1-2. Jehoova naŋ maale te teŋ maŋ taa popeɛloŋ ka teneeŋ wa korɔ noba boma a gaŋ noba naŋ korɔ te boma na, bo tɔnɔ teŋ maŋ nyɛ yi be?

 TE MAŊ taa la popeɛloŋ yaga zaa ka teneeŋ wa korɔ te taaba boma a gaŋ ka teneeŋ wa deɛrɛ boma yire te taaba zieŋ. Lɛ ka Jehoova maale te. (Tom. 20:35) Lɛ wuleeŋ ka, ka neɛŋ wa ko te kyɔɔtaa te ba maŋ taa popeɛloŋ bee? Ai. Te zaa baŋɛɛŋ ka ka neɛŋ wa ko te kyɔɔtaa, te maŋ taa la popeɛloŋ. Kyɛ te poɔ maŋ maaleŋ pɛleŋ yaga zaa ka teneeŋ wa korɔ te taaba kyɔɔtaare. A somaŋ yaga zaa Jehoova naŋ maale te ana sori ŋaŋ. Bonso teŋ yel lɛ?

² Jehoova naŋ maale te ana sori ŋa na zuŋ, a maŋ baŋ vɛŋeŋ teŋ erɛ yɛlɛ naŋ na ko te popeɛloŋ yaga. Ka teneeŋ maŋ teɛrɛ soe teŋ na baŋ tu a kyɛ korɔ te taaba boma, a maŋ mɔɔ kyɛ erɛ lɛ, te na taa la popeɛloŋ yaga zaa. A eɛ nɔmãã yaga zaa Jehoova naŋ maale te ana sori ŋaŋ.—Yiem. 139:14.

3. Ananso la wala teŋ na baŋ yelka Jehoova la “a [popeɛloŋ] Naaŋmen”?

³ A Baabole naŋ yelka bana naŋ maŋ korɔ ba taaba boma na maŋ taa la popeɛloŋ na, a vɛŋɛɛŋ teŋ baŋ ananso a Baabole naŋ yelka Jehoova la “a [popeɛloŋ] Naaŋmen.” (1 Tim. 1:11) Jehoova la daŋ piili a korɔ noba boma. Neɛzaa kyebe a korɔ boma gaŋ Jehoova. Aŋa lɛ a bitontona Pɔɔl naŋ yel na, o na la vɛŋ teŋ “voorɔ, a yoɔrɔ a kyɛ so te menne.” (Tom. 17:28) Yelmeŋɛ la, “mennoŋ kyɔɔtaare teroo zaa ane kyɔɔtaa zaa naŋ soma” yi la Jehoova zie.—Gyi. 1:17.

4. Boŋ na baŋ soŋ te ka te maaleŋ taa popeɛloŋ yaga zaa?

⁴ Te zaa na boɔrɔŋ ka te nyɛ popeɛloŋ na neɛ naŋ maŋ taa ka o naŋ wa korɔ o taaba boma. Te na baŋ eɛ lɛ ka teneeŋ maŋ tɔglɔ lɛ Jehoova naŋ maŋ yuoro o nu a korɔ noba boma na. (Efe. 5:1) A zannoo ŋa poɔŋ, te na zanne nyɛɛ lɛ Jehoova naŋ e ewuli soŋ ko te a yɛlɛ ŋa poɔŋ, ane lɛ teŋ na baŋ e ka teneeŋ wa nyɛ  ka neɛ kaŋa te naŋ e yelsoŋ kaŋa ko ba wuli nimipa. A na soŋ teŋ yaga zaa ka te moɔ̃ niŋe a maŋ korɔ te taaba boma ka lɛ vɛŋ ka te maaleŋ taa popeɛloŋ yaga zaa.

TƆGLƆ JEHOOVA A MAŊ KORƆ HO TAABA BOMA

5. Bo boma naŋ fɛre te zemmo poɔŋ la ka Jehoova maŋ korɔ te?

⁵ Bo yɛlɛ mine la ka Jehoova maŋ yuoro o nu a erɛ korɔ te? Yɛ vɛŋ ka te nyɛ a mine. Jehoova maŋ korɔ teŋ boma yɛlɛ naŋ fɛre te te zemmo poɔŋ. Aminekaŋaŋ te koŋ taa bontaree yaga te zemmo poɔŋ, kyɛ Jehoova maŋ ko teŋ boma yɛlɛ naŋ ferɛ te te zemmo poɔŋ. Aŋa mannoo poɔŋ, o maŋ ko teŋ bondirii, bonsuurii, ane gaa zie. (Yiem. 4:8; Mat. 6:​31-33; 1 Tim. 6:​6-8) Jehoova ba maŋ ko te a boma ŋa zaa a naŋ seŋ ka o e lɛ zuŋ. Lɛ yɛŋ ananso la wala oŋ maŋ korɔ te a boma ŋa zaa?

6. Bo yɛlɛ teŋ zanne yi Matio 6:​25, 26?

⁶ Jehoova naŋ nɔŋ te zuŋ oŋ maŋ korɔ te boma yɛlɛ naŋ fɛre te. Te nyɛ yɛlɛ na Yezu naŋ da yel aŋ be Matio 6:​25, 26. (Kanne.) Yezu da de la Naaŋmen bonmaalee mine a e yelmannaa. Yezu da de la ŋmama a e yɛlɛ bigree a yelka: “A ba borɔ bee a kyeɛrɛ, bee eŋnɛ boma bugri poɔ meŋ.” Kyɛ hooŋ nyɛ yɛlɛ oŋ da lɛ yel: “A yɛ tenvelaa Saa guolo a la.” Ka Yezu pãã da soore ba ka: “Yɛ ba seɛ a bon-ɛgre ama yaga zaa bee?” Boŋ oŋ da boɔrɔ ka o wuli te? Jehoova yelmeŋɛ puorebiiri eɛ nanee yaga zaa koo a gaŋ dunni. Ka Jehoovaŋ maŋ kaara a dunni ŋa zuŋ, lɛ yɛŋ te na baŋ sagediŋ peɛlaaŋ ka o na kaa la te meŋ zuŋ! Aŋa bi-saa naŋ maŋ kaara o booree zu na, lɛ meŋ la ka Jehoova maŋ yi nɔmmo poɔŋ a kaara o booree zu.—Yiem. 145:16; Mat. 6:32.

7. Bo yɛlɛ mine la teŋ na baŋ e a tɔglɔ lɛ na Jehoova naŋ maŋ yuoro o nu a korɔ noba boma na? (Kaa a foto meŋ.)

⁷ Aŋa Jehoova, te meŋ na baŋ ko la te taaba boma te naŋ nɔŋ ba zuŋ. Aŋa mannoo poɔŋ, ho baŋɛɛ te yɔɔ kaŋa bondirii ane bonsuurii yɛlɛ naŋ fɛre o bee? Jehoova na baŋ tu la ho eŋɛŋ kyɛ ko o soba boma yɛlɛ naŋ fɛre o. Ka saammo kpoŋ kaŋaŋ wa e, Jehoova noba maŋ eɛ wieoŋ a te soŋ ba taaba. Aŋa mannoo poɔŋ, a COVID-19 baaloŋ faa na saŋa, te yɔɔmine da de la bondirii, bonsuurii, ane bontaree a gaa soŋ te yɔɔmine yɛlɛ naŋ da e kpeɛŋaa ko ba. Ba mine meŋ da iree libie a soŋ te donɛɛ zaa puoruu toma na. A da soŋɛɛŋ baŋ de sommo te ko te yɔɔmine naŋ da tuoro saammo bɛrɛ ziiri mineŋ. Te yɔɔmine ŋa naŋ da yuo ba nu a tere a boma ŋa da de la yɛlɛ naŋ be Hiburu 13:16: “Yɛ ta nagra ka yɛ erɛ velaa kyɛ pono ne noba a boma yɛ naŋ taa, bonso, a [sareka] ama taaba la pɛllɛ Naaŋmen poɔ.”

8. Sobuo teŋ maŋ nyɛ tɔnɔ yi Jehoova kpeɛ̃o na eŋɛŋ? (Filipae 2:13)

 ⁸ Jehoova maŋ ko teŋ faŋa. Jehoova kpeɛ̃o ba taa mannoo, o maŋ ko la o puorebiiri faŋa naŋ seŋ neŋ. (Kanne Filipae 2:13.) Ka lɛ ho daŋ puore sɔrɛɛ Jehoova ka o ko bo faŋa ka ho toɔ̃ are pigrinyɛ bee yelkpeɛŋaa kaŋa noɔreŋ bee? Aminekaŋaŋ ho meŋ maŋ puore sɔrɛɛ Jehoova ka o ko bo faŋa ka ho toɔ̃ e yɛlɛ naŋ seŋ ka ho e bebiri zaa. Ka hooŋ nyɛ ho puoro na noɔre iribo, aminekaŋaŋ ho neŋ a bitontona Pɔɔl na laŋɛɛ teɛroŋ saŋa na oŋ da sɛge ka: “N na baŋ e la yelzaa a yi a soba na naŋ korɔ ma faŋa zie.”—Fil. 4:13.

9. Sobuoŋ te maŋ tɔglɔ Jehoova ka teneeŋ wa de te faŋa a sonnɔ te taaba? (Kaa a foto meŋ.)

⁹ Aneazaa ka te ba taa kpeɛ̃o aŋa Jehoova naŋ taa kpeɛ̃o a maŋ de sonnɔ noba na, kyɛ te na baŋ tɔglɛɛ Jehoova a maŋ de te faŋa a sonnɔ te taaba. Aŋa mannoo poɔŋ, te na baŋ soŋ la te yɔɔ kaŋa yuomo naŋ gaa nimitɔɔre bee a a soŋ te yɔɔ kaŋa naŋ beɛrɛ ka o maale o die bee a gaa te di daa wa koo. A neŋ meŋ, te na baŋ de la te menne tere a te soŋ ka ba maale te Lammozie. Ka teneeŋ de te faŋa a tonɔ a toma ŋa taa, te yɔɔmine na nyɛ la tɔnɔ yi be.

10. Wala hoŋ na baŋ e a de ho yelyaga eŋnɛ ho taaba faŋa?

¹⁰ Maŋ teɛre baŋ ka ho yelyaga na baŋ eŋɛɛ ho taaba faŋa yaga zaa. Ka lɛ ho baŋɛɛ neɛ kaŋa hoŋ na baŋ pugoo ane yelsonne o naŋ erɛ ka a emoo faŋa bee? Ho baŋɛɛ neɛ kaŋa naŋ boɔrɔ sukyiridii bee? Ka lɛ na, mɔɔ kyɛ vɛŋ ka o soba baŋ ka ho teɛrɛɛ o yɛlɛ. Ho na baŋ gaa te puoree o soba, a boɔloo fone zuŋ, bee a toɔloo card, email, bee text message. Ta de ho teɛroŋ zaa eŋ lɛ hoŋ na yel yelbie naŋ noma ko o soba. Ka hooŋ yi ho poɔ zaa a yel yelbie awala mine yoŋ gba, kyɛ a na baŋ eŋɛɛ o soba faŋa yaga zaa ka o toɔ̃ are o yelkpeɛne noɔreŋ.—Yeng. 12:25; Efe. 4:29.

11. Sobuoŋ ka Jehoova maŋ de yɛŋ korɔ noba?

¹¹ Jehoova maŋ ko teŋ yɛŋ. A bitontona Gyimisi da sɛgɛɛŋ ka: “Ka yɛ kaŋ zaa ba wa taa yɛŋ, o sɔre yɛŋ yi Naaŋmen zie, O na ko o la. Ona la maŋ ko neɛzaa ne popeɛloŋ, a ba zɔɔrɔ yɛlɛ.” (Gyi. 1:5) Lɛ wuleeŋ ka Jehoova ba maŋ taa o yɛŋ na o yoŋ, kyɛ o maŋ deoŋ ko noba mine meŋ. Ka hooŋ nyɛ, a sɛgre meŋ la yeleeŋ ka ka Jehoovaŋ wa korɔ te o yɛŋ na, o “ba zɔɔrɔ yɛlɛ.” O ba maŋ vɛŋ ka te eŋɛ kyoɔre te naŋ boɔrɔ o yɛŋ ane sowuli na zuŋ. O gba maŋ boɔrɔŋ ka te sɔrɔ yɛŋ yire o zie wagre zaa.—Yeng. 2:​1-6.

12. Bo soe mine la teŋ na baŋ tu kyɛ de bammo te naŋ taa wulo te taaba?

¹² Ka te meŋ? Te na baŋ tɔglɛɛ Jehoova a maŋ de te bammo wulo te taaba. (Yiem. 32:8) Jehoova puorebiiri taa la soe yaga baŋ na baŋ  tu kyɛ de yɛlɛ na ba naŋ zanne na wulo ba taaba. Aŋa mannoo poɔŋ, te maŋ wulee noba naŋ piili a naaŋ moɔloo aŋ ba kɔɔre lɛ baŋ na baŋ toŋ a naaŋ moɔloo toma. A lantaapuoruu nembɛrɛ maŋ di la kannyiri a sonnɔ a lantaapuoruu nembɛrɛ sonneba, ane te yɔɔdɔbɔ naŋ de suobu naŋ naŋ ba baŋ lɛ baŋ na baŋ toŋ toma mine a lantaapuoruu poɔŋ. Te yɔɔdɔbɔ ane te yɔɔpɔgeba naŋ kyile a meɛbo toma poɔŋ maŋ soŋ de la wulibo naŋ seŋ neŋ korɔ ba taaba ka ba meŋ na baŋ toŋ te puoruu meɛbo toma na mine.

13. Ka teneeŋ wa korɔ te taaba wuluu, wala teŋ na baŋ e a tɔglɔ Jehoova?

¹³ Maŋ tɔglɔ Jehoova ka hooŋ wa de bammo ho naŋ taa a wulo ho taaba. Jehoova maŋ yi la o poɔ zaa a de o yɛŋ a korɔ noba. Azuŋ, te meŋ maŋ yi la te poɔ zaa a de bammo te naŋ taa wulo te taaba weɛ lɛ. Te ba maŋ zoro dabeɛ̃ ka te de bammo te naŋ taa wuli te tɔ, bonso te ba maŋ teɛrɛ ka ka teneeŋ wa koo a wulibo baare, o na wa leɛrɛɛ te voɔreŋ a deɛ te toma tonɔ. A ba seŋ ka te teɛrɛ ka, neɛzaa ba soŋ te teŋ zanne yɛlɛ na te naŋ baŋ na, azuŋ te meŋ koŋ de wuli neɛzaa! Te na barɛɛ te tɔ na ka o meŋ zanna o meŋɛŋ. Jehoova puorebie zaa ba seŋ ka o taa a lɛ teɛroŋ ŋa. Te maŋ yi la te poɔ zaa a mɔɔrɔ te moɔbo zaa a de yɛlɛ te naŋ baŋ na wulo te taaba. (1 Tɛs. 2:8) Te boɔbo la ka nendaarekaŋa ba meŋ maŋ “toɔ̃ wuli . . . ba taaba.” (2 Tim. 2:​1, 2) Ka teneeŋ maŋ yi te poɔ zaa a wulo noba yɛlɛ te naŋ baŋ, te neŋ te taaba zaa na taa la yɛŋ ane popeɛloŋ.

KA TENEEŊ WA NYƐ KA NOBA NA TE NAŊ ERƐ SOŊ KORƆ NA BA WULO NIMIPA

14. Wala ka noba yaga zie zaa maŋ e ka teneeŋ wa yuo te nu a e yelsoŋ kaŋa ko ba?

¹⁴ Ka teneeŋ maŋ yuoro te nu a korɔ te taaba boma, agaŋaazaa ka teneeŋ wa erɛ lɛ korɔ te yɔɔmine, ba maŋ wulee nimipa. Aminekaŋaŋ ba na sɛgɛɛ yɛlɛ mine a toɔle ko te a puore te bareka, bee ba na baŋ tu la so zaala kaŋa a puore te bareka. (Kol. 3:15) Ka ba naŋ wa puore te bareka te maŋ taa la popeɛloŋ yaga zaa.

15. Bo aŋ seŋ ka te leɛteɛre ka noba mineŋ ba wa wuli nimipa ko te a kyaare yelsonne na te naŋ erɛ korɔ ba na?

¹⁵ Kyɛ saŋa kaŋa, noba mine ba maŋ wuli nimipa a kyaare yelsonne mine te naŋ e ko ba. Saŋa kaŋa a na maŋ waa ŋa sane zaa te naŋ kpɛ, wagre zaa te naŋ sãã, ane mɔɔre zaa te naŋ mɔɔ ka te soŋ neɛ kaŋa na, o baga kyebe. Ka lɛŋ wa e, wala hoŋ na baŋ e a naŋ kyɛnɛ taa popeɛloŋ ka ho suuri ta iri yaga zaa? Teɛre a sɛgre na ba naŋ iri a zannoo ŋa yi na, Toma 20:35. Ka teneeŋ wa e yelsoŋ kaŋa ko te taaba, bareka puoruu na baŋ na puore te na yoŋ naane maŋ vɛŋ teŋ taa popeɛloŋ. Ka teneeŋ erɛ soŋ korɔ noba kyɛ ka ba ba wulo nimipa, kyɛ te naŋ na baŋ taa la popeɛloŋ. Boŋ na baŋ soŋ te ka te e lɛ?

16. Bo yɛlɛ aŋ seŋ ka te teɛre ka teneeŋ wa erɛ yelsonne korɔ te taaba?

¹⁶ Teɛre baŋ ka ka hooŋ maŋ erɛ soŋ korɔ ho taaba, ho tɔglɛɛ Jehoova. O maŋ erɛɛ yelsonne korɔ noba, ka ba wulee nimipa bee ka ba ba wulo nimipa. (Mat. 5:​43-48) Jehoova eŋɛɛ noɔre ka ka teneeŋ meŋ maŋ erɛ soŋ korɔ te taaba, a ba “teɛrɛ ka ba leɛ yɔɔ [te],” te “saŋyɔɔ na e la kpoŋ.” (Luk. 6:35) Azuŋ ta vɛŋ ka ho eŋɛ kyoɔre ka nobaŋ ba wa wulo nimipa korɔ bo ane yelsonne na zaa ho naŋ erɛ korɔ ba na. Teɛre baŋ ka, yelsonne na zaa ho naŋ maŋ erɛ korɔ ho taaba a maŋ erɛ lɛ “ne popeɛloŋ” na, Jehoova na ko boŋ saŋyɔɔ.—Yeng. 19:17; 2 Kor. 9:7.

17. Bo teɛroŋ aŋ seŋ ka te taa ka teneeŋ wa erɛ yelsonne korɔ te taaba? (Luk. 14:​12-14)

¹⁷ Sori kaŋa teŋ na baŋ lɛ tɔgle Jehoova ka teneeŋ wa erɛ soŋ korɔ te taaba la ka te de yɛlɛ na Yezu naŋ yel aŋ be Luka 14:​12-14 tonɔ neŋ  toma. (Kanne.) A ba e faa ka te e soŋ ko noba naŋ na baŋ leɛ e soŋ ko te meŋ. Kyɛ ka teneeŋ wa nyɛ ka te maŋ erɛɛ soŋ korɔ noba mine a kyɛ taa a teɛroŋ ka ba meŋ e yelkaŋa ko te, wala teŋ na e? Ka lɛ aŋ waa ko bo yɛŋ, mɔɔ ka ho de yɛlɛ na Yezu naŋ yel na tonɔ neŋ toma. Te na baŋ yuo la te nu a e soŋ ko neɛ kaŋa te naŋ baŋ ka o ba taa a faŋa a na baŋ e yelzaa a yɔɔ te sane. Ka teneeŋ e lɛ te na taa la popeɛloŋ, bonso te baŋ ka te tɔglɛɛ Jehoova. Ka teneeŋ maŋ erɛ yelsonne korɔ te taaba kyɛ ba kaara soriŋ ka ba meŋ e yelkaŋa ko te, te naŋ na taa la popeɛloŋ ka teneeŋ wa e yelsoŋ ko neɛ kyɛ ka o soba ba wuli nimipa.

18. Bo aŋ ba seŋ ka te e, ka ananso la wala?

¹⁸ Ta taa teɛroŋ faa a kyaare ho taaba. (1 Kor. 13:7) Ka noba mineŋ ba wa wuli nimipa a kyaare yelkaŋa te naŋ e ko ba, te na baŋ soorɛɛ te menne ka: ‘Ba eɛ noba naŋ ba wulo nimipa, bee ba inneeŋ ka ba wuli nimipa ko te?’ Aminekaŋaŋ yɛlɛ mine zuŋ baŋ ba wuli nimipa ko te lɛ na te naŋ da kaara soriŋ na. Aminekaŋaŋ a soba niŋe paɛŋ yaga zaa neŋ yɛlɛ na ho naŋ e koo na, kyɛ a eɛ kpeɛŋaa koo ka o wuli nimipa. Kaapɔge a na baŋ eɛ vi ka o wuli nimipa ka neɛ kaŋaŋ wa e yelsoŋ koo, agaŋaazaa ka o naŋ da maŋ erɛ yelsonne korɔ noba saŋa kaŋa naŋ pare, kyɛ ba lɛ taa a kpeɛ̃o a na e lɛ pampana. Ka teneeŋ sereŋ nɔŋ te yɔɔmine, te na maŋ taa la teɛroŋ soŋ a kyaare ba, a maŋ de popeɛloŋ a korɔ te taaba boma.—Efe. 4:2.

19-20. Boŋ na baŋ lɛ soŋ te ka te taa popeɛloŋ ka teneeŋ wa erɛ yelsonne korɔ te taaba? (Kaa a foto meŋ.)

¹⁹ Taa kannyiri. Ŋaa ka Naa Soolomoŋ da sɛge kyaare teŋ na yuoro te nu a korɔ te taaba boma: “De ho boroboro lɔɔ eŋ koɔ̃ zuŋ, ho na leɛ nyɛaŋ beri yaga puoriŋ.” (Ikil. 11:1) Aŋa lɛ na a sɛgre naŋ soŋ te teŋ nyɛ na, noba mine na maŋ wulee nimipa—“beri yaga puoriŋ.” A yɛlɛ ŋa da pɔgɛɛ te yɔɔpɔge kaŋa.

²⁰ Yuomo mine puoriŋ, te yɔɔpɔge kaŋa ne o serɛ naŋ da tonɔ a gbandige zukaabo toma na da sɛgɛɛ lɛtɛ te ko te yɔɔpɔge kaŋa naŋ de suobu aŋ ba kɔɔre. A lɛtɛ poɔŋ, o da wulee ananso a naŋ e nimizeɛ ka te naŋ dire yelmennoŋ  korɔ Jehoova. Yuomo anii puoriŋ, te yɔɔpɔge ŋa meŋ da leɛ sɛgɛɛ lɛtɛ te koo a yelka: “Aminekaŋaŋ ho ba baŋ a yɛlɛ ŋa, kyɛ N boɔrɔŋ ka ho baŋ lɛ na ho naŋ soŋ ma a yuomo ŋa zaa puoriŋ.” O da la yeleeŋ ka: “Ho lɛtɛ na yelbie sereŋ da tɔ la N sukyiri yaga zaa, N daaŋ koŋ baŋ inni a Baabole sɛgre na meŋ naŋ da be a lɛtɛ poɔŋ na.” a O da mannɛɛ yelkpeɛne mine oŋ da tuore yuomo mine naŋ pare, a kyɛ pãã yelka: “Saŋa kaŋa N da maŋ boɔrɔŋ ka N bare Jehoova puoruu kpɛlɛŋkpɛlɛŋ. Kyɛ N da maŋ teɛrɛɛ a sɛgre hoŋ da sɛge eŋ a lɛtɛ poɔŋ ko ma na aŋ eŋ ma faŋa maŋ naŋ moɔ̃ niŋe puoro Jehoova.” O da lɛ yel poɔ yɛŋ ka: “A yuomo anii ŋa zaa poɔŋ, yelzaa ba kyebe a eŋ ma faŋa yaga zaa aseŋ lɛtɛ na hoŋ da sɛge ko ma ane Baabole sɛgre na hoŋ da sɛge eŋ a lɛtɛ poɔŋ na.” Hooŋ leɛteɛre nyɛ lɛ a gbandige zukaara pɔge na eŋɛ naŋ na mãã saŋa na o nu naŋ da kpɛ a lɛtɛ ŋa “beri yaga [mine] puoriŋ”! Aminekaŋaŋ ana kɔɔreŋ sɛre kyɛ ka neɛ kaŋa wuli nimipa a kyaare yelkaŋa te naŋ e koo saŋa kaŋa naŋ pare.

21. Ananso la wala hoŋ e siri ka ho na tɔglɛɛ Jehoova, a maŋ yuoro ho nu a korɔ ho taaba boma?

²¹ Aŋa lɛ te naŋ zanne nyɛ na, Jehoova maale teŋ sori kaŋa naŋ e o yoŋ poɔŋ. O maale teŋ teŋ maŋ taa popeɛloŋ yaga ka teneeŋ wa korɔ te taaba boma a gaŋ ka teneeŋ wa deɛrɛ. Ka teneeŋ wa toɔ̃ e yelkaŋa a soŋ te yɔɔ kaŋa, te maŋ taa la popeɛloŋ. Te poɔ meŋ maŋ pɛleŋ ka ba naŋ wa wuli nimipa ko te a kyaare yelsonne na te naŋ e ko ba na. Kyɛ ka o sobaŋ wuli nimipa bee ka o ba wuli nimipa, te naŋ maŋ taa la popeɛloŋ te naŋ e yɛlɛ naŋ soma. Daŋ ta wa inne ka bonzaa ho naŋ tere, “Jehoova na toɔ̃ ko boŋ boma yaga gaŋ lɛ.” (2 Tun. 25:9) Azuŋ o na baŋ ko boŋ boma yaga a gaŋ boma na ho naŋ korɔ ho taaba na! Ka Jehoovaŋ wa korɔ te maaloo, a maŋ eɛ kyɔɔtaa naŋ soma gaŋ kyɔɔtaa zaa. Azuŋ yɛ vɛŋ ka te zaa tɔglɔ te Saa naŋ be sazu naŋ maŋ yuoro o nu a korɔ noba boma yaga zaa na.