1 Korinito 8:1-13
8 Ame göi xen hna huujëne koi itre idrola: Isa hetre atrehmekune së. Nge ame la atrehmekun, ej a aciane la pi tru, ngo ame kö la ihnim, ej a ithuecatr.
2 Maine jë, ketre a mekune ka hape, atre hë angeice la ketre ewekë, ngo thatre hnyawa pala kö.
3 Ame la atre hnimi Akötresie, angeice hi la atr hna atre hnei nyidrë.
4 Ketre, ame göi troa xeni la itre hna huujëne koi idrola, atre hi huni laka, ka gufa hnyawa la itre idrola, nge casi hi la nyipi Akötresie.
5 Nge ala nyimu la itre atr ka qaja ka hape, nyimu akötresie e hnengödrai me e celë fen. Matre ame koi angatr, nyimu “akötresie” nge nyimu “joxu.”
6 Ngo ame koi së, casi hi la nyipi Akötresie, ene la Kem, ke kola ej la nöjei ewekë asë hnei nyidrë, nge easë a mele koi nyidrë; nge casi hi la Joxu, Iesu Keriso, nge kola ej la nöjei ewekë asë jëne nyidrë, nge easë a mel jëne nyidrë.
7 Ngo tha easë asë kö la ka hetrenyi la atrehmekune cili. Nyipici, pine laka, hnei itre xan ekö hna atrune la itre idrola, matre enehila, kola upezö angatr hnene la mekuthetheu* i angatr, ke angatr a xeni la hna huujën, me waipengöne lai xen, ceitu me ewekë hna huujëne koi idrola.
8 Ngo tha xeni kö la ka easenyi së koi Akötresie, ke maine tha xeni kö së, pëkö ka pë the së, nge e xeni pena së, ketre pëkö eloi së.
9 Haawe, thupëne kö matre tha tro kö la aqane ië ewekë i nyipunie a akeine la itre mekuthetheu* ka kucakuca.
10 Ke maine tro ketre a öhnyi eö, eö ka hetre atrehmekun, a kola xen ngöne la uma ne hmi ne la ketre idrola, hapeu, tha tro jë kö a huliwa la mekuthetheu* i angeic ka kucakuca, matre upi angeic troa xeni la hna huujën?
11 Haawe, hnene la atrehmekune i eö matre luzi pi la trejin me eö ka kucakuca, lo hna meci pin hnei Keriso.
12 Nge ame la nyipunie a akeine la trejin me nyipunie tune lai, me angazone la mekuthetheu* i angeic ka kucakuca, nyipunieti hi lai a ngazo koi Keriso.
13 Celë hi matre, maine tro la trejine me eni a kei hnei xen, eni a qaja, tha tro hmaca kö ni a öni mitr wanga kei pi la trejin me eni.
