2 Thesalonika 3:1-18
3 Haawe ange trejin, the mano kö thithi sai hun, matre troa nyimenyime tro fë la trengewekë i Iehova,* nge matre troa atrun ej, tune la hna kuca thei nyipunie.
2 Nge matre troa thepe hun qa ngöne la akötr me itre atre ka ngazo, ke tha ewekë i nöjei atr asë kö la lapaun.
3 Ngo pine laka, ka mele nyipici Joxu, tro kö nyidrëti a aegöcatrenyi nyipunie, me thupë nyipunie qa ngöne la atre ka ngazo.
4 Ketre, eahuni a mejiune koi Joxu göi nyipunie laka, nyipunie a trongëne la itre hne huni hna amekötin, nge tro pala kö nyipunie a trongën.
5 Haawe, epi tro pala hi la Joxu a troxome la itre hni i nyipunie, matre tro nyipunie a hnimi Akötresie, me cile hut pi Keriso.
6 Enehila ange trejin, ngöne la ëjene la Joxu së Iesu Keriso, eahuni a ameköti* ewekë thatraqai nyipunie,* ene la troa iananyi memine la itre trejine ka tha idrei, me ka xele ma trongëne la hne huni hna amekötin.
7 Nge atre hnyawa hi nyipunie la aqane troa nyitipu hun, ke tha hne huni kö hna huliwa menu nyipi nyipunie,
8 nge goi tha sipo* xeni fe hun, ngo hne huni pe hna huliwa catr e lai me jidr matre tha tro kö a nyi ehnefe i ketre.
9 Nyipici, ijiji hi tro huni a sipo ixatua koi nyipunie, ngo aja huni pe troa amamai tulu koi nyipunie.
10 Nge ame lo ce eahuni pala kö me nyipunie, hne huni hna majemine qaja koi nyipunie ka hape: “Maine ketre a xele ma huliwa, tha tro kö angeic a xen.”
11 Ke drenge hë huni ka hape, hetre ka huliwa menu thei nyipunie, xele kö angatre ma huliwa ngo angatre pe a lö hnine menune la ifekë jolen.
12 Matre ame kowe la itre atre cili, eahuni a qaja hnyawa koi angatr göi Iesu Keriso Joxu ka hape, tha tro hmaca kö angatr a nyi jë ne gejë,* ngo tro pe a huliwa, me xeni qa ngöne la sipu wene zihnu i angatr.
13 Nge ame nyipunie itre trejin, the cile kö troa kuca la loi.
14 Ngo maine xele kö ketre ma drenge la hne huni hna qaja hnine la tusi celë, nyi hatre i angeice ju, nge the ce tro hmaca kö me angeic, matre hmahma pi angeic.
15 Ngo the goeë angeice kö kösë ithupëjia, ngo tro pe a catre eamo angeic ke ketre trejine hi lai.
16 Enehila, epi tro pala hi la Joxu ne tingeting a hamë tingetinge koi nyipunie ngöne la nöjei ewekë asë.
17 Eni Paulo a sipu cinyihane koi nyipunie la ibozung, nge hnenge pala hi hna kuca tun ngöne la nöjei tusing, matre xecie hnyawa koi nyipunie ka hape, eni la ka cinyiany.
18 Haawe epi tro la ihnimi gufa ne la Joxu së Iesu Keriso a eje thei nyipunieti asë.
Itre mekun ecahu fen
^ Wange ju la HQP.
^ Maine, “ini.”
^ Maine jë, “angatr.”
^ Maine, “tha tro kö a nyithupen.”
^ Maine, “huliwa menu.”
