1 Korinito 2:1-16
2 Ame lo eni a traqa koi nyipunie ange trejin troa ce thawa me nyipunie lo ewekë ka hmitrötr nge hna juetrën hnei Akötresie, tha traqa kö ni troa nyi ka atreine ithanata, me ka inamacan.
2 Matre ame lo ce eni me nyipunie, hnenge hna axeciëne troa meku Keriso hmekuje hi, memine la meci nyidrë.
3 Nge eni a traqa koi nyipunie fë la kucakuca me xou, me hmengöhmengön.
4 Nge ame la eni a ithanata me hamë ini, tha eni kö a qaja la itre trengewekë ne la itre ka inamacan, ngo itre trengewekëng a amamane la emene ne la uati hmitrötr.
5 Celë hi matre, tha tro kö nyipunieti a mejiune kowe la inamacane i atr, ngo kowe pe la mene i Akötresie.
6 Enehila, easë a qeje inamacan thene la itre ka macaj, ngo tha ene kö la inamacan ne la fene celë,* memine la inamacan ne la itre ka musi kow, ke ka tro lai a patr.
7 Ngo easë pe a qaja la inamacane i Akötresie, göne la ewekë ka hmitrötr hnei nyidrë hna juetrën. Inamacane lai hna juetrën, ke qëmekene tro la itre atr a nyiqaane kuca la ketre ewekë, ase fe hë Akötresie hnëkën amë la aja i nyidrë, matre tro sa lapane la itre göhnë ka tru.
8 Haawe, celë hi inamacane lai ka patr thene la itre joxu ne fen,* ke maine hetrenyi ju angatr, tha tro jë pi kö angatre lai a jei faone* lo Joxu ka tru.
9 Ngo angatr a tune lo hna cinyihane ka hape: “Ti hë la luemek, nge simi hë la lue hnangenyë, nge goi patre fe e kuhu hni ne la atr la itre ewekë hnei Akötresie hna hnëkën thatraqai angetre hnimi nyidrë.”
10 Ke hnei Akötresie hna amamane la itre ewekë cili koi së, jëne la ua i nyidrë. Ke ame la ua, ej a thelethelëne la nöjei ewekë, ene fe la itre ewekë ka jui i Akötresie.
11 Ke drei la ka atreine trotrohnine la mekuna i ketre? Angeice casi hi la ka trotrohnine la itre sipu mekuna i angeic. Ketre tune mina fe, pëkö ka atreine trotrohnine la itre mekuna i Akötresie, ngo ua i nyidrëti hmekuje hi.
12 Nge enehila, tha easë kö a kapa la ua ne la fen, ngo ua i Akötresieti pe. Qa ngöne lai, ijiji së hë troa trotrohnine la itre ewekë hna amamane hnyawa koi së hnei Akötresie.
13 Haawe, itre ewekë lai hne së hna qaja trongën, ngo tha thenge kö la inamacane i atr, ngo jëne pe la itre trengewekë hna hamën hnene la ua, ke easë a qejepengöne la itre ini göi Akötresie, hnene la itre trengewekë qaathene la ua.
14 Matre ame la atre tro thenge la ngönetrei, thatreine kö angeice kapa la itre ewekë qaathene la ua i Akötresie, ke hmo lai koi angeic. Nge ketre, thatreine kö angeice trotrohnine la itre ewekë cili, ke itre ewekë lai hna atrepengöne jëne la ixatua ne la uati hmitrötr.
15 Ngo ame la atre tro thenge la ua, angeic a waipengöne la nöjei ewekë asë, nge pëkö ka atreine ameköti angeic.
16 Ke “drei la ka atreine trotrohnine la mekuna i Iehova* matre ini nyidrë?” Ngo the së la aqane waiewekë i Keriso.
Itre mekun ecahu fen
^ Maine, “hneijine celë.” Wange ju la HQP.
^ Maine, “hneijine celë.” Wange ju la HQP.
^ Maine, “humuth hune la sinöe.”
^ Wange ju la HQP.
