2 Thesalonika 1:1-12
1 Eahun, Paulo, me Silevana,* me Timoteo kowe la ekalesia ne Thesalonika, ka casi me Akötresie Keme së, me Iesu Keriso Joxu së:
2 Epi tro nyipunieti a kapa la ihnimi gufa me tingeting qaathei Akötresie la Kem, me Iesu Keriso Joxu.
3 Qa huni troa olene pala hi koi Akötresie pi nyipunie itre trejin. Nge aqane kö, ke kolo pala hi a kökötre la lapaune i nyipunie, me ihnimikeu i nyipunie.
4 Matre ame la thangan, eahuni a selë nyipunie nyipine la itre ekalesia i Akötresie, hnene la aqane cile huti nyipunie, me lapaune i nyipunie ngöne la itre iaxösisi me itre jol.*
5 Celë hi hatrene la emekötine la aqane iameköti i Akötresie, nge kolo lai a aijijë nyipunie troa sine la Baselaia i Akötresie, lo hnei nyipunieti hna akötre pin.
6 Haawe, meköti koi Akötresie tro nyidrëti a të kowe la itre ka axösisi nyipunie.
7 Nge ame nyipunie itre hna axösisin, tro ha ce aupunyi nyipunie me eahun, ngöne la ijine tro Iesu Joxu a mama qaa hnengödrai, me itre angela ka mene i nyidrë.
8 Nge ngöne la ijine cili, tro nyidrëti a uti fë la eë atraqatr matre të koi itre ka thatre Akötresie, me itre ka xele ma drengethenge la maca ka loi göne la Joxu së Iesu.
9 Tro hë la Joxu a ameköti angatr. Nge ame la pun hna troa athipe koi angatr, tre tro ha apatrene paluan, matre tha tro hmaca kö nyidrëti a thupë angatr, maine xatua angatr hnene la men atraqatr i nyidrë.
10 Nge e traqa ha la Joxu me itre jin ka hmitrötr i nyidrë troa kapa la iatruny, tro asë hi la itre ka lapaune koi nyidrë a hai nyidrë. Nge pine laka, nyipunie a mejiune kowe lo itre ini hne huni hna hamën, tro fe hë nyipunie a casi me itretre lapaun.
11 Celë hi matre eahuni pala hi a thithi sai nyipunie, matre tro la Akötresi së a amekötine ka hape, ijiji nyipunieti hi troa kapa la ihë i nyidrë. Nge jëne la mene i nyidrë, tro nyidrëti a hamën apexejene la nöjei lolo thenge la aja i nyidrë, me thenge la itre huliwa ne lapaune i nyipunie.
12 Tro ha traqa tun, matre atrune la ëje i Iesu Joxu pi nyipunie, me atrunyi nyipunie pine la hna casi me nyidrë, thenge la ihnimi gufa ne la Akötresi së, me Iesu Keriso Joxu së.
