2 Korinito 4:1-18
4 Haawe, pine laka hna utipi së me hamë së la huliwa celë, the cile kö së!
2 Nge hne huni hna nuetrije la itre ewekë hna kuca juetrën, itre ewekë nyine hmahman, nge tha eahuni hmaca kö a tro ngöne la iaö, me nyinyiköne la trengewekë i Akötresie. Ngo ame la eahuni a qaja amamane la nyipici qëmeke i Akötresie, eahuni fe a amamai tulu ka loi koi nöjei atr.*
3 Nge maine hna juetrëne la maca ka loi hne huni hna cainöjën, hna juetrëne kowe la itre ka troa mec,
4 itre atre lai ka tha lapaune nge hna atimekën hnene la haze ne la fene celë,* matre tha tro kö a mama la ehudrumen,* me elolone la maca ka loi göi Keriso, hnaiji Akötresie.
5 Ke tha eahuni kö a cainöjë hun, ngo eahuni pe a cainöjëne ka hape, Joxu hë Iesu Keriso, nge eahuni la itre hlue i nyipunie pi Keriso.
6 Akötresieti casi hi la ka qaja ka hape: “Lai pi nyipine la jidr.” Nge nyidrëti a alaine la itre hni së hnene la elolone la atrehmekune i nyidrë, jëne la iqëmeke i Keriso.
7 Ngo the huni la trengamo celë hnine la itre trengen hna xupe hnei dro, celë hi matre, tro la men atraqatr a xulu qaathei Akötresie, ngo tha qaathe huni kö.
8 Kola pepetrenyi hun, ngo enije pala kö hun; eahuni a luelu, ngo tha thingi* jë huni fe;
9 kola axösisi hun, ngo tha hna nuaxöji huni kö; eahuni a kei, ngo tha patre kö hun.
10 Ame ngöne la nöjei jë hun, eahuni a qëmeke kowe la mec tui Iesu, matre mama jë kowe la itre atr ka hape, eahuni a akötr tune la aqane akötre Iesu.
11 Matre eahuni a mel ngo eahuni pala hi a qëmeke kowe la mec, ke eahuni a xötrethenge Iesu, celë hi matre mama jë kowe la itre atr ka hape, eahuni a akötr tune la aqane akötre Iesu.
12 Haawe, ngacama eahuni a qëmeke kowe la mec, ngo mele la thangan koi nyipunie.
13 Nge the së la lapaune ka cas, lo hna cinyihane ka hape: “Eni a lapaun, ene pe, ithanata pi hi ni”; haawe pine laka, easë a lapaun, easë fe hë a ithanata,
14 ke atre hi së laka, ame la atre amele Iesu hmaca, tro fe nyidrëti a amele së tune lo aqane amele Iesu. Nge tro Akötresieti a tro sai së koi nyidrë [ene, Iesu].
15 Ke itre ewekë lai hna hnëkën pi nyipunie, matre tro la ihnimi gufa i Akötresie a tru catre hmaca kö; nge tro ha tru catr, qa ngöne la hna thithi ole hnene la itre atr.
16 Celë hi matre tha cile kö së. Ke ngacama kola hnyiqetre la ngönetrei së, ngo o drai, kolo pala hi a ahnyipixene la itre hni së me mekuna së.
17 Nge maine tha cile palua kö la itupath* nge ka hmaloi hi, ngo qa ngöne lai, easë a kapa la lolo atraqatr* nge ka pë pun;
18 matre tha easë kö a goeëne hutine la ewekë ka mama, ngo ene pe la ka tha mama kö. Ke ka canga patre hi la itre ewekë ka mama, ngo ka epine palua la itre ewekë ka tha mama kö.
Itre mekun ecahu fen
^ Ger., “mekuthetheu.”
^ Maine, “hneijine celë.” Wange ju la HQP.
^ Maine, “lai.”
^ Maine jë, “tha kucakuca kö hun.”
^ Maine, “akötr.”
^ Ger., “ka hace.”
