2 Korinito 2:1-17
2 Nge hane hi la hnenge hna mekun, tha tro hmaca kö ni a traqa koi nyipunie fë la hleuhleu.
2 Ke maine tro ni a ahleuhleunyi nyipunieti asë, nga drei pë hë la ka troa amadrinë ni? Kolo hmekuje hi lo itre hnenge hna ahleuhleun.
3 Haawe, hnenge hna cinyihane lai, matre e traqa jë ni, tha tro kö ni a ahleuhleune la itre ka troa amadrinë ni, ke ka xecie hnyawa koi ni ka hape, ame la ewekë ka troa amadrinë ni, celë fe hi ka troa thue madrine i nyipunie.
4 Eni hi la a cinyianyi koi nyipunie nyipine la iaxösisi, me hace hni, me treij, tha göi tro kö a ahleuhleunyi nyipunie, ngo matre öhne jë nyipunie la etrune la ihniminge koi nyipunie.
5 Nge maine hnei ketre hna ahleuhleunyi nyipunie, tha eni kö la hnei angeice hna ahleuhleun, ngo nyipunieti asë. Ngo ame pe, tha ajane kö ni troa hamëne la itre ithanata ka catr.
6 Ke ame kowe la atre cili, ijije hi la ihaji hna hamën hnene la ka ala nyim.
7 Haawe, nue hnyawane pi la ngazo i angeic, nge akeukawanyi angeice jë, ke wanga heti angeice jë hnei hleuhleu.
8 Qa ngöne lai, eni a sipone iele nyipunie troa amamane la ihnimi nyipunieti koi angeic.
9 Nge celë fe hi kepin matre eni a cinyianyi koi nyipunie: Matre atre jë ni ka hape, ka idrengethenge nyipunie ngöne la nöjei ewekë asë.
10 Haawe, ame la atr hnei nyipunie hna nue ngazon, ketre eni fe a hane nue la ngazo i angeic. Ngo maine nyipici laka, hnenge hë hna nue la ngazo i angeic (nue la nöjei ngazo) ngo qëmeke i Keriso, eni a tun, pi nyipunie.
11 Celë hi matre, tha tro kö a iaö* së hnei Satana, ke atre hë së la hnei angeice hna thel.*
12 Nge ame lo eni a traqa e Troas troa cainöjëne la maca ka loi göi Keriso, hna fe koi ni la ketre qëhnelö göi Joxu.
13 Nge eni a xou ke tha öhnyi Tito ju kö ni, trejine me eni. Matre eni a iahni jë me angatr me tro Makedonia.
14 Ngo oleti pe koi Akötresie, atre elemeke së ceitu me itre sooc ka hun ngöne la hna isi, nge ce easë me Keriso. Nge ame la atrehmekune qaathei Akötresie, tre tune la ka pui lolo, nge nyidrëti a nyi jëne la huliwa së, matre tro la itre atr a hane drenge la aqane pui lolon.
15 Matre ame easë, memine la maca göi Keriso, tre lue ewekë lai ka pui lolo koi Akötresie. Nge kolo fe a drenge lai hnene la itre ka troa mel, me itre ka troa mec.
16 Ame kowe la itre ka troa mec, tre punepune ne mec, ka itroxom kowe la mec. Nge ame kowe la itre ka troa mel, tre punepune ne mel, ka itroxom kowe la mel. Matre drei la ka ijije troa kuca lai?
17 Easë hi la itre ka ijij, ke tha easë kö a salemëne* la Trengewekë i Akötresie tune la aqane kuca ne la ka ala nyim, ngo easë pe a ithanata thenge la nyipici, tune la itretre drei Keriso. Nyipici, easë hi la itre hna upe hnei Akötresie, nge easë a kuca la huliwa cili qëmeke i nyidrë.
