ba naŋ sɔ naaloŋ kãã na ka ba naŋ ba nare ba mine soŋ a di kannyiri lɛɛŋ te ta a baaraa. Ka ba naŋ ba nare ba menne soŋ, ba koŋ nyɛ ba kyɔɔtaa na. (Gyn. 14:​3, 4) Lɛ na eɛ posaanaa yaga zaa! Ka te taa la teɛretɔ ka te na gaa la sazu bee ka te na zeŋ la a donɛɛ ŋa zuŋ, aseŋ ka te zaa de a kpããmo naŋ be a pɔgeba naŋ ba baŋ dɔbɔ yelmannaa na nimizeɛ. Aseŋ ka te kaŋa la kaŋa zaa nare te menne a kaara velaa, a e siri ka te di kannyiri te ta a baaraa.—Mat. 24:13.

⁹ Saŋa na Yezu naŋ da wa manne a pɔgeba naŋ ba baŋ dɔbɔ yelmannaa na baare na, a wuli lɛ a naŋ e nimizeɛ ka te nare te menne soŋ a kaara velaa na, o da lɛ mannɛɛ a talɛntere yelmannaa na meŋ. A lɛ yelmannaa na wulee ananso a naŋ seŋ ka te maŋ tonɔ tonkpeɛne.

A TALƐNTERE

10. Sobuo ka a gbaŋgbaare bayi na da wuli ka ba taa la yelmennoŋ? (Matio 25:​19-23)

¹⁰ A talɛntere yelmannaa na poɔŋ, Yezu da mannɛɛ gbaŋgbaare bayi mine naŋ da di yelmennoŋ  ko ba neŋkpoŋ, kyɛ ka ba kaŋa soba yɛŋ da ba e lɛ. (Mat. 25:​14-18) A gbaŋgbaare bayi na da tonɛɛ tonkpeɛne ka ba nyɛ tɔnɔ ko ba neŋkpoŋ na. Ba neŋkpoŋ na da tu la sori, kyɛ sɛre oŋ na tu a sori na o da de la talɛntere ko o gbaŋgbaare na kaŋa zaa, a da eɛ libi-yaga. A gbaŋgbaare bayi naŋ da taa yelmennoŋ na da toŋ la tonkpeɛne, a de a libie toŋ neŋ toma yɛŋ poɔŋ. Bo tɔnɔŋ da yi be wa? Saŋa na ba neŋkpoŋ naŋ da leɛ wa na, ba da nyɛɛ tɔnɔ a dɔgle bon na o naŋ da ko ba na. Ba neŋkpoŋ na da pugi baŋ, ka ba neŋ o zaa da laŋ taa popeɛloŋ. (Kanne Matio 25:​19-23.) Ka a taaloŋ gbaŋgbaa na meŋ? Bo oŋ da de a libie na o neŋkpoŋ naŋ koo na e neŋ?

11. Boŋ da pɔge a gbaŋgba “entuo soba” na, ka ananso la wala?

¹¹ A taaloŋ gbaŋgbaa na da nyɛ la talɛnte bonyeni kyɛ da e “entuo soba.” O neŋkpoŋ na da kaarɛɛ soriŋ ka o de a talɛnte toŋ neŋ toma yɛŋ poɔŋ. Kyɛ o da de oŋ ũũ teŋɛŋ. Saŋa na o neŋkpoŋ naŋ da leɛ wa na, a talɛnte bonyeni na yoŋ oŋ da leɛ de koo. A gbaŋgbaa ŋa da ba taa gyog-soŋ. O gba da ba sɔre sudi yi o neŋkpoŋ na zieŋ ane o naŋ ba toŋ toma a nyɛ tɔnɔ koo, kyɛ o da leɛ yeleeŋ ka o neŋkpoŋ na eɛ “potuo soba.” A gbaŋgbaa ŋa yɛlɛ da ba pɛle o neŋkpoŋ na poɔ. A baaraa zaa o neŋkpoŋ na da vɛŋɛɛŋ baŋ deɛ a talɛnte yi o nuuriŋ a kyɛ karoo yi o dieŋ meŋ.—Mat. 25:​24, 26-30.

12. Zenɛ ŋa, nembobo ka a gbaŋgbaare bayi na naŋ da taa yelmennoŋ na are ko?

¹² A gbaŋgbaare bayi naŋ taa yelmennoŋ na are ko la Kristabiiri ba naŋ sɔ naaloŋ kãã naŋ dire yelmennoŋ na. Ba neŋkpoŋ Yezu toŋboɔle baŋ ka ba “kpɛ wa laŋne [o] a wono noɔ̃.” Ba na nyɛɛ ba kyɔɔtaa a gaa sazu, a dɛndɛŋ kũũ leɛ-iruu na. (Mat. 25:​21, 23; Yel. 20:5b) Kyɛ, a gbaŋgba entuo soba na yɛŋ ewuli faa na eɛ kpããmo a ko bana na ba naŋ sɔ naaloŋ kãã na. Sobuoŋ?

13-14. Boŋ ka bana na ba naŋ sɔ naaloŋ kãã na zanne yi a talɛntere yelmannaa na poɔŋ? (Kaa a foto meŋ.)

¹³ Wuli ka ho eɛ neɛ naŋ tonɔ tonkpeɛne. A talɛntere yelmannaa na ane a pɔgeba naŋ ba baŋ dɔbɔ yelmannaa na poɔŋ, Yezu da ba wulo ka bana na ba naŋ sɔ naaloŋ kãã na mine na wa eɛ entuo deme. Kyɛ o da boɔrɔŋ ka o wuli yɛlɛ naŋ na pɔge ba ka ba naŋ ba lɛ taa eŋnyagroŋ.  Azuŋ bana menne koŋ wuli ka ba boɔle baŋ, a “kaa-iri” ba, ba koŋ ko ba vuo meŋ ka ba kpɛ a sazu Naaloŋ poɔ.—2 Pit. 1:10.

¹⁴ Yezu yelmannee naŋ kyaare a pɔgeba naŋ ba baŋ dɔbɔ ane a talɛntere na vɛŋɛɛŋ aŋ pɛle ka aseŋ ka Kristabiiri ba naŋ sɔ naaloŋ kãã na nare ba menne soŋ a kaara velaa, a kyɛ tonɔ tonkpeɛne meŋ. Kyɛ Yezu da lɛ yelee yelkaŋa naŋ e kpããmo a ko bana ba naŋ sɔ naaloŋ kãã na bee? Ɛɛ, o da eɛ lɛ! Yɛlɛ na o naŋ yel na be la Matio 24:​40, 41, a meŋ kyaarɛɛ a baaraa sɛrɛɛdiibu naŋ bebe ko bana na ba naŋ sɔ naaloŋ kãã na.

NEMBOBO BAŊ NA “TAA . . . GAA NE”?

15-16. Sobuo ka yɛlɛ naŋ be Matio 24:​40, 41 na soŋ bana na ba naŋ sɔ naaloŋ kãã na baŋ nyɛ ka aseŋ ka ba kaara velaa?

¹⁵ Sɛre kyɛ ka Yezu na manne a yelmannee ata na, o da mannɛɛ a baaraa sɛrɛɛdiibu naŋ kyaare bana na ba naŋ sɔ naaloŋ kãã na yɛlɛ, a na wulee bana naŋ na nyɛ faabo. O da yelee dɔbɔ bayi mine naŋ tonɔ toma weɛŋ ane pɔgeba bayi mine naŋ ɛrɛ zɔŋ neɛre zuŋ. A waa ŋa a dɔbɔ bayi zaa tonɛɛ toŋ yenaa ka a pɔgeba meŋ tonɔ toŋ yenaa, kyɛ Yezu da yeleeŋ ka ba na wa “taa [la] kaŋ gaa ne kyɛ bare kaŋ.” (Kanne Matio 24:​40, 41.) O pãã da kpãã la o potuuribo na ka: “Yɛ gu yɛmenne velaa, a kaara soŋ, bonso, yɛ ba baŋ a daare na yɛ Daana naŋ waana.” (Mat. 24:42) Saŋa na Yezu naŋ da wa manne a pɔgeba naŋ ba baŋ dɔbɔ yelmannaa na baare na, o da yelee yɛlɛ mine neŋ a yɛlɛ ŋa naŋ yitaa. (Mat. 25:13) Ka lɛ a yɛlɛ ŋa kyaarɛɛ taa bee? A waa ŋa a naŋ kyaare taa. Bana na ba naŋ sereŋ sɔ naaloŋ kãã baŋ na di yelmennoŋ te ta a baaraa na, ba na la baŋ na “taa . . . gaa ne,” ka Yezu de ba kpɛ a sazu Naaloŋ poɔ.—Gyn. 14:3.

¹⁶ Wuli ka ho eɛ neɛ naŋ kaara velaa. Neɛzaa ba naŋ sɔ naaloŋ kãã kyɛ oŋ ba kaara velaa, ba koŋ boɔle o paale a “neŋkaa-iri” poɔŋ. (Mat. 24:31) Bana na meŋ zaa naŋ taa teɛretɔ ka ba na zeŋ la a donɛɛ zuŋ kyɛ seŋ ka ba de Yezu kpããmo na nimizeɛ, a kaara velaa a kyɛ dire yelmennoŋ meŋ.

17. Ananso la wala aŋ ba seŋ ka te vɛŋ ka a dɔnnɔ te ka Jehoovaŋ kaa iri neɛ kaŋa pampana a sɔ o soba naaloŋ kãã?

¹⁷ Te baŋɛɛ Jehoova soŋ, azuŋ te baŋɛɛŋ ka o sɛrɛɛdiibu zaa maŋ toriŋ. Te saŋa ŋa, ka teneeŋ wa nyɛ ka Jehoova iree noba mine a sɔ ba naaloŋ kãã, te ba maŋ vɛŋ aŋ dɔnnɔ te. c Te maŋ teɛrɛɛ yelmannaa na Yezu naŋ da manne kyaare tontonneba mine naŋ da tonɔ toma dɔɔ kaŋa weɛŋ. (Mat. 20:​1-16) Bana naŋ daŋ gaa a weɛ ane bana naŋ da wa a puoriŋ na zaaŋ da nyɛ saŋyɔɔ aŋ seŋ taa. Lɛ meŋ la, ka ba naŋ daŋ sɔ neɛ kaŋa naaloŋ kãã yuomo mine naŋ pare, a kyɛ sɔ neɛ kaŋa meŋ naaloŋ kãã pampana, kyɛ ba zaaŋ na nyɛ a sazu kyɔɔtaa na, ka ba naŋ di yelmennoŋ te ta a baaraa.

KYƐLLE WOŊ A KPÃÃMO

18-19. Bo yɛlɛ teŋ zanne yi a yelmannee na zaa poɔŋ, ka bo kpããmo aŋ korɔ te?

¹⁸ Bo yɛlɛ teŋ zanne? A yelmannaa naŋ kyaare peere ane a boore na wulee bana naŋ taa teɛretɔ ka ba na zeŋ la a donɛɛ ŋa zuŋ, a nyɛ nyɔvore naŋ ba taa baaraa a neŋ lɛ aŋ e nimizeɛ ka ba dire yelmennoŋ korɔ Jehoova pampana ane a dɔgroŋ kpoŋ saŋa. Nendaarekaŋa naŋ waana, Yezu na di la yelmeŋɛ deme sɛrɛɛ ka ba eɛ noba naŋ seŋ neŋ a “nyɔvore naŋ ba taa baaroo.”—Mat. 25:46.

¹⁹ Te zannɛɛ yelmannee ayi mine meŋ naŋ e kpããmo a ko bana na ba naŋ sɔ naaloŋ kãã na. Yezu yelmannaa naŋ kyaare a pɔgeba naŋ ba baŋ dɔbɔ na, ba poɔ banuu la da wuli ka ba taa la yɛŋ. Ba da narɛɛ ba menne soŋ a kaara  velaa, a e siri ka ba kyɛnle a pɔge-paalaa serɛ a kɔɔre lɛ zaa naŋ seŋ neŋ. Kyɛ bana naŋ da e dambolo na da ba nare ba menne soŋ. Azuŋ a pɔge-paalaa serɛ da ba sage baŋ kpɛ a kultaa tigri zie. Aseŋ ka te meŋ e siri ka te kyɛnle kɔɔre lɛ zaa naŋ seŋ neŋ a te ta saŋa na Yezu naŋ na de a donfaa ŋa wane o baaraa. Yezu yelmannaa na meŋ naŋ kyaare a talɛntere na, te wa nyɛɛŋ ka a gbaŋgbaare bayi na da toŋɛɛ tonkpeɛne yaga. Ba da toŋɛɛ tonkpeɛne ko ba neŋkpoŋ na ka lɛ vɛŋ ka o poɔ da pɛle ba yɛlɛ. Kyɛ a gbaŋgba entuo soba na yɛŋ, o da zagrooŋ bare. Boŋ teŋ zanne yi be? Aseŋ ka te moɔ̃ niŋe Jehoova puoruu toma poɔŋ a te ta a baaraa. A baaraa zaa, te wa zanne nyɛɛ lɛ bana na ba naŋ sɔ naaloŋ kãã naŋ seŋ ka ba naŋ kyɛnɛ kaara velaa ka Yezu wa “taa [ba] gaa ne” a te ko ba a sazu kyɔɔtaa na. Ba de la eŋnyagroŋ a kaara soriŋ yaga zaa ka ba “te lantaa” ne Yezu sazuŋ. Hammagedon zɔɔre puoriŋ, ba na eɛ Yezu pɔge-paalaa a Pilee kultaa na poɔŋ.—2 Tɛs. 2:1; Yel. 19:9.

20. Boŋ ka Jehoova na e ko bana naŋ kyɛlle woŋ o kpããmo na?

²⁰ A saŋa tagra taraŋ wieoŋ wieoŋ ka Yezu de a sɛrɛɛdiibu waneŋ, kyɛ a ba seŋ ka te zoro dabeɛ̃. Ka teneeŋ dire yelmennoŋ, te Saa naŋ be sazuŋ naŋ nɔŋ te yaga zaa na na ko teŋ “kpeɛ̃o . . . naŋ ba taa mannoo” ka te toɔ̃ “muri yi . . . kyɛ are a nensaalaa Bie niŋesogɔ.” (2 Kor. 4:7; Luk. 21:36) Ka te taa la teɛretɔ ka te na gaa la sazu bee ka te na zeŋ la a donɛɛ zuŋ, ka teneeŋ de kpããmo naŋ be Yezu yelmannee na poɔŋ tonɔ neŋ toma, Jehoova poɔ na pɛleŋ. Jehoova naŋ taa nembaalonzoe yaga zaa na zuŋ, o na sɛgɛɛ te yoe eŋ a “nyɔvore gane poɔ.”—Daan. 12:1; Yel. 3:5.