1 Korinito 15:1-58
15 Nge eni hmaca a amekunë nyipunie ange trejine lo maca ka loi hnenge hna cainöjëne koi nyipunie, lo hnei nyipunie hna kapa, me cile huti ngön.
2 Nge jëne lai, mele hë nyipunie, e tro nyipunie a xolouthe catrëne la maca ka loi hnenge hna traqa fë koi nyipunie. Ngo e tha eje kö, nyipunie a mejiun menun.
3 Hnenge hna pane qaja koi nyipunie la ketre ini hnenge fe hna kapa, ene laka, hnei Keriso hna meci pine la itre ngazo së tune la hna qaja ngöne lo itre hna Cinyihan.
4 Thupene lai, hna kelemi nyidrë, nge ngöne la hnaakönine drai, nyipici, hna amele nyidrëti hmaca tune lo hna Cinyihan.
5 Qa ngöne lai, nyidrëti a mama pi koi Kefa,* nge thupene lai, kowe la ala Truelof.
6 Nge thupene lai, nyidrëti a aca mama pi kowe la ala 500 nge hetre munëne lao trejin, nge ala nyimu la itre xan e angatr the së, ngo hetre itre xane ka meköle hë ngöne la mec.
7 Thupene lai, nyidrëti a mama pi koi Iakobo, me kowe la itre xa aposetolo.
8 Nge thupei angatr asë, nyidrëti a mama pi fe koi ni, matre kösë eni la ketre nekönatre ka malaija.
9 Ke eni la aposetolo ka co catr ne la nöjei aposetolo, nge tha ijije kö troa hë ni ka hape, aposetolo, ke hnenge lo hna axösisine la ekalesia i Akötresie.
10 Ngo pine la ihnimi gufa i Akötresie, aposetolo fe hë ni. Nge tha gufa kö la ihnimi gufa i Akötresieti koi ni, ke hnenge hna huliwa catre hmaca kö hui angatr asë, ngo tha eni kö, ngo ihnimi gufa i Akötresieti theng.
11 Haawe, eni ju hë maine angatre la ka cainöj, ngo casi hi la maca hne huni hna cainöjën, nge hnei nyipunieti hë hna mejiun kow.
12 Haawe, pine laka, ase hë cainöjëne ka hape, hna amele Keriso hmaca, hnauëne laka, itre xane thei nyipunie a catre fë ka hape, pëkö mele hmaca?
13 Ke e pëkö mele hmaca, nga tha hna amele Keriso kö.
14 Nge e tha hna amele Keriso hmaca, ka gufa la hne huni hna cainöjën, nge tune fe kowe la lapaune i nyipunie.
15 Nge maine nyipici ju ka hape, tha tro kö a amelene hmaca la itre ka mec, nga eahuni la itretre thoi göi Akötresie, ke hne huni hna qaja ka hape, ase hë nyidrëti amele Keriso hmaca, ngo tha eje kö.
16 Ke maine tha tro kö a amelene hmaca la itre ka mec, haawe, tha hna hane amele Keriso kö.
17 Nge maine tha hna amele Keriso kö, nga ka gufa hnyawa la lapaune i nyipunie, nge nyipunieti pala kö hnine la ngazo.
18 Nge nyipici, ame fe lo itre keresiano ka meci hë, itre ka luzi hnyawa ha angatr.
19 Nge maine easë hi a mejiune koi Keriso göne la mele celë, nga loi ju kö la nöjei atr asë hu së.
20 Ngo nyipici, ase hë amele Keriso hmaca qa hna mec, pane wene ne la itre ka meköl ngöne la mec.
21 Nge pine laka, hna xulu la mec qaathene la trahmany, matre kolo fe a traqa la iamele jëne la trahmany.
22 Eje hi, kola meci la nöjei atr asë hnei Adramu, nge tune fe, jëne Keriso, tro ha mele la nöjei atr.
23 Nge hane hi la aqane trongen: Keriso la hna pane amelen, nge thupene lai, tro ha amelene la itre atre i nyidrë ngöne la ijine laka, celë hë nyidrë.
24 Nge ame hë ngöne la pun, tro hmaca nyidrëti a nue la Baselaia kowe la Kem me Akötresi nyidrë, thupene la hna pane lepe apatrene la nöjei mus, me nöjei trene mus.
25 Ke tro Keriso a Joxu uti hë la ijine tro Akötresieti a amë la itre ithupëjia me nyidrë, fene la lue ca i Keriso.
26 Nge tro ha apatrene la mec, lo ithupëjia tixenuë.
27 Ke hnei Akötresieti hna “amë la nöjei ewekë fene la lue ca i Keriso.” Ngo ame la kola qaja ka hape, ‘hna amë la nöjei ewekë fene la lue ca i nyidrë,’ tha kolo kö a qaja lo atre hamëne koi Keriso.
28 Ngo e musi hë Keriso kowe la nöjei ewekë asë, tro fe hë nyidrëti a nue nyidrëti kö kowe la Atre hamë mus, matre tro Akötresieti a musi hune la nöjei ewekë asë.
29 Nge maine tha tro kö a amelene hmaca la itre ka mec, nga tune kaa ju hë kowe la itre ka bapataiso? Nge nyine ue hö la troa bapataiso e meci la pune koi angatr?
30 Nge hnauëne la easë pala hi a kuca la itre ewekë ka troa xome la mele së?
31 O drai pala hi eni a qëmeke kowe la mec. Eni a qaja lai, me selë ni göi nyipunie ange trejin thene la Joxu së Iesu Keriso.
32 Nge maine hnenge ju hna tune lo itre xa trahmanyi* me isi me itre öni wael e Efeso, nemene la eloing? Ke maine pëkö mele hmaca, “xeni jë së me ij, ke elanyi tro sa mec.”
33 Haawe, the amenu nyipunieti kö, itre sinatro ka ngazo a angazone la itre thiina ka loi.
34 Ngo inamacane pi thenge la ka meköt, nge the majemine kö kuca la ngazo. Hetre itre xan nyipi nyipunie ka thatre Akötresie. Ngo eni a qaja lai matre hmahma jë nyipunie.
35 Ngo maine jë, tro ketre a traqa me hape: “Troa amelene tune kaa la itre ka mec? Nge troa amele angatr ngöne ngönetrei ka u?”
36 Atre ka hmo lai! Ame la nyipunie a tra feja, tha tro kö ej a canga cia e tha pane meci kö lo hnapan.
37 Ke nyipici, ame la nyipunie a jumi feja, tha nyipunieti kö a jume la ka cia ha, ngo itine pe, maine qitr, maine itre xa feja pena.
38 Nge Akötresieti la ka acian, thenge la aja i nyidrë me thenge la pengöne feja, ke isa pengöne kö itre ej.
39 Ka isapengöne la nöjei ijön, isapengöne kö la ijön ne atr, me öni hna axöj, me waco, me i.
40 Nge hetre ngönetrei thatraqane la hnengödrai, me thatraqane la ihnadro; ngo ketre pengöne kö la lolo ne la ngönetrei ne hnengödrai, nge ketre pengöne kö kowe la ngönetrei ne fen.
41 Ketre pengöne kö la lolo ne la jö, nge ketre pengöne kö la lolo ne la treu, nge ketre pengöne fe la lolo ne la itre wëtresij; nge goi isa hetre elolone la itre wëtresij.
42 Nge ceitune lai memine la troa amelene hmaca la itre ka mec. Hna jum ngöne la ka hnyiqetr, nge hna amejën ngöne la ka tha hnyiqetre kö.
43 Hna jum ngöne la hmahma, nge hna amejën ngöne la lolo. Hna jum ngöne la ngazo, nge hna amejën ngöne la men.
44 Hna jum ngöne la ngönetrei, nge hna amejën ngöne la ngönetrei ne hnengödrai.* Matre, maine nyipici laka, hetre ngönetrei ne atr, haawe hetre ngönetrei fe thatraqane la hnengödrai.
45 Nge hna cinyihane lo ka hape: “Ame hna mele jë la pane atr.”* Nge ame lai Adramu tixenuë, nyidrëti hi la u ne iamele.
46 Ngo eje hi, tha ngönetrei ne hnengödrai kö la pane ngönetrei, ngo ngönetrei ne atre pe, nge thupene lai, ngönetrei ne hnengödrai.
47 Matre ame lo lai pane atr tre, atre fen, nge hna xupi angeic hnei dro, ngo qaa hnengödrai la hnaaluen.
48 Qa ngöne lai, ame la itre atr e celë fen, ceitu i angatr memine lo atr hnei Akötresieti hna xup hnei dro, nge ame la itre atr ne hnengödrai, ceitu i angatr memine lo atr ka uti qaa hnengödrai.
49 Nge pine laka, hna hnaho së hnaijine lo atr hna xupe hnei dro, ketre tun, tro fe së elanyi lai a tune lo atr ka uti qaa hnengödrai.
50 Ngo eni a qaja hnyawa koi nyipunie ange trejin ka hape, tha tro kö a sine la Baselaia i Akötresie hnei madra me ijön, nge thatreine kö la ka hnyiqetr troa hetrenyi la ka tha hnyiqetre kö.
51 Nge hanawang! Eni a qaja koi nyipunie la ketre ewekë ka hmitrötr nge hna juetrën: Tha tro kö së asë a meköl aqeanyi ngöne la mec, ngo tro pe së asë a ketrepengön,
52 nge tro ha traqa lai kösë samek. Nge tro lai a traqa ngöne la kola ufi trutru tixenuë. Ke tro ha mexemi la meje ne trutru, nge troa mejë hmaca la itre ka mec, nge tro angatr a hetrenyi la ngönetrei ka tha tro kö a hnyiqetr, me saze.
53 Ke tro ha saze la ka hnyeqetr kowe la ka tha hnyiqetre kö, memine la ka mec kowe la ka tha meci kö.
54 Nge e traqa ha la ijine tro la ka hnyiqetr a tha hnyiqetr, nge tro la ka mec a tha mec, haawe, tro hë lai a eatrëne lo hna cinyihane ka hape: “Ase hë ulume paluane la mec.”
55 “Mec, ekaa ha lo hnei eö hna ngaan? Mec, ekaa ha la mene i eö?”
56 Ke ngazo la mene ne la mec, nge Trenge Wathebo la ka hamë mene kowe la ngazo.
57 Ngo oleti pe koi Akötresie, atre aijijë së troa hun, jëne Iesu Keriso Joxu së!
58 Haawe, ange trejine hniminang, catre pi, nge the enienije kö, ngo loi e tro pala hi a tru hnei huliwa i nyipunie koi Joxu, ke tha gufa kö la itre trenge catre i nyipunie koi Joxu.
Itre mekun ecahu fen
^ Ketre ëje i Peteru.
^ Maine jë, “hna waiewekë tui atr.”
^ Ger., pneuʹma. Wange ju la HQP.
^ Maine, “u.” Ger., psy·kheʹ. Wange ju la HQP.
