1 Korinito 4:1-21
4 Loi e tro la itre atr a goeë hun ceitu me itre hlue i Keriso, nge itretre thupëne la ini ka hmitrötr nge hna juetrën hnei Akötresie.
2 Qa ngöne lai, ame la thiina ka nyipiewekë kowe la itre hlu, tre troa nyipici.
3 Celë hi matre, tha nyipiewekë kö koi ni tro nyipunie, maine hnakootre i atr a ameköti ni. Ke eje hi, tha hnenge fe kö hna sipu ameköti ni.
4 Ketre, thatre kö ni la ngazong, ngo tha eni kö a hape, ka meköti ni, ke Iehova* casi hi la ka ameköti ni.
5 Qa ngöne lai, the iameköti kö qëmekene la ijine hna sa, uti hë la drai ne traqa hnei Joxu. Tro hë nyidrëti a xome la itre ewekë hna juetrën ngöne la gaa mit kowe la lai, me amamane la itre aja ne la hni, matre tro la itre atr a isa kepe thupene qaathei Akötresie.
6 Itre trejine fe, eni a cinyihan me qeje ni me Apolo nyine loi koi nyipunie, matre tro nyio a itre tulu koi nyipunie göi troa trongëne la trengewekë celë, kola hape: “Kuca ju hi la hna cinyihan.” Celë hi matre, tha tro kö nyipunieti a pi tru me wangaconyi itre xan.
7 Ke drei la ka aisa pengönë eö me ketre? Nemene la hnei eö hna hetreny nge tha hna hamë eö? Haawe, maine hna hamë eö, hnauëne la eö a sipu selë eö kösë tha hnei eö hna kapa?
8 Hapeu, meji fe hë nyipunie? Itre trenamo hë nyipunie? Nyipunieti fe hë a joxu? Tru catre la ajange tro nyipunieti a itre joxu enehila, matre tro fe huni a itre joxu me ce musi me nyipunie.
9 Ame koi ni, kösë hnei Akötresie hna amamai hun itre aposetolo, tune la lapa tixenuë hna troa humuth ngöne la ketre hnë elo. Nge fen, me itre angela, me nöjei atr a goeë hun.
10 Nge itre hmo huni pi Keriso, ngo nyipunie la itre ka inamacane göi Keriso; nge itre ka kucakuca hun, ngo ka catre pe nyipunie. Nge ijiji nyipunie troa kapa la lolo, ngo koi huni pë hë la hmahma.
11 Nge uti pala hi la hawa ce, eahuni a pi xen me pi ij, nge xalaithe hi la itre iheetre* hun, nge kola lepi* hun, nge pë pala kö uma hun.
12 Ketre, hne huni hna catre huliwane la lue ime hun; nge ame la kola qaqa hun, eahuni a amanathithin; nge ame la kola axösisi hun, eahuni a catre xomihni me cile hut.
13 Nge ame la kola silitrengathoi hun, eahuni a sa amenyiken;* nge uti pala hi enehila, ceitu i eahuni me itre ewekë hna trij, me hna sisin hnei fen.
14 Ngo tha eni kö a cinyihane la itre ewekë celë göi troa ahmahmanyi nyipunie, ngo nyine tro pe a eamo nyipunie, ke nyipunie la itre nekönge hniminang.
15 Nyipici, ngacama hetrenyi ju hë nyipunieti la 10 000 lao atre inin ka xatua nyipunie troa xötrethenge Keriso, ngo tha ala nyimu kö la itre keme i nyipunie. Ke hnenge hna nyi keme i nyipunie pine la maca ka loi thei Keriso Iesu.
16 Ngo eni la a upe iele nyipunie troa nyitipu ni.
17 Celë hi matre eni a upi Timoteo koi nyipunie, ke angeice hi la nekönge hniminang thei Joxu, nge ka nyipici. Tro hë angeic a amekunë nyipunie la aqane huliwang* matre xötrethenge Keriso Iesu, tune la aqane inine ni la nöjei ekalesia asë.
18 Ngo hnei itre xan thei nyipunie hna pi tru, ke angatr a mekune ka hape, tha tro hmaca kö ni a bëeke koi nyipunie.
19 Haawe, maine aja i Iehova,* easenyi hë tro ni a traqa koi nyipunie, nge e cili, tha tro kö ni a drenge la hna qaja hnene la itre ka pi tru, ngo tro pe ni a wange ka hape, qaathei Akötresieti kö la mene i angatr.
20 Ke eje hi, ame la Baselaia i Akötresie, tre tha ene kö la hna qaja, ngo mene pe.
21 Matre nemene la hnei nyipunieti hna ajan? Tro ni a traqa fë jia, maine tro ni a traqa fë la ihnim me menyik?
Itre mekun ecahu fen
^ Wange ju la HQP.
^ Ger., “cile xöe.”
^ Maine, “jeng.”
^ Ger., “loi thiina.”
^ Ger., “itre jëng.”
^ Wange ju la HQP.
