2 Ioane 1:1-13
1 Qaathene la qatr, kowe la föe hna iën me itre nekö i eahlo, lo hnenge hna hnime catrën, ngo tha eni casi kö ngo nöjei atre fe ka atre la nyipici.
2 Eahuni a hnimi nyipunie pine la nyipici ka eje the hun, nge ka troa lapa palua the hun.
3 Nge tro fe a eje the së la ihnimi gufa, me utipin, me tingeting qaathei Akötresie la Kem, me Iesu Keriso, Nekö ne la Kem, nge tro fe nyidroti a hnimi së, me ini së la nyipici.
4 Eni a madrin atraqatr, ke öhne hi ni la itre xa nekö i eö ka trongëne pala hi la nyipici, thenge lo hna amekötin koi së hnene la Kem.
5 Enehila föe, eni a sipo eö troa ihnimikeu. (Tha eni kö a cinyihane troa hamë eö la ketre wathebo ka hnyipixe, ngo ketre hne së hna kapa ngöne la qaan.)
6 Hane hi la aliene la ihnim, ene la troa trongëne la itre hnei nyidrëti hna amekötin. Nge celë hi ewekë hna amekötin, lo hnei nyipunie hna dreng ngöne la qaan, nge nyine tro nyipunie a catre trongën.
7 Ala nyimu la itretre iamenumenu ka mama ngöne la fen, itretre thatre ka hape, hnei Iesu Keriso hna traqa ngöne la ngönetrei. Celë hi atre iaö me ithupëjia me Keriso.
8 Haawe, wai nyipunieti kö, wanga luzi pi la thangane la itre huliwa hun koi nyipunie, ngo loi pe tro nyipunieti a kapa la edrö ka pexej.
9 Matre ame la atre sasaithi tulu, me trotrije la ini i Keriso, tha casi kö angeic me Akötresie. Ngo ame la atre lapa catr ngöne la ini cili, angeice la ka casi memine la Kem me Nekön.
10 Matre, e tro ketre a traqa koi nyipunie nge tha traqa fë kö angeic la ini cili, the kepe angeice kö hnine la itre hnalapa i nyipunie, nge the ibozu kö memin.
11 Ke ame la atre ibozu memin, angeic a nyixölene la itre ngazo i angeic.
12 Ngacama nyimu mekune pala kö nyine tro ni a cinyihane koi nyipunie, ngo tha pi tro kö ni a qaja jëne pepa me tim ne cinyiany; ngo eni pe a ajane troa traqa koi nyipunie, me ithanata iqëmekë me nyipunie, matre pexeje pi la madrine i nyipunie.
13 Itre nekö ne la trejine me eö, itre hna iën, a upe la ibozu i angatr koi eö.
