1 Korinito 14:1-40
14 Haawe catre jë trongëne la gojenyi ne ihnim. Nge thele catrëne jë troa kapa la itre ahnahna ne la ua, ngo sisitria kö la troa perofeta.*
2 Ke ame la atre ithanatane la itre qene hlapa, angeice a ewekë, tha koi itre atre kö ngo koi Akötresie, ke pëkö ka drei angeic, ngo jëne la ua, angeice a ithanatane la itre ewekë ka hmitrötr nge hna juetrëne hnei Akötresie.
3 Ngo ame la atre perofeta, angeic a hamë ithuecatr, me ixatua, me akeukawane la itre atr jëne la itre trengewekë i angeic.
4 Ame la atre ithanatane la ketre qene hlapa, angeic a thuecatre i angeice kö, ngo ame la atre perofeta, angeice a thuecatrene la ekalesia.
5 Nyipici, ajange tro nyipunieti a ithanata nyimu qene hlapa, ngo tru catre kö la ajange troa wai nyipunie e perofeta. Ke sisitria kö la atre perofeta hune la ka ithanata qene hlapa, ke eje hi, maine pëkö ka ujëne la hnei angeic hna qaja, tha tro kö lai a thuecatrene la ekalesia.
6 Nge enehila ange trejin, maine tro ni a traqa koi nyipunie me ithanatane la ketre qene hlapa, tro lai a xatua nyipunie tune kaa? Ngo loi pe e tro ni a ithanatane la itre ewekë hna amaman hnei Akötresie, maine tro pena a tro fë la inamacan, maine perofeta, maine hamë ini koi nyipunie.
7 Nge ceitune lai memine la itre ewekë ka pë melen nyine elo miuzik, itre ej a hetre mejen, tune la trutru me arp.* Ngo maine tro la ketre atr a ce elone lue ej nge casi hi la nin, tro la itre atr a wangatrehmekune tune kaa ka hape, trutru la hna elon maine arp?
8 Nge maine itria kö la nine trutru, drei la ka troa hnëkë kowe la isi?
9 Haawe, ketre tun, maine tro nyipunie a qaja la itre trengewekë ka jole troa trotrohnin, drei la ka atre la hna qaja? Ke eje hi, nyipunieti a ewekë koi eny.
10 Nge e cailo fen, nyimutre la itre qene hlapa hna ithanatan, nge hna trotrohnin itre ej asë.
11 Matre e tha trotrohnine kö ni la hna qaja, kolo hi lai a hape, trenyiwa ni kowe la atre ithanata, nge trenyiwa la atre ithanata koi ni.
12 Haawe, pine laka, nyipunieti a thele catrëne la itre ahnahna ne la ua, isine jë troa kapa la itre ahnahna nyine thuecatrene la ekalesia.
13 Ngo loi e tro la atr ka ithanatane la ketre qene hlapa a thith, matre atrein angeice ujëne la hna qaja.
14 Ke maine eni a thith ngöne la ketre qene hlapa, ahnahnange qaathene la ua la ka ithanata, ngo tha trotrohnine kö ni la hnenge hna qaja.
15 Matre nemene la nyine tro ni a kuca? Tro ni a thith thenge la ahnahnange qaathene la ua, me thithi matre trotrohnine la hnenge hna thithi fë. Nge tro fe ni a nyima hnene la ahnahnange qaathene la ua, me nyima matre trotrohnine la hnenge hna nyiman.
16 Ketre, maine tro nyipunieti a thith thenge la ahnahna ne la ua, tro la itre ka tha qa hna ini a “Amen” tune kaa kowe la thithi nyipunie, nge tha trotrohnine pe angatr?
17 Haawe, maine nyipici laka, lolo catre la aqane ole i nyipunie, ngo ame pe, tha ka ithuecatre kö.
18 Nge eni a olene koi Akötresie laka, tru catre kö la itre qene hlapa hnenge hna ithanatan hui nyipunie.
19 Ngo eje hi, hnine la ekalesia pi tro kö ni a qaja la faifi hi lao trengewekë hnenge hna trotrohnin, matre troa inine* la itre xan, hune la trene thauzan ngöne la ketre qene hlapa.
20 Haawe ange trejin, the qene nekönatre kö göi aqane waiewekë. Ngo qene nekönatre jë göi ngazo; nge loi e macaje la aqane waiewekë i nyipunie.
21 Hna cinyihane lo ngöne la Trenge Wathebo ka hape: “Tro ni a ithanata kowe la nöje celë ngöne la itre qene hlapa trenyiwa, me jëne la itre që trenyiwa, ngo e cili fe, tha tro jë kö angatre a hane drei ni, öni Iehova.”*
22 Ame la itre qene hlapa, tre hatren kowe la itre ka pë lapaune ngo tha koi itre ka lapaun. Nge ame la itre hna perofetan, hatrene kowe la itre ka lapaun, ngo tha koi itre ka pë lapaun.
23 Ke maine tro la ekalesia asë a icasikeu ngöne la ketre götran, nge tro la itre atren a isa ithanata qene hlapa, nge kolo fe a hane sin hnene la itre ka tha qa hna ini, maine ka pë lapaun, hapeu, tha tro jë kö angatre lai a jele hmo nyipunie?
24 Ngo maine tro nyipunieti asë a perofeta, tro hë la atre ka tha qa hna ini, maine ka pë lapaun, a drenge la itre trengewekë i nyipunie kösë kola wenë ameköti angeic, me uku angeice troa waipengö i angeice hnyawa.
25 E cili, tro ha mama hnyawa koi angeic la ewekë hna juetrën e kuhu hni angeic, nge tro hë angeic a thili hnadro eë, me nyihlue i Akötresie me hape: “Nyipici, Akötresie thei nyipunie.”
26 Matre nemene la nyine kuca ange trejin? Maine tro nyipunie a icasikeu nge thei ketre la itre Salamo, nge ketre a hamë ini, nge ketre a ithanatane la hna amaman, nge ketre a ithanata ngöne la itre qene hlapa, nge ketre a ujë qene hlapa, loi e troa kuca la nöjei ewekë cili göi troa ithuecatrekeu.
27 Nge maine hetre ka ithanatane la itre xa qene hlapa, loi e tha tro kö a sasaithe la luetre maine könitre, ase jë ketre matre ketre. Ngo nyipiewekë troa hetre ka ujën.
28 Ngo e pëkö ka ujën, loi e tro angeic a lapa thaup ngöne la ekalesia, me ithanata koi angeice kö me Akötresie.
29 Nge ketre, loi e tro hi la ala lue maine ala köni a perofeta, nge tro pë hë itre xan a thele troa trotrohnine la alien.
30 Ngo maine tro la ketre ka lapa e cili a kapa la ketre hna amaman, loi e tro la ka pane ithanata a lapa thaup.
31 Ke ijiji nyipunieti asë troa perofeta, ase jë ketre matre ketre. Nge qa ngöne lai, nyipunieti asë la hna troa inin me thuecatren.
32 Nge tro la itre perofeta a thupëne la aqane huliwan angatr la ahnahna cili hna kapa qaathene la ua.
33 Ke ame Akötresie, tha Akötresie ne zikoziko kö nyidrë, ngo Akötresie ne tingeting.
Casi hi kowe la nöjei ekalesia ne la itre ka hmitrötr,
34 tro la itre föe a lapa thaup hnine la ekalesia, ke tha hna aijijë angatre kö troa ithanata. Ngo loi pe tro angatr a hmala troa idrengethenge, tune lo hna qaja hnene la Trenge Wathebo.
35 Nge maine aja i angatre troa atre la ketre ewekë, loi e tro angatr a hnyinge kowe la itre föi angatr ngöne la hnalapa, ke nyine hmahmane e tro la föe a ithanata ngöne la ekalesia.
36 Nge nemen? Ka xulu qaathei nyipunie la trengewekë i Akötresie? Nge hapeu, hna hamë nyipunieti hi?
37 Maine ketre a mekune ka hape, perofeta angeic, maine kapa ha angeic la ketre ahnahna qaathene la ua, loi e tro angeic a kapa la hnenge hna cinyihane koi nyipunie, ke itre ewekë lai hna amekötin hnei Joxu.
38 Nge maine ketre a xele* ma kapa, tro Akötresie a xele angeic.
39 Haawe, ange trejin, thele catrëne jë la ahnahna ne perofeta, ngo the wathebone pi kö troa ithanata qene hlapa.
40 Ngo loi e troa kuca hnyawane la nöjei ewekë asë, nge tha tro kö a hetre zikoziko.
Itre mekun ecahu fen
^ Kolo fe a qaja la troa tro fë koi ketre la maca i Akötresie, maine troa cainöjëne la maca i nyidrë.
^ Ame la “arp,” tre ketre nyine elo miuzik ka hetre fil tune la gitar, ngo ka ketrepengöne kö.
^ Maine, “ithanata kow.”
^ Wange ju la HQP.
^ Maine jë, “maine ka thatre angeic, ka tro pë hë angeic lai a thatre.”
