1 Korinito 3:1-23
3 Itre trejine fe, thatreine kö ni ithanata koi nyipunie tune la eni a ithanata kowe la itre ka tro thenge la ua, ngo eni pe a ithanata koi nyipunie tune la eni a ithanata kowe la itretre tro thenge la ngönetrei, ceitu me itre nekönatr göi Keriso.
2 Nyipici, tha hnenge kö ekö hna hamë xeni ka catre koi nyipunie ngo meleke pe, ke tha ijiji nyipunieti pala kö. Ngazo pe, tha ijiji nyipunieti pala hi enehila.
3 Ke eje hi, nyipunie pala hi a tro thenge la ngönetrei. Hapeu, e hetre zalu me iwesitrë thei nyipunie, tha kolo kö lai a qajaqaja ka hape, nyipunie a tro thenge la ngönetrei tune la itre xa atr?
4 Nge ame la ketre a qaja ka hape: “Atre i Paulo ni,” nge ketre a sa ka hape: “Atre i Apolo ni,” hapeu, tha nyipunieti kö lai a ithanata qene atr?
5 Ke drei Apolo? Nge drei Paulo? Lue atre eatrëne la huliwa hna ahnithi koi së hnei Joxu, matre xatua nyipunie troa lapaun.
6 Haawe, hnenge hna traan, nge hnei Apolo hna fi, ngo Akötresie la ka acian.
7 Celë hi matre tha tro kö a atrune la atre traan, maine atre fi, ngo Akötresieti pe, atre acian.
8 Ke ceitune* hi la atre traan me atre fi, ngo tro la nöjei atr a isa kepe thupen, thenge la isa huliwa i angatr.
9 Easë la itre ka ce huliwa me Akötresie. Nge nyipunie la hlapa i nyidrë, hna nyidrawan hnei nyidrë, me uma hna xup hnei nyidrë.
10 Ngo pine la ihnimi gufa i Akötresie hna hamëne koi ni, hnenge hna ujë tune la atre xupi uma ka inamacan,* me xupi trepen, nge ketre atr pena la ka xupe hun ej. Ngo isa wange hnyawa kö së la aqane xupe së.
11 Nyipici, thatreine kö la ketre atr troa amë hmaca la ketre trepen, ke Iesu Keriso hi la nyipi trepen.
12 Ngo maine tro la ketre atr a xup hune la trepene gool, maine sileva, maine etë mo ka tru thupen, maine sinöe, maine nöjei pengöne haö,
13 tro ha mama la nöjei huliwa ne la itre atr. Ke tro la lai a amamane la itre huliwa cili jëne la eë. Nge tro la eë a isa tupathe la ecatrene la nöjei huliwa.
14 Haawe, maine troa cile huti la hna xupe draiën hnei ketre, tro hë angeic a kepe thupen.
15 Ngo maine troa dreuthetrije la huliwa i ketre, tro ha patre la ewekë i angeic, ngo tro pe kö angeic a mel. Nge maine tro ha traqa tun, tro ha traqa hnei eë.
16 Nge hapeu, thatre kö nyipunie laka, nyipunieti hi la itre uma ne hmi i Akötresie, nge ua i Akötresieti hë thei nyipunie?
17 Haawe, maine tro ketre a apatrene la uma ne hmi i Akötresie, tro kö Akötresie a apatrenyi angeic, ke ka hmitrötre la uma ne hmi i nyidrë. Nge nyipici, nyipunieti hi la uma ne hmi cili.
18 Nge the amenu nyipunieti kö, maine ketre atr thei nyipunie a mekune ka hape, ka inamacan angeic ngöne la fene celë,* loi ju kö e tro angeic a hmo, matre inamacane jë angeic.
19 Ke ame la inamacane i fen, tre hmo lai koi Akötresie. Hna cinyihane lo ka hape: “Nyidrëti a tra thethine la itre ka inamacan ngöne la sipu iaö i angatr.
20 Nge atre hnyawa hi Iehova* laka, ka gufa la inamacane i atr.”
21 Haawe, the tro kö la ketre a selëne la hna kuca hnei atr, ke ewekë i nyipunieti la nöjei ewekë asë.
22 Matre Paulo ju hë, maine Apolo, maine Kefa,* maine fene hnengödrai asë, maine mel, maine mec, maine itre ewekë enehila, maine itre ewekë elany, itre ewekë i nyipunieti asë hi la itre ewekë cili.
23 Nge eje hi, itre atre i Keriso nyipunie, nge tune mina fe, atre i Akötresie lae Keriso.
Itre mekun ecahu fen
^ Maine, “ca hna isi kow.”
^ Maine, “tane huliwa ka inamacan.”
^ Maine, “hneijine celë.” Wange ju la HQP.
^ Wange ju la HQP.
^ Hna hëne fe ka hape, Peteru.
