Ka hooŋ wa nara ho meŋɛ ka ho zanne boma, ho na baŋ soorɛɛ ho meŋɛ ka, ‘Bo yɛlɛ maŋ kaara soriŋ ka N zanne?’ Kyɛ aseŋ ka te teɛre baŋ ka, ka teneeŋ waana ka te zanne yelkaŋa, lɛ ba wuli ka yelpaala zaa ba kyebe ka Jehoova boɔrɔ ka te zanne. Wala teŋ na baŋ e a de te teɛroŋ zaa eŋ yɛlɛ na Jehoova naŋ waana ka o wuli te na eŋɛŋ?

Puore sɔre Jehoova ka o ko bo yɛŋ. Puore sɔre Jehoova ka o soŋ bo ka ho baŋ yɛlɛ na o naŋ boɔrɔ ka ho zanne pampana. (Gyi. 1:5) Ta vɛŋ ka yɛlɛ na ho naŋ baŋ saŋa zaa na yoŋ seŋ bo.—Yeng. 3:​5, 6.

Vɛŋ ka faŋa na naŋ be a Naaŋmen yelbiri poɔŋ na tonɔ toma ho zemmo poɔŋ. “Naaŋmen yelbiri voorɔ la.” (Hib. 4:12) Wagre zaa te naŋ maŋ wa kanna a Baabole, te na baŋ zannɛɛ yelpaala mine teŋ da ba baŋ a yi be, ka a baŋ soŋ te soe yaga poɔŋ. Kyɛ ka lɛŋ na baŋ e yɛŋ, aseŋ ka te daŋ sage yɛlɛ na Naaŋmen naŋ wulo te na.

Taa nimipa a kyaare soe na Jehoova naŋ maŋ tu kyɛ wulo te na. Jehoova siiloŋ bondirii na waa ŋa “bondi-sonne naŋ soma yaga zaa.” (Aiz. 25:6) Ta maŋ gaŋna yɛlɛ mine bara ho naŋ nyɛ ka a koŋ noma korɔ bo ka hooŋ kannaa. Ka hooŋ ba maŋ gaŋna yɛlɛ mine bara, ho na terɛɛ sori ka Naaŋmen soŋ bo ka ho wa taa gyogri naŋ soma, kyɛ ka ho nyɛrɛ popeɛloŋ meŋ ho boma zannoo poɔŋ!