Galatia 1:1-24
1 Eni Paulo, hna acil troa aposetolo tha hnei atre kö, ngo hnei Iesu Keriso me Akötresie Keme së, atre amele Iesu qa hna mec,
2 eni me itre trejin ka ce me eni, koi nyipunie ekalesia ne Galatia:
3 Epi eje thei nyipunie la ihnimi gufa me tingetinge qaathei Akötresie Keme së, me Iesu Keriso Joxu së.
4 Hnei Iesu hna hamëne la mele i nyidrë thatraqa së, matre thepe së qa ngöne la fene celë* ka ngazo, thenge lo aja i Akötresie me Keme së,
5 lo nyine troa atrun epin epine palua. Amen.
6 Eni a haine la aqane sasaqe trije* nyipunie lo Atre hë nyipunie, jëne la ihnimi gufa i Keriso, me epe pena ha kowe la ketre pengöne maca ka loi.
7 Ngo pëkö xa maca ka loi; hetre itre maca ka amenu nyipunie, me thele troa saze la maca ka loi göi Keriso.
8 Haawe, maine tro hun, maine ketre angela qaa hnengödrai a tro fë koi nyipunie la ketre maca ka loi, nge tha ka ihmeku kö memine lo maca ka loi hne huni hna tro fë, hnëjine hë angeic.
9 Eahuni hmaca a amexeje lo hna qaja ha, ame la atre tro fë la ketre maca ka loi nge tha ka ihmeku kö memine lo maca hnei nyipunieti hna kapa ha, hnëjine hë angeic.
10 Nge hapeu, eni kö a thele troa kepe ni hnei atr maine Akötresie? Eni kö a thele troa amadrinë atr? Maine eni pala kö a thele troa amadrinë atr, tha hlue i Keriso kö ni.
11 Ngo ajange tro nyipunieti a atre ange trejin laka, ame lo maca ka loi hnenge hna cainöjën, tre tha qaathei atre kö;
12 ke nyipici, tha kapa kö ni qaathei atr, nge pëkö atre ka ini ni, ngo Iesu Keriso pe, atre mama koi ni.
13 Nyipici, drenge hë nyipunie lo aqane catre fë* ni la hmi angetre Iudra, memine la ecatrene la aqane axösisine me akötrëne ni la ekalesia i Akötresie.
14 Nge ka mama kö ni hune la itre sine xötrenge qa Iudra ngöne la hmi angetre Iudra. Nge ketre, eni hi lo ka catre isigöline la qenenöj ne lo itre qaaqaang.
15 Ngo ame la Akötresie, atre ije ni memine la trengene hnaho i nenë, hnei nyidrëti hna hë ni pine la ihnimi gufa i nyidrë, me mekune ka hape, loi
16 e troa qaja la Nekö i nyidrë jëne ni. Qa ngöne lai, hnenge hna cainöjëne la maca ka loi göi Iesu Keriso ngöne la itre nöj, nge tha sipo eamo kö ni koi ketre;*
17 nge goi tha elë fe ni a tro Ierusalema kowe la itre ka pane kapa la hnëqa ne aposetolo, ngo hnenge pe hna tro Arabia, nge thupene lai, bëeke hmaca pi ni a tro Damaseko.
18 Nge thupene la köni macatre, hnenge hna tro Ierusalema troa pane wai Kefa,* me lapa thei angeic koi 15 lao drai.
19 Nge pëkö xa aposetolo hnenge hna öhn, ngo Iakobo hi, jini i Joxu.
20 Nge thenge la itre ewekë hnenge hna cinyihane koi nyipunie, eni a qaja hnyawa koi nyipunie, nge qëmeke i Akötresie laka, tha eni kö a thoi.
21 Thupene lai, hnenge hnatro kowe la itre nöj e Suria me Kilikia.
22 Matre trenyiwa ni kowe la ekalesia ne Iudra, ketre ekalesia i Keriso.
23 Ngo hnei angatre lo hna majemine drenge ka hape: “Ame lo atre ka thele troa apatrene lo hmi së, me majemine axösisi së, angeice fe hë a hane cainöjëne la maca ka loi.”
24 Ame hnei angatre hna atrunyi Akötresie pi ni.
Itre mekun ecahu fen
^ Maine, “hneijine ka ngazo.” Wange ju la HQP.
^ Maine, “aqane sasaqe nyipunieti fejetrij.”
^ Ger., “ase hë ni sasaithi tulu.”
^ Ger., “ijöne me madra.”
^ Ketre aqane hë Peteru.
