1 Thesalonika 2:1-20
2 Atre hnyawa hi nyipunie ange trejin laka, tha gufa kö lo iwai huni koi nyipunie.
2 Nge atre fe hë nyipunie ka hape, ngacama hna pane akötrë hun me ithanata angazonyi koi huni e Filipi, ngo jëne Akötresie, tha xou huni kö troa ithanata, matre tro fë koi nyipunie la maca ka loi göi Akötresie qëmekene* la itre iaxösisi.
3 Ke ame la eamo hun, tre tha qa ngöne kö la tria, maine aja ka ngazo, maine iamenu.
4 Ngo pine laka, hna aijijë huni hnei Akötresie troa kapa la hnëqa ne tro fë maca ka loi, celë hi matre eahuni a ithanata, ngo tha göi tro kö a amadrinë atr, ngo Akötresieti pe atre goeëne la itre aliene hni së.
5 Atre hnyawa fe nyipunie nge öhne kö Akötresie ka hape, tha eahuni kö a qaja la itre trenge ithanata hna pi dreng, maine lue iqëmek matre juetrëne la itre aja huni ka ngazo.
6 Ketre, ngacama ijiji huni hi troa nyi ehnefe i nyipunie göi mani, ke itre aposetolo i Keriso hun, ngo tha hne huni kö hna thele loi qaathei atr, qaathei nyipunie maine itre xane pena.
7 Hne huni pe hna menyik nyipi nyipunie, tune la ketre thine ka iji thin me thupëne* hnyawa la itre kuku.
8 Haawe, pine laka, tru la ihnimi huni koi nyipunie, xecie* hnyawa koi huni troa tro fë koi nyipunie la maca ka loi i Akötresie, ngo tha eje hmekuje kö, ngo mele* huni fe, ke itre hnimina nyipunie koi hun.
9 Nge ka xecie hnyawa koi huni ange trejin ka hape, mekune pala kö nyipunie lo aqane huliwa catre hun, me trengecatre hun. Ame lo eahuni a cainöjëne la maca ka loi göi Akötresie, hne huni lo hna catre huliwa e lai me jidr, matre tha tro kö a nyi ehnefene la ketre e nyipunie göi mani.
10 Nyipunie me Akötresie la itretre anyipicine la aqane mele nyipici hun, me meköt, me pë gelen thatraqai nyipunie, angetre lapaun.
11 Nge atre hnyawa ha nyipunie laka, hne huni pala hi hna catre eamo, me iakeukawany me iele nyipunie isa ala cas, tune la kem koi kuku.
12 Qa ngöne lai, tro pala kö nyipunieti a tro thenge la aja i Akötresie, lo atre hë nyipunie kowe la Baselaia me lolo i nyidrë.
13 Celë hi matre eahuni a catre olene koi Akötresie, ke ame lo nyipunieti a drenge lo trengewekë i Akötresie, lo hnei nyipunieti hna dreng qaathe hun, hnei nyipunieti hna kapa a tha trengewekë i atre kö, ngo eje hi, sipu trengewekë i Akötresie. Nge ej a huliwa thei nyipunie itretre lapaun.
14 Haawe itre trejin, nyipunie la itre ka nyitipune la itre ekalesia i Akötresie ka ce me Iesu Keriso e Iudra, ke nyipunieti a akötr hnene la itre atrene la nöje i nyipunie, tune la aqane akötrë angatr hnene la angetre Iudra,
15 ene lo itre ka humuthi Iesu Joxu me itre perofeta, nge itre ka axösisi hun. Ketre, tha angatre kö a amadrinë Akötresie, nge ame la hnei angatre hna kuca, tre tha nyine loi kö kowe la itre atr.
16 Angatr a sewe huni troa cainöj kowe la itre atre ne fen, wanga amele nyudreni jë. Matre angatre hi lai a nyixane la etrune la itre ngazo i angatr, ngo tro ha traqa koi angatre la elëhni i Akötresie.
17 Haawe ange trejin, tha qea kö lo ijine kola aisa* huni me nyipunie (göi ngönetrei hi ngo tha göi mekun) ngo hne huni hna isin troa iöhnyi* hmaca me nyipunie, ke atraqatre la aja hun.
18 Pine lai, hne huni hna thele troa tro koi nyipunie, nyipici, eni Paulo, tha hnenge kö hna aca thele troa tro koi nyipunie ngo alu, ngazo pe, hnei Satana pala hi hna sewe hun.
19 Ke nemene mejiun, me madrin, me korona la hne huni hna troa selëne qëmekei Iesu Joxu së ngöne la ijine celë hë nyidrë? Hapeu, tha nyipunieti kö?
20 Nyipici, nyipunie la lolo me madrine hun.
Itre mekun ecahu fen
^ Maine jë, “nyipine la itre akötr.”
^ Maine, “kuca hnyawan.”
^ Ger., “aja hun.”
^ Maine, “u.” Ger., psy·kheʹ. Wange ju la HQP.
^ Maine, “sawa.”
^ Ger., “goeëne la iqëmeke i nyipunie.”
