2 Korinito 7:1-16
7 Pine laka, hetrenyi hë së ange hnimina la hna thingehnaeane celë, loi e tro sa ahmitrötrë së qa ngöne la itre ewekë ka adrone la ngönetrei së, me mekuna së, matre wië hnyawa pi së, itretre xoue Akötresie.
2 Haawe, nyi göhne i huni jë hnine la itre hni nyipunie, ke tha hne huni kö hna ngazo koi ketre, maine akeinyi ketre, maine qenatrekënö ketre.
3 Ngo tha eni kö a nyizö nyipunie, ke ase hë ni lo qaja ka hape, hetre göhne i nyipunie ngöne la itre hni hun, matre ce meci së, nge ce mele së.
4 Nge tha xounge kö troa ithanata koi nyipunie. Nge eni a madrine pi nyipunie, nge tiqa ha ni hnene la iakeukawany, nge madrine atraqatre ni ngöne la nöjei itupathi hun.
5 Ame lo eahuni a traqa e Makedonia, tha mano kö la itre ngönetrei* hun, nge kolo pala hi a traqa la nöjei pengön akötr. Hetre itre isi e tröne la ekalesia, me xou e hnin.
6 Ngo hnei Akötresie, atre akeukawane la ka kucakuca, hna akeukawanyi hun jëne Tito.
7 Ngo tha hnene hmekuje kö laka, ce angeice me eahun, ngo hnene fe la keukawa hnei angeic hna kapa qaathei nyipunie. Ke hnei angeic hna thuemacanyi huni la aja i nyipunie troa wai ni, me akötre i nyipunie, me aqane meku* ni hnei nyipunie, nge celë hi ka akökötrene la trenge madrineng.
8 Nge ngacama hnenge ju hë hna ahleuhleunyi nyipunie hnene lo tusing, ngo tha hacehnine kö ni. Nge maine hnenge ju hë hna pane hace pine lai (ke öhne hi ni laka, hna pane ahleuhleunyi nyipunie hnene lai tus),
9 ngo enehila, ka madrine ni, ngo tha pine kö la hleuhleu i nyipunie, ngo pine la hnei nyipunie hna hleuhleu matre ietra. Ke nyipunieti a hleuhleu thenge la aja i Akötresie, nge celë hi ka xatua nyipunie. Qa ngöne lai, tha hna akeinyi nyipunieti kö hnene la itre trengewekë hun.
10 Ke ame la hleuhleu qaathei Akötresie, kola aciane la ietra me itroxome kowe la mel, matre tha ewekë kö nyine troa hace fë. Ngo ame la akötre qaathei fen, tre meci la pun.
11 Nge goeëne thei nyipunie la thangane la hleuhleu qaathei Akötresie, nyipici, nyipunieti a akötrehnine troa ahmitrötrë nyipunie, nyipici, nyipunieti a hace fë la hna kuca, nyipici, nyipunieti a xou, nyipici, atraqatre la aja i nyipunie troa ietra, nyipici, nyipunieti a isine troa wenëameköti nyipunie, nge nyipici, nyipunieti a isine troa pë gelen.* Nge ngöne la nöjei götran, hnei nyipunieti hna amamane hnyawa ka hape, ka wië nyipunie göne la itre ewekë celë.
12 Nge tha eni kö a cinyiany koi nyipunie pine la atre kuca la ngazo, maine thatraqane la hna akötrën, ngo matre mama pi qëmeke i Akötresie la trenge aja i nyipunie troa drei hun.
13 Nge celë hi ka akeukawanyi hun.
Nge maine nyipici laka, hna akeukawanyi hun, ngo tru catre hmaca kö la madrine hun pine la trenge madrine i Tito, ke hnei nyipunieti asë hna thuecatre i angeic.
14 Nge maine nyipici laka, hnenge hna nango selë ni pi nyipunie koi angeic, ngo tha hmahma pi kö ni; ke hne huni hna qaja la itre ewekë cili thenge la nyipici, matre ame la itre ewekë hne huni hna selëne qëmeke i Tito, tre hna jelenyipicin.
15 Nge atraqatre hmaca kö la ihnim me utipin i angeic koi nyipunie, la angeic a mekune hmaca lo aqane idrengethenge i nyipunieti asë, memine la aqane metrötrë angeic hnyawa hnei nyipunie, lo nyipunieti a kepe angeic.
16 Qa ngöne lai, eni a madrine laka, ijije tro ni a mejiune* koi nyipunie göne la nöjei ewekë asë.
Itre mekun ecahu fen
^ Ger., “ijön.”
^ Ger., “catr.”
^ Maine, “wië, hmitrötr.”
^ Maine jë, “Tro hë ni a nyipi catre pi nyipunie.”
