Ai. Jehoova Sieree Deme ba maŋ zagre ka ba kyɔgi vaccine. A be la Kristabie zaa zie ka o de gbɛre ka o na kyɔgɛɛ vaccine kaŋa bee ka o koŋ kyɔgi. Jehoova Sieree Deme yaga zie zaa maŋ sageŋ ka ba kyɔgi vaccine.

Ka teneeŋ wa beɛrɛ te maŋ boɔrɛɛ tẽẽ sonne naŋ na toɔ̃ vɛŋ ka te nyɛ laafeɛ, te nimiri paɛ tonkpeɛne na laafeeloŋ tontonneba naŋ tonɔ ka ba toɔ̃ vɛŋ ka baaloŋ faare ŋmaa bare na. Ka baaloŋ faa kaŋaŋ wa wa, lɛ na laafeeloŋ tontonneba naŋ maŋ mɔɔ ba moɔbo zaa ka ba soŋ noba na maŋ vɛmeŋ ka te poɔ zaa pɛle.

Jehoova Sieree Deme maŋ tuuree sowuli na zaa a laafeeloŋ tontonneba naŋ maŋ korɔ noba na. Aŋa mannoo poɔŋ, a yi saŋa na a COVID-19 baaloŋ naŋ wa piili na, Jehoova Sieree Deme sɛgɛɛ duoro kɔkɔɛ yaga poɔŋ a wuli lɛ a naŋ e nimizeɛ ka te tuuro a laafeeloŋ tontonneba sowuli na. A mine la lɛ a naŋ e nimizeɛ ka te ta maŋ peɛlɛ taa ane lɛ teŋ na toɔ̃ e a go te menne saŋa na teŋ be nen-yaga poɔŋ, lɛ teŋ na maŋ tage te menne yi te taaba poɔŋ, lɛ a naŋ fɛre ka te pɛgrɛ te nuure, ane teŋ na eŋ nose mask, ane a sowuli ŋa taa a teŋɛzu wederebɛ naŋ korɔ te na.​—Urom 13:1, 2.

Yuomo yaga la ŋa ka Jehoova Sieree Deme gama na wulo lɛ a sowuli ŋa naŋ tu naŋ e nimizeɛ seŋ:

• A be la neɛzaa zie ka o kaa iri lɛ o naŋ boɔrɔ ka ba tu kyɛ saŋ o baaloŋ.​—Galesiya 6:5.

  “[A magazine] ŋa ba wulo ka tẽẽ kaŋa soma gaŋ la o tɔ bee sori na baŋ maŋ tu kyɛ saŋ baaloŋ mine somaŋ a gaŋ a taaba na, a gane ŋa meŋ ba korɔ noba baaloŋ saŋ kawane meŋ. Kyɛ a gane ŋa maŋ yelee yelmeŋɛ naŋ be a yɛlɛ poɔŋ a kyɛ bare a yɛlɛ zaa ko a kannekanna ka o teɛre a yɛlɛ gaa tɔɔre kyɛ de gbɛre o meŋɛŋ.”​—Awake!, February 8, 1987.

  “A be la yɛ kaŋa zaa zie ka yɛ kaa iri ka yɛ na ane yɛ bibiiri zaa na sageŋ a kyɔgi a vaccine bee ka yɛ koŋ kyɔgi.”​—Awake!, August 22, 1965.

• Te naŋ de nyɔvore tegroŋ zuŋ la so teŋ maŋ gaa bɔ baaloŋ saŋ saŋa na teŋ beɛrɛ.​—Toma 17:28.

  “Jehoova Sieree Deme maŋ gaa la laafeeloŋ tontonneba yaga zie a te bɔ sommo saŋa na baŋ wa beɛrɛ. Jehoova Sieree Deme boɔrɔŋ ka ba zeŋ a teŋɛzu kyɛ kɔɔre, azuŋ ba na e la lɛ zaa baŋ na toɔ̃ a vɛŋ ka ba nyɔvore e wogi. Kyɛ, ba koŋ sage tu sori naŋ sãã Naaŋmen bege na kyɛ saŋ ba baaloŋ”​—The Watchtower, July 1, 1975.

  “Jehoova Sieree Deme maŋ sageŋ ka laafeeloŋ tontonneba ko ba tẽẽ bee a saŋ ba baaloŋ. Ba boɔbo la ka ba taa laafeeloŋ naŋ soma ane nyɔvo-tɔɔre. Aŋa lɛ Luka naŋ da e Kristabie kyɛ e laafeeloŋ tontona a dɛndɛŋ yuoŋ kɔɔ na saŋa na, Jehoova Sieree Deme mine meŋ eɛ laafeeloŋ tontonneba. . . . Jehoova Sieree Deme poɔ pɛlɛŋ yaga ane tonkpeɛne na laafeeloŋ tontonneba naŋ maŋ tonɔ na. Ka a laafeeloŋ tontonnebaŋ wa toɔ̃ saŋ ba baaloŋ na, ba maŋ puori baŋ bareka.”​—The Watchtower, February 1, 2011.