1 Korinito 6:1-20
6 Ame la nyipunieti a iwesitrë me ketre, hnauëne laka, canga nyinyape ju hi nyipunie troa utisai angeic kowe la itre ka tha meköti kö, ngo tha tro pe koi ange ka hmitrötr?
2 Nge hapeu, thatre kö nyipunie laka, ange ka hmitrötr la ka troa amekötine la fen? Nge maine nyipunie la itre ka troa amekötine la fen, hapeu, thatreine kö nyipunie senge la itre jole ka co cili?
3 Nge hapeu, thatre kö nyipunie laka, tro fe së a hane amekötine la itre angela? Nga ka ue pe kö la itre jol ne la mele celë?
4 Haawe, maine hetre jole ne la mele celë hnei nyipunie hna pi isenyin, tro kö nyipunieti a iëne la atre iameköti thene la itre hna wangacon hnene la ekalesia?
5 Eni a ithanata tune matre ahmahmanyi nyipunie, ke hapeu, pëkö ka inamacane thei nyipunie matre senge la itre jole ne la itre trejin?
6 Ngazo pe, itre trejin a itö iutisai qëmekene la itre ka tha lapaun!
7 Nyipici, nyipunieti a ahmahmanyi nyipunieti kö, la nyipunie a uti fë la trejin me nyipunie. Ngo hnauëne tha nue angeice kö troa ngazo koi nyipunie? Nge hnauëne tha nue kö nyipunie la trejin troa thapa la itre ewekë i nyipunie?
8 Ngazo pe, nyipunie la itre ka ngazo nge ka thepe ewekë, ngacama trejin me nyipunieti lai!
9 Hapeu, thatre kö nyipunie ka hape, tha tro kö a sine la Baselaia i Akötresie hnene la itre ka tha meköti kö? Haawe, the amenu nyipunieti kö. Ame la itretre kuci ngazo,* me thili koi idrola, me nyixetë, me nyi föe, me trahmanyi ka ce meköl me trahmany,
10 me atrekënö, me atre meciun, me ka hmo hnei ka haitr, me atre iqaqa,* me huliwa qenatrekënö, tha tro kö angatre lai a hane sine la Baselaia i Akötresie.
11 Nge celë hi aqane ujë ne la itre xan e nyipunieti ekö, ngo enehila, ase hë ahmitrötrë nyipunie, me jelemeköti nyipunie ngöne la ëje ne la Joxu Iesu Keriso, nge jëne la ua ne la Akötresi së.
12 Nge ngacama ka meköti* koi ni la nöjei ewekë asë, ngo ame pe, tha nyine loi asë kö. Nge ngacama meköti koi ni la nöjei ewekë asë, ngo xele ni ma tro la ketre ewekë a musinëne* la meleng.
13 Ame la xen, tre thatraqane la trengenan, nge trengenan thatraqane la xen, ngo tro Akötresieti a apatrene lue ej. Nge ame la ngönetrei, tha göi tro kö a kuci ngazo,* ngo thatraqai Joxu pe, nge nyidrëti a thupëne la ngönetrei.
14 Nge hnei Akötresieti hna amelene hmaca la Joxu, nge tro fe nyidrëti lai a hane thepe së qa ngöne la mec, jëne la mene i nyidrë.
15 Hapeu, thatre kö nyipunie laka, itre hnepe ngönetrei i Keriso la itre ngönetrei i nyipunie? Matre nemen, tro kö ni a thupatrije la itre hnepe ngönetrei i Keriso nyine nyi ngönetrei ne föe ne gojeny? Epi tha tro kö a tun!
16 Nge hapeu, thatre kö nyipunie laka, ame la atre fedre kowe la föe ne gojeny, casi hë nyidro? Ke öni Akötresieti lo: “Tro nyidroti a ca ngönetrei.”
17 Ngo ame la atre fedre kowe la Joxu, ka casi hë angeic me nyidrë göi aqane waiewekë.
18 Haawe, kötrene pi la kuci ngazo! Ke ame la itre xa ngazo hna kuca hnene la atr, tre e tröne la ngönetrei angeic, ngo ame la atre majemine kuci ngazo,* angeice kö a sipu angazone la ngönetrei angeic.
19 Nge hapeu, thatre kö nyipunie ka hape, ame la itre ngönetrei i nyipunie, tre celë hi uma ne hmi hna lapan hnene la ua hna hamën hnei Akötresie? Nge ketre, nyipunie la itre ewekë i Akötresie,
20 ke hnei nyidrë hna itö nyipunie. Haawe, atrunyi Akötresieti jë hnene la itre ngönetrei nyipunie.
Itre mekun ecahu fen
^ Wange ju la HQP.
^ Maine “ithanata angazon.”
^ Maine, “ijij.”
^ Maine, “xomacon.”
^ Ger., por·neiʹa. Wange ju la HQP.
^ Ger., por·neiʹa. Wange ju la HQP.
