2 Korinito 9:1-15
9 Nge ame göi huliwa thatraqane la ange ka hmitrötr, tha nyipiewekë kö tro ni a cinyiany koi nyipunie,
2 ke atre hë ni la trenge aja i nyipunie, lo hnenge hna selëne koi angetre Makedonia; hnenge hna qaja koi angatre ka hape, ca macatre ne nyipunieti hë e Akaia a treqene troa hamë ixatua. Qa ngöne lai, cia jë fe hi la trenge aja ne la ka ala nyimu thei angatr troa hane ixatua.
3 Ngo eni pe a upe la itre trejin, matre tha tro kö a gufa la hne huni hna selën göi nyipunie ka hape, ka hnëkë hë nyipunie, tune lo hnenge hna qaja.
4 Ke maine tro la angetre Makedonia a ce traqa me eni, me öhne laka, tha ka hnëkë kö nyipunie, tro huni lai a hmahma pine laka, triane kö lo hne huni hna mejiune göi nyipunie, nge tro mina fe nyipunieti a hmahma.
5 Qa ngöne lai, eni a canga upe la itre trejine koi nyipunie troa canga hnëkëne la itre hnei nyipunieti hna mekune troa ithingën, wanga mekune jë ka hape, hna musinën, ngo hna isa hamëne pe qa kuhu hni.
6 Ngo eje hi laka, ame la atre tran acon, tro kö a menuën acon, ngo ame la atre tran atrun, tro ha menuën atrun.
7 Ngo loi e troa isa hamën thenge la hna isa axeciën qa kuhu hni, ngo tha loi kö e hna musinën,* maine troa hacen e thupen. Ke Akötresieti a hnime la itre ka hamëne madrin.
8 Nge atreine Akötresieti kuca matre mana pi thei nyipunieti la ihnimi gufa i nyidrë, matre tro pala hi nyipunieti a hetrenyi la ka nyipiewekë koi nyipunie, nge matre tro fe a hetrenyi la ka nyipiewekë thatraqane la huliwa ka loi.
9 (Tune lo hna cinyihane ka hape: “Hnei nyidrëti hna thawa atrun,* me hamën kowe la itre ka pë ewekë, nge ka tha tro kö a hane patre la meköti nyidrë.”
10 Nge ame la atre hamë feja atruny kowe la itre ka jumi feja, me falawa kowe la itre ka xen, tro kö nyidrëti lai a hamë feja koi nyipunie, me hamën atrune hmaca kö. Haawe, tro nyipunieti a jumi feja, nge tro hë nyidrëti a kuca matre menuëne atrune pi nyipunie la itre wene ne la meköt.)
11 Ngöne la nöjei ewekë, kola atrenamo nyipunie hnene la nöjei pengöne aqane ham, nge ame la thangan, itre atr a olene koi Akötresie.
12 Ke ame la kepine la huliwa cili, tre tha nyine tro hmekuje kö a xatuane la itre ka hmitrötr, ngo matre tro fe a tru hnei atr ka olen koi Akötresie.
13 Nge e tro nyipunieti a hamëne la ahnahna cili, tro hë nyipunieti a amamane la pengöi nyipunie. Nge tro la itre atr a atrunyi Akötresie, ke nyipunieti a ujë thenge la maca ka loi hnei nyipunie hna tro fë göi Keriso, me hamëne koi angatr, me nöjei atr asë.
14 Ketre, tro fe hë angatre lai a hnimi nyipunie, me xëwe sai nyipunie koi Akötresie pine la ihnimi gufa i nyidrë ka eje thei nyipunie.
15 Haawe, ole koi Akötresie pine la ahnahna ka ketrepengön hna hamëne gufan.
