1 Thesalonika 1:1-10
1 Eni Paulo, me Silevana* me Timoteo a cinyiany koi nyipunie ekalesia ne Thesalonika, itretre cas me Akötresie Keme së, me Iesu Keriso Joxu së:
Epi tro la ihnimi gufa me tingeting a eje thei nyipunie.
2 Tha mano kö huni ole koi Akötresie la eahuni a thithi sai nyipunie,
3 ke qëmeke i Akötresie Keme së, tha thëthëhmine kö huni lo itre huliwa ne lapaune me huliwa ne ihnim, me aqane cile huti nyipunie hnene la mejiune i nyipunie koi Iesu Keriso Joxu së.
4 Atre hnyawa hi hun itre trejine hna hnim hnei Akötresie ka hape, hnei nyidrëti hna hane ië nyipunie,
5 ke ame lo maca ka loi hne huni hna cainöjëne koi nyipunie, tre, tha hnei trengewekë hmekuje kö, ngo hnene la ixatua ne la uati hmitrötr. Nge xecie hnyawa koi huni ka hape, trenge nyipici la maca hne huni hna cainöjën, nge ixatua lai ka tru koi nyipunie. Ketre, atre hnyawa hi nyipunie lo aqane huliwa hun thatraqai nyipunie.
6 Matre nyipunieti hë a nyitipu hun me Joxu, ke ngacama nyimu jol hnei nyipunie hna cile kow, ngo jëne la uati hmitrötr nyipunie a kapa madrine la trengewekë i Akötresie.
7 Qa ngöne lai, itre tulu nyipunie kowe la itretre lapaun e Makedonia me Akaia.
8 Ngo tha hnei nyipunieti hmekuje kö hna tro fë la trengewekë i Iehova* e Makedonia me Akaia, ngo ngöne la nöjei götran asë. Nge kolo fe a drei mejene e cili la lapaune i nyipunie koi Akötresie, haawe, pë hë nyine tro huni a qaja.
9 Eje hi, itre atr e cili a iqajakeune lo eahuni a xötrei cainöje koi nyipunie e Thesalonika, me aqane trotrije nyipunie la itre idrola, matre nyihluene la Akötresie ka mel me ka nyipici.
10 Nge kolo fe a iqajakeune ka hape, nyipunieti a lapa treqene lo Nekö i Akötresie ka troa uti qa hnengödrai, ene Iesu lo hna amelene hmaca, nge atre thepe së qa ngöne la elëhni i Akötresie ka troa traqa.
