2 Korinito 12:1-21
12 Tro pala kö ni a sipu selë ni. Tro ni a qaja la hna amamane koi ni hnei Joxu, me maca hnei nyidrëti hna hamë ni ngöne la hna meköle goeën, ngacama tha nyine loi kö koi ni.
2 Atre hi ni la ketre hlue i Keriso laka, 14 hë lao macatre enehila, hna xomi angeice kowe la hnaakönine hnengödrai, maine jë ngöne la ngönetrei maine waea, thatre kö ni ngo atre kö Akötresie.
3 Nyipici, atre hi ni la atre cili. Hna xomi angeic kowe la paradraiso, maine jë ngöne la ngönetrei maine waea, thatre kö ni ngo atre kö Akötresie.
4 Nge ngöne la paradraiso, hnei angeic hna drenge la itre trengewekë hna thatreine qaja, nge hmitrötr kowe la atr troa qaja.
5 Tro ni a selë ni göne la atre cili, tha göi ni kö, ngo ame pe, tro ni a selëne la itre ijine eni a kucakuca.
6 Nge maine ajange tro ni a selë ni, tha hmo kö ni, ke tro ni a qaja la nyipici. Ngo xele ni ma kuca lai, wanga sasaithi tulu pi la aqane tro ketre a wangatrune la hna öhne me dreng qaatheng,
7 pine hi laka, tru hnei ewekë hna amamane koi ni hnei Joxu.
Ngo matre tha tro kö ni a pi draië, hetre ka ithinyi ngöne la ngönetreing, ketre angela i Satana ka xe* ni lapa. Qa ngöne lai, tha pi draië kö ni.
8 Akönia sipone ielene ni koi Joxu troa xometrije qaatheng.
9 Ngo sa jë hi nyidrëti koi ni ka hape: “Ijije hi koi eö la ihnimi gufang, ke kola pexeje la meneng ngöne la kucakuca.” Haawe, eni a madrine troa selëne la itre ijine eni a kucakuca, matre tro la mene i Keriso a petrë ni tune la ketre itat.
10 Qa ngöne lai, eni a madrine e kola kucakuca, me iqaqa, me ijine pë, me iaxösisi me jol pi Keriso. Ke ame la eni a kucakuca, kolo hi lai a tru la trengecatreng.
11 Zö i nyipunie matre eni a ithanata tune la ketre hmo. Ngo maine hnei nyipunieti ju hna qaja aloinyi ni, tha tro jë kö ni lai a ithanata tun. Nge ngacama pëkö ni, ngo ame ngöne la nöjei götran, tha co kö ni hune la itre aposetolo i nyipunie ka tru talan.
12 Ke hnenge lo hna cile hut me amamane hnyawa koi nyipunie la enyipicine laka, aposetolo ni. Hnenge hna kuca la itre iamamanyikeu, me itre hatren, me itre ewekë nyine hain.
13 Ngo hnei nemene matre troa wangaconyi nyipunie hune la itre xa ekalesia? Hnene hi laka, tha hnenge kö hna nyi ehnefe i nyipunie. Ngo pine laka tha meköti kö lai, menu hë ni.
14 Hanawang! Akönia hnëkë hë ni troa traqa koi nyipunie, nge tha tro pi kö ni a nyi ehnefe i nyipunie. Ke tha eni kö a ajane la itre ewekë i nyipunie, ngo nyipunieti pe; ke tha qa i nekönatre kö troa xawa ewekë thatraqai keme me thin, ngo keme me thine pe thatraqane la kuku.
15 Ngo ame koi ni, tru catre la madrineng troa hamën asë koi nyipunie, me nue la trengecatreng me melenge thatraqai nyipunie.* Matre hapeu, tha meköti kö e tro nyipunieti a hnimi ni tune la aqane hnimi nyipunieti ni?
16 Nge ngacama tha eni kö a nyi ehnefe i nyipunie, ngo nyipunieti pe a qaja ka hape, hnenge hna “nyinyithiina” me xolouthi nyipunie hnene la “iaö.”
17 Nge hapeu, hnenge kö hna thele troa kepe mo jëne la itre atr hnenge hna upe koi nyipunie?
18 Hnenge hna sipone ielene koi Tito, me upe la itre trejin me angeic. Matre hapeu, hnei Tito kö hna thele mo thene la ala casi thei nyipunie? Nge hapeu, tha eahuni kö a tro thenge la ua ka cas? Me thupaca ka cas?
19 Nge hapeu, nyipunieti pala kö a mekune ka hape, eahuni a thele troa isigöli hun qëmeke i nyipunie? Eahuni a ithanata qëmeke i Akötresie ke itretre drei Keriso hun. Ngo ange hniminang, ame asë hi la nöjei ewekë hna kuca, tre nyine thuecatre i nyipunie.
20 Ngo eni pe a xou wanga, e traqa jë ni, isazikeu kö la aqane ujë i nyipunie memine la hnenge hna ajan, me aqane ujëng memine la hnei nyipunieti hna ajan. Nge tro ha hetre iwesitrë, me izalukeu, me elëhni, me icilekeu, me ixöjetrij, me iqej, me pi tru, me zikoziko.
21 Nge maine jë, ame la ijine tro hmaca ni a traqa koi nyipunie, tro la Akötresieting a thaipië ni qëmeke i nyipunie, nge tro ni a treije pine la ka ala nyimu itre ka kuca ha la ngazo, nge ka catre fë la aqane ujë i angatr, ke xele kö angatre ma ietra qa ngöne la aqane ujë ka sis, me kuci ngazo,* me itre huliwa nyine hmahman.*
Itre mekun ecahu fen
^ Maine, “lep.”
^ Maine, “u.” Ger., psy·kheʹ. Wange ju la HQP.
^ Ger., por·neiʹa. Wange ju la HQP.
^ Ger., a·selʹgei·a. Wange ju la HQP.
