2 Thesalonika 2:1-17
2 Ange trejin, ame göne la ijine celë hë la Joxu së Iesu Keriso, me ijine troa acasi së me nyidrë, eahuni a sipo nyipunie,
2 the tro kö a canga amenu nyipunie e qaja jë ketre ka hape, enehila la drai Iehova.* Nge the hnehengazo menu kö pine angatre qaja ka hape, qaathei Akötresie la maca cili, maine pena, hna e lai ngöne la tusi hun.
3 The nue ketre kö troa amenu* nyipunie, ke tha tro kö a traqa la drai cili, nge tha hna pane traqa kö la iamenumenu, nge tro la atr ne la ngazo a mama, ene la nekö ne la hnëjin.
4 Angeic a icilekeu me sipu selë angeic hune la itre hna hëne ka hape, akötresie, me hune la itre hna thili kow, matre angeic a lapa ngöne la uma ne hmi i Akötresie, me nyi akötresie qëmekene la ka ala nyim.
5 Hapeu, mekune pala hi nyipunie lo ce easë, lo eni a lapa qaja lai koi nyipunie?
6 Enehila, atre hë nyipunie la ka sewe angeic, nge tro kö a traqa la ijine tro angeic a mama.
7 Nyipici, kola ha nyiqaane huliwa juetrë la emene ne la atre ne la ngazo, nge tro pala kö angeic a huliwa juetrë uti hë la ijine patre hë la atre sewe angeic.
8 Ngo tro la atre ne la ngazo a mama, lo hna troa apatren hnei Iesu Joxu jëne la emene ne la itre trengewekë* i nyidrë, tro ha apatrenyi angeic ngöne la ijine troa mama cile ka hape, celë hë Iesu Joxu.
9 Ngo tro la atre ne la ngazo a mama jëne la mene i Satana, tro angeic a kuca la itre iamamanyikeu, me itre hatrene ka iaö, me itre ewekë nyine hain,
10 me nöjei ewekë ka tha meköti kö, nge ka ahleuhleune la itre atr. Itre ewekë lai ka amenune la itre atr me troxomi angatre kowe la mec, nge pune hi lai koi angatr, pine angatre xelen me tha nyipiewekëne la nyipici matre mel.
11 Celë hi kepin matre Akötresieti a nue troa amenu angatr hnene la itre ini thoi, matre tro angatr a mejiune kowe la thoi.
12 Qa ngöne lai, tro ha ameköti angatr, ke tha hnei angatre kö hna mejiune kowe la nyipici, ngo hna madrine fë la ka tha meköti kö.
13 Ngo hnëqa huni troa olene pala hi koi Akötresie pi nyipunie, itre trejin hna hnime hnei Iehova,* ke hnei Akötresie hna ië nyipunie ekö ngöne la qaan kowe la iamele, jëne la hna ahmitrötrë nyipunie hnene la uati hmitrötr, me lapaune i nyipunie kowe la nyipici.
14 Hnei nyidrëti hna hë nyipunieti kowe lai, jëne la maca ka loi hne huni hna cainöjën, matre ijiji nyipunie troa kapa la lolo ne la Joxu së Iesu Keriso.
15 Haawe ange trejin, cile huti ju nge qale catre jë kowe lo itre ewekë hne huni hna sipu ini nyipunie, maine hna qaja jëne tus.
16 Nge epi tro la Joxu së Iesu Keriso me Akötresie Keme së, atre hnimi së me akeukawanyi së epine palua, me atre hamë mejiune koi së hnene la ihnimi gufa,
17 a akeukawane la isa hni i nyipunie, me aegöcatrenyi nyipunie matre tro pala hi nyipunieti a qaja me kuca la loi.
Itre mekun ecahu fen
^ Wange ju la HQP.
^ Maine, “iaö.”
^ Ger., “hnene la u ne la që i nyidrë.”
^ Wange ju la HQP.
