2 Korinito 8:1-24
8 Nge enehila ange trejin, eahuni a thuemacanyi nyipunie, la aqane huliwa la ihnimi gufa i Akötresie ngöne la nöjei ekalesia e Makedonia.
2 Ke nyipine la itupathe ka tru, me akötr, hna mama cile* la madrine i angatr, memine la etrune la aqane hame i angatr, qa ngöne la pë i angatr.
3 Ke hna kuca lai thenge la hnei angatre hna hetreny, ngo eni a qaja hnyawa, goi sasaithe fe la hnei angatr hna hetreny.
4 Nge angatre kö la ka iele huni troa sine la hnëqa ka tru celë, ene la troa hamëne qa kuhu hni thatraqane la ange ka hmitrötr.
5 Nge tha mekune fe kö huni tro angatr a ujë tun, ke nyipici, thenge lo aja i Akötresie, hnei angatre hna nue xanë angatre kö troa eatrën qa kuhu hni la huliwa i Joxu, me xatua hun.
6 Nge celë hi ka upi huni troa thuecatre i Tito ka hape, pine laka, angeice lo ka nyiqaane la huliwa cili thei nyipunie, haawe, loi e tro kö angeic a umuthe thei nyipunie la huliwa ne hle hna ithingë.
7 Nge pine laka, mana ha la nöjei ewekë thei nyipunie, tune la lapaun, me trengewekë, me atrehmekun, me trenge aja, me ihnim hne huni hna amamane koi nyipunie, haawe, epi tro hmaca kö nyipunie a mana ngöne la huliwa ne hame celë.
8 Ngo tha eni kö a musinë nyipunie, ngo eni pe a pi qaja koi nyipunie la aqane huliwa catr, me trenge aja ne la itre xan. Nge pi tro fe ni a hane öhne la etrune la aqane hame i nyipunie.
9 Ke atre hë nyipunie la ihnimi gufa i Iesu Keriso Joxu laka, ngacama ka hetrenyi asë nyidrëti lo, ngo hnei nyidrëti hna pë ewekë pi nyipunie, matre tro hë nyipunie a trenamo qa ngöne la pë i nyidrë.
10 Nge eni a qaja la mekunang: Huliwa lai nyine loi koi nyipunie, ke ame lo macatre hnapan, nyipunie lo ka nyiqaane la huliwa cili, ngo tha göi mekune hi, ngo göi kuca fe.
11 Haawe enehila, apexejene jë lo hna nyiqaan, matre umuthe pi lo huliwa hnei nyipunieti hna canga mekun, thenge la hna hetreny.
12 Nge maine nyipici laka, hna canga ajan, ngo tro ha kapa hnyawa e hna hamën thenge la hna hetreny, ngo tha thenge kö la pë.
13 Ke tha ajane kö ni troa hmaloi koi itre xan, nge hace pë hë koi nyipunie.
14 Ngo göne hi matre tro ha ceitu asë. Ke tro la munëne i nyipunieti enehila a apexejene la ka pë thei angatr. Matre tro fe la itre munën i angatr a hane apexejen la ka pë thei nyipunie. Celë hi matre tro ha ceitu asë,
15 tune lo hna cinyihane ka hape: “Tha tro kö la itre ka hetreny a hetrenyi atruny, nge tha tro kö la itre ka pë a pë hnyawa.”
16 Nge oleti koi Akötresie, ke hnei nyidrëti hna amë hnine la hni i Tito la trenge aja cili göi nyipunie.
17 Ke hnei angeice hna kapa la ithuecatre hun, me sipu ajane troa tro koi nyipunie.
18 Nge eahuni fe a ce upe me angeic la trejin hna qaja aloin ngöne la nöjei ekalesia pine la maca ka loi.
19 Ngo tha göne hmekuje kö lai, ngo hna acili angeice fe hnene la itre ekalesia troa nyi sinatronge hun, göi troa thupëne la huliwa ka hmitrötr ne hleme la hna ithingë. Huliwa lai ka atrunyi Joxu, me amamane la trenge aja huni troa xatua itre xan.
20 Nge eahuni hi a thupën wanga qeje huni jë pine la huliwa hna ahnithe koi hun, ene la troa hleme la trenge hna ithingë.
21 Ke eahuni a thupëne hnyawa troa huliwa meköt, ngo tha qëmeke i Iehova* casi kö, ngo qëmekene fe la itre atr.
22 Nge eahuni a ce upe me angatr la trejine me eahun, ke anyimua amamane angeice la trenge aja i angeic, ngo enehila, tru catre hmaca kö la trenge aja i angeic, ke angeic a mejiune koi nyipunie.
23 Nge, e traqa jë hnying göi Tito, angeice la sineeng* me sine huliwang thatraqai nyipunie. Nge e traqa jë fe hnying göne la itre trejine me eahun, itre aposetolo angatr hnine la itre ekalesia, nge itre ka atrunyi Keriso.
24 Haawe, amamane jë koi angatre la enyipicine la ihnimi i nyipunie, me itre hne huni hna selëne göi nyipunie qëmekene la itre ekalesia.
