2 Korinito 13:1-14
13 Akönia qaja ni ka hape, “qanyinge hë koi nyipunie.” “Tro ha eje la nöjei ewekë hnene la hna anyipicine* hnei ala lu, maine ala kön.”
2 Nge ngacama tha ce eni kö me nyipunie, ngo kösë eni hmaca ha thei nyipunie. Celë hi matre eni a canga hmekëne la itre ka kuca la ngazo, me nyipunieti asë laka, ame la eni a troa traqa, pëkö ca hnenge hna troa nue pe.
3 Qa ngöne lai, tro ni a amamane hnyawa ka hape, Keriso a ithanata jëne la qëng. Tha nyidrëti kö a ujë koi nyipunie tune la ka kucakuca, ngo cememine pe la men atraqatr.
4 Ke nyipici, hna jei faonyi nyidrë pine la itre ngazo, ngo ka mele nyidrë jëne la mene i Akötresie. Nge eje hi, easë a ce kucakuca me Keriso, ngo tro së elanyi a ce mele me nyidrë jëne la mene i Akötresie thatraqai nyipunie.
5 Haawe, the mano kö nyipunie isa tupathe ka hape, nyipunieti kö ngöne la lapaun. Nge catre jë isa waipengöi nyipunie. Hapeu, tha öhne kö nyipunieti ka hape ce Keriso me nyipunie? Maine jë, tha hna kepe nyipunieti kö.
6 Ngo tru catre fe la ajange tro nyipunieti a wangatrehmekune ka hape, hna kepe huni hnei Akötresie.
7 Enehila, eahuni a thithi sai nyipunie koi Akötresie, matre tha tro kö nyipunieti a kuca la ngazo, ngo tha göi tro kö a amamane ka hape, hna kepe hun, ngo matre tro nyipunieti a kuca la loi, ngacama tha kepe huni ju hë.
8 Ke thatreine kö huni icilekeu memine la nyipici, ngo casi hi, troa huliwa thatraqane la nyipici.
9 Nge madrine huni la eahuni a kucakuca, nge ka tru pena la trengecatre i nyipunie. Nge eahuni a thithi sai nyipunie, matre troa wenë ameköti nyipunie.
10 Celë hi matre eni a cinyihane la itre ewekë cili e patre kö ni, matre e traqa ha ni elany, tha tro kö a catre la aqane tro ni a huliwane la musing qaathei Joxu. Nge matre troa acatrene la lapaune i nyipunie, ngo tha tro kö a apatren.
11 Haawe ange trejin, the mano kö troa madrin, me wenë amekötine la itre mekuna i nyipunie, me iakeukawany, me ca mekun, me mele tingeting. Qa ngöne lai, tro hë la Akötresie ne ihnim me tingeting a ce me nyipunie.
12 Nge itö ibozu jë nyipunie, me itö idrem.
13 Ange ka hmitrötr asë a upe la ihnimi angatre koi nyipunie.
14 Nge epi tro nyipunieti asë a kapa la ihnimi gufa i Iesu Keriso Joxu, me ihnim i Akötresie, me manathith qaathene la uati hmitrötr.
Itre mekun ecahu fen
^ Ger., “që.”
