1 Korinito 11:1-34
11 Nyitipu ni jë, tune la aqane nyitipu Keriso ni.
2 Ngo eni fe a qaja aloinyi nyipunie, ke ngöne la nöjei ewekë, nyipunieti pala hi a meku ni, me hnine catrëne la itre ini hnenge hna traqa fë koi nyipunie.
3 Ngo ajange tro nyipunie a atre ka hape, Keriso la he ne la nöjei trahmany, nge trahmanyi la he i föe, nge ketre tun, Akötresie la he i Keriso.
4 Matre e tro la trahmany a thith me perofeta nge kola atu he, angeic a ahmahmane la atre musi hui angeic.
5 Ngo e tro la föe a thith me perofeta nge tha hna atu he kö, angeic a ahmahmane la atre musi hui angeic, ke ceitu i angeic me föe hna cin apane la he.
6 Ke maine ka tha atu he la föe, loi e tro angeic a cine la he i angeic. Ngo maine hmahma la föe troa cin apane la he i angeic, haawe, loi e tro angeic a atu he.
7 Nge tha tro pi kö la trahmany a atu he, ke angeice la hnaiji Akötresie me lolo i nyidrë, ngo ame la föe, angeice la lolo i trahmany.
8 Ke eje hi, tha hna xupi trahmanyi kö qaathei föe, ngo föe qaathei trahmany.
9 Nge ketre, tha hna xupe kö la trahmany pi föe, ngo föe pi trahmany.
10 Qa ngöne lai, nge pine la itre angela, nyipiewekë tro la itre föe a hetre hatrene metrötr hune la isa he i angatr.
11 Ngo ame göi Joxu, tha hna aisane kö la föe me trahmany, me trahmanyi me föe.
12 Ke eje hi, kola fetra la föe qaathei trahmany, nge trahmanyi a traqa jëne la föe. Ngo Akötresie la qaane la nöjei ewekë asë.
13 Haawe, isa amekötine jë nyipunie: ijiji kö tro la föe a thithi koi Akötresie cememine la atre musi hui angeic nge tha hna pane atu he kö?
14 Nge hapeu, tha hna ini nyipunieti kö hnene la aqane xupi nyipunie ka hape, nyine hmahmane lai e tro la trahmanyi a hnaihe?
15 Nge hapeu, tha emingömingö i föe kö e ka qea la ipenehe i angeic? Ke hna hamëne lai nyine petre koi angeic.
16 Ngo maine ketre a pi catre fë la itre xa ini, pë hmaca ju kö ketre ini the hun, me thene la nöjei ekalesia i Akötresie.
17 Ngo ame la eni a hamëne la itre hna amekötine celë koi nyipunie, tha eni kö a qaja aloinyi nyipunie, ke tha ixatua kö koi nyipunie la itre icasikeu i nyipunie, ngo itre eje pe a akötrë nyipunie.
18 Ke hanawang, drenge hë ni ka hape, ame la nyipunieti a icasikeu, hetre icilekeu thei nyipunie; nge ame koi ni, nyipici hi la itre xa hnepe ithuemacany.
19 Nge eje hi, tro ha xulu qaathei nyipunie la itre hmi thoi, ngo kolo hi matre mama cile pi koi nyipunie la itre atre hna kapa hnei Akötresie.
20 Nge ame la nyipunieti a icasikeu ngöne la ketre götran, tha ijiji nyipunieti kö troa xen la Xeni Heji Ne La Joxu.
21 Ke ame la nyipunieti a sine lai, ase hë xen hnei itre xan, matre, itre xan a mecijiin, nge itre xane pena a hmo hnei ka haitr.
22 Nge hapeu, ka pë hnalapan nyipunie göi troa xeni me ij? Maine pena, nyipunieti kö a wangesixane la ekalesia i Akötresie, me ahmahmane la itre ka pë xen? Matre tro ni a qeje nemene koi nyipunie? Tro kö ni a qaja aloinyi nyipunie? Pëkö.
23 Nge tune la aqane ini ni hnei Joxu, eni fe a ini nyipunie laka, ame lo heji ne salemë Iesu Joxu, hnei nyidrë hna xome la falawa.
24 Nge ase jë hi nyidrëti thith, nyidrëti a thupathupa pi me hape: “Celë hi hatrene la ngönetreing thatraqai nyipunie. Tro pala pë hë nyipunie a kuca la, nyine mekune koi ni.”
25 Nge thupene la angatre a ase xeni hej, nyidrëti a kuca tune ju fe kowe la ver, me hape: “Ame la vere celë, ej a nyihatrene la isisinyikeu ka hnyipixe, hna troa aejëne ngöne la eni a nenge la madrang. Nge tro pala pë hë nyipunie a kuca la, ngöne la nöjei ijine nyipunieti a iji la, ke nyine mekune koi ni.”
26 Haawe, ame la nöjei ijine nyipunieti a xeni la falawa me iji la vere celë, nyipunieti hi lai a atrune la meci Joxu, uti hë la ijine traqa nyidrë.
27 Haawe, ame la atre xeni la falawa me iji la ver, nge tha ijiji angeice kö, angeice a ngazo kowe la ngönetrei me madra i Joxu.
28 Matre, loi e tro la atr a pane waipengöi angeice hnyawa, nge qa ngöne lai, tro hë angeic a xeni la falawa me iji la ver.
29 Ke maine tro la ketre atr a xeni me ij, nge tha pane wangatrehmekune kö angeic ka hape, hatrene la ngönetrei Joxu lai, tro hë angeice a nyizö angeic.
30 Celë hi matre ala nyimu la itre ka kucakuca me wezipo thei nyipunie, nge ala nyimu fe la itre ka meköl ngöne la mec.*
31 Ngo maine tro sa isa waipengö së, tha tro jë kö a traqa la iameköti koi së.
32 Nge ketre, ame la kola ameköti së, Iehova* la ka haji së, matre tha tro kö a ce ahnëjinë së memine la fen.
33 Haawe ange trejin, ame la nyipunieti a ce icasikeu göi troa xeni la Xeni Heji Ne La Joxu, pane treqene ju matre traqa asë pi nyipunie.
34 Nge maine ketre a mecijiin, loi e tro angeic a xeni ngöne la hnalapa i angeic, matre tha tro kö nyipunieti a icasikeu kowe la iameköti. Ngo ame pë hë kowe la itre xa jol, wange pi pë hë ni e traqa pi ni koi nyipunie.
Itre mekun ecahu fen
^ Tha nyipi meci kö, ngo kola qaja la itre ka aluzine la imelekeu i angatr me Akötresie.
^ Wange ju la HQP.
