Sieree zaa ba kyebe a wuli ka Yezu potuuribo 70 na naŋ da ba kye a Daana Zimaanee Bondirii zie na wuleeŋ ka o poɔ da ba pɛle ba yɛlɛ bee ba da zagrooŋ bare. Yezu deɛ da boɔrɔŋ ka o neŋ o bitontonee na laŋ di a lɛ zimaanee na.

A 12 na ane a noba 70 na zaa da eɛ Yezu potuuribo. Yezu da daŋ kaa la o potuuribo na zaa poɔŋ a iri dɔbɔ 12, oŋ da boɔlɔ ka o bitontonee. (Luk. 6:​12-16) O da be la Galili saŋa na oŋ da “boɔle a potuuribo pie ne bayi” a toŋ ba ka ba “gaa te moɔle a Naaŋmen Naaloŋ yɛlɛ kyɛ saŋna noba.” (Luk. 9:​1-6) A puoriŋ, saŋa na oŋ da lɛ be Gyudiya poɔŋ na, Yezu “da iri la noba lezaata ne pie mine meŋ, a da toŋ ba bayi bayi.” (Luk. 9:51; 10:1) Azuŋ, Yezu da taa la potuuribo ziiri tɛɛtɛɛ poɔŋ, baŋ moɔlɔ duoro a kyaaroo.

Aminekaŋaŋ, Yezu potuuribo na naŋ da e Gyuumine na neŋ ba booree deme meŋ da maŋ laŋ di la a Parebare tigri yuoni zaa. (Yiib. 12:​6-11, 17-20) Aŋ da kyɛre beraa wala ka Yezu kpi na, o neŋ o bitontonee na da gaa la Gyɛruzɛlɛm. Kyɛ o da ba toŋboɔle o potuuribo na zaa naŋ da be Gyudiya, Galili, ane Perea ka ba wa ka ba neŋ o laŋ di a Parebare tigri. A pɛlɛɛŋ ka, Yezu da boɔrɔŋ ka o neŋ o bitontonee na laŋ a lɛ tigri na saŋa. O da yelko baŋ ka: “N boɔrɔ la ne N poɔ zaa ka N di a [Parebare] tigri ne yɛ, kyɛ pãã nyɛ dɔgɛɛ.”—Luk. 22:15.

Yelkaŋa zuŋ ka Yezu da e lɛ. Yezu da waanaŋ ka o kpi aŋa “Naaŋmen Pilee. Ona la na peere a aŋdonɛɛ yelbieri bare.” (Gyn. 1:29) Gyɛruzɛlɛm oŋ na te kpi, takoreŋ saŋa na, be baŋ da maŋ te iri sarekare ko Naaŋmen. A Parebare tigri da maŋ teɛrɛɛ a Izerayɛl biiri ka Jehoova la faa ba yi a Igyipiti gbaŋgbaaloŋ poɔŋ, kyɛ Yezu sareka na yɛŋ na eɛ yɛlɛ naŋ gaŋ lɛ. O na faa la nensaaleba zaa yi yelfaare ane kũũ eŋɛŋ. (1 Kor. 5:​7, 8) Yezu sareka na zuŋ, a pie neŋ bayi na na eɛ a Kristabiiri lantaapuoruu na piiluu zie. (Efe. 2:​20-22) A yɛlɛ noɔ̃ zie la ka, a Gyɛruzɛlɛm naŋ e teŋ-forifori na taa la “daŋkyinpare pie ne ayi”, ba da sɛgɛɛ a “Pilee [bitontonee] pie ne bayi yoe eŋ a daŋkyinpare pie ne ayi eŋɛ.” (Yel. 21:​10-14) Azuŋ a bitontonee sereŋ taa la toŋ nimizeɛ a na toŋ a soŋ ka Naaŋmen poboɔbo zaa nyɛ eebo. Azuŋ a ba e te seɛlee Yezu naŋ da boɔrɔ ka o neŋ ba laŋ di a Parebare tigri baaraa soba ane yɛlɛ naŋ da tu a puoriŋ, a Daana Zimaanee Bondirii na.

A noba 70 ane Yezu potuuribo naŋ kyɛre na zaa da ba kyebe a zimaanee bondirii zieŋ. Kyɛ Yezu yelmeŋɛ potuuribo zaa na nyɛ la tonɔ yi a Daana Zimaanee Bondirii na eŋɛŋ. Bana na zaa naŋ na wa e Kristabiiri baŋ na sɔ a naaloŋ kãã na na laŋ kpɛ la a naaloŋ nɔlaŋ na Yezu naŋ da yel o yɛlɛ ko o bitontonee a lɛ zisoɔree na poɔŋ.—Luk. 22:​29, 30.