1 Korinito 13:1-13
-
Ihnim—gojenyi ka sisitria (1-13)
13 Maine tro ni a ithanatane la itre qene hlapa i atr me angela, ngo patre kö thenge la ihnim, ceitunge me ketre paate maine lue sine fao hna ihnakeun, nge ka itrutru hnangenyë.
2 Nge maine hna hamë ni la ahnahna ne perofeta, me aijijë ni troa trotrohnine la nöjei ewekë ka hmitrötr nge hna juetrën, me atrehmekune la nöjei ewekë, nge hetrenyi ni la lapaune ka atreine enienijëne* la itre wetr, ngo e patre kö thenge la ihnim, ka gufa lai.
3 Nge maine eni a hamëne la nöjei ewekëng göi troa thuane la ka pë ewekë, me madrine fë la hnenge hna nue la meleng, ngo e pëkö ihnim, ka pë eloine lai.
4 Ame la ihnim, tre ka xomihni* me menyik. Tha ka zalu kö la ihnim, nge tha ka selëne kö, nge tha ka pi tru kö.
5 Tha ka iangazo* kö la ihnim, nge tha ka thele loi i angeice kö, nge tha ka canga elëhni kö. Nge tha ka lapa fë trenge* hni kö la ihnim.
6 Nge tha ka madrine kö kowe la ewekë ka tha meköti kö, ngo kowe la nyipici.
7 Nge ihnim a xomihnine la nöjei ewekë asë, me kapa la nöjei ewekë asë, me mejiune la nöjei ewekë asë, me cile huti ngöne la nöjei ewekë asë.
8 Tha tro kö a patre la ihnim. Ngo ame la ahnahna ne perofeta; tro lai a patr, nge ame la nöjei qene hlapa,* tro ha pë, nge ame la atrehmekun, tro ha ae.
9 Ke sine hi la atrehmekune the së, nge sine hi la hne së hna perofetan,
10 ngo e traqa ha la ka pexej, patre pi hi lai sin.
11 Matre, ame lo nekönatre petre kö ni, hnenge hna ithanata qene nekönatr, me mekun tui nekönatr, me waiewekë tui nekönatr; ngo enehila, ka tru hë ni, matre ase hë ni trije la qene nekönatr.
12 Nge enehila, kösë easë a thulu ngöne la ketre ithulu ka hajihaj, ngo tro ha traqa la ijine tro la nöjei ewekë a lualai. Enehila, eni hi a atre la sin, ngo epin, tro ha pexeje la hnenge hna atre, tune la aqane atre ni hnyawa hnei Akötresie.
13 Ngo köni ewekë ka troa cile hut: lapaun, mejiun, me ihnim; nge hune la köni ewekë celë, sisitria kö la ihnim.
Itre mekun ecahu fen
^ Maine, “kapa.”
^ Maine, “xomihni aqean.”
^ Maine, “calogitr.”
^ Maine, “ka tha e la itre tria.”
^ Iamamanyikeu ka aijijëne troa qaja la itre xa qene hlapa.
