1 Korinito 1:1-31
1 Qaathei Paulo, lo hna iëne troa ketre aposetolo i Keriso Iesu pine la aja i Akötresie, me Sosetheni trejine me easë,
2 thatraqane la ekalesia i Akötresie e Korinito, koi nyipunie itre hna ahmitrötrën me ka casi me Iesu Keriso. Itre hna ce iëne troa hmitrötr memine la angetre hën la ëje ne la Joxu së Iesu Keriso e cailo fen, Joxu i angatr, nge Joxu së mina fe:
3 Epi kapa nyipunie la ihnimi gufa me tingetinge qaathei Akötresie Keme së, me Iesu Keriso Joxu së.
4 Eni pala hi a olene kowe la Akötresing pi nyipunie, ke hnei nyipunieti hna kapa la ihnimi gufa i nyidrë hna hamëne jëne Keriso Iesu;
5 ke qa ngöne laka, casi hi nyipunieti me Keriso, hetrenyi hë nyipunieti la nöjei ewekë, ene la atreine troa cainöjëne hnyawa la trengewekë i Akötresie, me atrepengön eje hnyawa.
6 Nge tune fe kowe la itre ini hnei nyipunie hna kapa göi Keriso laka, catrecatre hë thei nyipunie.
7 Ngo qëmekene troa mama la Joxu së Iesu Keriso, hetrenyi hë nyipunie la nöjei ewekë hnei nyipunie hna ajan.
8 Nge tro fe Akötresie a acatrenyi nyipunie, me acile huti nyipunie uti hë la pun, matre tha tro kö la ketre a nyizö nyipunie ngöne la drai i Iesu Keriso Joxu së.
9 Nge ame lai Akötresie ka hë nyipunie troa casi memine la Nekö i nyidrë Iesu Keriso Joxu së, tre Akötresie ka nyipici hi lai.
10 Nge enehila, eni a upe iele nyipunie itre trejin, ngöne la ëje i Iesu Keriso Joxu së, troa casi ngöne la aqane ithanata, nge tha tro kö a thë la lapa i nyipunie, ngo loi e tro nyipunie a nyipi casi ngöne la mekun me aqane waiewekë.
11 Ke hnene la itre xa atrene la hnalapa i Keloe hna thuemacanyi ni ka hape, hetre iwesitrë thei nyipunie ange trejin.
12 Atre hë ni laka, nyipunie a isa catre fë ka hape: “Atre i Paulo ni,” nge “atre i Apolo ni,” nge “atre i Kefa* ni,” nge “atre i Keriso ni.”
13 Ngo hapeu, hna hane kö thupathupa Keriso? Nge hnei Paulo kö hna meci pi nyipunie? Maine pena, hna hane kö bapataiso nyipunie ngöne la ëje i Paulo?
14 Celë hi matre eni a olene koi Akötresie laka, tha hane kö ni bapataiso nyipunie, ngo Kerisepo pe me Gaio.
15 Matre thatreine kö la ala casi thei nyipunie troa qaja ka hape, hna bapataiso angeice ngöne la ëjeng.
16 Ngo nyipici, hnenge mina fe hna bapataisone la hnalapa i Setefana. Ngo ame pë hë la munën, thatre hë ni ka hape, hnenge jë kö hna bapataiso angatr.
17 Ngo ame pe, tha hnei Keriso kö hna upi ni troa bapataiso atr, ngo tro pe a cainöjëne la maca ka loi. Ketre, tha hna upi ni kö memine la atreine troa ithanata tune lo itre ka inamacan, wanga gufa pi la sinöe ne iaxösisi* i Keriso.
18 Ame la maca göne la sinöe ne iaxösisi,* tre maca ka hmo kowe la itre ka troa mec, ngo ame pë hë koi së itre hna troa amelen, tre mene i Akötresieti lai.
19 Ke hna cinyihane lo ka hape: “Tro ni a apatrene la inamacan ne la itre ka inamacan, nge ame la mekuna ne la itre ka inamacan, tro ni a trij.”*
20 Matre ekaa ha la ka inamacan? Nge ekaa ha la atre cinyihan?* Nge ekaa ha lo itre ka isi ithanata ngöne la fene celë?* Hapeu, tha hnei Akötresieti kö hna ahmone la inamacane i fen?
21 Ke ngacama itre atr ne la fene celë a mejiune kowe la inamacane i angatr, ngo thatre Akötresieti kö angatr. Matre ame la hne së hna cainöjën, tre kösë pëkö thangan koi itre xan, ngo jëne la maca cili, hnei Akötresie hna mekune troa amelene la itretre lapaun. Nge celë hi ka amamane la aqane inamacane i nyidrë.
22 Nyipici, angetre Iudra a sipo iamamanyikeu, nge angetre Geres a thele inamacan;
23 ngo easë pe a cainöjë Keriso hna humuth hune la sinöe, nge celë hi ewekë ka akeine la angetre Iudra, nge maca ka hmo kowe la itre atre ne fen.
24 Ngo ame kowe la angetre Iudra me angetre Geres hna hën, Keriso hi la atre amamane la mene i Akötresie, me inamacane i nyidrë.
25 Ke nyipici, ame la atre i Akötresie ka hmo, inamacane catre kö angeic hui itre atr, nge ame la atre i Akötresie ka kucakuca, egöcatre kö angeic hune la itre trahmany.
26 Ke öhne fe hi nyipunie itre trejin laka, ame lo Akötresieti a hë nyipunie, tha itre ka inamacane asë kö nyipunie tune la aqane waiewekë i fen, nge tha itre ka catr asë kö nyipunie, nge tha hna hnaho nyipunieti asë kö ngöne la itre lapa ka trenamo.
27 Ngo hnei Akötresieti pe hna iëne la itre ewekë ka hmo ne la fen nyine ahmahmane la itre ka inamacan. Nge hnei Akötresieti hna iëne la itre ewekë ka kucakuca ne la fen nyine ahmahmane la itre ka egöcatr.
28 Nge Akötresieti a iëne la itre ewekë hna sisin ne la fen, me itre hna wangacon, me itre ka pëpengön, matre apatrene la itre ewekë ka mama.
29 Celë hi matre pëkö ala casi* ka troa selë angeice kö qëmeke i Akötresie.
30 Ke hnei nyidrë, matre nyipunieti a casi me Keriso, lo atre amamane koi së la inamacane qaathei Akötresie, me meköt, nge atre ahmitrötrë së, me amele së jëne la thupene mel.
31 Qa ngöne lai, tro ha eatre lo hna cinyihane ka hape: “Ame la atre selën, loi e tro angeic a selë angeic göi Iehova.”*
Itre mekun ecahu fen
^ Hna hëne fe ka hape, Peteru.
^ Wange ju la HQP.
^ Wange ju la HQP.
^ Maine, “thipetrij.”
^ Ka atrepengöne hnyawa la Trenge Wathebo.
^ Maine, “hneijine celë.” Wange ju la HQP.
^ Ger., “ngönetrei.”
^ Wange ju la HQP.
