1 Korinito 10:1-33
10 Nge enehila ange trejin, eni a ajane tro nyipunieti a atre ka hape, hnene lo itre qaaqaa së hna tro fene la iaw, me thupa la hnagejë.
2 Nge hnei angatr asë hna bapataiso jëne la iaw me hnagejë, ngöne lo angatr a xötrethenge Mose.
3 Nge hnei angatr asë hna ce kapa la xeni qaathei Akötresie.
4 Nge hnei angatr asë hna ce iji la timi qaathei Akötresie. Nge anyimua iji angatre la tim ka neni qa ngöne lo ietë atraqatr ezi angatr. Nge qaathei Akötresieti lai, nge nyine nyi hatre i Keriso.
5 Ngo ame pe, ala nyimu thei angatr la itre hna trije hnei Akötresie, ke hna humuthi angatr ngöne la hnapapa.
6 Haawe, kolo hi lai a hmekë së, matre tha tro kö sa ajane catrëne la itre ewekë ka ngazo tune lo aqane kuca i angatr ekö.
7 Nge tha tro pi kö nyipunie a itretre thili koi idrola, tune la itre xan e angatr, ke hna cinyihane lo ka hape: “Hnene la nöj hna lapa troa xeni me ij, ame hnei angatre hna mejë jë troa madrin.”
8 Nge the tro pi kö sa kuci ngazo,* tune la itre xan e angatr ka hane kuci ngazo, ame hna kei pi la ala 23 000 ngöne la ca drai.
9 Nge ketre, the tro pi kö sa tupathi Iehova,* tune la itre xan e angatr ka tupathi nyidrë, ame hna meci pi angatr hnei itre un.
10 Nge the tro pi kö sa eetr, tune la aqane eetr ne la itre xan e angatr, ame hna meci pi angatr hnene la atre ihumuth.
11 Haawe, hna cinyihane la itre ewekë ka traqa koi angatr nyine hmekë së, easë itre ka mele ngöne la pune la fene celë.
12 Qa ngöne lai, ame la atre mekune ka hape, ka cil angeic, wange kö ke kei pi.
13 Nyipici, ame la itre itupath ka traqa koi nyipunie, kolo fe a hane traqa koi nöjei atr asë. Ngo ka nyipici Akötresie, matre tha tro kö nyidrëti a nue nyipunie kowe la itupath hnei nyipunie hna thatreine xomihnin, ngo hnine la itupath, tro kö nyidrëti a nyi jëne kötre i nyipunie, matre atreine jë nyipunie cile hut.
14 Haawe, ange hniminang, kötrene pi la kuci idrola.
15 Eni a ithanata kowe la itre ka atreine waiewekë, haawe, isa wange ju pë hë ka hape, nyipici kö maine thoi la hnenge hna qaja.
16 Nge ame la easë a iji la trepe manathith hne së hna sipon troa amanathithin, hapeu, tha easë kö a ce thawa qa ngöne la madra i Keriso? Nge ame la easë a xeni la falawa hna thupathupa, hapeu, tha easë kö a ce thawa ngöne la ngönetrei i Keriso?
17 Nge casi hi la falawa matre ngacama ala nyimu së, ngo casi hi la ngönetrei së, ke easë asë a ce thawa la falawa cili.
18 Hanawang la angetre Isaraela: Ame la itre ka xeni la itre huuj, hapeu, tha angatre kö a ce thawa memine la ita ne huuj?
19 Matre nemene la hnenge hna pi qaja? Ame la itre mitr hna huujëne koi idrola, tre mitre hi? Nge ame la itre idrola, tre idrola hi nge pë ju hë?
20 Waea tha eje kö, ngo eni pe a pi qaja ka hape, ame la itre huuj hna kuca hnene la itre nöj, tre kola huuj koi itre dremoni ngo tha koi Akötresieti kö. Nge xele ni ma tro nyipunieti a ce thawa me itre dremoni.
21 Tha ijiji nyipunieti kö troa iji la vere i Iehova* me vere ne la itre dremoni, nge tha ijiji nyipunieti kö troa xeni ngöne la “laulau i Iehova,”* me laulau ne la itre dremoni.
22 Ke hapeu, “Tro kö sa amejëne la zalu i Iehova?* Nge ka catre kö së hui nyidrë?”
23 Haawe, ijiji* së hi troa kuca la nöjei ewekë, ngo tha nyine loi asë kö. Nge ijiji së hi troa kuca la nöjei ewekë, ngo tha nyine ithuecatre asë kö.
24 Qa ngöne lai, the tro pi kö ketre a catre thele la loi koi angeice kö, ngo koi itre xane pe.
25 Haawe, öni jë la nöjei mitr hna salemën ngöne hna maketr, nge loi ju hë hna hnying ke nyipunieti a xou wanga ajolëne jë la itre mekuthetheu* i nyipunie.
26 Ke nyipici, “ewekë i Iehova* la ihnadro me nöjei ewekë e hnin.”
27 Nge maine tro la ketre ka tha lapaune a könë nyipunie, nge aja i nyipunie troa tro, xeni jë la nöjei ewekë hna amë qëmeke i nyipunie, nge the hnyinge kö wanga ajolëne jë la itre mekuthetheu* i nyipunie.
28 Ngo e qaja ha ketre koi nyipunie ka hape: “Ewekë hna huujëne lai,” the xeni kö pine lai atre ka ithanata koi nyipunie, nge matre pëkö mekuthetheu* hna troa angazon.
29 Ngo tha eni kö a qaja la itre mekuthetheu* i nyipunie, ngo mekuthetheu i itre xane pe. Ke ngacama qanyinge kö iëne la hnenge hna pi kuca, ngo tha ajane kö ni wanga nyizö ni jë hnene la mekuthetheu i ketre.
30 Nge maine eni a thithi kowe la hnenge hna troa xen, nga hnauëne la kola qeje ni pine la hnenge hna thithi fë?
31 Haawe, e tro nyipunieti a xeni me ij, me kuca la nöjei ewekë asë, kuca asë jë nyine atrunyi Akötresie.
32 Nge isine jë matre tha tro kö nyipunieti a akeine la itretre Iudra me itretre Geres, memine la ekalesia i Akötresie.
33 Ke tunge fe, eni a isine troa amadrinëne la nöjei atr ngöne la nöjei ewekë asë. Matre, tha eni kö a thele la nyine loi koi ni, ngo nyine loi kowe la ka ala nyim, matre mele pi angatr.
Itre mekun ecahu fen
^ Wange ju la HQP.
^ Wange ju la HQP.
^ Wange ju la HQP.
^ Wange ju la HQP.
^ Wange ju la HQP.
^ Maine, “meköt.”
^ Wange ju la HQP.
^ Wange ju la HQP.
^ Wange ju la HQP.
^ Wange ju la HQP.
^ Wange ju la HQP.
