2 Korinito 1:1-24
1 Qaathei Paulo, aposetolo i Keriso Iesu thenge la aja i Akötresie, me Timoteo trejin me easë, thatraqane la ekalesia i Akötresie e Korinito, me ange ka hmitrötr e Akaia.
2 Epi tro nyipunie a kapa la ihnimi gufa me tingetinge qaathei Akötresie, Keme së, me Iesu Keriso Joxu së.
3 Epi troa atrune la Akötresie me Keme ne la Joxu së Iesu Keriso. Keme ka tru trenge utipin, me Akötresie ne iakeukawany,
4 atre akeukawanyi* së ngöne la nöjei akötre* së, matre atreine jë së troa hane akeukawane la itre xan ngöne la nöjei pengöne akötr, jëne la iakeukawany hne së hna kapa qaathei Akötresie.
5 Ke atraqatre la itre akötre së pi Keriso, ketre tun, tro fe a atraqatre la iakeukawany hne së hna kapa jëne Keriso.
6 Nge maine eahuni e hnine la akötr, tre nyine akeukawanyi nyipunie me amele nyipunie; nge ame la kola akeukawanyi hun, tre nyine akeukawanyi nyipunie, matre atreine jë nyipunie cile catr ngöne la itre akötr hne huni hna melën.
7 Nge ka mejiune hnyawa huni koi nyipunie, ke pine laka, ceitune hi la itre akötre i nyipunie, ketre ceitune hi la iakeukawany hnei nyipunie hna troa kapa.
8 Nge ange trejin, tha ajane kö huni tro nyipunie a thatre la jole ka traqa koi huni ngöne la nöje Asia. Nyipici, atraqatre pi hë lo akötre hun, nge goi thatreine fe huni cile hut, ke tha nyipi mama kö koi huni ka hape, tro jë kö huni a mel maine mec.
9 Nyipici, ame itre xa ijin eahuni a mekun ka hape, ase hë amekötine tro huni a mec. Ngo kolo hi matre tha tro kö huni a mejiune koi huni kö, ngo koi Akötresieti pe, ka troa amelene hmaca la itre ka mec.
10 Ke tha fene ewekë kö la hnei nyidrëti hna kuca koi së, nyidrëti a thepe së qa ngöne la mec, nge tro kö nyidrëti a thepe së. Matre hetre mejiune së laka, tro pala hi nyidrëti a thepe së.
11 Ngo ijije tro nyipunie a xatua hun jëne la hna xëwe sai hun, ke maine ala nyimu la itre ka xëwe sai hun, tro Akötresieti a dreng me xatua hun, nge qa ngöne lai, ala nyimu la ka troa olen koi Akötresie.*
12 Ke hetre kepin matre eahuni a selë hun, ene laka, ngöne la fen nge nyipi nyipunie, ka wië pala hi me meköt la aqane ujë hun, thenge lo hna ini huni hnei Akötresie me ihnimi gufa i nyidrë, ngo tha thenge kö la inamacane i fen. Nge göne la ewekë cili, kola isa anyipici huni hnene la itre mekuthetheu* hun.
13 Nge tha eahuni kö a cinyihane la ketre ewekë hnei nyipunie hna thatreine e me trotrohnin,* ngo loi e tro pala hi nyipunieti a kapa lai uti hë la pun,
14 tune la aqane trotrohnin ne la itre xan thei nyipunie. Nyipici, hnei angatre hna trotrohnine ka hape, pi hun matre nyipunie a selën; nge eje hi, tro fe huni elanyi a selëne pi nyipunie ngöne la drai i Iesu Joxu së.
15 Nge pine laka, xecie hnyawa lai koi ni, hnenge lo hna mekune troa wai nyipunie, matre nyixane la madrine* i nyipunie.
16 Ke hnenge lo hna mekune troa wai nyipunie ngöne lo trongeng a tro Makedonia, eni lo a pi tro qaa Makedonia me pane jea koi nyipunie. Nge thupene lai, tro huni lo a pane ce tro Iudra eë.
17 Ngo nyipici, ame lo eni a qaja lai koi nyipunie, tha eni kö lo a qaja göne hi matre ase pi. Nge hapeu, eni kö a ekö mekun thenge la ngönetrei matre e qaja jë ni ka hape, ö, tre, ö, nge waea, tre waea?
18 Nge pine laka, ka nyipici Akötresie, ka nyipici fe la itre trengewekë hun. Haawe, tha eahuni kö a pane ö, nge ase jë hi waea.
19 Nge ame Iesu Keriso Nekö i Akötresie, lo hne huni hna cainöjëne koi nyipunie, eni me Silevana* me Timoteo, tha hnei nyidrëti kö hna pane ö, nge ase jë, waea, ngo hnei nyidrëti hna ö hnyawa.
20 Matre nyimutre ju hë la itre ewekë hnei Akötresieti hna thingehnaean, ngo ö asë hë jëne Iesu. Celë hi kepin matre jëne la ëje i nyidrë, easë a “Amen” me atrunyi Akötresie.
21 Ngo ame la atre anyipicin koi ni me nyipunieti laka, itre atre i Keriso së, tre Akötresie atre ië së.
22 Nge hnei nyidrëti fe hna atihatre së, me hamëne la enyipicine la ewekë ka troa traqa,* ene la ua ngöne la isa hni së.
23 Ngo enehila, eni a hë Akötresie troa nyi atre anyipici ni,* laka, tha qaange pala kö thei nyipunie e Korinito, ke xele ni ma troa ahacene catrëne la itre hni i nyipunie.
24 Nge tha eahuni kö a musinëne la lapaune i nyipunie, ngo eahuni pe la itre sine huliwa i nyipunie matre madrine jë nyipunie, ke nyipunie a isa cile hut qa ngöne la isa lapaune i nyipunie.
Itre mekun ecahu fen
^ Maine, “thuecatren.”
^ Maine, “itupath.”
^ Maine, “pine la nöjei iqëmeke ka xëwe sai hun.”
^ Wange ju la HQP.
^ Maine jë, “hna atre hnyawa ha.”
^ Maine jë, “matre alua madrine jë nyipunie.”
^ Ketre aqane hë Sila.
^ Maine, “canga nyithupen.”
^ Maine, “u.” Ger., psy·kheʹ. Wange ju la HQP.
