1 Korinito 5:1-13
5 Nyipici, eahuni a drei mejene la ketre aqane ujë ka sis* hna kuca thei nyipunie, ketre aqane ujë lai hna tha öhn thene la itre atre ne fen. Ketre nekö trahmany a xome la föe ne la keme i angeic.
2 Nge hapeu, nyipunieti kö a selëne lai? Nge hnauëne la tha hleuhleu kö nyipunie matre xometrije qaathei nyipunie la atre ujë tun?
3 Nyipici, ngacama patre kö ni ngöne la ngönetrei, ngo ce eni me nyipunie ngöne la mekun,* nge goi ase fe hë ni mekune la pune kowe la atre cili, kösë ce eni fe me nyipunie.
4 Celë hi matre, ame la nyipunie a ce icasikeu ngöne la ëje i Iesu Joxu së, me atre laka, ce eni me nyipunie ngöne la mekun, eni, lo hnei Iesu Joxu së hna hamë mene kow,
5 tro hë nyipunie a nue la atre cili koi Satana, matre patre pi la iajojezi qa hnine la ekalesia, nge matre thupëne la aqane waiewekë ne la ekalesia ngöne la drai i Joxu.
6 Tha ka loi kö la ewekë hnei nyipunieti hna selën. Hapeu, thatre kö nyipunieti laka, hnene hi la ca wamine leven matre cipa asë jë la farin hna ce lomëne me tim?
7 Haawe, xometrije pi la farin hnapan hna kuië levenen, matre tro nyipunieti a itre farin ka hnyipixe e patre hë la leven. Ke eje hi, ase hë huujë Keriso, Paseka së.
8 Qa ngöne lai, loi e tro sa feet, ngo tha cememine kö la levene hnapan, maine levene ne ngazo me qali thiina, ngo loi pe cememine la itre falawa ka pë levenen, hatrene loi me nyipici.
9 Ngöne la tusing, eni a cinyihane koi nyipunie matre tha tro hmaca kö nyipunie a nyi sineen la itre ka kuci ngazo,*
10 ngo tha eni kö a qaja la itre atre ka thatre Akötresie nge ka kuci ngazo,* me meciun, me huliwa qenatrekënö, maine ka thili koi idrola. Ke maine eje ju, tro hë nyipunieti a feke qaa la fen.
11 Ngo enehila, eni a cinyihane koi nyipunie matre tha tro hmaca kö nyipunie a nyi sineene la itre hna hëne ka hape, trejin, ngo ka kuci ngazo,* nge ka meciun, nge ka thili koi idrola, nge ka iqaqa,* nge ka pi iji gorok, maine ka huliwa qenatrekënö. Nge goi tha tro fe nyipunieti a hane ce xeni me itre ka ujë tun.
12 Ke nyine ue la tro ni a amekötine la itre atr e trön? Hapeu, tha hnëqa i nyipunieti kö troa amekötine la itre atr e hnine la ekalesia,
13 nge Akötresie a amekötine la itre atr e tröne la ekalesia? “Haawe, xometrije pi qaathei nyipunie la atre kuca la ngazo.”
Itre mekun ecahu fen
^ Ger., por nei’ a, kola qaja la nöjei pengöne aqane kuci ngazo. Wange ju la HQP.
^ Ger., “pneu’ma.”
^ Ger., por nei’ a, kola qaja la nöjei pengöne aqane kuci ngazo. Wange ju la HQP.
^ Ger., por nei’ a, kola qaja la nöjei pengöne aqane kuci ngazo. Wange ju la HQP.
^ Ger., por nei’ a, kola qaja la nöjei pengöne aqane kuci ngazo. Wange ju la HQP.
^ Maine, “atre ithanata angazon.”
