1 Thesalonika 5:1-28
5 Nge ame göi itre ijin me itre hneijin ange trejin, tha nyipiewekë kö tro huni a cinyihane koi nyipunie.
2 Ke atre hnyawa ha nyipunie ka hape, tro la drai Iehova* a traqa tune la atrekënö e jidr.
3 Nge e qaja ha angatre ka hape: “Tingetinge hë nge pë hë hna mecin!”* tro ha aca tro traqa koi angatre la itre akötre ka tru, tune la akötr ne la föe ka troa hnaho,* pëkö jë ne kötre i angatr.
4 Ngo ame nyipunie ange trejin, tha nyipunieti kö ngöne la jidr, matre tha tro kö la drai cili a asesëkötrë nyipunie, tune la aqane asesëkötrëne la atrekënö hnene la lai.
5 Ke nyipunie la itre nekön hna alain, me itre nekö ne la lai. Tha easë kö a tro ngöne la gaa mit, maine gaa jidr.
6 Qa ngöne lai, the tro pi kö sa meköl tui itre xan, ngo loi e tro pe sa hmek me atreine waiewekë.
7 Ke ame la itre ka meköl, angatr a meköl e jidr, nge ame itre ka hmo hnei ka haitr, angatr a hmo e jidr.
8 Ngo ame easë itre atre ne la lai, loi e tro pala hi sa atreine waiewekë hnyawa, me hetrëne la imano së hnene la lapaun me ihnim, me petrëne lo itrapetr, ene la mejiun kowe la iamele.
9 Ke ase hë Akötresie ië së, tha göi tro kö a isi, ngo matre troa kapa la iamele jëne Iesu Keriso Joxu së.
10 Hnei nyidrëti hna meci pi së, matre ngacama ka hlë ju hë së maine ka meköl,* ngo loi e tro pala hi sa ce mele me nyidrë.
11 Haawe, the mano kö ithuecatrekeu* me itö ixatua, tune lo aqane kuca i nyipunie.
12 Enehila ange trejin, eahuni a sipo nyipunie troa metrötrëne la itre ka huliwa mec thei nyipunie, itre ka xomiuji nyipunie thei Joxu, me ka eamo nyipunie;
13 me troa nyipi hnimi angatr me wangatrunyi angatr pine la itre huliwa i angatr. Nge isine jë troa mele tingetinge me itre xan.
14 Ngo eahuni fe a upi nyipunie ange trejin, troa canga hmekëne* la itre ka tha idrei, me hamëne la itre trenge ithanata ka keukawa kowe la itre ka hace hni,* me xatuane la itre ka kucakuca, me xomihnine la nöjei atr asë.
15 Nge wange ju matre tha tro kö a iatëkeune la ngazo, ngo tro pala hi a thele la ka loi koi ketre, me koi nöjei atr asë.
16 Loi e tro pala hi nyipunieti a madrin.
17 The mano kö thith.
18 Olene jë la nöjei ewekë asë, ke celë hi aja i Akötresie koi nyipunie thei Keriso Iesu.
19 The ajolëne kö la huliwa ne la ua i Akötresie thei nyipunie.
20 Nge the wange sixane kö la itre hna perofetan.
21 Waipengöne hnyawa ju la enyipicine la nöjei ewekë asë; nge xölehuje ju la ka loi.
22 Nge iananyi pi memine la nöjei pengöne ngazo.
23 Haawe, epi tro Akötresie, atre hamë tingeting a sipu ahmitrötrë nyipunie. Nge epi tro pala hi nyipunie itre trejin a thupëne la itre mekun me mel* me ngönetrei i nyipunie, matre tha tro kö a hetre gele i nyipunie ngöne la ijine celë hë la Joxu së Iesu Keriso.
24 Haawe pine laka, atre mele nyipici la atre hë nyipunie, tro kö nyidrëti a kuca lai.
25 Haawe ange trejin, the mano kö thithi sai hun.
26 Nge ibozu jë me itre trejin nge itö idremi* ju.
27 Haawe, eni a ahnith koi nyipunie la hnëqa ka tru celë ngöne la ëje i Joxu, troa e la tusi celë kowe la nöjei trejin asë.
28 Epi troa eje thei nyipunie la ihnimi gufa ne la Joxu së Iesu Keriso.
Itre mekun ecahu fen
^ Wange ju la HQP.
^ Maine, “xetietë.”
^ Maine, “akötre sil.”
^ Maine, “meköl ngöne la mec.”
^ Maine, “iakeukawa.”
^ Maine, “hajin.”
^ Maine, “ka kucakuca.”
^ Maine, “u.” Ger., psy·kheʹ. Wange ju la HQP.
^ Ger., “idrem ka hetre ehmitrötren.”
