2 Korinito 5:1-21
5 Nge atre hë huni laka, maine troa patr* la uma ne fen, ene la itate celë, ngo loi e tro huni a hetre uma hna xup qaathei Akötresie, ketre uma tha hna xupe kö hnei wanakoim, nge ka cil epine palua e hnengödrai.
2 Ke ngöne la uma* ne fene celë, eahuni a awe, me lapa treqene troa kapa la ketre uma hna hnëkën thatraqai hun e hnengödrai, kösë iheetr.
3 Matre e heetrëne hë hun, tha tro kö a öhnyi huni a cile xöe.
4 Nyipici, eahuni itre ka lapa ngöne la itate celë a awe, ngo tha hnene kö laka, eahuni a pi unatrij ej, ngo aja huni troa hetrëne la ketre, matre ulume pi la ka mec hnene la mel.
5 Nge enehila, Akötresie la atre hnëkë huni kowe lai. Nge nyidrëti a hamëne la ua i nyidrë, hatren ka anyipicine la ewekë ka troa traqa.*
6 Celë hi matre ka catre pala hi së, ke atre hi së laka, e easë pala kö ngöne la ngönetrei, nanyi pala kö së qaathei Joxu.
7 Ke easë a tro thenge la lapaun, ngo tha thenge kö la hna goeën.
8 Ngo ka catre pala hi së, ke pi tro sa trotrije la ngönetrei matre lapa pi së me Joxu.
9 Qa ngöne lai, ce easë ju hë me nyidrë maine iananyi pala kö së, ngo easë pe a isine matre troa kepe së hnei nyidrë.
10 Ke tro asë hi së a isa cile* qëmekene la ita ne iameköti i Keriso, matre tro sa isa kepe thangane la hne së hna kuca ngöne la ngönetrei, ka loi ju hë maine ka ngazo.
11 Nge pine laka, atre hë huni la aliene la troa xoue Joxu, eahuni a catre ahmalane la hni ne la itre atr, nge Akötresieti a atrepengö* huni hnyawa. Ngo ajange fe tro la itre mekuthetheu* i nyipunie a xatua nyipunie troa atrehmekune la pengö hun.
12 Ngo tha eahuni hmaca kö a qejepengö huni koi nyipunie, ngo eahuni pe a aijijë nyipunie troa selë nyipunieti pi hun, matre atreine jë nyipunieti sa kowe la itre ka pi mama, ngo tha mama fë kö la ka ej e kuhu hni.
13 Ke e kuca ha huni la ketre ewekë hna jele hmon, thatraqai Akötresieti lai. Ngo e tro huni a kuca inamacanën, thatraqai nyipunieti lai.
14 Nge kola upi huni hnene la ihnimi Keriso, ke hne huni hna mekune ka hape: hna meci la ketre atr pine la nöjei atr, ngacama ka meci asë hë angatr.
15 Matre hnei nyidrëti hna mec koi angatr asë, nge pine lai, thatreine hmaca kö la itre ka mel troa mele göi angatre kö, ngo thatraqai nyidrëti pe, atre meci pi angatr nge hna amelene hmaca.
16 Matre qaane enehila, the tro hmaca kö së a qeje ketre, hnene hi la hne së hna goeën. Nge maine hne së lo hna waipengöi Keriso tune lai, the tune hmaca kö.
17 Nge maine tro ketre a casi me Keriso, ketre atr hna xup ahnyipixen angeic; patre hë lo itre ewekë hnapan, ke hanawang, mele hë la itre ewekë ka hnyipixe.
18 Ngo qaathei Akötresie la nöjei ewekë asë, atre ialoinekeu së me nyidrë jëne Keriso, me atre hamë së la huliwa ne iloi,
19 ene laka, jëne Keriso, nyidrë a ialoinekeu nyidrë memine la fen, matre tha hna e kö la itre ngazo ne la fen. Nge easë la itre hna ahnithe kow troa tro fë la maca ne iloi.
20 Qa ngöne lai, eahuni la itre qeneqaja ka nyihna i Keriso, kösë Akötresie a ihë jëne eahun. Nge pine laka, eahuni la ka nyihna i Keriso, eahuni a ielene la itre atr me hape: “Iloi jë me Akötresie.”
21 Nge tha hnei Keriso kö hna hane kuca la ngazo, ngo hnei Akötresieti pe hna hamë Keriso nyine huuj thatraqane la itre ngazo së, matre jëne nyidrë, ijije tro sa meköt qëmeke i Akötresie.
Itre mekun ecahu fen
^ Maine, “hnyiqetr.”
^ Maine, “götran.”
^ Maine, “mani hna canga hamën hnei maseta.”
^ Maine, “cil amamany.”
^ Maine, “mama.”
^ Wange ju la HQP.
