2 Korinito 6:1-18
6 Nge pine laka easë a ce huliwa me nyidrë, eahuni a iele nyipunie wanga kapa jë nyipunie la ihnimi gufa i Akötresie, me tha nyipiewekën.
2 Ke öni nyidrëti lo: “Ngöne la ijine ka loi, hnenge hna drei eö, nge ngöne la drai ne iamele, hnenge hna xatua eö.” Hanawang! Enehila hi la ketre ijine ka nyipi lolo. Hanawang! Enehila fe la drai ne iamele.
3 Nge tha hne huni kö hna akeinyi ketre, matre thatreine kö troa qajangazone la huliwa hun;
4 ngo ngöne la nöjei ewekë, hne huni hna amamane laka, itre ka huliwa i Akötresieti hun. Hne huni hna cile huti ngöne la nöjei itupath, me iaxösisi, me ijine pë, me jol,
5 me ithaucë, me kalabus, me ijine kola ce uti koi hun hnene la ka ala nyim, me huliwa catr, me tha meköl e jidr, me pë xen;
6 me thiina ka wië, me atrehmekun, me xomihni, me loi hni, me uati hmitrötr, me ihnimi nyipici,
7 me trenge nyipici, me mene i Akötresie. Nge eahuni a cila xome ngöne la ime maca* me ime mi* la itre jia ne isine la meköt.
8 Nge kola qaja atrunyi hun me thaipië hun, nge kolo fe a qaja aloinyi hun me jelengazo hun. Nge itre atr a goeë hun kösë itre ka iaö, ngo ka nyipici pe,
9 nge kösë itre trenyiwa, ngo hna wangatrehmekune pe, kösë itre ka mec,* ngo hanawang! itre ka mele pe, nge kösë itre hna hajin, ngo tha hna nue kö troa mec,
10 nge kösë itre ka hleuhleu, ngo ka madrine pala hi, nge kösë ka pë mani, ngo ka atrenamon, nge kösë ka pë ewekë, ngo ka hetrenyi asë.
11 Haawe angetre Korinito, hne huni hna fe la që huni troa ithanata* koi nyipunie, me fe hnyawa la itre hni hun.
12 Tha ka co kö nyipunie ngöne la itre hni hun, ngo nyipunieti pe a thinge la itre hni nyipunieti koi hun.
13 Matre eni a ithanata koi nyipunie ceitu me itre neköng, kuca jë koi hun tune la aqane ujë huni koi nyipunie, fe hnyawane pi la itre hni nyipunie.
14 Nge the isilekeu* nyipunieti kö me itre ka tha lapaun, ke tha ihmeku kö. Troa ce tro tune kaa la ka meköt me ka tha meköti kö? Nge nemene la ka ceitu ngöne la lai me jidr?
15 Ketre tun, tro Keriso a casi tune kaa me Belial?* Nge nemene la nyine ce thawa hnene la ka lapaun* me ka tha lapaune kö?
16 Nge troa nyi göhnene tune kaa la itre idrola hnine la uma ne hmi i Akötresie? Ke easë hi la uma ne hmi ne la Akötresie ka mel; tune lo hnei nyidrëti hna qaja ka hape: “Tro ni a lapa nyipi angatr, me tro nyipi angatr, nge tro hë ni a Akötresi angatr, nge tro angatr a nöjeng.”
17 “Qa ngöne lai, trotriji angatre pi, nge iananyi pi” öni Iehova,* “nge the ketr hmaca kö la ewekë ka sis, nge tro hë ni a kepe nyipunie.”
18 “ ‘Nge tro hë ni a Keme i nyipunie, nge tro hë nyipunieti a itre neköng, trahmanyi me jajiny,’ öni Iehova* ka Tru Trenge Men.”
Itre mekun ecahu fen
^ Maine jë, “nyine hna.”
^ Maine jë, “nyine petr.”
^ Maine, “hna amekötine troa mec.”
^ Maine, “qaja asë.”
^ Maine, “ce hnöth.”
^ Qa ngöne la qene Heberu, kola hape, “Pëkö Eloin.” Kola qeje Satana.
^ Maine, “ka mele nyipici.”
^ Wange ju la HQP.
^ Wange ju la HQP.
