1 Korinito 12:1-31
12 Nge ange trejin, eni a ajane tro nyipunieti a trotrohnine hnyawa la itre ahnahna qaathei Akötresie.
2 Atre hi nyipunie ka hape, ame lo nyipunieti pala kö a itre atre ne fen,* nyipunieti a nyihluene la itre idrola ka thatreine ithanata, me kuca la itre aja i angatr.
3 Qa ngöne lai, eni a pi qaja koi nyipunie, pëkö atr ka ithanata hnene la ua i Akötresie ka qaja ka hape: “Hnëjine hë Iesu!” Nge ketre, e tha qaathene kö la ua, pëkö ka atreine qaja ka hape: “Joxu hë Iesu!”
4 Isa pengöne kö la itre ahnahna, ngo qaathene la ua ka cas.
5 Nge ame ngöne la huliwa i Akötresie, nyimutre la itre huliwa, ngo casi hi la Joxu.
6 Nge nyimu aqane huliwane la ua thene la itre atr, matre atreine jë angatre kuca la nöjei ewekë, ngo casi hi la Akötresie, atre aijijëne la nöjei atr troa kuca la nöjei ewekë cili.
7 Nge mama cile hi la ixatua ne la uati hmitrötr the së asë, nge Akötresie la atre hamëne lai nyine loi kowe la nöjei atr.
8 Ame koi ketre, ua a ixatua troa inamacane la aqane ithanata,* nge koi ketre, hnene pala hi lai ua hna ixatua troa ithanata thenge la atrehmekun.
9 Nge koi ketre, ua a ixatua troa hetre lapaun, nge koi ketre, ua a aijijëne troa aloine la trene mec.
10 Nge koi ketre, ej a aijijëne troa kuci iamamanyikeu, nge koi ketre, troa perofeta, nge koi ketre, troa wangatrehmekune ka hape, qaathei Akötresieti jë kö la trengewekë, nge koi ketre, troa ithanata nyimu qene hlapa, nge koi ketre, troa ujëne ngöne la nyimu qene hlapa.
11 Ngo itre huliwa lai hna aijijën hnene la ua ka cas, hna isa thawa thenge la ajan ej.
12 Ame ngöne la ngönetrei ka cas, nyimutre la itre hnep. Ngacama nyimu hnep, ngo casi hi la ngönetrei, haawe ceitune hi lai me Keriso.
13 Ke jëne la ua ka cas, hna bapataiso së ngöne la ngönetrei ka cas, matre atre Iudra ju hë së maine atre Geres, maine hlue maine hlue hna nuamacan, ngo hna thue ime së asë hi la ua ka cas.
14 Ke eje hi, tha ca hnepe kö la ngönetrei asë, ngo nyimutre pe.
15 Maine tro la waca a qaja ka hape: “Pine laka, tha wanakoime kö ni, tha hnepe ngönetrei kö ni,” ngo hapeu, tha hnepe ngönetrei kö lai?
16 Nge maine tro la hnangenyë a qaja ka hape: “Pine laka tha alameke kö ni, tha hnepe ngönetrei kö ni,” ngo hapeu, tha hnepe ngönetrei kö lai?
17 Nge maine alameke asë la ngönetrei, tro së lai a drenge tune kaa? Nge maine hnagenyë asë la ngönetrei, tro së lai a drei punepune tune kaa?
18 Ngo enehila, hnei Akötresieti hna isa amë la itre hnepe ngönetrei, thenge la aja i nyidrë.
19 Nge maine ca hnep asë ju, ekaa pë hë la ngönetrei?
20 Ngo enehila, nyimutre la itre hnep, ngo ca ngönetrei hi lai.
21 Haawe, thatreine kö la alameke qaja kowe la wanakoime ka hape: “Tha nyipiewekë kö eö koi ni.” Ketre tun, thatreine kö la he qaja kowe la waca ka hape: “Tha nyipiewekë kö eö koi ni.”
22 Ngo nyipiewekë pe la itre hnepe ngönetrei hne së hna mekun ka hape, ka kucakuca.
23 Nge ame la itre hnepe ngönetrei hne së hna mekune ka hape, tha ka mingöminge kö, easë lai a ahmitrötrën, matre hna kuca alolone me nyidrawane hnyawa la itre hnepe ngönetrei hne së hna hmahman.
24 Ngo tha hna tune kö kowe la itre hnepe ngönetrei së ka mingöming. Haawe, hnei Akötresie hna kuca la ngönetrei matre troa ahmitrötrëne la itre hnepe ngönetrei ka tha mingöminge kö.
25 Celë hi matre, tha tro kö a aisan la ngönetrei, ngo tro pe la itre hnep a imekunekeun.
26 Matre, e akötre hë la ketre hnepe ngönetrei, tro la itre hnep asë a ce akötr, nge e hna atrune la ketre, kola ce madrine la itre hnep asë.
27 Enehila, nyipunieti asë hi la ngönetrei Keriso, nge nyipunie isa ala casi la itre hnepe ngönetrei.
28 Ngo Akötresie la ka isa acili atr hnine la ekalesia: Hnapan, itre aposetolo, hnaaluen, itre perofeta, hnaakönin, itre atre ini, thupene lai, itre ka kuca la itre huliwa nyine hain, nge thupene lai, itre ka aloine la itre trene mec, me itre ka ixatua, me itretre elemeken, me itre ka ithanata nyimu qene hlapa.
29 Hapeu, itre aposetolo asë hi angatr? Itre perofeta asë kö? Itre atre ini asë kö? Itre ka kuci huliwa ka men asë kö?
30 Nge hapeu, angatr asë kö a aloine la itre trene mec? Angatr asë kö a ithanata qene hlapa? Angatr asë kö a ujë qene hlapa?
31 Haawe, the mano kö thele catrëne la itre ahnahna ka tru. Ngo enehila, eni a troa amamane koi nyipunie la ketre gojenyi ka sisitria.
