2 Korinito 3:1-18
3 Hapeu, tro hmaca kö huni a qejepengöi huni koi nyipunie? Nge nyipiewekë kö tro huni a hetre tusi nyine qaja aloinyi hun tune la itre xa atr? Nge nyipiewekë kö tro nyipunieti a cinyihane lai göi hun? Pëkö.
2 Nyipunieti hi la tusi hun, hna cinyihan ngöne la itre hni hun, nge hna atrehmekun me e hnene la nöjei atr asë.
3 Ke mama hnyawa laka, nyipunie la itre tus i Keriso hne huni hna cinyihan ceitu me itre hlue i Akötresie. Tha hna cinyihane kö hnei timi ne cinyiany, ngo hnene la uati ne la Akötresie ka mel. Nge tha hune etë kö, ngo hune ijön, ene la hni.
4 Nge pi Keriso, ka mejiune hnyawa huni koi Akötresie.
5 Ngo tha kolo kö a hape, ka atreine hë hun, matre tro huni a mekune ka hape, qaathe huni la ketre ewekë, ngo Akötresieti pe la ka atreinë hun.
6 Nyidrëti la atre hnëkë huni troa itretre huliwa thatraqane la isisinyikeu ka hnyipixe, ngo tha göne kö la wathebo hna cinyihan, ngo göi uati pe. Ke ame la wathebo hna cinyihan, ej a itroxom kowe la mec, ngo ame kö la ua, ej a itroxom kowe la mel.
7 Nge ame la Wathebo ka itroxom kowe la mec nge hna cinyihan hune etë, hnene eje hna mama cememine la lolo atraqatr, matre goi thatreine fe la itre nekö i Isaraela goeëne la iqëmeke i Mose, pine la ehudrumene la iqëmeke i angeic. Ngo lolo lai ka troa patr.
8 Matre hnauëne hö laka, tha tro kö a sisitria la lolo qaathene la wathebo ne la ua?
9 Ke maine hetre lolo ne la wathebo ka itroxom kowe la mec, nga the qaja pala ha la lolo ne la wathebo ne la meköt!
10 Eje hi, tro ha pë pengöne la lolo ne la Wathebo hune la lolo ne la isisinyikeu ka hnyipixe.
11 Haawe, maine hna hamë lolo kowe la ewekë ka troa patr, nga the qaja pala ha la lolo ne la ka troa cile hut.
12 Nge pine laka, ka xecie hnyawa lai koi hun, eahuni a catre cainöj,
13 ngo tha eahuni kö a tui Mose, lo angeic a juetrëne la iqëmeke i angeic hnei sine imaano, matre tha tro kö la itre nekö i Isaraela a goeëne hutine la pune la ewekë ka troa patr.
14 Ngo meci hë la itre mekuna i angatr, nge uti hë enehila, celë pala kö lo lai sine imaano la kola e la isisinyikeu hnapan, ke Keriso hmekuje hi la ka atrein xometrij.
15 Eje hi, uti pala hi enehila, ame la kola e la trenge wathebo i Mose, hetre sine imaano hune la itre hni angatr.
16 Ngo e tro ketre a thele Iehova,* tro hë lai a patre la sine imaano cili.
17 Iehova* la ketre U, nge ame la itretre kapa la uati i Iehova,* itre hna nuamacane lai.
18 Nge ame easë, itre hna hule hë qaathene la sine imaano, easë a tune la ithulu ka amamane la lolo i Iehova.* Hne së hna saze matre troa tui Akötresie, me amacane trongëne la aqane tro sa amamane la lolo i Iehova,* thenge la aja ne la Ua i nyidrë.*
Itre mekun ecahu fen
^ Wange ju la HQP.
^ Wange ju la HQP.
^ Wange ju la HQP.
^ Wange ju la HQP.
^ Wange ju la HQP.
^ Maine jë, “jëne la uati Iehova.”
