1 Korinito 7:1-40
7 Nge ame pena göne lo itre ewekë hnei nyipunieti hna cinyihane koi ni, loi e tha tro kö la trahmany a ketri* föe;
2 ngo pine laka, catrehnine catre la kuci ngazo* enehila, loi e tro la itre trahmany a isa hetre föen, nge tro la itre föe a isa hetre trahmany.
3 Nge hnëqa ne la trahmanyi troa eatrëne la aja* i föe, nge tune fe kowe la föe thatraqane la föi angeic.
4 Haawe, tha ewekë i föe kö la ngönetrei angeic, ngo trahmany la ka mus, nge tune mina fe, tha ewekë i trahmanyi kö la ngönetrei angeic, ngo föe pe la ka mus.
5 Nge the cipa nyipunieti kö koi föi nyipunie, ngo loi pe e hna ce ajan ngöne la ketre hnepe ijin, matre hetre ijine i nyipunie troa thith me casi hmaca. Nge e troa tro tune lai, tha tro kö Satana a tupathi nyipunie pine nyipunie thatreine xomehnöth.
6 Nyipici, eni a qaja lai, ngo tha ewekë kö hna amekötin.
7 Nge ajange tro la nöjei atr a tung. Ngo eje hi laka, isa hetre ahnahna së qaathei Akötresie, itre xan a faipoipo, nge itre xan a lapa pë föe.
8 Enehila, eni a qaja kowe la itre ka pë föen, me itre sine föe ka hape, ka loi kö e tro angatr a lapa pë föen tui eni.
9 Ngo maine thatreine kö angatre xomehnöth, nue angatre pi troa faipoipo, ke loi e tro angatr a faipoipo hune la troa meci fë trenge aja.
10 Nge ame kowe la itre ka faipoipo, eni a amekötine la ewekë celë, ngo tha eni kö ngo Joxu pe. Kola hape, tha tro pi kö la föe a isa lapa me föi angeic.
11 Ngo maine tro angeic a isa lapa me föi angeic, tha tro kö angeic a faipoipo me ketre. Nge maine thatreine kö angeice lapa cas, loi e tro angeic a iloi hmaca me föi angeic. Nge ketre, tha tro kö la trahmanyi a trotrije la föi angeic.
12 Ngo ame koi itre xan, eni a qaja la ewekë celë, eni hi, ngo tha Joxu kö: Maine ketre trejin a föene la ketre föe ka tha lapaune kö, ngo aja i föe troa ce mele me angeic, haawe, the tro kö angeic a trotriji föe;
13 nge maine ketre trejine föe a föene la ketre trahmanyi ka tha lapaune kö, ngo aja i trahmanyi troa ce mele me angeic, haawe, the tro kö angeic a trotriji trahmany.
14 Ke hna ahmitrötrëne la trahmanyi ka tha lapaun hnene la föi nyidrë, nge hna ahmitrötrëne la föe ka tha lapaun hnene la trejin. Nge maine ju, tha hna ahmitrötrëne kö la itre nekö i nyidro, ngo enehila, ase hë ahmitrötrë nyudren.
15 Ngo maine tro la ketre ne lai lue trefëne ka tha lapaun a mekune troa itrotrij,* nue angeice pi; ke nyipici, ame ngöne la itre ijine cili, pëhë ka hnöthe lai trejin. Ngo Akötresieti pe a hamë tingetinge koi nyipunie.
16 Nge nyipunie itre föe, maine tro nyipunie a lapa me itre föi nyipunie, maine jë, tro hë nyipunie a amele angatr. Nge nyipunie itre trahmany, maine tro nyipunie a lapa me itre föi nyipunie, maine jë, tro hë nyipunie a amele angatr.
17 Ngo pine laka, hnei Iehova* hna isa thewe edrö së, loi e tro sa isa mele thenge lo pengö së ngöne lo nyidrëti a hë së. Nge celë hi hnenge hna amekötin kowe la nöjei ekalesia.
18 Matre hapeu, hna hane kö hëne la ketre trejin nge ase hë xötrehatrenyi angeic? Nue angeice pi. Nge hapeu, hna hane kö hëne la ketre trejin nge tha hna xötrehatrenyi angeice kö? Nue angeice pi.
19 Ke ka pë aliene la troa xötrehatren maine tha xötrehatren, ngo ame la ka tru alien, tre ene la troa trongëne la itre hna amekötin hnei Akötresie.
20 Haawe, isa lapa ju kö së ngöne lo pengö së lo nyidrë a hë së.
21 Nge hapeu, hna hane kö hë eö nge hlu pe eö? Tha nyipiewekë kö; ngo maine ijije troa nuamacanyi eö, isine jë.
22 Ke ame la atre hna hën göi Joxu nge hlu angeic, hna nuamacanyi angeice lai thei Joxu. Ketre tun, ame la atre hna hën nge atre hna nue kö, ketre hlu angeice lai thei Keriso.
23 Nge pine laka hna itö nyipunie, loi ju hë hna nyihlue i atr.
24 Haawe ange trejin, qëmeke i Akötresie, isa lapa ju kö së ngöne lo pengö së lo nyidrëti a hë së.
25 Nge ame pena kowe la itre ka tha hane kö faipoipo, pëkö hna amekötin hnenge hna kapa qaathei Joxu, ngo eni hi a qaja la aqane waiewekëng. Nge pine laka hna utipi ni hnei Joxu, ijije tro nyipunie a mejiune kowe la hnenge hna qaja.
26 Eni a mekune ka hape, pine la itre jole ka traqa enehila, ka loi e tro la trahmanyi a lapa tune lai.
27 Nge hapeu, hna othi nyipunieti hë kowe la ketre föe? Nga the thele hmaca kö troa kötre eahlo. Nge hapeu, tha hna othi nyipunieti hmaca kö kowe la ketre föe? Nga loi ju hë hna thele föe.
28 Ngo maine tro eö a faipoipo, pëkö ngazo i eö, nge maine tro la ka pë föen a faipoipo, tha ngazo kö angeic, ngo ame la itre ka faipoipo, tro kö angatre lai a ixelë me itre akötr. Ngo eni pe a thele troa ananyi nyipunie qa ngöne la itre akötre cili.
29 Ketre, eni a qaja ange trejin, hohopatre pe hi la ijin. Qa ngöne lai, epi tro la itre ka trene föe a tune la itre ka pë föen,
30 nge tro la itre ka treij a tune la itre ka tha treij, nge tro la itre ka madrin a tune la itre ka tha madin, nge tro la itre ka itö a tune la itre ka pë ewekë,
31 nge tro la itre ka kepe loi qaathene la fen, a tune la itre ka tha kapa atrun; ke kola saze la pengöne la fene celë.
32 Ketre, eni a ajane matre tha tro kö nyipunieti a hnehengazone la itre xa ewekë ne fen. Ke ame la trahmanyi ka pë föen, angeic a akötrehnine la itre huliwa i Joxu, ene la aqane tro angeic a amadrinë Joxu.
33 Ngo ame la ka faipoipo, angeic a akötrehnine la itre ewekë ne fen, ene la aqane tro angeic a amadrinëne la föi angeic.
34 E cili, tha angeice hmaca kö a mekune la ca ewekë. Ngo ame la föe ka pë föen memine la jajiny, nyidroti a akötrehnine la itre huliwa i Joxu, matre ka hmitrötre nyidro ngöne la ngönetrei me mekun. Ngo ame la föe ka faipoipo, angeic a akötrehnine la itre huliwa i fen, ene la aqane troa amadrinëne la föi angeic.
35 Eni a qaja lai nyine loi koi nyipunie, tha göi tro kö a xomacone* la mele i nyipunie, ngo loi pe troa thuecatre i nyipunie kowe la ka loi, nge matre tha tro kö a ajolë nyipunie troa huliwa pala hi koi Joxu.
36 Ngo maine tro la ketre atr ka tha faipoipo a thatreine xomehnöthe la itre aja göi ce meköl, nge ase hë angeice sasaithe lo ijine hna hape, kola xötrei tru, ka loi kö la tro angeic a faipoipo, ke pëkö engazon.
37 Ngo maine xecie hë e kuhu hni ketre troa lapa cas, nge pëkö ka ajolë angeic, nge angeice a musi kowe la itre aja i angeic, nge eje hnyawa hi lai e kuhu hni angeic, ka loi la hnei angeice hna mekun.
38 Haawe, ame la atre faipoipo, ka loi la mekuna i angeic, ngo ame la ka lapa cas, sisitria kö la mekuna i angeic.
39 Nge ame la föe ka faipoipo, hna othi eahlo e mele petre kö la föi eahlo. Ngo e traqa ju nyidrëti mec, ijije tro eahlo a faipoipo hmaca me ketre, ngo thei Joxu hmekuje hi.
40 Ngo ame koi ni, tro kö a tru catre la madrine i eahlo e tro eahlo a lapa cas, nge ka xecie lai koi ni, ke ua i Akötresieti theng.
Itre mekun ecahu fen
^ Kola qaja la ce meköl.
^ Kola qaja la nyimu aqane kuci ngazo thenge lo qene Geres, por·neiʹa. Wange ju la HQP.
^ Ene la troa ce meköle hnei lue trefën.
^ Maine, “isa lapa.”
^ Wange ju la HQP.
^ Ger., “hnöth.”
